Read bahnar Both 29 Bible Online

Both 29 - bahnar bible

Both 29

¹'Nâu lu nơ̆r pơgơ̆p tơ'blŏk đơ̆ng Kră Yang pơkă khan kơ Môis hăm lu bơngai Isơrael, lăm dêh Môap, 'nguaih kơ tơdrong pơgơ̆p hăm lu sư tơ kông Hôrêp.

²Môis krao đĭ bơngai Isơrael khan kơ lu sư: Lu iĕm hlôi 'bôh boih dôm tơdrong Kră Yang pơm lăm dêh Êyiptơ 'bơ̆t tơm măt iĕm kơ Pharaôn kơ đĭ bơngai jang kơ sư păng lăm dêh sư.

³Dôm lu tơdrong truh tih krưp dêh, tơdra hlĭch tơdrong mơsêh tih, mă măt lu iĕm hlôi 'bôh boih.

⁴Mă-lei truh tơ dang ei Kră Yang ưh tam ăn kơ lăm jơhngơ̆m lu iĕm hlôh băt, măt iĕm 'bôh păng đon iĕm kơtơ̆ng.

⁵Inh chông lu iĕm puăn-jĭt sơnăm boih lăm char glă ao lu iĕm ưh kơ so hiah, chơkhŏ lu iĕm 'bot tơ jơ̆ng ưh kơ huach luih.

⁶Lu iĕm ưh kơ đei sŏng sa păng ưh kơ đei huch đak hơmu dah et tơdrô suai ôh, wă kơ iĕm băt Inh boih Kră Yang 'Bok Kei-Dei lu iĕm.

⁷Mưh iĕm truh tơ anih 'nâu, Sihôn, pơtao pơlei Hesbôn păng Ôk, pơtao char Basan, năm tơblah hăm lu bơ̆n mă-lei tơblah jei bơ̆n.

⁸Iŏk dêh char sư pơjao ăn kơ adrĕch Rubên, Gat păng pơjao ăn minh puăt kơ adrĕch Manase jang sa.

⁹Lu iĕm athei kơchăng wei răk pơm kiơ̆ dôm nơ̆r tơdrong pơgơ̆p pơkă 'nâu, wă kơ lu iĕm gơh đei jing lăm tôm tơdrong jang iĕm pơm.

¹⁰Năr 'nâu đĭ-đăng kơ lu iĕm oei dơ̆ng 'bơ̆t anăp Kră Yang đei lu yŏng kơdră lăm adrĕch, lu kră pơlei, lu yŏng pơgơ̆r linh păng đĭ-đăng lu drŏ-nglo bơngai Isơrael.

¹¹Lu kon hơ'lơ̆p păng lu akăn iĕm, hăm lu bơngai tơmoi oei lăm kơđông, lu bơngai kăl 'long ŭnh truh tơ lu bơngai chhŏ đak.

¹²Lu iĕm dơ̆ng tơ âu wă yak mơ̆t lăm tơdrong pơgơ̆p Kră Yang 'Bok Kei-Dei iĕm, noh boih tơdrong pơgơ̆p mă Kră Yang 'Bok Kei-Dei iĕm, pơm hăm iĕm năr 'nâu, wă kơ iĕm pơkă wă pơm keh, wă kơ iĕm pơkă wă pơm kiơ̆ thoi đei chih lăm tơdrong pơgơ̆p pơkă Kră Yang.

¹³Năr 'nâu Sư pơjing iĕm jing kon pơlei pơla Sư păng Sư Kră Yang 'Bok Kei-Dei iĕm, thoi Sư đei pơkă boih hăm iĕm păng sư kư̆m đei pơkăm hăm 'bok iĕm, Abraham, Isăk păng Jakôp.

¹⁴Kră Yang krao lu iĕm wă kơ lu iĕm pơkă wă pơm kiơ̆ dôm tơdrong pơgơ̆p mă Kră Yang đei pơm, ưh kơ sĭ lu bơ̆n đĕch ôh wă khan ưh kơ lăp dôm lu bơ̆n dơ̆ng tơ âu 'bơ̆t anăp Kră Yang 'Bok Kei-Dei lu bơ̆n đĕch ôh.

¹⁵Mă-lei pơjing hăm lu kon sâu lu bơ̆n mă ưh kơ đei dơ̆ng hơdai bơ̆n năr âu hai.

¹⁶Lu iĕm băt hơđăl boih lu bơ̆n oei arih lăm dêh Êyiptơ păng trong lu bơ̆n năm rok găn lăm dêh char đe, mă truh tơ anih âu.

¹⁷Lu iĕm 'bôh lu kon pơlei lu sư kơkuh kơ rup yang lăng krưp, lu rup yang pơm hăm 'long, tơmo, hăm hu hăm maih.

¹⁸Athei kơchăng bĕ, 'nĕ kơ đei bu drŏ-nglo dah drŏ-kăn, hnam dơnŏ dah adrĕch adrung ayơ mă dơ̆ng tơ âu năr 'nâu achăng lê̆ Kră Yang 'Bok Kei-Dei lu bơ̆n, na năm kơkuh kơ lu yang adrĕch drung nai; lăm lu iĕm athei 'nĕ kơ ăn đei rơh kơnê̆ hơkăm chăt sôr tơ lăm lu iĕm.

¹⁹Bơngai bu kơtơ̆ng dôm nơ̆r pơkă pơkăm lăm tơdrong pơgơ̆p 'nâu, 'nĕ sơkat pŭn hiôk kơdih 'nâu, 'nĕ kơ đei lăm jơhngơ̆m tơchĕng khan: Inh gô oei arih sa kiơ̆ tơdrong inh kơdih kư̆m bưh, huay kơ đei kiơ. Pơm thoi noh pơrăm iĕm kư̆m thoi teh hơiuh hăm teh hrĕng kro.

²⁰Kră Yang ưh kơ mơnat tơdrong yoch bơngai noh, mă-lei tơdrong Kră Yang hil mĭl păng gar sư noh chhông blah bơngai noh păng đĭ lu tơdrong hiap pơtê̆ chih lăm sơ̆p hla bơar 'nâu gô tơpŭ tơ kơpal sư; păng Kră Yang gô sŭt lê̆ anăn sư đơ̆ng lăm teh đak 'nâu.

²¹Kră Yang gô tơklah lê̆ sư lĕch đơ̆ng đĭ-đăng adrĕch bơngai Isơrael, wă kơ pŭ iŏk tơdrong pơmat-tat kiơ̆ thoi đơ̆ng tơdrong pơgơ̆p đei chih lăm sơ̆p hla bơar khôi juăt 'nâu.

²²Adrĕch adrung lu iĕm ning-mônh chăl lu kon sâu lu iĕm păng lu bơngai tơmoi đơ̆ng ataih, 'bôh dôm tơdrong răm pơmat-tat păng tơdrong jĭ jăn mă Kră Yang đei ăn truh wă pơrăm dêh char 'nâu,

²³'Bôh jơ̆p-jang kơ dêh 'nâu răm đĭ ŭnh păng 'boh sa đĭ teh ưh pă gơh rei pơtăm, ưh kơ đei kiơ gơh bluh chăt, ưh kơ đei minh tơnơm kiơ gơh chăt, nhen thoi pơlei Sôđôm Gômôrơ, Atma păng Sêbôlim, pơlei mă Kră Yang hil mĭl krưp pơlôch pơrăm lê̆ boih.

²⁴Đĭ-đăng adrĕch adrung lu sư gô jet: Lơliơ mă Kră Yang pơm kơ dêh âu thoi noh liơ mă tơdrong Sư hil mĭl tih krưp dêh thoi noh?

²⁵Nơ̆r đe tơl: Yua kơ kon pơlei âu sơngah kơ tơdrong pơgơ̆p Kră Yang 'Bok Kei-Dei lu 'bok lu sư, pơm boih hăm lu sư, kơplah Sư chông ba lĕch hlôi đơ̆ng dêh Êyiptơ;

²⁶lu sư năm kơkuh kơ lu yang nai mă kơdih lu sư ưh kơ băt. Kră Yang ưh kơ ăn.

²⁷Thoi ei Kră Yang hil mĭl dêh kơ char noh, na Sư ăn kơ char noh dôm tơdrong hiap pơtê̆ chih boih lăm sơ̆p hla bơar 'nâu.

²⁸Lăm tơdrong ơh blĕk dêh păng tơdrong hil mĭl krưp dêh tơpă Kră Yang buch lê̆ boih na klơ̆m hŭt lê̆ lu sư tơ char nai, thoi kơ năr 'nâu.

²⁹Dôm tơdrong hlơp Kră Yang 'Bok Kei-Dei lu bơ̆n đĕch băt; mă-lei dôm lu tơdrong Sư tơ'bôh ăn kơ lu bơ̆n păng kơ lu kon sâu bơ̆n ling-lang hlŏng hloi, noh lăm khôi juăt âu, wă kơ lu bơ̆n chu pơm kiơ̆.