Read bahnar Both 30 Bible Online

Both 30 - bahnar bible

Both 30

¹Layơ dôm tơdrong 'nâu đei truh kơ iĕm, pŭn hiôk dah pơmat-tat, mă inh đei roi pơdah truh tơ iĕm, kơplah oei lăm lu teh đak, mă Kră Yang 'Bok Kei-Dei iĕm puh iĕm năm, lu iĕm gô 'blŏk dơ̆ng kơ dôm tơdrong inh bơtho khan.

²Dah kơplah noh iĕm wih brŏk dơ̆ng tơ Kră Yang 'Bok Kei-Dei iĕm, iĕm păng lu kon sâu iĕm athei đĭ jơhngơ̆m klơm klak chu kiơ̆ dôm tơdrong inh bơtho khan kơ iĕm năr 'nâu.

³Na Kră Yang 'Bok Kei-Dei iĕm gô dŏng pơklaih iĕm đơ̆ng pơm đĭch păng gô chông ba iĕm brŏk. Kră Yang gô mơnat păng akŭm pơpôi lu iĕm đơ̆ng rim anih mă Sư pơm kơ iĕm tơklah tơklang.

⁴Mă khan lu iĕm Sư puh boih truh tơring ataih tôch kơ plĕnh teh, Kră Yang 'Bok Kei-Dei iĕm kư̆m gô pơpôi akŭm iĕm dơ̆ng păng chông wih brŏk đơ̆ng anih noh.

⁵Kră Yang 'Bok Kei-Dei iĕm gô chông ba iĕm brŏk tơ dêh 'bok, 'bă iĕm iŏk boih: Sư gô ăn kơ iĕm chek lar hrôh ngôh mơdrŏng hloh kơ 'bok iĕm.

⁶Kră Yang 'Bok Kei-Dei gô ăn kơ bơ̆n păng kon sâu lu bơ̆n đei jơhngơ̆m rơmuăn băt chu yom, wă kơ iĕm đĭ jơhngơ̆m klơm klak 'mêm yom kơ Kră Yang 'Bok Kei-Dei, wă kơ gơh arih.

⁷Kră Yang 'Bok Kei-Dei iĕm gô tuh dôm nơ̆r hiap pơtê̆ 'nâu kơ lu bơngai ayăt areh pơm kơnê̆ kơ iĕm.

⁸Iĕm gô chu, mơ̆ng pơm kiơ̆ nơ̆r Kră Yang păng pơm kiơ̆ dôm lu nơ̆r Sư tơtă, mă inh bơtho khan ăn kơ iĕm năr 'nâu.

⁹Kơplah noh Kră Yang 'Bok Kei-Dei iĕm: Sư gô ăn tơdrong pŭn tih lăm dôm tơdrong jang đơ̆ng tơpang ti iĕm pơm ăn kơ kon sâu iĕm hrôh ngôh rai lơ, sem dơrong, chek lar păng 'ba hơ'bo đơ̆ng chŭn mir gơh đei mah rơkah rơkai; Kră Yang lăp đon mơnat ăn pŭn hiôk kơ iĕm, thoi Sư lăp đon ăn pŭn hiôk kơ lu 'bok iĕm.

¹⁰Tơdah lu iĕm chu pơm kiơ̆ Kră Yang 'Bok Kei-Dei iĕm wei răk nơ̆r tơtă tơdrong juăt mă sư đei chih lăm Sơ̆p hla bơar khôi juăt mă sư đei chih lăm Sơ̆p hla bơar khôi juăt 'nâu păng đĭ jơhngơ̆m đĭ bơhngol wih tơ Kră Yang 'Bok Kei-Dei iĕm.

¹¹Dôm tơdrong mă inh bơtho khan ăn kơ iĕm năr 'nâu ưh kơ trŏ tơnat dêh kơ iĕm, kư̆m ưh kơ ataih dêh kơ iĕm;

¹²Kŭm ưh kơ trŏ kơ tơdrong tơ kơpal plĕnh na iĕm mah jet: Bơngai bu gô tŏk tơ plĕnh chĕp ba tơjur tơbăt ăn kơ bơ̆n kơtơ̆ng, na wă kơ lu bơ̆n pơm kiơ̆?

¹³Sư kư̆m ưh kơ tơ pah to đak dơsĭ, na iĕm jet: Bơngai bu gơh tŏk hlôi pah to đak dơsĭ, na chĕp ba ăn kơ lu bơ̆n wă kơ bơ̆n kơtơ̆ng păng pơm kiơ̆?

¹⁴Ưh ôh, nơ̆r Kră Yang jê̆ iĕm lăm 'bơ̆r iĕm păng lăm jơhngơ̆m iĕm, na wă kơ iĕm pơm kiơ̆ Sư.

¹⁵Âu, năr 'nâu inh apinh iĕm rơih iŏk tơdrong arih pŭn hiôk, dah tơdrong pơmat-tat lôch răm.

¹⁶Năr 'nâu inh athei iĕm 'mêm kơ Kră Yang 'Bok Kei-Dei, yak kiơ̆ trong Sư păng wei răk dôm lu nơ̆r tơtă, khôi juăt Sư păng nơ̆r Sư athei, wă kơ iĕm arih sot hrôh ngôh, Kră Yang 'Bok Kei-Dei ăn pŭn hiôk kơ lăm dêh char mă iĕm gô mơ̆t iŏk.

¹⁷Mă-lei dah jơhngơ̆m iĕm tơplih sơngah, kuă kơ mơ̆ng kră kơ pơm kiơ̆, na chu đe pơhlŭ kŭp kơ̆l kơkuh kơ lu yang nai,

¹⁸na năr 'nâu inh tơbăt kơ iĕm thoi âu, tơpă lu iĕm gô lôch hiong răm, iĕm ưh kơ gơh arih sot lăm teh mă iĕm wă năm iŏk mưh tŏk hlôi kơ đak Krong Jôrđăn.

¹⁹Năr 'nâu, inh krao plĕnh păng teh pơm kơdranh ăn kơ inh, inh dan tơ'bôh 'bơ̆t anăp iĕm rơih iŏk tơdrong arih păng tơdrong lôch, tơdrong pŭn hiôk păng tơdrong hiap pơtê̆. Thoi noh, rơih bĕ tơdrong arih, wă kơ iĕm păng lu kon sâu iĕm gơh arih.

²⁰'Mêm kơ Kră Yang 'Bok Kei-Dei, chu kiơ̆ nơ̆r Sư păng kiơ̆ Sư mă tơpă yua kơ lăp Sư đĕch gơh ăn tơdrong arih na Kră Yang gô ăn kơ iĕm gơh arih sot, tơ lăm teh đak mă Kră Yang hlôi pơkă wă ăn kơ lu 'bok iĕm, 'bok Abraham, Isăk păng Jakôp.