Read bahnar Yo 1 Bible Online

Yo 1 - bahnar bible

Yo 1

¹Đei minh 'nu Sư dang nơ̆r 'Bok Kei-Dei, Sư jur tơ bơ̆n wă kơ bơ̆n hlôh tơdrong 'Bok Kei-Dei. Đơ̆ng blŭng-a sơ̆ tam đei plĕnh teh, Sư đei boih. Sư oei hơdai păng Kră Yang 'Bok Kei-Dei, mă Sư kư̆m Kră Yang 'Bok Kei-Dei mơ̆n.

²Kơlih kơ Sư oei hơdai păng Kră Yang 'Bok Kei-Dei đơ̆ng sơ̆ boih,

³na Sư kư̆m gơh pơjing tôm tơdrong. Ưh kơ đei bu nai pơjing ôh, 'Bă Sư pơjao ăn kơ Sư pơjing tôm tơdrong.

⁴Kơlih kơ Sư gơh pơjing tôm tơdrong arih thoi noh, na Sư tơbăt ăn kơ kon bơngai tơdrong 'Bok Kei-Dei thoi lĕ kơ hơdah măt 'năr pơchrang jơ̆p-jang kơ teh.

⁵Sư pơchrang kơ lu bơngai mă oei lăm măng mu, lu bơngai oei lăm măng mu ưh kơ gơh pĭt tŭk tơdrong hơdah Sư.

⁶Thoi noh na 'Bok Kei-Dei wơh minh 'nu bơngai, anăn sư Yôhan,

⁷wă kơ Yôhan pơtruh kơ đe tơdrong bơngai pơchrang hơdah ei. Yôhan pơtruh kơ đe tơdrong bơngai hơdah ei wă kơ đĭ-đăng bơngai lui kơ bơngai mă pơchrang hơdah ei.

⁸Yôhan sư ưh kơ sĭ bơngai mă hơdah dang măt 'năr ei ôh, sư bơngai 'Bok Kei-Dei wơh wă pơtruh kơ đe tơdrong bơngai pơchrang hơdah ei.

⁹Bơngai mă hơdah dang măt 'năr ei, Sư pơchrang hơdah kơ đĭ-đăng bơngai wă kơ đĭ-đăng bơngai băt tơdrong 'Bok Kei-Dei. Bơngai mă hơdah ei, hơtai ei sơ̆ Sư jur tơ ala teh âu tơ'bôh kơ đe tơdrong hơdah Sư.

¹⁰Teh bơ̆n âu đơ̆ng Sư pơjing mơ̆n, na kơplah Sư oei tơ ala teh âu sơ̆ lu bơngai ala teh âu ưh kơ băt kơ Sư.

¹¹Sư jur tơ teh đak Sư kơdih, mă-lei lu buăl Sư ưh kơ wă sơng iŏk Sư.

¹²Na dôm lu bơngai mă sơng iŏk Sư tơpă păng dôm lu bơngai lui kơ Sư, Sư ăn kơ lu bơngai 'noh jing kon 'Bok Kei-Dei.

¹³Lu sư jing kon 'Bok Kei-Dei, kơlih kơ 'Bok Kei-Dei ăn, ưh kơ sĭ kiơ̆ kơ krung kơtum adrĕch adrung kon bơngai ôh.

¹⁴Yêsu Krist dang nơ̆r 'Bok Kei-Dei, Sư jur jing kon bơngai. Sư oei hơdai păng kon bơngai bơ̆n. Bơngai bơ̆n 'bôh Sư gơh pơm tơdrong mơsêh mơyang; Sư 'noh boih Kon pôm 'Bok Kei-Dei tơpă; Sư 'mêm mơnat kơ bơ̆n, pơklaih bơ̆n đơ̆ng tơdrong yoch păng tơbăt ăn kơ bơ̆n tơdrong 'Bok Kei-Dei tơpă.

¹⁵Hơtai ei sơ̆, Yôhan bơtho tơdrong Yêsu Krist 'bơ̆t anăp đe tơpôl lơ. Sư pơma re bơtho đe thoi âu: “Gah 'Bok âu boih inh bơtho iĕm sơ̆, 'Bok mă inh khan gô truh đơ̆ng rŏng inh, Sư tih hloh kơ inh tơpă. Inh tơpŭ sơ̆, Sư đei hơdrol loi kơ inh boih.”

¹⁶Sư 'mêm mơnat đĭ-đăng kơ bơ̆n, pơklaih bơ̆n đơ̆ng tơdrong yoch păng tơgŭm bơ̆n lăm tôm tơdrong tơpă.

¹⁷Môis ată kơ bơ̆n tơdrong juăt đơ̆ng nơ̆r 'Bok Kei-Dei, na Yêsu Krist pơklaih bơ̆n đơ̆ng tơdrong yoch păng tơbăt ăn kơ bơ̆n tơdrong 'Bok Kei-Dei tơpă.

¹⁸Kră Yang 'Bok Kei-Dei, ưh kơ đei bu gơh 'bôh Sư, lăp minh 'nu Kon pôm Sư đĕch 'bôh Sư păng oei hơdai Sư tơpă. Kon Sư tơbăt ăn kơ bơ̆n tơdrong 'Bă Sư.

¹⁹Bơngai Juđê wơh lu 'bok soi păng lu bơngai Lêwi mă jang lăm hnam akŭm 'Bok Kei-Dei tơm năm đơ̆ng Pơlei Jêrusalem tơ Pơlei Bethani pah to krong Jôrđăn wă jet lăng Yôhan. Chă Yôhan 'bôh boih na jet thoi âu: “Ih bu mă tơpă?”

²⁰Yôhan roi tơpăt hloi ưh kơ ôn ôh. Sư khan: “Inh ưh kơ sĭ 'Bok Krist mă 'Bok Kei-Dei wơh wă pơgơ̆r kon bơngai ôh.”

²¹Lu sư jet dơ̆ng: “Lei hăm trŏ kơ ih Êli bơngai mă pơtruh nơ̆r 'Bok Kei-Dei sơ̆?” Yôhan khan: “Ưh ôh.” “Lei hăm trŏ kơ ih bơngai pơtruh nơ̆r 'Bok Kei-Dei mă nhôn chang gô đơ̆ng sơ̆?” Yôhan khan: “Ưh mơ̆n.”

²²Lu sư jet dơ̆ng: “Lei ih bu? Ih khan kơ nhôn mă tơpăt wă kơ nhôn gơh roi kơ lu bơngai mă wơh nhôn năm jet ih. Na ih khan mă tơpăt, ih bu mă tơpă?”

²³Yôhan khan kơ lu sư: “Inh bơngai mă bơtho tơ char glă athei hơmet trong Kră Yang mă tơpăt dang khan tơbral kơdih tơdrong yoch, yua kơ Sư wă truh tơ bơ̆n boih kư̆m thoi Êsai khan lê̆ hơdrol sơ̆.”

²⁴Lu bơngai mă năm jet Yôhan noh đơ̆ng bơngai Pharisi wơh lu sư.

²⁵Lu sư jet dơ̆ng Yôhan thoi âu: “Ih ưh kơ sĭ 'Bok Krist, ưh kơ sĭ Êli păng ih kư̆m khan ưh kơ sĭ 'bok pơtruh nơ̆r 'Bok Kei-Dei noh, lei ih bu? Liơ ih gơh pơm kơ đe 'batem?”

²⁶Yôhan khan: “Inh pơm kơ đe 'batem păng đak đĕch. Na lăm bơ̆n dang ei đei minh 'nu bơngai, Sư 'Bok tih tơpă, sơmă iĕm ưh kơ kơnăl kơ Sư.

²⁷Sư boih 'Bok mă truh đơ̆ng rŏng kơ inh, Sư 'Bok tih hloh kơ inh tơpă. Mă khan athei inh yaih ăn tơlei chơkhŏ Sư, inh kư̆m ưh kơ hơnhŏ 'mơ̆i, inh ưh kơ pơ̆n ngơk lăng Sư ôh.”

²⁸Lu bơngai ei jet Yôhan gah tơdrong âu tơ Pơlei Bethani, pah to krong Jôrđăn mă đêl anih Yôhan pơm kơ đe 'batem.

²⁹Năr đơ̆ng rŏng dơning dơ̆ng, Yôhan 'bôh Yêsu thar năm tơ sư, na Yôhan khan kơ đe: “Iĕm lăng bĕ, 'Bok to 'noh boih Kon Triu 'Bok Kei-Dei, 'Bok 'noh boih pơklaih yoch bơngai jơ̆p-jang kơ teh đak.

³⁰'Bok 'noh boih inh krô nŏng roi kơ iĕm: ‘'Bok mă truh đơ̆ng rŏng kơ inh Sư tih hloh kơ inh tơpă; inh tơpŭ sơ̆, Sư đei hơdrol loi kơ inh boih.’

³¹Sơ̆ inh ưh kơ kơnăl kơ Sư, sơmă truh inh wă pơm kơ đe 'batem, na inh wă kơ lu bơngai Isơrael băt kơ Sư, na inh pơm kơ lu sư 'batem păng đak.”

³²Yôhan roi kơ đe thoi âu: “Inh 'bôh Yang Bơhngol 'Lơ̆ng jur đơ̆ng plĕnh thoi sem kơtơp jruh kơpal Sư.

³³Hơdrol kơ 'noh ki inh kư̆m tam mă băt kơ Sư mơ̆n, sơmă 'Bok Kei-Dei wơh inh pơm kơ đe 'batem păng đak păng Sư đei khan kơ inh thoi âu: ‘Ih gô 'bôh Yang Bơhngol 'Lơ̆ng jur oei kơpal minh 'nu bơngai, bơngai 'noh boih pơm kơ đe 'batem phara yua kơ Sư ăn Yang Bơhngol 'Lơ̆ng oei hơdai păng kon bơngai.’

³⁴Inh 'bôh tơpă Yang Bơhngol 'Lơ̆ng jur oei kơpal minh 'nu bơngai, na inh khan kơ iĕm tơpăt, bơngai 'noh boih Kon 'Bok Kei-Dei tơpă.”

³⁵Năr đơ̆ng rŏng dơning Yôhan dơ̆ng hơdai păng 'bar 'nu bơngai pơhrăm păng sư.

³⁶Na lu sư 'bôh Yêsu yak brih lu sư. Na Yôhan khan: “Sư 'noh boih Kon Triu 'Bok Kei-Dei”

³⁷'Bar 'nu bơngai mă pơhrăm păng Yôhan kơtơ̆ng sư khan thoi noh, bre sư năm kiơ̆ Yêsu hloi.

³⁸Yêsu hue tơ rŏng 'bôh bre ei kiơ̆ Sư, na Sư jet: “Biĕm chă kiơ?” Bre sư khan: “Ơ 'Bok Thây, Ih oei tơ yơ?”

³⁹Yêsu khan kơ bre sư: “Lei bĕ biĕm kiơ̆ năm lăng anih Inh.” Na bre sư kiơ̆ năm lăng 'bôh tơpă anih hnam Sư. Kơplah ei dang puăn jơ kơsơ̆. Bre sư oei hơdai Sư lăm năr 'noh đĕch.

⁴⁰'Bar 'nu bơngai pơhrăm mă kơtơ̆ng Yôhan khan thoi noh na kiơ̆ lăng hloi anih Yêsu ei, minh 'nu anăn sư Andrê. Sư oh Simôn.

⁴¹Na Andrê năm chă 'nhŏng sư Simôn, roi kơ 'nhŏng sư khan: “Nhôn 'bôh boih 'Bok Mêsi.” 'Bok Mêsi wă khan 'Bok Krist mă 'Bok Kei-Dei wơh wă pơgơ̆r kon bơngai.

⁴²Thoi noh na Andrê anhăk 'nhŏng sư Simôn năm tơ Yêsu. Yêsu lăng sư păng khan: “Ih Simôn kon Yôhan, na dang ei Inh wă anăn ih Sêphaih.” Sêphaih noh nơ̆r Juđê, kiơ̆ nơ̆r Grĕk sư khan Pêtrôs. (Nơ̆r Pêtrôs noh wă khan tơmo.)

⁴³Năr đơ̆ng rŏng dơning dơ̆ng Yêsu wă năm tơ dêh Galilê, na Sư chă Philip pơtơm năm kiơ̆ Sư khan: “Năm kiơ̆ Inh bĕ.”

⁴⁴Philip sư bơngai đơ̆ng Pơlei 'Betsaiđa. Andrê hăm Pêtrôs kư̆m pơlei 'noh mơ̆n.

⁴⁵Philip năm roi kơ Nathanel khan: “Nhôn 'bôh boih Yêsu kon 'bok Yôsep Pơlei Nasaret, bơngai ei mă Môis chih roi lăm sơ̆p hla bơar tơdrong juăt bơ̆n păng lu 'bok pơtruh nơ̆r 'Bok Kei-Dei kư̆m chih roi lê̆ hơdrol kơ bơ̆n đơ̆ng sơ̆.”

⁴⁶Na Nathanel khan: “Lơliơ? Tam mă biơh đei bơngai bu pơm tih đơ̆ng lăm Pơlei Nasaret ôh.” Na Philip khan dơ̆ng kơ sư: “Na ih jah năm lăng Sư deh wă kơ ih băt kơ Sư thoi yơ.”

⁴⁷Lăp Yêsu 'bôh Nathanel năm tơ Sư, na Sư khan: “Ih boih bơngai Isơrael tơpă. Ih đei đon 'lơ̆ng tơpăt ưh kơ đei layơ hơlĕnh kơ đe.”

⁴⁸Nathanel khan: “Ơ 'Bok Thây, lơliơ Ih băt kơ inh bơngai thoi ei lĕ?” Yêsu khan kơ sư: “Inh băt tơpă păng Inh kư̆m 'bôh ih ngôi 'bơ̆t tơm 'long hơra hơdrol kơ Philip tam năm roi kơ ih hei.”

⁴⁹Nathanel khan kơ Sư dơ̆ng: “Ơ 'Bok Thây, lei Ih boih Kon Kră Yang 'Bok Kei-Dei, Ih Pơtao bơngai Isơrael tơpă.”

⁵⁰Yêsu khan: “Đon ih lui thoi noh kơlih kơ Inh khan kơ ih Inh 'bôh ih ngôi 'bơ̆t tơm 'long hơra. Mă-lei ning-mônh ih gô 'bôh lơ tơdrong mơsêh mơyang tih hloh loi kơ 'noh dơ̆ng.”

⁵¹Yêsu khan kơ lu sư: “Inh khan kơ iĕm tơpă, ning-mônh iĕm gô 'bôh plĕnh tơpơih na iĕm 'bôh lu linh jang 'lơ̆ng 'Bok Kei-Dei jur tơ Inh Kon Bơngai păng iĕm kư̆m 'bôh lu sư tŏk tơ plĕnh.”