Read bahnar Both 3 Bible Online

Both 3 - bahnar bible

Both 3

¹Kơplah noh lu bơ̆n wơ̆t hơlơ̆k rok trong char Basan păng Ôk pơtao char Basan iung blah bơ̆n, sư păng đĭ-đăng lu kon pơlei sư wă tơblah lu bơ̆n tơ Êdrei.

²Mă-lei Kră Yang khan kơ inh: Ih 'nĕ hli kơ sư ôh, yua kơ Inh jao sư, đĭ-đăng kon pơlei păng dêh sư lăm tơpang ti iĕm boih; iĕm gô pơm kơ sư kư̆m thoi iĕm pơm boih kơ Sihôn, pơtao đe Amôrit, mă oei tơ pơlei Hesbôn.

³Thoi noh Kră Yang 'Bok Kei-Dei lu bơ̆n jao boih lăm tơpang ti lu bơ̆n Ôk, pơtao char Basan păng đĭ-đăng kon pơlei sư: Lu bơ̆n blah pơrăm lu sư dĭng truh tơ ưh pă đei minh 'nu bơngai bu oei arih dơ̆ng.

⁴Kơplah noh lu bơ̆n iŏk đĭ lu pơlei tih sư, ưh kơ đei pơlei tih ayơ đơ̆ng mă lu bơ̆n ưh kơ tam iŏk; đei tơdrâu-jĭt tŏ pơlei tih păng đĭ tơring Argôp, teh đak pơtao Ôk lăm dêh Basan.

⁵Đĭ-đăng lu pơlei tih noh jơ̆ pơlei kơjăp đei dur kơjung, 'măng jang păng đei 'long chơkăl; hloh kơ noh dơ̆ng kư̆m đei lơ lu pơlei mă ưh kơ đei dur.

⁶Lu bơ̆n pơrăm goh đĭ lu sư, kư̆m thoi lu bơ̆n pơm boih kơ Sihôn, pơtao đe Hesbôn, pơrăm đĭ lu pơlei tih, lu bơngai drŏ-nglo, drŏ-kăn păng lu kon hơ'lơ̆p.

⁷Mă-lei lu bơ̆n blah iŏk lu sem dơrong păng mŭk tơmam mă lu pơlei đêl tơblah jei bơ̆n.

⁸Thoi noh lu bơ̆n blah iŏk teh đơ̆ng 'bar 'nu pơtao Amôrit lăm char noh mă oei pah to Krong Jôrđăn, iŏk đơ̆ng glung Arnôn truh tơ Kông Hermôn.

⁹Kon pơlei Siđôn krao kông Hermôn noh kông Siriôn, gah kon pơlei Amôrit krao kông Sênir;

¹⁰Đĭ-đăng lu pơlei tih lăm char glă Gileat păng Basan truh tơ pơlei Salêka păng pơlei Êdrei 'bar tŏ pơlei tih teh đak pơtao Ôk lăm char Basan.

¹¹Gah adrĕch Rêphaim oei đei minh 'nu Ôka arih pơtao char Basan, giơng sư pơm păng mam tor giơng tơsĭn hơgăt, wơ̆l giơng puăn hơgăt. Oei đei tơ Raba pơlei tih kon sâu Ammôn,

¹²Kơplah lu bơ̆n đei iŏk dêh noh, jing char bơ̆n inh asong ăn kơ adrĕch Rubên păng Gat iŏk đơ̆ng tơring gah yă-nơ̆m pơlei Arôe, tơ rok thŭng đak glung Arnôn păng minh puăt kông groi Gileat, hăm lu pơlei tih sư.

¹³Inh klah asong minh puăt kơ adrĕch Manase, mă oei minh puăt lăm kông groi Gileat păng char Basan teh đak pơtao Ôk, wă khan đĭ tơring Argôp lăm char Basan. Tơring ei đe krao dêh Rêphaim.

¹⁴Jair adrĕch Manase, iŏk đĭ tơring Argôp truh tơ hơdral kon pơlei Gêsur păng Makathit, krao anăn sư kơdih pơlei Hawôt Jar lu pơlei lăm dêh Basan, truh tơ dang ei.

¹⁵Inh kư̆m asong ăn kơ Makir dêh Gileat.

¹⁶Gah lu adrĕch Rubên păng Gat, inh klah asong ăn teh iŏk đơ̆ng gơal char Gileat tơ thong đak glung Arnôn, hơdral gah yă-nơ̆m iŏk đơ̆ng tŏk-bŏk đak krong Jabôk krong 'nâu hơdral lu kon sâu Ammôn.

¹⁷Hơdral gah bơmơ̆t noh thŭng glă Jôrđăn lăm teh Araba, đơ̆ng Kinêret truh tơ thŭng glă đak dơsĭ Araba noh đak Dơsĭ 'Boh, b tơ jơ̆ng kông Pisga, tơ gah hơlĕch.

¹⁸Kơplah noh, inh tơtă kơ lu iĕm, khan, Kră Yang 'Bok Kei-Dei lu iĕm jao boih dêh âu kơ lu iĕm iŏk bơ̆jang sa; đĭ-đăng lu bơngai nuih kơtang lu iĕm athei chĕp đao hơlă yak năm adrol kơ lu 'nhŏng oh bơ̆n, kon pơlei Isơrael.

¹⁹Mă-lei lu kon akăn păng sem dơrong lu iĕm. Inh băt kơ lu iĕm đei lơ sem dơrong, lê̆ oei kơtă lăm pơlei tih mă inh ăn boih kơ lu iĕm.

²⁰Dĭng mă Kră Yang ăn 'nhŏng oh lu iĕm đei tơdrong pơdơh hiôk thoi bơ̆n păng lu 'nhŏng oh iĕm kư̆m gơh iŏk boih dêh mă Kră Yang 'Bok Kei-Dei lu iĕm ăn kơ lu sư tơ gah pah to đak Krong Jôrđăn; klaih kơ noh đĭ-đăng kơ lu iĕm gơh wih brŏk bơ̆jang sa mă teh inh đei ăn boih kơ lu iĕm.

²¹Kơplah noh inh pơkă boih kơ Jôsuê: Măt ih 'bôh boih dôm tơdrong Kră Yang 'Bok Kei-Dei lu iĕm hlôi pơm boih kơ 'bar 'nu pơtao âu; Kră Yang kư̆m gô pơm thoi noh kơ dôm lu teh đak ayơ mă iĕm wă năm mơ̆t.

²²'Nĕ kơ hli lu teh đak noh; yua kơ Kră Yang 'Bok Kei-Dei lu iĕm gô blah dŏng lu iĕm.

²³Kơplah ei; inh krao khan hăm Kră Yang thoi âu:

²⁴Ơ Kră Yang, Ih hlôi tơ'bôh kơ đĭch đam Ih tơdrong krưp tih păng tơpang ti mơyang Ih, yua kơpal plĕnh ala teh âu ưh kơ đei yang ayơ gơh pơm tơdrong mơsêh mơyang thoi Ih.

²⁵Inh apinh Ih ăn kơ inh gơh 'bôh teh đak 'lơ̆ng rŏ, hăm kông groi tih rŏ păng kông Liban mă oei pah to đak Krong Jôrđăn.

²⁶Mă-lei Kră Yang khan; yua kơ đơ̆ng lu iĕm na Kră Yang hil kơ inh, kuă kơ mơ̆ng nơ̆r inh Kră Yang khan kơ inh: Tôm boih; 'nĕ pă roi gah tơdrong 'nâu dơ̆ng kơ Inh.

²⁷Tŏk bĕ tơ kông Pisga, đơ̆ng noh ih lăng tơ gah bơmơ̆t, tơ gah yă-nơ̆m, tơ gah gơal păng tơ gah hơlĕch, na ih lăng dêh noh, yua kơ ih ưh kơ gơh năm hlôi kơ Krong Jôrđăn 'nâu.

²⁸Mă-lei athei jao bĕ kơ Jôsuê, tơgŭm jơhngơ̆m sư mă kơjăp, yua kơ sư gô chông ba kon pơlei 'nâu, tŏk blah iŏk dêh mă ih đei lăng 'bôh noh.

²⁹Lei na lu bơ̆n oei lăm thŭng jê̆ Bet Pêôr.