Read bahnar Both 4 Bible Online

Both 4 - bahnar bible

Both 4

¹Ơ Isơrael! Mơ̆ng bĕ khôi juăt păng nơ̆r tơtă mă inh gô pơhrăm lu iĕm, wă kơ lu iĕm gơh đei arih păng gơh mơ̆t tơ dêh mă Kră Yang 'Bok Kei-Dei 'bok lu iĕm wă ăn kơ lu iĕm iŏk.

²Lu iĕm 'nĕ kơ thim kiơ păng kư̆m 'nĕ kơ hŭt lê̆ kiơ dôm nơ̆r inh wă khan kơ iĕm, mă-lei athei wei răk dôm nơ̆r tơtă đơ̆ng Kră Yang 'Bok Kei-Dei lu iĕm, nơ̆r tơtă mă inh wă bơtho kơ lu iĕm.

³Măt lu iĕm hlôi 'bôh boih dôm tơdrong Kră Yang pơm tơ Baal Pêôr. Kră Yang 'Bok Kei-Dei lu iĕm đei pơlôch pơrăm đĭ lu bơngai lui kiơ̆ Baal Pêôr đơ̆ng lăm lu iĕm.

⁴Bơngai bu oei kiơ̆ Kră Yang 'Bok Kei-Dei lu iĕm kơjăp, oei arih ngăl truh năr âu.

⁵Inh đei bơtho lu iĕm lu nơ̆r tơtă păng khôi juăt Kră Yang 'Bok Kei-Dei inh tơtă boih kơ inh, wă kơ lu iĕm pơm kiơ̆ mưh iĕm mơ̆t oei boih tơ lăm dêh char noh.

⁶Lu iĕm athei wei răk pơm kiơ̆ bĕ dôm lu nơ̆r tơtă păng khôi juăt âu; yua kơ noh jơ̆ tơdrong hơgei păng tơdrong hlôh wao lu iĕm 'bơ̆t anăp lu adrĕch adrung đe nai. Lu sư kơtơ̆ng gah khôi juăt âu, na lu sư khan: Lu kon pơlei âu jơ̆ minh adrĕch hơgei păng hlôh wao!

⁷Ưh kơ đei adrĕch tih ayơ mă đei yang jê̆ lu sư thoi Kră Yang 'Bok Kei-Dei oei jê̆ lu bơ̆n ling-lang na mơ̆ng rim nơ̆r krao khan thoi bơ̆n:

⁸Hăm đei ưh adrĕch adrung tih ayơ đei lu nơ̆r tơtă păng khôi juăt 'lơ̆ng tơpăt thoi khôi juăt đĭ tơdrong juăt âu, mă inh pơdah 'bơ̆t anăp lu iĕm âu?

⁹Athei wei răk, pơ'lơ̆ng kơdih akâu iĕm, kơnh hli kơ iĕm hiơt dôm tơdrong mă măt lu iĕm 'bôh boih păng 'nĕ ăn lu tơdrong noh lĕch đơ̆ng lăm jơhngơ̆m iĕm păng athei bơtho bĕ kơ lu kon sâu se iĕm dơ̆ng.

¹⁰'Blŏk bĕ kơ năr iĕm dơ̆ng 'bơ̆t anăp Kră Yang 'Bok Kei-Dei iĕm tơ Hôrêp kơplah noh Kră Yang khan kơ inh thoi âu: Krao akŭm bĕ đĭ-đăng kon pơlei, wă kơ lu sư mơ̆ng nơ̆r Inh, wă pơhrăm ăn kơ lu sư băt hli yom kơ Inh kơplah lu sư oei arih tơ kơpal teh âu păng wă kơ lu sư bơtho nơ̆r âu ăn kơ lu kon sâu se lu sư dơ̆ng.

¹¹Thoi noh lu iĕm năm jê̆ păng dơ̆ng 'bơ̆t jơ̆ng kông, 'bơ̆t kông ŭnh oei sa dơhlông truh tơ plĕnh, đei hơmơ̆l măng mu găm suek gom.

¹²Kơplah noh đơ̆ng lăm ŭnh Kră Yang khan kơ lu iĕm, lu iĕm kơtơ̆ng nơ̆r Sư pơma, mă-lei ưh kơ đei 'bôh akâu Sư ôh, lăp kơtơ̆ng nơ̆r pơma đĕch.

¹³Sư roi ăn kơ lu iĕm băt tơdrong Sư pơgơ̆p nơ̆r Sư tơtă wă kơ lu iĕm athei pơm kiơ̆, thoi mơjĭt nơ̆r tơtă, Sư chih tơ kơpal 'bar hlak tơmo lat.

¹⁴Lăm kơplah noh, Kră Yang athei inh bơtho tơ'bôh kơ lu iĕm dôm nơ̆r tơtă păng khôi juăt wă kơ lu iĕm pơm kiơ̆ tơdrong noh tơ lăm dêh mă lu iĕm gô tŏk hlôi kơ đak Krong Jôrđăn năm mơ̆t iŏk.

¹⁵Lu iĕm athei kơchăng bĕ kơdih, yua kơ lu iĕm ưh kơ đei 'bôh ôh akâu Kră Yang 'Bok Kei-Dei lu iĕm, đơ̆ng lăm tŏk-bŏk ŭnh lăm năr Sư pơma khan kơ lu iĕm tơ kông Hôrêp.

¹⁶Kơchăng bĕ kơnh hli kơ lu iĕm pơrăm akâu kơdih, na chă pơm kơdih lu rup yang, pơm hơbŏ thoi rup bơngai drŏ-nglo dah bơngai drŏ-kăn,

¹⁷dah hơbŏ thoi rup kon sem brem mơmŏ kơpal teh, dah hơbŏ thoi rup kon sem brem đei pơnăr păr kơpal plĕnh,

¹⁸dah hơbŏ thoi rup lu hơdrông kơep mơmŏ ah klak kơpal teh, dah hơbŏ thoi lu rup ka oei lăm đak.

¹⁹Kơnh hli kơ lu iĕm pơm ngoi lăng tơ plĕnh 'bôh măt 'năr, măt khei, lu sơnglŏng dôm lu tơmam kơpal plĕnh, kơnh iĕm 'maih wă kơkuh kơ dôm lu tơmam noh păng drap kơkuh kơ lu sư. Mă Kră Yang 'Bok Kei-Dei asong ăn tơmam noh kơ kon bơngai oei ala teh âu.

²⁰Mă-lei lu iĕm, Kră Yang rơih păng iŏk lu iĕm lĕch đơ̆ng dêh Êyiptơ, thoi ŭnh đei 'buh bơsei ngur lăm ŭnh wă kơ lu iĕm jing kon pơlei pơla Sư kơdih, thoi iĕm năr âu.

²¹Na Kră Yang hil kơ inh; yua kơ lu iĕm na Sư pơkăm khan ưh kơ ăn inh tŏk hlôi kơ đak Krong Jôrđăn păng ưh kơ ăn inh mơ̆t tơ dêh 'lơ̆ng rŏ mă Kră Yang 'Bok Kei-Dei lu iĕm wă ăn kơ lu iĕm bơ̆jang sa.

²²Inh gô lôch tơ lăm dêh âu, ưh kơ gơh tŏk hlôi kơ đak Krong Jôrđăn, mă-lei lu iĕm gô năm hlôi păng iŏk dêh 'lơ̆ng rŏ ei.

²³Athei kơchăng bĕ kơdih akâu iĕm, 'nĕ kơ hiơt tơdrong pơgơ̆p đơ̆ng Kră Yang 'Bok Kei-Dei lu iĕm mă đei pơgơ̆p hăm lu iĕm păng 'nĕ kơ pơm rup yang, rup sem brem ayơ mă Kră Yang 'Bok Kei-Dei lu iĕm khă.

²⁴Yua kơ Kră Yang 'Bok Kei-Dei iĕm thoi kơ ŭnh soh chhông păng jơ̆ Kră Yang 'Bok Kei-Dei băt kơ gar.

²⁵Mưh lu iĕm đei kon sâu păng oei tơ dêh noh đunh boih, tơdah lu iĕm pơm yoch kơnê̆ pơrăm akâu kơdih thoi pơm kơ rup yang dah rup sem brem kiơ, mă pơm tơdrong kơnê̆ kiơ 'bơ̆t anăp Kră Yang 'Bok Kei-Dei lu iĕm wă pơm kơ Sư blĕk.

²⁶Năr âu inh krao plĕnh păng teh pơm kơdranh kơ lu iĕm thoi âu dah lu iĕm ưh kơ chu pơm kiơ̆ Kră Yang, lu iĕm gô lôch hiong 'bônh đĕch đơ̆ng dêh iĕm wă năm iŏk tơ pah to đak Krong Jôrđăn. Lu iĕm ưh kơ oei tơ noh đunh ôh, mă-lei gô lôch đĭ.

²⁷Kră Yang gô pơm kơ iĕm tơklah tơklang jơ̆p kơ teh đak đe, oei pă tŏ sĕt đĕch mă tơ anih Kră Yang puh lu iĕm.

²⁸Tơ noh lu iĕm gô kơkuh kơ rup yang pơm păng 'long păng tơmo, jơ̆ tơdrong jang tơpang ti kon bơngai pơm, ưh kơ gơh 'bôh, ưh kơ kơtơ̆ng ưh kơ gơh sa, kư̆m ưh kơ băt 'bâu.

²⁹Mă-lei đơ̆ng noh lu iĕm gô krao chă Kră Yang 'Bok Kei-Dei iĕm, layơ iĕm chă Kră Yang hăm đĭ jơhngơ̆m, đĭ tơdrong tơchĕng na gơh tơ'bơ̆p Sư.

³⁰Kơplah lu iĕm đei tơdrong pơmat-tat păng đei dôm tơdrong truh kơ iĕm, lăm năr mă tuch-luch, lu iĕm gô wih brŏk tơ Kră Yang 'Bok Kei-Dei iĕm păng chu kiơ̆ nơ̆r Sư.

³¹Yua kơ Kră Yang 'Bok Kei-Dei iĕm jơ̆ Kră Yang 'Bok Kei-Dei băt mơnat ưh kơ achăng lê̆ păng ưh kơ pơrăm pơlôch iĕm ôh; kư̆m ưh kơ hiơt kơ tơdrong pơgơ̆p mă đơ̆ng Sư pơkă pơkăm boih hăm 'bok lu iĕm.

³²Thoi noh, iĕm athei apinh lăng iŏk đơ̆ng jơhnơr đei adrol kơ iĕm sơ̆, đơ̆ng năr Kră Yang 'Bok Kei-Dei pơjing kon bơngai kơpal teh, đơ̆ng tôch plĕnh âu truh tơ tôch plĕnh to, hăm tam đei tơdrong kiơ truh boih tih dah đei kơtơ̆ng tơdrong kiơ boih thoi noh?

³³Hăm tam đei minh adrĕch ayơ kơtơ̆ng nơ̆r Kră Yang 'Bok Kei-Dei pơma đơ̆ng lăm ŭnh thoi lu iĕm đei kơtơ̆ng boih mă oei arih dang ei.

³⁴Hăm tam đei yang kiơ rơih iŏk minh adrĕch kon pơlei 'nâu đơ̆ng adrĕch kon pơlei nai kơ sư kơdih, hăm tơdrong pơlong lăng, hăm tơdrong hlĭch chrơp, hăm tơdrong mơsêh mơyang pran kơtang đơ̆ng ti sư, hăm tơdrong tơblah, hăm tơdrong hli krưp thoi đĭ-đăng tơdrong Kră Yang 'Bok Kei-Dei lu iĕm đei pơm boih kơ lu iĕm hăm dêh char Êyiptơ 'bơ̆t tơm măt lu iĕm?

³⁵Đei tơ'bôh boih kơ lu iĕm dôm tơdrong noh, wă băt kơ Kră Yang 'noh boih Kră Yang 'Bok Kei-Dei, ưh kơ bu nai dơ̆ng.

³⁶Đơ̆ng kơpal plĕnh Sư ăn kơ iĕm kơtơ̆ng nơ̆r Sư, wă bơtho pơhrăm iĕm, tơ kơpal teh Sư ăn kơ iĕm 'bôh ŭnh tih Sư păng đơ̆ng lăm ŭnh lu iĕm đei kơtơ̆ng nơ̆r Sư pơma.

³⁷Yua kơ đơ̆ng Sư 'mêm kơ lu 'bok iĕm, na rơih iŏk adrĕch adrung lu iĕm 'nâu, kơ Sư kơdih păng Sư yua tơdrong mơsêh tih Sư krao tơlĕch boih iĕm đơ̆ng dêh Êyiptơ.

³⁸Sư puh lê̆ lu adrĕch adrung tih hloh păng pran hloh kơ iĕm, wă ba iĕm năm mơ̆t tơ dêh noh păng ăn kơ iĕm teh noh wă kơ lu iĕm jang sa, thoi iĕm đei 'bôh dang ei.

³⁹Thoi noh, dang ei iĕm athei băt păng chih răk bĕ lăm jơhngơ̆m lu iĕm: Kră Yang noh boih Kră Yang 'Bok Kei-Dei tơ kơpal plĕnh ti păng tơ ala teh âu; ưh kơ đei bu nai dơ̆ng.

⁴⁰Wei răk bĕ dôm lu khôi juăt păng nơ̆r tơtă đơ̆ng Sư, tơdrong mă inh bơtho boih kơ iĕm năr 'nâu, wă kơ iĕm păng kon sâu iĕm gơh đei hiôk-hian wă kơ lu iĕm oei arih sot lăm dêh Kră Yang 'Bok Kei-Dei iĕm ăn kơ iĕm ling-lang truh ning-mônh.

⁴¹Kơplah noh Môis klah lê̆ pêng tŏ pơlei tih tơ gah hơlĕch kơ Krong Jôrđăn,

⁴²wă kơ lu bơngai pơlôch bơngai kơdâu ôn tơ noh, bơngai mă pơlôch rông 'bôt sư hơch 'bơm ưh kơ pơrơ̆ng ôh, ưh kơ đei chă ayăt băl đơ̆ng adrol, wă kơ sư gơh klaih đơ̆ng đe wă pơlôch 'mong, na kơdâu ôn mơ̆t lăm pơlei noh.

⁴³Noh pơlei Bêser, lăm dêh teh dơnă lê̆ kơ lu adrĕch Rubên; Ramôt lăm tơring Gileat, lê̆ kơ lu adrĕch Gat păng pơlei Gôlan tơring Basan lê̆ kơ adrĕch Manase.

⁴⁴'Nâu boih khôi juăt mă Môis tơ'bôh 'bơ̆t anăp kon pơlei Isơrael.

⁴⁵'Nâu tơdrong tơbăt păng khôi juăt păng nơ̆r tơtă mă Môis bơtho ăn kơ kon pơlei Isơrael đơ̆ng rŏng kơ lu sư lĕch đơ̆ng dêh Êyiptơ.

⁴⁶Mă oei gah hơlĕch đak Krong Jôrđăn, lăm thŭng tơklă Bet Pêôr tơ dêh Sihôn, pơtao kon pơlei Amôrit, oei tơ pơlei Hesbôn, Môis păng kon pơlei Isơrael blah iŏk jei đơ̆ng rŏng lu sư lĕch đơ̆ng dêh Êyiptơ.

⁴⁷Kon pơlei Isơrael tơgar iŏk dêh noh hloi păng dêh Ôk pơtao char Basan, noh 'bar 'nu pơtao kon pơlei Amôrit oei tơ gah hơlĕch kơ Krong Jôrđăn,

⁴⁸Teh âu iŏk đơ̆ng pơlei Arôe jih thong đak Arnôn, truh tơ Kông Siriôn, wă khan kông Hermôn.

⁴⁹Păng đĭ tơmăn glă tơ gah hơlĕch kơ đak Krong Jôrđăn, truh tơ đak dơsĭ Araba,a boih ala jơ̆ng kông Pisga.