Read bahnar Both 26 Bible Online

Both 26 - bahnar bible

Both 26

¹Mưh lu iĕm mơ̆t lăm dêh char mă Kră Yang 'Bok Kei-Dei iĕm ăn kơ lu iĕm bơ̆jang sa, gơh iŏk asong păng oei tơ noh boih,

²iĕm athei iŏk minh lăm mơjĭt đơ̆ng dôm plei blŭng-a mă đơ̆ng teh, lăm dêh mă Kră Yang 'Bok Kei-Dei iĕm ăn kơ lu iĕm, tah lăm minh pôm bai, năm ba tơ anih Kră Yang 'Bok Kei-Dei iĕm gô rơih, wă kơ 'măn anăn Sư tơ noh.

³Lu iĕm athei năm tơ 'bok soi mă oei bơ̆jang kơplah noh, na khan kơ sư: Năr 'nâu, inh năm 'bơ̆t anăp Kră Yang 'Bok Kei-Dei ih, wă khan kơ sư: Inh băt kơnăl kơ inh mơ̆t boih lăm dêh mă Kră Yang pơkă hăm 'bok yă wă ăn kơ lu bơ̆n.

⁴Na, 'bok soi gô iŏk bai đơ̆ng ti lu iĕm, dan 'bơ̆t anăp chơnang soi Kră Yang 'Bok Kei-Dei iĕm.

⁵Đơ̆ng noh, lu iĕm roi 'bơ̆t anăp Kră Yang 'Bok Kei-Dei lu iĕm: 'Bă inh bơngai Aram thông mang, kơplah năm jur tơ dêh Êyiptơ oei tơ noh tŏ sĕt bơngai đĕch, mă-lei dang ei jing minh adrĕch adrung tih, pran păng lơ kơdrâ̆m.

⁶Bơngai Êyiptơ pơm kơnê̆ kơ lu nhôn, rôp lu nhôn pơm đĭch bơ̆jang gleh hrat, lu sư pơmat lu nhôn dêh tơpă.

⁷Kơplah noh, lu nhôn krao apinh Kră Yang 'Bok Kei-Dei 'bok yă lu nhôn, Kră Yang kơtơ̆ng păng 'bôh tơdrong pơmat lu nhôn păng tơdrong đe pơjuă pơđep lu nhôn.

⁸Kră Yang yua tơpang ti mơsêh pran kơtang, Kră Yang pơm mơsêh tih krưp hlĭch chrơp na chông lu nhôn lĕch đơ̆ng dêh Êyiptơ.

⁹Chông ba lu nhôn truh tơ âu, ăn kơ lu nhôn dêh char 'nâu, dêh char đak toh păng đak sut.

¹⁰Ơ Kră Yang! Dang ei inh chĕp pơyơ̆r dôm lu plei blŭng-a đơ̆ng teh mă Ih ăn kơ inh. Lê̆ plei 'long tơ noh 'bơ̆t anăp Kră Yang 'Bok Kei-Dei iĕm păng drap bon kơkuh Sư.

¹¹Đơ̆ng noh iĕm, bơngai Lêwi păng lu bơngai tơmoi mă oei hơdai hăm lu iĕm, hăm hnam dơnŏ lu iĕm gô chơt hiôk gah tơdrong pŭn hiôk mă đơ̆ng Kră Yang 'Bok Kei-Dei iĕm ăn boih kơ lu iĕm.

¹²Kư̆ rim pêng sơnăm jơ̆ sơnăm pơyơ̆r minh lăm mơjĭt lu iĕm 'măn lê̆ pha dôm tơmam iĕm roi, na athei asong ăn kơ bơngai Lêwi, kơ bơngai tơmoi, bơngai mơti păng ăn kơ yă adro, wă kơ lu sư đei tơmam sa phĭ mah.

¹³Đơ̆ng noh iĕm năm roi 'bơ̆t anăp Kră Yang 'Bok Kei-Dei iĕm: Inh iŏk tơmam 'lơ̆ng rơgoh đơ̆ng hnam inh, na asong ăn kơ lu bơngai Lêwi, bơngai tơmoi, bơngai mơti păng yă adro, pơm kiơ̆ dôm tơdrong Kră Yang tơtă; inh ưh kơ pơm glăi kư̆m ưh kơ hiơt nơ̆r tơtă ayơ đơ̆ng ih athei.

¹⁴Lăm năr ơh kơ bơngai lôch, inh ưh kơ sa tơmam 'lơ̆ng rơgoh 'nâu; kơplah 'mê̆-'mach inh kư̆m ưh kơ hơtŭt 'bơm păng kư̆m ưh kơ yua tơmam âu yua kơ bơngai lôch; inh chu kiơ̆ nơ̆r Kră Yang 'Bok Kei-Dei inh păng pơm kiơ̆ dôm tơdrong Ih hlôi pơkă khan kơ inh.

¹⁵Apơi kơ Kră Yang đơ̆ng anih 'lơ̆ng rơgoh Ih tơ kơpal plĕnh ti, nger lăng păng ăn tơdrong pŭn hiôk kơ lu bơngai Isơrael, Ih hăm teh đak mă Ih ăn boih kơ lu nhôn kư̆m thoi đei pơkă boih hăm 'bok yă lu nhôn sơ̆, wă khan dêh thoi đak toh thoi đak sut 'nâu.

¹⁶Năr 'nâu, Kră Yang 'Bok Kei-Dei iĕm athei pơkă khan kơ iĕm pơm kiơ̆ dôm lu khôi juăt păng nơ̆r tơtă 'nâu, iĕm athei kơchăng wei răk hăm đĭ jơhngơ̆m klơm klak,

¹⁷Năr 'nâu iĕm pơkă drơ̆ng iŏk Kră Yang pơm 'Bok Kei-Dei iĕm, yak năm kiơ̆ trong Sư, wei răk khôi juăt Sư, nơ̆r tơtă păng nơ̆r đơ̆ng Sư athei, kư̆m chu kiơ̆ nơ̆r sư khan.

¹⁸Năr 'nâu Kră Yang kư̆m pơkă drơ̆ng iŏk iĕm pơm kon pơlei pơla Sư, jing tơmam gĭt Sư thoi Sư đei pơkă hăm iĕm păng iĕm athei wei răk đĭ dôm lu nơ̆r Sư tơtă.

¹⁹Sư kư̆m khan ăn kơ iĕm tơdrong ư-ang păng tơdrong pơyom hloh kơ đĭ-đăng adrĕch adrung mă Sư đei pơjing păng iĕm jing minh adrĕch 'lơ̆ng rơgoh ăn kơ Kră Yang 'Bok Kei-Dei iĕm, kư̆m thoi Sư đei khan boih.