Read bahnar Both 6 Bible Online

Both 6 - bahnar bible

Both 6

¹'Nâu jơ̆ khôi juăt, nơ̆r tơtă păng nơ̆r tơbăt đơ̆ng Kră Yang 'Bok Kei-Dei lu bơ̆n, tơtă boih kơ inh bơtho ăn kơ lu iĕm, wă kơ lu iĕm pơm kiơ̆ tơdrong noh tơ lăm dêh mă lu iĕm gô mơ̆t oei.

²Wă kơ lu iĕm păng kon sâu iĕm băt kơ hli yom kơ Kră Yang 'Bok Kei-Dei iĕm, đĭ chăl arih tơ kơpal teh wei răk dôm lu tơdrong juăt păng nơ̆r Sư tơtă; wă kơ lu iĕm oei arih sot.

³Ơ Isơrael, mơ̆ng bĕ păng pơm kiơ̆ tơdrong noh wă kơ iĕm gơh đei pŭn hiôk păng rai lơ, dêh char thoi đak toh đak sut mă Kră Yang 'Bok Kei-Dei lu 'bok iĕm đei pơkă hăm lu iĕm.

⁴Ơ đĭ-đăng bơngai Isơrael mơ̆ng bĕ: Kră Yang 'Bok Kei-Dei bơ̆n, Kră Yang minh đĕch, ưh kơ đei 'bar.

⁵Na lu iĕm athei đĭ jơhngơ̆m klơm klak, đĭ đon tơchĕng đĭ jơhngơ̆m pran 'mêm kơ Kră Yang 'Bok Kei-Dei iĕm.

⁶Lu iĕm athei chih răk lăm jơhngơ̆m lu nơ̆r mă inh đei bơtho lu iĕm năr âu.

⁷Athei adrin bơtho ăn dôm tơdrong noh kơ lu kon iĕm păng bơtho tơdrong âu kơplah sư oei lăm hnam, dah oei năm rok trong, dah wă tep, dah iung đơ̆ng tep.

⁸Ih athei chô̆ nơ̆r âu tơ kơkŏng ih, pơ̆n pơm tơdra 'bơ̆t klĕng ih wă kơ 'blŏk.

⁹Ih athei chih răk nơ̆r âu tơ jrăng 'măng hnam ih păng tơ 'măng jang pơlei.

¹⁰Layơ Kră Yang 'Bok Kei-Dei iĕm chông ba iĕm mơ̆t tơ dêh mă Sư đei pơkă pơkăm wă ăn kơ lu 'bok iĕm Abraham, Isăk păng Jakôp, wă ăn kơ iĕm, đei pơlei tih păng mơdrŏng mă lu iĕm ưh kơ đei man pơdơ̆ng.

¹¹Hnam oei 'bĕnh-'bang kơ mŭk tơmam 'lơ̆ng mă lu iĕm ưh kơ đei răt mong, lu sơlŭng đak mă lu iĕm ưh kơ đei sir, tơm hơmu păng 'long ôliwơ mă lu iĕm ưh kơ đei pơtăm, gô đei sa mah rơkah rơkai.

¹²Lu iĕm kơchăng bĕ kơdih 'nĕ hiơt kơ Kră Yang tơ'ngla chông tơlĕch iĕm đơ̆ng dêh Êyiptơ, đơ̆ng pơm đĭch.

¹³Iĕm athei hli yom kơ Kră Yang 'Bok Kei-Dei iĕm bơ̆jang kơ Sư păng yua anăn Sư na pơkă pơkăm,

¹⁴'Nĕ kơ kiơ̆ lu yang nai, lu yang mă lu adrĕch adrung oei jum dăr kơ iĕm.

¹⁵Yua kơ Kră Yang 'Bok Kei-Dei oei hơdai iĕm, jơ̆ Kră Yang 'Bok Kei-Dei băt gar, tơdah lu iĕm kơkuh kơ yang nai Kră Yang 'Bok Kei-Dei hil mĭl kơ iĕm păng Sư gô pơlôch tơhiong iĕm đơ̆ng kơpal teh âu,

¹⁶'Nĕ kơ pơlong lăng Kră Yang 'Bok Kei-Dei iĕm, thoi iĕm đei pơlong lăng Sư tơ Masa.

¹⁷Athei kơchăng wei răk dôm lu nơ̆r Kră Yang tơtă păng nơ̆r Sư tơbăt, khôi juăt Sư mă inh đei bơtho ăn kơ iĕm.

¹⁸Athei pơm dôm tơdrong kiơ Kră Yang, khan 'lơ̆ng khan trŏ, na iĕm đei pŭn hiôk păng gơh mơ̆t tơ dêh 'lơ̆ng rŏ mă Kră Yang hlôi pơkă wă ăn kơ lu 'bok iĕm.

¹⁹Kră Yang gô puh lê̆ đĭ lu bơngai ayăt đơ̆ng anăp iĕm kư̆m thoi Sư đei pơkă boih.

²⁰Ning-mônh, dah đei kon sâu iĕm jet: Dôm lu khôi juăt, tơdrong juăt păng nơ̆r tơtă 'nâu, mă Kră Yang 'Bok Kei-Dei lu bơ̆n tơtă wă khan kiơ?

²¹Na iĕm gô tơl, sơ̆ lu bơ̆n pơm đĭch kơ Pharaôn tơ dêh Êyiptơ na Kră Yang đei yua ti pran kơtang Sư chông ba lu bơ̆n lĕch đơ̆ng dêh Êyiptơ ei;

²²Kră Yang đei pơm tơ'bôh boih dôm lu tơdra hlĭch păng mơsêh mơyang krưp dêh tơpă, pơrăm dêh Êyiptơ, Pharaôn păng đĭ lu yŏng mơng sư 'bơ̆t anăp bơ̆n.

²³Na Sư chông ba tơlĕch boih lu bơ̆n đơ̆ng dêh ei, Sư chông anhăk lu nhôn mơ̆t tơ dêh Sư mă pơkă wă ăn kơ 'bok lu bơ̆n; păng wă ăn kơ lu bơ̆n.

²⁴Kră Yang đei bơtho khan kơ bơ̆n athei pơm kiơ̆ đĭ-đăng dôm tơdrong juăt âu păng băt hli yom kơ Kră Yang, wă kơ lu bơ̆n gơh đei hiôk-hian ling-lang păng oei arih thoi lu bơ̆n năr 'nâu.

²⁵Tơdah lu bơ̆n kơchăng pơm kiơ̆ đĭ lu nơ̆r tơtă âu đơ̆ng Kră Yang 'Bok Kei-Dei bơ̆n, na gơh jô̆ bơ̆n 'lơ̆ng tơpăt.