Read bahnar Both 24 Bible Online

Both 24 - bahnar bible

Both 24

¹Tơdah đei minh 'nu bơngai drŏ-nglo iŏk akăn, mă-lei bơngai drŏ-nglo noh ưh kơ lăp đon, yua kơ đơ̆ng sư 'bôh bơngai drŏ-kăn noh đei tơdrong kơnê̆, na sư gơh chih minh hlak hla bơar hrĕch, ăn tơ tơpang ti drŏ-kăn, puh tơbrŏk lê̆ sư đơ̆ng hnam sư, na sư weh lĕch đơ̆ng hnam sư,

²Đơ̆ng rŏng kơ sư lĕch đơ̆ng hnam, klo so sư, oei kơ klo nai dơ̆ng,

³tơdah bơngai klo mă 'bar kuă dơ̆ng kơ sư, chih minh hlak hla bơar hrĕch ăn tơ tơpang ti sư păng puh tơbrŏk sư đơ̆ng hnam, dah bơngai klo mă 'bar âu lôch.

⁴Lei bơngai klo mă adrol hlôi puh tơbrŏk sư boih, ưh kơ gơh iŏk sư pơm akăn dơ̆ng, yua kơ sư 'mê̆-'mach boih. Noh jơ̆ minh tơdrong pơm krưp dêh 'bơ̆t anăp Kră Yang; iĕm 'nĕ kơ chĕp ba yoch tơ dêh mă Kră Yang 'Bok Kei-Dei iĕm ăn kơ iĕm teh bơ̆jang sa.

⁵Minh 'nu bơngai drŏ-nglo 'nao iŏk akăn, huay pă năm tơblah păng kư̆m huay kơ năm bơ̆jang; bơngai noh gơh oei jang sa lăm hnam sư kơtĕch minh sơnăm, hiôk chơt hăm akăn sư.

⁶'Nĕ kơ chĕp pơkơ̆ng tơpăl tơmo păng hơnơ̆l kơpơ̆ng dah ala pơm tơmam pơdơ̆ng pơkă; yua kơ noh thoi chĕp pơkơ̆ng tơdrong arih sa bơngai nai.

⁷Tơdah đei bơngai bu rôp tơtông iŏk lu 'nhŏng oh iĕm bơngai Isơrael păng rôp pơm đĭch, dah rôp tĕch, lei bơngai tơtông noh athei pơlôch. Lu iĕm athei hơpuih pơgoh lê̆ tơdrong kơnê̆ đơ̆ng lăm lu iĕm.

⁸Lăm tơdrong jĭ chin kren, athei kơchăng pơm kiơ̆ mă tơpă dôm tơdrong mă 'bok soi bơtho adrĕch Lêwi pơkă boih lu iĕm athei kơchăng pơm kiơ̆ thoi inh đei bơtho pơkă boih hăm 'bok soi.

⁹Iĕm athei 'blŏk kơ tơdrong Kră Yang 'Bok Kei-Dei iĕm, pơm boih kơ Miriam rok trong, kơplah lu iĕm lĕch đơ̆ng dêh Êyiptơ.

¹⁰Mưh iĕm asong ăn kơ rông 'bôt iĕm tŏk iŏk mă tơmam kiơ, iĕm 'nĕ kơ mơ̆t lăm hnam iŏk tơmam wă pơkơ̆ng.

¹¹Iĕm athei dơ̆ng tơ 'nguaih, lê̆ bơngai noh chĕp ba tơmam pơkơ̆ng noh.

¹²Dah bơngai noh dơnuh hin, 'nĕ kơ wei tơmam pơkơ̆ng noh truh kơmăng wă tep,

¹³tơdah pơkơ̆ng ao tai athei pơdrâu ăn kơ bơngai noh adrol kơ măt 'năr mơ̆t, wă kơ sư tep đei ao sư hrŭk tep, lei na sư bơnê kơ iĕm, jô̆ iĕm bơngai 'lơ̆ng tơpăt 'bơ̆t anăp Kră Yang 'Bok Kei-Dei iĕm.

¹⁴Iĕm 'nĕ kơ pơm kơ lu bơngai dơnuh păng bơngai hoh kơ đei, mă khan 'nhŏng oh iĕm bơngai Isơrael dah bơngai tơmoi chă oei lăm pơlei iĕm.

¹⁵Iĕm athei apah ăn kơ bơngai noh lăm năr sư jang hloi adrol kơ 'năr mơ̆t; yua kơ bơngai dơnuh noh sư chang kơ tơmam apah noh, kơnh hli kơ bơngai noh krao ôr truh tơ Kră Yang na lu iĕm gô pŭ yoch.

¹⁶'Nĕ kơ pơlôch 'bă yua kơ đơ̆ng tơdrong yoch kon, kư̆m 'nĕ kơ pơlôch lu kon yua kơ đơ̆ng tơdrong yoch 'bă, bơngai bu pơm yoch na pơlôch bơngai noh.

¹⁷'Nĕ kơ pơm ưh kơ tơpăt hơnơ̆ng kơ lu bơngai tơmoi dah lu bơngai mơti; kư̆m 'nĕ kơ iŏk ao tai lu yă adro pơm tơmam pơkơ̆ng.

¹⁸Athei 'blŏk kơ lu iĕm đêl hlôi pơm đĭch tơ dêh Êyiptơ păng Kră Yang 'Bok Kei-Dei iĕm dŏng pơklaih iĕm lĕch đơ̆ng anih noh. Noh na inh bơtho pơkă tơtă ăn kơ lu iĕm.

¹⁹Kơplah iĕm yuă 'ba tơ mir chŭn, na hiơt minh hơchô̆ 'ba oei tơ noh, 'nĕ pă năm wơ̆t iŏk dơ̆ng hơchô̆ 'ba noh lê̆ kơ lu bơngai tơmoi, lu bơngai mơti păng lu yă adro, wă kơ Kră Yang 'Bok Kei-Dei iĕm ăn pŭn hiôk kơ iĕm lăm dôm tơdrong jang đơ̆ng iĕm pơm.

²⁰Kơplah iĕm preh plei 'long ôliwơ, 'nĕ kơ preh 'bar wơ̆t hơlơ̆k, noh lê̆ kơ lu bơngai tơmoi, lu bơngai mơti păng lu yă adro.

²¹Kơplah iĕm phĕ plei hơmu, 'nĕ kơ chă phĕ hơlơ̆k dơ̆ng lu plei oei đei, noh lê̆ kơ lu bơngai tơmoi, lu bơngai mơti păng lu yă adro.

²²Iĕm athei 'blŏk kơ iĕm kư̆m đêl pơm đĭch lăm dêh Êyiptơ; yua kơ thoi ei na inh bơtho pơkă tơtă kơ iĕm.