Read bahnar Both 25 Bible Online

Both 25 - bahnar bible

Both 25

¹Tơdah đei tơdrong pơjah băl, 'bar pah athei năm apinh truh tơ anih sek tơlang, lu kră sek tơlang, sek tơpăt kơ bơngai 'lơ̆ng tơpăt păng sek phak lu bơngai mă đei yoch noh.

²Dah bơngai pơm yoch trŏ kơ teh tôn, kră sek tơlang athei bơngai noh 'bĭch kơmŭ brum tơ teh, teh tôn bơngai noh 'bơ̆t anăp sư hơdôm wơ̆t kiơ̆ kơ tơdrong yoch bơngai noh pơm;

³mă loi 'nĕ kơ tôn teh truh tơ puăn-jĭt wơ̆t, dah teh hloh kơ noh, mă khan trŏ kơ teh hloh kơ noh, kơnh pơm kơ sư mơlâu dơ̆ng 'bơ̆t anăp iĕm khan kơ ih pơm pơgră hnang.

⁴'Nĕ kơ trôp 'bơ̆r rơmo kơplah oei juă hơnong 'ba.

⁵Tơdah 'nhŏng oh pôm mĕ 'bă oei hơdai, đei minh 'nu lôch tam mă đei kon, na akăn bơngai mă lôch noh 'nĕ kơ iŏk klo bơngai nai; 'nhŏng oh gah klo sư athei năm truh tơ sư, iŏk sư pơm akăn, đơ̆ng noh pơm kiơ̆ dôm tơdrong juăt 'nhŏng oh klo sư păng duch adro.

⁶Kon kơdră drŏ-nglo mă đei tơpŭ noh athei krao anăn bơngai lôch noh, wă kơ anăn bơngai lôch noh huay kơ hiong đơ̆ng adrĕch Isơrael.

⁷Mă-lei, tơdah 'nhŏng oh bơngai 'noh ưh kơ lăp đon iŏk duch adro noh, sư athei năm tơ 'măng jang, na roi: Lu 'nhŏng oh klo inh ưh kơ wă pơtrơp adrĕch 'nhŏng lu sư lăm adrĕch Isơrael; păng ưh kơ wă iŏk oei kơ inh pơm kiơ̆ tơdrong juăt 'nhŏng oh klo.

⁸Lu kră pơlei ei gô krao bơngai noh păng pơma dơnuh kơ sư hăm bơngai noh; tơdah bơngai noh oei pơma khan: Inh ưh kơ wă iŏk sư pơm akăn.

⁹Thoi noh drŏ-kăn adro, mi dah oh sư 'noh năm jê̆, 'bơ̆t anăp lu kră, plôh lê̆ chơkhŏ wăn đơ̆ng jơ̆ng bơngai drŏ-nglo noh, gơsoh đak hai tơ muh măt, đơ̆ng noh pơma 'bơ̆r re khan: Bơngai bu ưh kơ wă pơdơ̆ng dơ̆ng đơ̆ng hnam dơnŏ 'nhŏng oh sư kơdih gô pơm ăn thoi noh!

¹⁰Đơ̆ng noh lăm bơngai Isơrael gô krao kơ hnam dơnŏ bơngai noh hnam dơnŏ bơngai đe plôh lê̆ chơkhŏ wăn.

¹¹Kơplah 'bar 'nu bơngai drŏ-nglo tơteh băl, tơdah akăn minh 'nu lăm 'bar 'nu noh truh wă dŏng klo sư, na ti sư rôp 'bơm 'bơ̆t anih hlơp bơngai ei.

¹²Na iĕm ih athei chơ̆ng lê̆ ti bơngai drŏ-kăn noh; 'nĕ mơnat kơ sư.

¹³Lăm 'bi ih 'nĕ kơ đei 'bar tŏ plei 'long kŏng, minh pah trăp trŏ, minh pah phiơl hơlĕch ĕnh.

¹⁴Lăm hnam lu iĕm 'nĕ kơ đei 'bar tŏ 'long kŏng minh hơlĕnh minh tơpăt.

¹⁵Iĕm athei đei 'long kŏng trŏ păng tơpăt, wă kơ lu iĕm gơh arih sot soi jơnoi đunh tơ kơpal teh lăm dêh char Kră Yang 'Bok Kei-Dei iĕm ăn kơ iĕm.

¹⁶Yua kơ Kră Yang 'Bok Kei-Dei iĕm areh krưp dêh kơ bơngai bu pơm dôm tơdrong ưh kơ trŏ 'nâu.

¹⁷Ih athei 'blŏk dôm tơdrong bơngai Amalek pơm ăn kơ lu iĕm tơ rok trong, kơplah lu iĕm lĕch đơ̆ng dêh Êyiptơ;

¹⁸Lu sư ưh kơ băt hli yom kơ Kră Yang 'Bok Kei-Dei, na druh blah pơlôch đĭ lu bơngai yak đơ̆ng rŏng, kơplah iĕm rok trong, 'bơ̆t lu iĕm oei lap gleh rơmơ̆n rơmok.

¹⁹Layơ Kră Yang 'Bok Kei-Dei lu iĕm ăn tơdrong hiôk hơđơ̆ng pơdơh đơ̆ng lu bơngai dăr wang tăp dăr kơ iĕm lăm dêh mă Kră Yang 'Bok Kei-Dei iĕm ăn kơ lu iĕm iŏk bơ̆jang sa, asong băl athei sŭt lê̆ tơdrong 'blŏk đơ̆ng Amalek đơ̆ng ala teh âu, 'nĕ kơ hiơt hŏ.