Read bahnar Both 28 Bible Online

Both 28 - bahnar bible

Both 28

¹Tơdah iĕm mơ̆ng kiơ̆ nơ̆r Kră Yang 'Bok Kei-Dei iĕm mă kơjăp, pơ'lơ̆ng pơm kiơ̆ dôm nơ̆r Sư tơtă, mă inh bơtho khan kơ iĕm năr 'nâu, na Kră Yang 'Bok Kei-Dei iĕm gô pôk hơtŏk iĕm hloh kơ adrĕch nai mă oei tơ kơpal teh âu.

²Tơdah iĕm mơ̆ng pơm kiơ̆ nơ̆r Kră Yang 'Bok Kei-Dei iĕm, dôm tơdrong pŭn hiôk gô jur tơ iĕm đei hloi.

³Kră Yang gô ăn kơ iĕm pŭn hiôk tơ jơ̆p-jang anih, tơ lăm pơlei dah tơ mir chŭn.

⁴Kră Yang gô ăn pŭn hiôk kơ lu kon sâu iĕm, hơnik anăn lơlang, sem dơrong rơmo triu bơbe chek lar.a

⁵Kră Yang gô ăn pŭn hiôk kơ iĕm, plei 'long gô 'bĕnh kơ bai păng tơpŭng bơlah 'bĕnh kơthŭng.

⁶Kră Yang gô ăn kơ lu iĕm đei pŭn hiôk lăm tôm tơdrong, kơplah iĕm mơ̆t dah lĕch.

⁷Kră Yang gô ăn kơ lu iĕm iung blah hăm bơngai ayăt jei iĕm, lu sư yak minh trong năm blah iĕm, mă-lei gô kơdâu ôn lĕch yak tơpơh trong kơdâu ôn 'bơ̆t anăp lu iĕm.

⁸Kră Yang gô pơm ăn kơ iĕm pŭn hiôk, tơ lăm pơk 'ba păng tơ lăm lu tơdrong jang iĕm pơm; Sư gô ăn pŭn hiôk kơ iĕm lăm dêh char mă Kră Yang 'Bok Kei-Dei wă ăn.

⁹Tơdah iĕm wei răk dôm nơ̆r tơtă Kră Yang 'Bok Kei-Dei iĕm păng yak năm kiơ̆ trong Sư, na Kră Yang gô ăn kơ iĕm jing minh adrĕch adrung 'lơ̆ng rơgoh ăn kơ Sư kư̆m thoi Sư pơkă boih kơ iĕm.

¹⁰Lu kon bơngai kơpal teh gô 'bôh anăn Kră Yang păng lu sư gô hli kơ iĕm.

¹¹Kră Yang iĕm gô ăn kơ iĕm đei mŭk tơmam rơkah rơkai, tơ lăm dêh mă Kră Yang hlôi pơkă boih hăm lu 'bok iĕm wă ăn kơ iĕm ăn kơ lu kon sâu iĕm hrôh lơlang lơlap, sem dơrong chek lar păng hơnik nơnăm đơ̆ng teh pơgar iĕm gô đei thim rai lơ.

¹²Kră Yang gô pơih anih 'mong tơmam gĭt đơ̆ng plĕnh, ăn đak 'mi jur tơ teh trŏ bơyan păng ăn pŭn hiôk dôm tơdrong jang đơ̆ng tơpang ti iĕm pơm. Iĕm gô ăn kơ lơ teh đak tŏk iŏk, mă-lei gah iĕm ưh kơ đei tŏk iŏk đơ̆ng bơngai bu.

¹³Kră Yang gô pôk iĕm jing kơ̆l ưh kơ trŏ kiĕng ôh, tơdah iĕm chu mơ̆ng kiơ̆ dôm nơ̆r tơtă đơ̆ng Kră Yang 'Bok Kei-Dei mă năr 'nâu inh bơtho khan ăn kơ iĕm, iĕm gô oei adrol tơ kơpal ling-lang, ưh kơ trŏ tuch-luch dah oei tơ kơđeh.

¹⁴'Nĕ kơ weh achăng hŭt lê̆ nơ̆r tơtă inh bơtho khan năr 'nâu, 'nĕ kơ weh tơ 'ma dah tơ 'ngiĕo 'nĕ kơ năm bơ̆jang kiơ̆ lu yang nai.

¹⁵Mă-lei tơdah iĕm ưh kơ chu mơ̆ng kiơ̆ nơ̆r Kră Yang 'Bok Kei-Dei iĕm, ưh kơ pơ'lơ̆ng pơm kiơ̆ dôm nơ̆r tơtă păng khôi juăt đơ̆ng Sư mă inh bơtho khan ăn kơ iĕm năr 'nâu, na 'nâu boih dôm tơdrong hiap pơtê̆ gô truh kơ iĕm, đei hloi:

¹⁶Đe gô hiap pơtê̆ iĕm mă oei lăm pơlei dah tơ mir chŭn.

¹⁷Bai păng kơthŭng jrâu tơpŭng iĕm hoh-hoy kơ đei yua kơ đơ̆ng hiap pơtê̆.

¹⁸Đe gô hiap iĕm ưh kơ đei kon hơ'lơ̆p lăm chŭn mir iĕm ưh kơ đei hơnik hơnam rơmo triu bơbe iĕm ưh kơ tuh kon.

¹⁹Đe gô hiap pơtê̆ iĕm lăm tôm tơdrong kơplah iĕm lĕch kơplah iĕm mơ̆t

²⁰Kră Yang gô pơm kơ iĕm tơ'bơ̆p tơdrong hiap pơtê̆, đei tơdrong răm truh, kơ̆l jrok 'ngok răm ơh blĕk lăm tơdrong jang dĭng iĕm lôch răm đĭ dah iĕm pơm yoch achăng lê̆ Kră Yang.

²¹Kră Yang gô ăn jĭ hơbuh druh kiơ̆ iĕm dĭng Sư pơrăm iĕm lôch hiong đĭ đơ̆ng teh mă iĕm gô mơ̆t iŏk.

²²Kră Yang gô pơrăm iĕm hăm tơdrong jĭ dơsoh hiĕn-hiok, bơlŏ chĕp tơngiĕt, rơka rơkĕch, jĭ bơôr, tŏ, phang-ang, 'long pơlei 'nhĕt 'nhot kro đĭ phơ̆k phok dôm tơdrong noh druh kiơ̆ iĕm dĭng truh tơ iĕm lôch hiong đĭ.

²³Lu plĕnh tơ kơpal kơ̆l nhen thoi kong, na teh tơ ala jơ̆ng nhen thoi bơsei.

²⁴Tơplih kơ đak 'mi, Kră Yang ăn 'mi lăm char jing 'mui chuơh đơ̆ng kơpal plĕnh jruh tơ teh đak dĭng truh pơrăm đĭ lu iĕm lôch.

²⁵Kră Yang gô ăn lu bơngai ayăt blah pơrăm iĕm jei lu sư; lu iĕm gô năm blah sư minh trong, lĕch kơdâu ôn kơ lu sư tơpơh trong; lu adrĕch adrung kơpal teh 'bôh iĕm gô hli tơrơ.

²⁶Akâu lôch lu iĕm gô pơm tơmam sa ăn kơ lu sem păr kơpal plĕnh păng ăn kơ lu sem bri lăm teh sa, ưh kơ đei bơngai bu pơpuh lê̆ lu sư weh.

²⁷Kră Yang gô ăn kơ iĕm jĭ pơtôch đuh đơ̆ng dêh Êyiptơ, pơ'ngeh đek, rơka tơlŏng, đơđik, lu iĕm hơmet ưh kơ klaih.

²⁸Kră Yang gô ăn kơ iĕm jing wơnh, măt tol, hiong tơdrong tơchĕng rŭng răng.

²⁹Kơplah 'năr dơ̆ng iĕm nơnăm chă hơbơ̆ nhen thoi bơngai măt tol yak lăm măng mu; iĕm bơ̆jang sa ưh kơ pŭn. Rim năr đe gô pơjuă pơđep păng tơgar iŏk, ưh kơ đei bơngai bu dŏng iĕm.

³⁰Minh 'nu lăm lu iĕm hơkơ̆t boih hăm minh 'nu bơngai adruh, mă-lei đei bơngai drŏ-nglo nai oei kơ sư. Iĕm pơm hnam, mă-lei ưh kơ đei oei; iĕm pơtăm minh hlak pơgar hơmu, mă-lei ưh kơ đei phĕ sa plei sư.

³¹Rơmo iĕm đe gô pơlôch 'bơ̆t anăp iĕm; mă-lei iĕm ưh kơ đei sa 'nhĕm sư; aseh iĕ iĕm đe gô rôp tơgar đơ̆ng iĕm, mă-lei ưh kơ đei layơ pơdrâu kơ iĕm dơ̆ng: Triu bơbe đei gô iŏk ăn kơ lu bơngai ayăt, mă-lei ưh kơ đei bu rôp pơdrâu.

³²Lu kon drŏ-nglo păng kon drŏ-kăn iĕm đe gô rôp jao ăn kơ lu bơngai tơmoi măt iĕm lăng chang gô năr âu truh tơ năr nai, mă-lei lu iĕm tôch kơ đon ưh pă băt wă pơm kiơ.

³³Minh adrĕch adrung mă iĕm tam lah băt gô iŏk sa tơmam đơ̆ng mir chŭn păng đơ̆ng tơdrong jang iĕm gleh hrat; đe gô pơjuă pơđep păng pơjuă bơhlơ̆r iĕm ling-lang rim năr.

³⁴Na iĕm jing wơnh yua kơ đêl tơm măt iĕm oei 'bôh.

³⁵Kră Yang gô ăn kơ iĕm jĭ pơtôch đuh tơ kŭl-tăng păng tơ 'bar pah jơ̆ng jĭ dêh, hơmet ưh kơ gơh klaih, lanh rai să đơ̆ng kơnơl jơ̆ng truh tơ kơpal kơ̆l.

³⁶Kră Yang gô puh iĕm păng pơtao mă iĕm rơih pôk kơdih, truh tơ minh adrĕch adrung mă iĕm hăm 'bok iĕm tam lah băt. Tơ noh iĕm gô kơkuh kơ lu yang nai, pơm păng 'long dah păng tơmo.

³⁷Lăm lu adrĕch adrung mă Kră Yang puh iĕm truh tơ yơ, đĭ-đăng kon pơlei tơ noh hli tơrơ, 'bôh tơdrong pơmat-tat lu iĕm. Lu iĕm jing bơngai pơm kơ đe pơjăm hiĕk ăr.

³⁸Lu iĕm gô rei adrĕch lơ tơ lăm mir chŭn, mă-lei kĕch iŏk tŏ sĕt đĕch yua kơ gô đei lep 'ba sa đĭ.

³⁹Lu iĕm gô pơtăm plei 'long hơmu, mă-lei ưh kơ đei phĕ huch đak hơmu, yua kơ hơdrông kơnu gô sa pơrăm đĭ.

⁴⁰Iĕm gô đei tơm 'long ôliwơ jơ̆p-jang kơ teh, mă-lei ưh kơ đei đak rơmă wă pik; yua kơ tơm 'long ôliwơ plei sư hơlŭng đĭ.

⁴¹Iĕm gô pơjing kon drŏ-nglo kon drŏ-kăn, mă-lei ưh kơ đei oei hăm iĕm, yua kơ lu sư noh đe gô rôp pơm đĭch đĭ.

⁴²Lep tung-nut gô kăp pơrăm đĭ lu tơm 'long 'ba hơ'bo.

⁴³Bơngai tơmoi oei hơdai iĕm gô rai tŏk pran păng mơdrŏng hloh kơ iĕm rim 'năr, gah lu iĕm, rai 'năr rai rơdu jur ling-lang.

⁴⁴Lu sư ăn kơ iĕm tŏk iŏk, mă-lei gah iĕm ưh kơ đei ăn kơ bu tŏk iŏk; lu sư gô pơm kơ̆l, gah iĕm jing kiĕng.

⁴⁵Đĭ-đăng dôm lu tơdrong hiap pơtê̆ 'nâu gô truh tơ iĕm druh tam iĕm, dĭng lu iĕm lôch hiong răm đĭ, yua kơ iĕm ưh kơ mơ̆ng kiơ̆ nơ̆r Kră Yang 'Bok Kei-Dei iĕm păng ưh kơ wei răk dôm lu nơ̆r tơtă păng khôi juăt mă Sư ăn boih kơ iĕm.

⁴⁶Lu tơdrong hiap pơtê̆ 'nâu gô oei đom tơ lăm akâu jăn păng oei tơ lăm adrĕch adrung iĕm nhen thoi tơdra tơ'blŏk trăp, ling-lang hlŏng hloi.

⁴⁷Kơplah đei mŭk tơmam rơkah rơkai, iĕm ưh tam lăp đon jơhngơ̆m hiôk bơ̆jang kơ Kră Yang 'Bok Kei-Dei.

⁴⁸Lu iĕm gô bơ̆jang kơ lu bơngai ayăt, mă Kră Yang wơh năm blah iĕm. Iĕm gô pơngot rơwĕt hoh-hoy păng kơ'bah kơ'bôch lăm tôm tơdrong, Sư gô tơ'băk 'long ăt bơsei tơ hơko iĕm dĭng truh iĕm lôch răm đĭ.

⁴⁹Kră Yang gô ba minh adrĕch adrung đơ̆ng ataih, đơ̆ng tôch kơ plei teh năm blah lu iĕm, thoi klang păr rôp sa kon sem; iĕm ưh kơ hlôh nơ̆r lu sư pơma ôh.

⁵⁰Muh măt lu sư krưp tơpă, ưh kơ lăng lu bơngai kră, kư̆m ưh kơ băt mơnat kơ bơngai 'lơ̆p;

⁵¹Lu sư gô sa đĭ lu sem dơrong hơnik hơnam plei sa đơ̆ng chŭn mir iĕm dĭng truh tơ lu iĕm răm đĭ; sư ưh kơ lê̆ kiơ mă phe 'ba hơ'bo, sik hơmu, đak rơmă ôliwơ, dah rơmo păng triu ih, dĭng truh iĕm lôch răm đĭ.

⁵²Lu sư gô wang tăp dăr kơ pơlei jơ̆p lăm dêh char mă Kră Yang 'Bok Kei-Dei ăn kơ iĕm dĭng truh tơ lu dur tih kơjung kơjăp tơ noh, mă iĕm gơnang, gô teh pơchah răm đĭ.

⁵³Kơplah đe wang tăp dăr, lu ayăt pơrŭng iĕm, iĕm gô 'buh sa kon drŏ-nglo kon drŏ-kăn iĕm kơdih, mă đơ̆ng Kră Yang 'Bok Kei-Dei ăn kơ iĕm.

⁵⁴Kơplah đei lu ayăt wang tơ pơlei, pơm kơ iĕm tôch đon đĭ boih, bơngai drŏ-nglo mă 'lơ̆ng, iơ̆m dim hloh lăm lu iĕm gô jing kret kơ 'nhŏng oh sư, kon akăn sư mă oei arih.

⁵⁵Lăm năr pơmat-tat bơngai noh ưh kơ asong ôh tơmam sa sư đei, 'nhŏ kơ 'nhĕm kon sư kơdih mă sư oei sa, yua kơ sư pă đei tơmam kiơ sa.

⁵⁶Bơngai drŏ-kăn 'lơ̆ng hloh lăm lu iĕm, bơngai mă ưh kơ lah jur jơ̆ng sư tơ teh ôh. Sư bơngai iơ̆m dim, gơh găt, mă-lei gô kret kơ klo sư mă hưch wă păng kơ kon drŏ-nglo kon drŏ-kăn sư,

⁵⁷gô ôn lê̆ tơpu kon sư păng kon sư 'nao tơpŭ lĕch đơ̆ng klak, yua kơ wă sa ôn hơdrô̆ sư, yua kơ ưh kơ đei tơmam kiơ sa, kơplah lăm năr rŭng răng đe wang, lu ayăt gô pơrŭng iĕm lăm pơlei iĕm.

⁵⁸Tơdah iĕm ưh kơ kơchăng pơm kiơ̆ dôm nơ̆r đơ̆ng khôi juăt 'nâu, chih boih lăm sơ̆p hla bơar 'nâu, ưh pă hli kơ anăn 'lơ̆ng rŏ Kră Yang 'Bok Kei-Dei iĕm anăn ư-ang trŏ kơ hli yom krưp,

⁵⁹na Kră Yang gô ăn đei tơdrong truh kơ iĕm păng tơ lu kon sâu iĕm pơmat-tat krưp đe tam lah 'bôh ôh, tơdrong pơmat tih păng đunh, đei tơdrong jĭ anat păng đunh, lu tơdrong jĭ krưp.

⁶⁰Sư gô ăn kơ iĕm đei tơdrong jĭ đơ̆ng dêh Êyiptơ, tơdrong jĭ noh mă đêl iĕm hli tơrơ boih, lu sư gô đom druh kiơ̆ iĕm.

⁶¹Kră Yang kư̆m gô ăn kơ iĕm tôm tĕch tơdrong jĭ jăn păng tôm tĕch tơdrong pơmat-tat ưh kơ đei chih lăm Sơ̆p hla bơar Khôi Juăt 'nâu, dĭng truh tơ iĕm lôch răm đĭ.

⁶²Kon bơngai iĕm lơ thoi sơnglŏng kơpal plĕnh mă-lei oei pă tŏ sĕt, yua kơ iĕm ưh kơ wă mơ̆ng nơ̆r Kră Yang 'Bok Kei-Dei iĕm.

⁶³Kŭm thoi Kră Yang đei hiôk pơm 'lơ̆ng păng ăn kơ iĕm rai lơ kơdrâ̆m thoi yơ, kư̆m thoi noh na Kră Yang kư̆m hiôk ăn kơ iĕm đei tơdrong gleh truh tơhiong pơrăm iĕm; Lu iĕm đe gô buch lê̆ puh tơlĕch đơ̆ng teh lăm dêh iĕm wă mơ̆t iŏk.

⁶⁴Kră Yang gô tơraih iĕm tơrak 'brak jơ̆p kơ teh đak, đơ̆ng tôch kơ teh đak 'nâu truh tôch kơ teh đak to. Tơ noh, lu iĕm gô kơkuh kơ lu yang nai pơm hăm 'long păng tơmo yang noh iĕm hăm lu 'bok iĕm ưh kơ lah băt ôh.

⁶⁵Oei lăm teh đak noh, iĕm ưh kơ đei hiôk rơnŭk ôh, ưh kơ đei anih wă ăn kơ kơnơl jơ̆ng iĕm pơdơh ôh. Tơ anih noh Kră Yang gô ăn kơ jơhngơ̆m iĕm hli tơrơ, măt hơ'nhôi, jơhngơ̆m đon ơh sơ'ngon.

⁶⁶Iĕm tơtăm tơdrong arih ưh pă hơđơ̆ng; măng năr iĕm hli tơrơ, ưh kơ băt tơdrong arih wă jing thoi yơ, yua kơ lăm jơhngơ̆m iĕm hli tơtăm lu tơdrong măt iĕm 'bôh.

⁶⁷Pơgê hrôih iĕm khan: Rŏ kơ jah măng! Gơsơ̆ măng boih iĕm khan: Rŏ kơ jah hơdah

⁶⁸Kră Yang gô chông ba iĕm hăm duk hơlơ̆k brŏk tơ dêh Êyiptơ dơ̆ng; mă khan Sư đei pơkă hăm lu iĕm ưh pă đei layơ wă wih brŏk tơ noh dơ̆ng; lu iĕm gô tĕch akâu iĕm kơ lu bơngai ayăt pơm đĭch, đĭ drŏ-nglo dah drŏ-kăn, mă-lei ưh kơ đei bu wă răt.