Read bahnar Both 5 Bible Online

Both 5 - bahnar bible

Both 5

¹Môis krao đĭ-đăng bơngai Isơrael na khan: Ơ bơngai Isơrael! Mơ̆ng bĕ dôm lu khôi juăt păng nơ̆r tơtă inh roi ăn kơ lu iĕm băt năr 'nâu; lu iĕm athei pơhrăm hŏk iŏk mă pơ'lơ̆ng pơm kiơ̆ dôm lu tơdrong noh.

²Kră Yang 'Bok Kei-Dei lu bơ̆n đei pơgơ̆p boih hăm lu bơ̆n tơ kông Hôrêp.

³Ưh kơ sĭ hăm lu 'bok bơ̆n đĕch mă Kră Yang pơgơ̆p boih noh ôh, mă-lei hăm đĭ-đăng lu bơ̆n dang ei mă oei arih 'nâu.

⁴Kră Yang pơma boih hăm lu iĕm tơ kơpal kông đơ̆ng lăm ŭnh.

⁵Kơplah noh, inh dơ̆ng tŏk-bŏk Kră Yang hăm lu iĕm, wă bơtho nơ̆r đơ̆ng Sư ăn kơ lu iĕm; yua kơ lu iĕm hli kơ ŭnh, lu iĕm ưh kơ tŏk tơ kơpal kông. Kră Yang khan:

⁶Inh boih Kră Yang 'Bok Kei-Dei lu iĕm, Tơ'ngla tơlĕch lu iĕm đơ̆ng dêh Êyiptơ, lĕch đơ̆ng pơm đĭch.

⁷Lu iĕm 'nĕ kơkuh kơ yang nai, 'nguaih kơ Inh.

⁸Lu iĕm 'nĕ kơ pơm rup yang na kơkuh, kư̆m 'nĕ kơ pơm rup nhen thoi tơmam kơpal plĕnh dah nhen sem brem thoi tơ ala teh âu, dah nhen thoi ka lăm đak sŭng.

⁹Lu iĕm 'nĕ kơ drap kơkuh 'bơ̆t anăp lu rup noh păng kư̆m 'nĕ kơ soi sơmah kơ lu sư noh, yua kơ Inh jơ̆ Kră Yang 'Bok Kei-Dei lu iĕm, wă khan jơ̆ Kră Yang 'Bok Kei-Dei băt gar. Bơngai bu areh kơ Inh, Inh gô phak bơngai noh truh tơ kon sâu se sư pêng puăn jơhnơr.

¹⁰Păng gô 'mêm kơ lu bơngai mă 'mêm kơ Inh păng wei răk dôm lu nơ̆r Inh tơtă truh kơ rơbâu jơhnơr.

¹¹Lu iĕm 'nĕ kơ yua anăn Kră Yang 'Bok Kei-Dei lu iĕm na pơma kư̆ kă; yua kơ Kră Yang gô phak tơpă dôm lu bơngai bu wă yua anăn Sư na pơma kư̆ kă.

¹²Iĕm athei 'blŏk kơ năr tơpơh wă pơm năr giĕng 'lơ̆ng rơgoh, kư̆m thoi Kră Yang 'Bok Kei-Dei iĕm pơkă ăn boih kơ iĕm.

¹³Iĕm athei bơ̆jang lăm tơdrâu năr đĕch;

¹⁴Mă-lei lăm năr tơpơh noh năr pơdơh Kră Yang 'Bok Kei-Dei iĕm; 'nĕ kơ bơ̆jang minh tơdrong kiơ, kon drŏ-nglo kon drŏ-kăn iĕm, đĭch drŏ-nglo đam drŏ-kăn iĕm, dah rơmo, aseh iĕm, dah lu sem dơrong iĕm, dah lu tơmoi chă oei pơdơh lăm hnam iĕm, wă kơ lu đĭch đam drŏ-nglo drŏ-kăn iĕm kư̆m pơdơh thoi iĕm mơ̆n.

¹⁵Iĕm athei 'blŏk thoi lu iĕm hlôi pơm đĭch boih tơ dêh Êyiptơ, na Kră Yang 'Bok Kei-Dei iĕm yua ti mơsêh mơyang pran kơtang chông ba iĕm lĕch hlôi đơ̆ng noh; yua kơ thoi noh na Kră Yang 'Bok Kei-Dei iĕm đei tơtă boih kơ iĕm, wă kơ iĕm 'blŏk kơ năr pơdơh.

¹⁶Athei lui yom kơ mĕ 'bă ih, kiơ̆ thoi Kră Yang tơtă boih kơ ih wă kơ ih gơh arih sot păng đei tơdrong pŭn hiôk tơ kơpal teh âu mă Kră Yang 'Bok Kei-Dei ih ăn kơ ih.

¹⁷Ih 'nĕ kơ pơlôch bơngai.

¹⁸Ih 'nĕ kơ pơm pơyô kư̆ kă.

¹⁹Ih 'nĕ kơ tơtông klĕ.

²⁰Ih 'nĕ kơ pơm kơdranh hơlĕnh kơ lu bơngai nai.

²¹Ih 'nĕ kơ 'nhĕng plah iŏk akăn đe, kư̆m 'nĕ 'nhĕng hnam đe, dah chŭn mir, đĭch drŏ-nglo đam drŏ-kăn, rơmo, aseh, dah tơmam kiơ nai.

²²Tơ kơpal kông, đơ̆ng tŏk-bŏk ŭnh, đơ̆ng lăm hơmơ̆l păng đơ̆ng lăm măng mu, đei nơ̆r re kơtang; Kră Yang khan dôm lu nơ̆r âu ăn kơ đĭ-đăng lu iĕm, Sư ưh kơ đei thim ôh; Sư chih dôm lu nơ̆r noh tơ kơpal 'bar hlak tơmo lat na jao ăn kơ inh.

²³Kơplah lu iĕm kơtơ̆ng nơ̆r pơma đơ̆ng lăm măng mu kơplah ŭnh oei sa kông lu iĕm năm tơ inh, đĭ-đăng lu kră pơgơ̆r păng dôm lu yŏng kơdră lăm adrĕch iĕm:

²⁴Na khan: Kră Yang 'Bok Kei-Dei lu nhôn tơ'bôh boih tơdrong rang mơnhal păng tơdrong krưp tih Sư kơ lu nhôn păng lu nhôn đei kơtơ̆ng boih nơ̆r Sư đơ̆ng lăm ŭnh; năr âu lu nhôn 'bôh boih Kră Yang 'Bok Kei-Dei pơma dơnuh hăm kon bơngai mă-lei lu nhôn oei arih.

²⁵Mă-lei dang ei, yua kơ kiơ lu nhôn athei lôch? Ŭnh tih âu gô sa lu nhôn, tơdah lu nhôn oei kơtơ̆ng nơ̆r đơ̆ng Kră Yang 'Bok Kei-Dei lu nhôn, noh lu nhôn gô lôch tơpă.

²⁶Hăm đei bu kơtơ̆ng boih nơ̆r Kră Yang 'Bok Kei-Dei oei pơma đơ̆ng lăm ŭnh, nhen thoi lu nhôn, mă-lei oei arih?

²⁷Ih năm mă jê̆ bĕ, wă kơ mơ̆ng dôm tơdrong Kră Yang 'Bok Kei-Dei lu nhôn khan na roi ăn kơ lu nhôn dơ̆ng, na lu nhôn gô mơ̆ng păng pơm kiơ̆.

²⁸Kră Yang kơtơ̆ng dôm lu nơ̆r đơ̆ng iĕm, na Kră Yang khan kơ inh: Inh kơtơ̆ng boih dôm lu nơ̆r kon pơlei âu pơma hăm ih; lu sư pơma thoi noh trŏ boih.

²⁹Ô tơdah lu kon pơlei âu đei jơhngơ̆m hli yom kơ Inh hăm wei răk dôm lu nơ̆r Inh tơtă ling-lang lu sư păng kon sâu lu sư gơh đei tơdrong pŭn hiôk ling-lang.

³⁰Năm roi bĕ kơ lu kon pơlei pơla brŏk tơ anih bơsŭn kơdih.

³¹Gah ih, oei bĕ 'bơ̆t dâu hăm Inh, Inh gô roi ăn kơ ih băt dôm nơ̆r tơtă, tơdrong juăt păng nơ̆r tơbăt ih gô bơtho ăn dơ̆ng kơ lu sư, wă kơ lu sư pơm kiơ̆ tơ lăm dêh mă Inh gô ăn kơ lu sư.

³²Thoi noh, lu iĕm athei kơchăng pơm kiơ̆, thoi Kră Yang 'Bok Kei-Dei lu bơ̆n hlôi pơkă boih. 'Nĕ kơ weh gah 'ma, dah gah 'ngiĕo.

³³Lu iĕm athei yak kiơ̆ đĭ trong mă Kră Yang 'Bok Kei-Dei lu iĕm tơtă, wă kơ lu iĕm gơh đei pŭn hiôk păng oei arih sot lăm dêh mă iĕm gô iŏk.