Read bahnar Both 8 Bible Online

Both 8 - bahnar bible

Both 8

¹Lu iĕm athei kơchăng pơm kiơ̆ bĕ đĭ dôm nơ̆r tơtă mă đơ̆ng inh roi ăn kơ lu iĕm năr âu, wă kơ lu iĕm arih, gơh pơjing băl rai lơ, na mơ̆t iŏk dêh mă Kră Yang đei pơkă pơkăm hăm lu 'bok iĕm sơ̆.

²Athei 'blŏk kơ đĭ-đăng trong mă Kră Yang 'Bok Kei-Dei iĕm chông anhăk ba iĕm lăm puăn-jĭt sơnăm kơ 'nâu tơ lăm char glă pơmat-tat, wă pơlong iĕm, wă kơ băt iĕm hăm đei wei răk dôm nơ̆r Sư tơtă dah ưh.

³Sư ăn kơ iĕm pơngot 'me rong iĕm ăn kơ iĕm sa mana mă iĕm păng lu yă 'bok kư̆m tam mă biơh băt, wă bơtho iĕm băt, kon bơngai arih ưh kơ trŏ arih đơ̆ng tơmam sa đĕch ôh, mă-lei kon bơngai arih đơ̆ng nơ̆r Kră Yang.

⁴Lăm puăn-jĭt sơnăm hơbĕn iĕm ao ưh kơ hiah jơ̆ng iĕm kư̆m huay kơ pơ'ngeh.

⁵Iĕm athei băt kơdih, Kră Yang 'Bok Kei-Dei iĕm, teh bơtho kư̆m thoi 'Bă teh bơtho kon drŏ-nglo sư kơdih.

⁶Hli yom bĕ kơ Kră Yang 'Bok Kei-Dei iĕm, wei răk dôm nơ̆r Sư tơtă, yak năm kiơ̆ trong Sư;

⁷Yua kơ Kră Yang 'Bok Kei-Dei wă gô chông ba iĕm mơ̆t tơ dêh char 'lơ̆ng, đei lơ đak glung, đei đak krong, đak mơlĕch ro lăm thŭng thong păng tơ kơpal kông groi.

⁸Dêh noh đei 'ba mi, 'ba tơ'bâu, plei hơmu, 'long hơra, plei gărnăt, đak rơmă plei 'long ôliwơ păng đak sut;

⁹Dêh noh đei tơmam sa mah rơkah rơkai; ưh kơ đei kơ'bah kiơ. Dêh noh đei tơmo bơsei păng đơ̆ng lăm kông iĕm gô sir iŏk kong,

¹⁰Mưh iĕm sŏng sa phĭ mah rơkah rơkai, iĕm gô bơnê ư-ang kơ Kră Yang 'Bok Kei-Dei iĕm, yua kơ teh đak 'lơ̆ng mă đơ̆ng Sư ăn boih kơ iĕm.

¹¹Athei kơchăng bĕ, 'nĕ hiơt kơ Kră Yang 'Bok Kei-Dei, wei răk dôm nơ̆r Sư tơtă, nơ̆r Sư tơbăt păng khôi juăt Sư mă đơ̆ng inh bơtho lu iĕm năr 'nâu.

¹²Hli kơ gô sŏng sa phĭ mah rơkah rơkai boih, pơm hnam 'lơ̆ng rŏ, đei anih oei kơjăp boih,

¹³păng tơdah rơmo triu chek lar roi lơ, hu, maih păng mŭk tơmam rai tŏk boih,

¹⁴Athei kơchăng 'nĕ kơ pơang păng 'nĕ hiơt kơ Kră Yang 'Bok Kei-Dei iĕm, Tơ'ngla chông ba iĕm lĕch đơ̆ng dêh Êyiptơ, lĕch đơ̆ng pơm đĭch.

¹⁵Kră Yang chông ba iĕm rok char glă să pă băt krưp dêh, đei 'bih tang, hơguăt, teh hrĕng kro, ưh kơ đei đak ôh, Sư ăn đak lĕch đơ̆ng tơmo arăk tơpă.

¹⁶Lăm char glă Sư boih wei rong ăn kơ iĕm sa 'bĕng mana, mă lu 'bok iĕm tam lah băt, ăn kơ lu iĕm pơmat-tat wă pơlong lăng iĕm tuch-luch ăn pŭn hiôk kơ lu iĕm.

¹⁷Kơchăng bĕ, 'nĕ chă pơma lăm jơhngơ̆m khan: Noh yua kơ đơ̆ng tơdrong hơgei păng pran kơtang tơpang ti inh na mă gơh đei dôm mŭk tơmam mơdrŏng 'nâu.

¹⁸Iĕm athei 'blŏk kơ Kră Yang 'Bok Kei-Dei iĕm, noh jơ̆ đơ̆ng Sư ăn kơ iĕm jing mơdrŏng; wă pơsĭt tơdrong pơgơ̆p Sư pơkă pơkăm hăm 'bok iĕm sơ̆.

¹⁹Tơdah iĕm hiơt kơ Kră Yang 'Bok Kei-Dei iĕm, na kiơ̆ lu yang nai, bơ̆jang păng drap kơkuh kơ lu yang ei, inh khan tơpă năr âu. Lu iĕm gô lôch hiong đĭ!

²⁰Kră Yang pơlôch pơrăm đĭ lu adrĕch nai 'bơ̆t anăp lu iĕm thoi yơ. Sư kư̆m pơlôch pơrăm lu iĕm thoi noh mơ̆n yua kơ lu iĕm ưh kơ wă mơ̆ng kiơ̆ nơ̆r Kră Yang 'Bok Kei-Dei lu iĕm ôh.