Read bahnar Yo 10 Bible Online

Yo 10 - bahnar bible

Yo 10

¹Yêsu oei pơma kơ lu sư thoi âu: “Inh khan kơ iĕm tơpăt tơpă, bơngai bu mơ̆t tơ hơdrong triu mă ưh kơ mơ̆t trong 'măng tơm, na hao trong war, bơngai 'noh sư chă tơtông.

²Bơngai mă mơ̆t trong 'măng tơm, bơngai 'noh sư tơ'ngla triu.

³Na bơngai gak 'măng pơih ăn kơ tơ'ngla sư 'măng hloi. Mă triu kư̆m kơnăl kơ 'bơ̆r tơ'ngla sư mơ̆n. Na tơ'ngla sư krao tôm kơ anăn lu sư, na tơlĕch lu sư kiơ̆ tơ'ngla sư lĕch tơ 'ngoaih.

⁴Lăp tơ'ngla sư tơlĕch triu sư tôm đĭ tơ 'ngoaih boih, na sư yak hơdrol kơ triu sư, na triu sư kiơ̆ đơ̆ng rŏng, yua kơ triu sư kơnăl kơ 'bơ̆r tơ'ngla sư.

⁵Lu triu ei ưh kơ kiơ̆ bơngai tơmoi ôh. Sư kơdâu jăk đơ̆ng bơngai tơmoi yua kơ sư ưh kơ băt kơ 'bơ̆r bơngai tơmoi.”

⁶'Noh Yêsu pơma pơtih gia kơ lu bơngai Juđê ră, mă-lei lu sư ưh kơ hlôh Yêsu bơtho tơdrong noh.

⁷Thoi noh Yêsu bơtho kơ lu sư thoi âu dơ̆ng: “Inh khan kơ iĕm tơpăt, triu wă mơ̆t lăm hơdrong, sư athei mơ̆t trong 'măng. Na Inh thoi 'măng hơdrong, lu bơngai wă oei păng 'Bok Kei-Dei, lu sư athei mơ̆t trong Inh, noh wă khan athei lui kơ Inh.

⁸Đĭ-đăng bơngai truh hơdrol kơ inh khan wă wei-lăng triu, lu sư dang bơngai chă tơtông ngăl mă-lei triu ưh kơ kiơ̆ lu sư ôh.

⁹Inh thoi 'măng hơdrong, bơngai bu mơ̆t trong Inh, lui kơ Inh, sư gô klaih đơ̆ng tơdrong yoch. Sư gơh mơ̆t păng gơh lĕch chă sa ưh kơ hli tơdrong kiơ.

¹⁰Bơngai chă tơtông truh, sư wă tơtông iŏk đĕch păng wă pơrăm đĕch. Mă-lei inh truh tơ âu wă ăn kơ triu arih păng hiôk chơt tơpă.

¹¹“Inh bơngai wei triu 'lơ̆ng tơpăt. Inh chu lôch yua kơ triu Inh.

¹²Gah bơngai wei triu mă ưh kơ tơ'ngla triu ei, sư bơngai jang đĕch; bơngai 'noh lăp sư 'bôh kŏ-so truh sư achăng lê̆ triu ei, na akâu sư jăk hloi tơ nai. Lu triu ei mơ'nah kŏ-so rôp, mơ'nah jăk tơklah tơklang.

¹³Bơngai ei kơdâu jăk yua kơ sư bơngai jang đĕch, sư ưh kơ 'mêm kơ triu ôh.

¹⁴Gah Inh bơngai wei triu 'lơ̆ng tơpăt păng brĕ tơpă. Inh băt kơ triu Inh, triu Inh băt kơ Inh mơ̆n,

¹⁵kư̆m thoi 'Bă Inh băt kơ Inh, na Inh băt kơ Sư mơ̆n. Na Inh athei chu lôch yua kơ triu Inh.

¹⁶Inh đei mơ̆n triu khŭl nai, mă-lei ưh kơ trŏ khŭl Juđê âu ôh. Na Inh athei iŏk triu khŭl nai ei. Lu triu ei gô lui kơ Inh păng băt kơ 'bơ̆r Inh pơma mơ̆n. Na triu ei păng triu tơpôl âu lu sư gô jing minh tơpôl lơ kiơ̆ minh 'nu Inh wei-lăng.

¹⁷“'Bă Inh 'mêm kơ Inh kơlih Inh chu ăn akâu Inh lôch, na Sư gô tơiung arih dơ̆ng.

¹⁸Dah Inh ưh kơ ăn, ưh kơ đei bu gơh pơlôch Inh ôh. Inh lôch yua Inh wă kơdih Inh đĕch. Inh gơh ăn akâu Inh lôch, Inh gơh ăn akâu Inh iung arih; noh đơ̆ng 'Bă Inh pơkă, na Inh pơm thoi noh.”

¹⁹Yêsu bơtho thoi noh lu bơngai Juđê tơklah băl đon gah tơdrong Yêsu.

²⁰Đei lơ bơngai mơ'nah khan: “Iĕm 'maih mơ̆ng kiơ kơ Sư, noh Sư bơngai yang mơ̆t pơm kơ Sư wơnh?”

²¹Lu bơngai mơ'nah dơ̆ng khan: “Bơngai yang mơ̆t ưh kơ gơh bơtho thoi noh ôh. Lơliơ yang kơnê̆ gơh pơm bơngai măt tol gơh 'bôh hơdah?”

²²Hơtai ei tơ Pơlei Jêrusalem năr đe pơm giĕng lu bơngai Juđê. Pơm giĕng ei đe wă kơ 'blŏk hơdơ̆r kơ năr đe pơyơ̆r hnam akŭm 'Bok Kei-Dei tơm sơ̆.

²³Hơtai ei bơyan puih tơngiĕt. Na Yêsu nơnăm lăm pra Sôlômôn, lăm hnam akŭm 'Bok Kei-Dei tơm.

²⁴Kơplah noh lu bơngai Juđê năm akŭm tăp dăr kơ Sư păng jet Sư thoi âu: “Đunh tơpă boih Ih oei chĭt lê̆ đon nhôn gueo sơleng. Dah Ih 'Bok Krist mă 'Bok Kei-Dei wơh wă pơgơ̆r nhôn Ih jah roi kơ nhôn bĕ wă kơ nhôn băt kơ Ih.”

²⁵Yêsu khan kơ lu sư thoi âu: “Inh khan kơ iĕm boih mă iĕm ưh kơ wă lui. Dôm tơdrong mơsêh mơyang 'Bă Inh ăn kơ Inh pơm tơ'bôh ăn kơ iĕm ră wă kơ iĕm băt kơ Inh âu 'Bok Krist.

²⁶Mă-lei lu iĕm kuă kơ lui, kơlih lu iĕm ưh kơ trŏ kơ triu Inh.

²⁷Dah iĕm triu Inh tơpă lei iĕm băt kơ 'bơ̆r Inh pơma hloi păng Inh kư̆m băt kơ iĕm mơ̆n, na iĕm kiơ̆ Inh hloi.

²⁸Inh ăn kơ triu Inh arih ling-lang, sư ưh kơ layơ lôch răm ôh. Ưh kơ đei bu kĕ tơgar iŏk sư đơ̆ng ti Inh.

²⁹Lu triu 'Bă Inh mă ăn kơ Inh ei, 'Bok ei boih tih hloh kơ dôm lu yang nai, na ưh kơ đei bu kĕ tơgar iŏk lu sư đơ̆ng ti 'Bă Inh ôh.

³⁰Nhi 'Bă Inh dang minh 'nu akâu đĕch.”

³¹Na lu bơngai Juđê kơtơ̆ng Sư khan thoi noh, lu sư iŏk tơmo wă klơ̆m pơlôch Sư ră.

³²Na Yêsu khan hloi: “Iĕm 'bôh Inh pơm lơ tơdrong mơsêh 'lơ̆ng ngăl boih. 'Bă Inh ăn kơ Inh pơm dôm tơdrong noh. Na iĕm wă klơ̆m Inh păng tơmo yua kơ Inh pơm dôm tơdrong 'lơ̆ng mă 'Bă Inh ăn kơ Inh pơm noh hă?”

³³Lu bơngai Juđê khan: “Nhôn ưh kơ klơ̆m Ih ôh gah tơdrong pơm 'lơ̆ng, mă-lei nhôn wă klơ̆m păng tơmo yua kơ Ih pơma tih kơ 'Bok Kei-Dei. Ih kon bơngai đĕch, mă Ih khan Ih atŏ păng 'Bok Kei-Dei.”

³⁴Yêsu khan kơ lu sư: “Lăm sơ̆p hla bơar 'Bok Kei-Dei đei chih khan, 'Bok Kei-Dei anăn lu kơdră bơ̆n sơ̆ khan sư kư̆m dang yang mơ̆n.

³⁵Bơ̆n băt sơ̆p hla bơar 'Bok Kei-Dei pơma trŏ tơpăt, na 'Bok Kei-Dei khan kơ lu kơdră bơ̆n mă Sư ăn jang tơdrong Sư sơ̆ khan sư dang yang.

³⁶Na lơliơ iĕm khan Inh pơma tih kơ 'Bok Kei-Dei Inh khan Inh Kon 'Bok Kei-Dei, yua kơ 'Bă Inh ăn kơ Inh jang tơdrong Sư tơpă păng wơh Inh jur tơ ala teh âu.

³⁷Dah Inh ưh kơ pơm tơdrong mơsêh mơyang đơ̆ng 'Bă Inh ăn lei trŏ tơpă iĕm ưh kơ wă lui kơ Inh.

³⁸Iĕm kuă kơ lui kơ nơ̆r Inh bơtho, mă-lei iĕm athei lui kơ dôm tơdrong mơsêh mơyang Inh pơm krô hmă noh hŏ, yua kơ đơ̆ng 'Bă Inh tơpă. Dah iĕm lui iĕm gô băt tơpă 'Bă Inh oei lăm Inh, nhi 'Bă Inh minh jơhngơ̆m minh đon.”

³⁹Thoi noh lu bơngai Juđê wă rôp Sư ră, mă-lei Sư jăk hloi đơ̆ng anih noh.

⁴⁰Klaih kơ noh Yêsu tŏk pah to krong Jôrđăn. Sư năm tơ anih Yôhan juăt pơm 'batem kơ đe sơ̆ na Yêsu oei tơ ei.

⁴¹Đei lơ bơngai năm tơ Yêsu tơ ei. Lu sư khan: “Yôhan ưh kơ pơm tơdrong mơsêh mơyang ôh, mă-lei sư khan tôm tơdrong gah Yêsu trŏ tơpă.”

⁴²Na đei lơ bơngai lui kơ Yêsu tơ ei.