Read bahnar Both 9 Bible Online

Both 9 - bahnar bible

Both 9

¹Ơ kon pơlei Isơrael, mơ̆ng bĕ! Lu iĕm wă tŏk kơ Krong Jôrđăn, wă mơ̆t tơblah puh tơweh lu adrĕch tih păng pran hloh kơ iĕm pơlei tih đei dur kơjung kơjăp truh tơ plĕnh.

²Lu adrĕch bơngai tih kơjung, pran kon sâu Anakim, mă iĕm băt boih păng iĕm đei kơtơ̆ng đe roi khan: Bơngai bu gơh kĕ dơ̆ng 'bơ̆t anăp kon sâu Anak?

³Mă-lei iĕm athei băt tơpă: Kră Yang 'Bok Kei-Dei iĕm năm adrol kơ iĕm, nhen thoi pla ŭnh khơ̆ng dơhlông sa, Kră Yang boih Sư gô pơlôch pơrăm lu sư. Pơm kơ lu sư chu thuơ, lu iĕm gô pơlôch lu sư 'mônh đĕch, thoi Kră Yang đei pơkă hăm lu iĕm.

⁴Kơplah Kră Yang 'Bok Kei-Dei, blah puh lê̆ lu sư 'bơ̆t anăp iĕm, iĕm 'nĕ kơ tơchĕng khan: Noh yua kơ đơ̆ng tơdrong 'lơ̆ng tơpăt bơ̆n na mă Kră Yang chông bơ̆n mơ̆t iŏk dêh noh mă tơpă yua kơ đơ̆ng tơdrong yoch kơnê̆ adrĕch âu, na Kră Yang blah puh lu sư đơ̆ng anăp iĕm.

⁵Iĕm mơ̆t iŏk dêh đơ̆ng lu adrĕch âu ưh kơ sĭ yua kơ đơ̆ng tơdrong iĕm pơm 'lơ̆ng tơpăt ôh, dah kiơ̆ tơnăp ưh ôh, mă-lei yua kơ đơ̆ng tơdrong yoch kơnê̆ lu sư, na Kră Yang 'Bok Kei-Dei blah puh lê̆ lu sư đơ̆ng anăp iĕm, wă pơsĭt kơ nơ̆r sư pơkă pơkăm hăm lu 'bok iĕm Abraham, Isăk păng Jakôp.

⁶Thoi noh, iĕm athei băt; ưh kơ sĭ yua kơ đơ̆ng tơdrong 'lơ̆ng tơpăt iĕm, mă Kră Yang 'Bok Kei-Dei ăn kơ iĕm gơh iŏk teh đak 'lơ̆ng 'nâu; lu iĕm jơ̆ minh adrĕch arăng kơ̆l.

⁷Iĕm athei 'blŏk, 'nĕ kơ hiơt lu iĕm hlôi tơblĕk Kră Yang 'Bok Kei-Dei tơ lăm char glă, đơ̆ng năr iĕm lĕch hlôi kơ dêh Êyiptơ truh tơ năr 'nâu, iĕm ling-lang blah pơm plơ̆ kơ Kră Yang.

⁸Tơ Hôrêp lu iĕm kư̆m hlôi tơblĕk Kră Yang; na Sư blĕk hil dĭng mah Sư wă pơlôch pơđĭ lu iĕm,

⁹Kơplah inh năm tŏk tơ kông iŏk 'bar hlak tơmo lat, 'bar hlak tơmo tơdrong pơgơ̆p mă Kră Yang hlôi pơgơ̆p hăm lu iĕm, inh oei tơ kơpal kông puăn-jĭt năr păng puăn-jĭt măng; ưh kơ sŏng sa kư̆m ưh kơ nhă đak;

¹⁰na Kră Yang pơjao ăn kơ inh 'bar hlak tơmo lat, đơ̆ng hơnglâu ti Kră Yang 'Bok Kei-Dei chih 'mơ̆i; đei tôm dôm lu nơ̆r mă Kră Yang pơma đơ̆ng lăm tŏk-bŏk ŭnh tơ kơpal kông, lăm năr iĕm oei akŭm.

¹¹Tôm puăn-jĭt năr păng puăn-jĭt măng boih, Kră Yang pơjao ăn kơ inh 'bar hlak tơmo lat, 'bar hlak tơmo tơdrong pơgơ̆p.

¹²Kră Yang khan kơ inh; iung bĕ iĕm, jur mă tĕnh tĕnh, yua kơ lu kon pơlei mă ih chông ba lu sư lĕch đơ̆ng dêh Êyiptơ pơm yoch răm boih; 'nao lăp 'biơ̆ đĕch weh achăng lê̆ trong đơ̆ng Inh bơtho tơtă kơ lu sư; lu sư tuh hling minh pôm rup yang!

¹³Kră Yang khan kơ inh: Inh 'bôh boih kon pơlei 'nâu, jơ̆ minh adrĕch arăng kơ̆l.

¹⁴Lê̆ Inh pơlôch pơđĭ lu sư păng sŭt lê̆ anăn lu sư đơ̆ng lăm teh đak âu, đơ̆ng noh inh gô pơm ăn kơ ih jing minh adrĕch pran kơtang păng lơ kơdrâ̆m hloh kơ lu sư.

¹⁵Inh hăt hot jur đơ̆ng kông, kông ŭnh oei sa; 'bar pah tơpang ti inh chĕp 'bar hlak tơmo lat tơdrong pơgơ̆p.

¹⁶Inh lăng 'bôh lu iĕm pơm yoch blah Kră Yang 'Bok Kei-Dei lu iĕm, 'nao lăp 'biơ̆ đĕch lu iĕm weh achăng lê̆ trong Kră Yang bơtho pơkă, tuh man pơm kơdih iĕm minh pôm rup kon rơmo.

¹⁷Inh chĕp 'bar hlak tơmo lat noh, klơ̆m lê̆ 'bar hlak tơmo lat noh pơchah hĕch 'bơ̆t anăp lu iĕm.

¹⁸Yua kơ lu iĕm pơm kơnê̆, pơm tơdrong yoch tih 'bơ̆t anăp Kră Yang che bơle tơblĕk Sư, na inh drap kơkuh 'bơ̆t anăp Kră Yang lăm puăn-jĭt năr păng puăn-jĭt măng thoi adrol ki, ưh kơ đei sŏng sa păng ưh kơ đei nhă.

¹⁹Inh hli kơ Kră Yang blĕk hil mĭl dĭng mah Sư wă pơlôch pơgoh lu iĕm: Mă-lei Kră Yang oei mơ̆ng nơ̆r inh mơ̆n.

²⁰Kră Yang kư̆m blĕk hil dêh kơ Arôn, mah truh kơ wă pơlôch sư; inh kư̆m krao khan ăn kơ Arôn lăm kơplah noh.

²¹Đơ̆ng noh inh iŏk tơmam, rup kon rơmo mă lu iĕm pơm păng soh lê̆ lăm ŭnh, teh pơhĕch lê̆, dĭng thoi 'mui teh; đơ̆ng noh inh tuh hŭt lê̆ 'mui noh lăm glung đak ro đơ̆ng kông.

²²Lu iĕm kư̆m đei pơm tơblĕk Kră Yang tơ Tabêra, tơ Masa păng tơ Kirôt, Hatawa.

²³Kơplah Kră Yang athei lu iĕm weh đơ̆ng Kades Barnêa, pơkă khan: Năm iŏk bĕ dêh mă Inh ăn kơ lu iĕm, mă-lei lu iĕm blah plơ̆ Kră Yang 'Bok Kei-Dei lu iĕm tơtă, ưh kơ lui kơ Sư păng ưh kơ chu mơ̆ng kiơ̆ nơ̆r Sư ôh.

²⁴Đơ̆ng năr inh băt kơ lu iĕm truh dang ei inh 'bôh lu iĕm ling-lang pơma blah Kră Yang.

²⁵Thoi noh Kră Yang khan Sư wă pơlôch đĭ lu iĕm. Na inh đei drap bon kơkuh 'bơ̆t anăp Kră Yang lăm puăn-jĭt năr păng puăn-jĭt măng boih.

²⁶Inh krao khan apinh thoi âu: Ơ Kră Yang mơsêh mơyang, apinh Ih 'nĕ kơ pơlôch kon pơlei Ih, noh jơ̆ tơmam Ih, đei dŏng pơklaih lu sư chông ba lu sư lĕch hlôi boih đơ̆ng dêh Êyiptơ hăm tơpang ti mơsêh pran kơtang Ih.

²⁷Apinh Ih 'blŏk kơ lu đĭch đam Ih, Abraham, Isăk păng Jakôp; păng 'nĕ pă jô̆ dôm tơdrong kơ chu arăng kơ̆l, tơdrong yoch kơnê̆ lu kon pơlei 'nâu.

²⁸Tơdah ưh lei kon pơlei dêh Êyiptơ gô khan; Kră Yang ưh kơ chông ba lu kon pơlei noh wă mơ̆t tơ dêh Sư pơkă, yua kơ Sư areh kơ lu sư, na chông wă pơlôch lu sư tơ lăm char glă.

²⁹Kon pơlei pơla âu jơ̆ kon pơlei Ih păng tơmam Ih, lu bơngai mă Ih hlôi yua tơdrong mơsêh pran kơtang tih chông tơlĕch lu sư đơ̆ng dêh Êyiptơ.