Read bahnar Yo 12 Bible Online

Yo 12 - bahnar bible

Yo 12

¹Tơdrâu năr hơdrol kơ Năr Giĕng Năm Brih ei, na Yêsu năm tơ Pơlei Bethani. Pơlei ei pơlei Lasarơ mă Yêsu tơiung arih sư đơ̆ng lôch.

²Na đe hơmet tơmam sŏng sa kơ Sư. Mathê awih awăn kơ lu sư tơmam sa. Lasarơ kư̆m sŏng sa hơdai păng Yêsu mơ̆n.

³Mari chĕp minh gŏl đak pơgang 'bâu phu. Pơgang ei đe gĭt tơpă dang minh puăt kilô. Na Mari tuh 'bơ̆t jơ̆ng Yêsu; sư sut jơ̆ng Yêsu hăm sŏk sư kơdih na pơgang ei 'bâu jơ̆p-jang lăm hnam.

⁴Na Juđa đơ̆ng Pơlei Ikariôt bơngai pơhrăm păng Yêsu mơ̆n, mă sư wă plơ̆ plĕch kơ Yêsu đơ̆ng rŏng kơ noh, sư khan:

⁵“Pơgang 'bâu phu âu kăp pêng-hrĕng hlak jên hu. Lơliơ sư ưh kơ wă tĕch chă jên asong kơ lu bơngai dơnuh hin?”

⁶Juđa khan thoi noh ưh kơ sĭ sư mơnat kơ lu bơngai dơnuh hin tơpă ôh. Sư bơngai wei kơdŭng jên tơpôl lu sư păng sư bơngai tơtông mơ̆n. Phŏ phŏ sư tơtông iŏk jên đơ̆ng kơdŭng ei.

⁷Yêsu khan: “Ơ Juđa, lê̆ sư pơm thoi noh boih, yua kơ hơdrol kơ Inh wă lôch na sư tuh pơgang 'bâu phu thoi đe tuh kơ bơngai lôch kơplah đe wă 'bŭ hmă.

⁸Lu bơngai dơnuh hin sư oei hơdai hăm iĕm ling-lang tơ ala teh âu, mă-lei Inh âu ưh kơ oei hơdai hăm iĕm ling-lang ôh.”

⁹Thoi noh na lơ bơngai Juđê kơtơ̆ng ang khan Yêsu oei tơ Pơlei Bethani, na lu sư năm tơ ei. Lu sư năm tơ ei wă kơ 'bôh Yêsu păng wă kơ 'bôh akâu Lasarơ mă Yêsu tơiung arih sư đơ̆ng lôch.

¹⁰Lu 'bok soi tih chă đon wă pơlôch Lasarơ mơ̆n,

¹¹kơlih đơ̆ng sư na đei lơ bơngai Juđê achăng lê̆ lu kră sư, na lui kiơ̆ gah Yêsu.

¹²Năr dơning dơ̆ng, lu bơngai tơpôl lơ mă đêl năm hơpong Năr Giĕng Năm Brih, lu sư kơtơ̆ng ang Yêsu wă năm tơ Pơlei Jêrusalem.

¹³Lu sư pĕch iŏk dơng hla gao na năm đih sơng Sư. Lu sư pơma 'bơ̆r re khan: “Hôsana, bơnê kơ 'Bok Kei-Dei. Bơnê kơ Yêsu Pơtao Isơrael truh tơ bơ̆n yua kơ Kră Yang wơh.”

¹⁴Yêsu iŏk minh pôm aseh iĕ dăm na hao hloi aseh iĕ ei. 'Noh trŏ thoi đe chih khan lê̆ hơdrol lăm sơ̆p hla bơar 'Bok Kei-Dei sơ̆ thoi âu:

¹⁵“Ơ kon pơlei pơla Jêrusalem, iĕm 'nĕ kơ hli, yua kơ Pơtao iĕm wă mơ̆t tơ pơlei iĕm, Sư hao minh pôm aseh iĕ dăm.”

¹⁶Hơtai ei lu bơngai pơhrăm păng Sư ưh kơ tơchĕng tơdrong âu pơma roi gah tơdrong Yêsu năm tơ Pơlei Jêrusalem. Mă-lei đơ̆ng rŏng kơ Yêsu lôch iung arih tŏk tơ plĕnh lu sư 'blŏk hơdơ̆r tơdrong đe chih noh. Na lu sư băt boih tơdrong noh roi kơ Sư mơ̆t tơ Pơlei Jêrusalem.

¹⁷Lu bơngai mă oei hơdai păng Yêsu ki, lu sư 'bôh Yêsu tơiung arih Lasarơ đơ̆ng bơsat, na lu sư kư̆m ư-ang roi tơdrong noh kơ bôl buăl nai mơ̆n.

¹⁸Lu kon pơlei pơla kơtơ̆ng ang tơdrong Yêsu pơm mơsêh mơyang thoi noh, kơlih thoi noh na lu sư đih sơng Yêsu kơplah Sư wă mơ̆t tơ Pơlei Jêrusalem.

¹⁹Thoi noh boih, na lu bơngai Pharisi ơh klai. Lu sư pơma khan dih băl: “Iĕm lăng, ưh pă jei bơ̆n tơpă boih; dang ei đĭ-đăng kon bơngai kiơ̆ Sư ngăl.”

²⁰Đei bơngai Grĕk năm tơ Pơlei Jêrusalem hơpong kơ năr giĕng ei păng mơ̆t kơkuh kơ 'Bok Kei-Dei.

²¹Lu đe ei năm tơ Philip bơngai đơ̆ng Pơlei 'Betsaiđa lăm dêh Galilê. Lu sư năm apinh Philip: “Ơ 'bok, nhôn wă tơ'bơ̆p Yêsu.”

²²Philip năm khan kơ Andrê, na bre sư năm khan kơ Yêsu.

²³Na Yêsu pơma hloi gah tơdrong Sư wă lôch iung arih thoi âu: “Dang ei trŏ năr 'Bok Kei-Dei wă pơư pơang Inh Kon Bơngai tơpă boih.

²⁴Inh khan kơ iĕm tơpă, dah bơ̆n 'măn lê̆ adrĕch 'ba lăm kŭ ling-lang, sư ưh kơ chăt đei plei dơ̆ng ôh. Mă-lei dah bơ̆n rei sư tơ teh, bơ̆n lăng nhen lôch hiong, mă-lei găr lăm to sư gô chăt păng gô đei plei trem.

²⁵Bơngai bu 'mêm kơ akâu sư kơdih, akâu sư 'noh gô hiong. Mă-lei bơngai bu ưh kơ 'mêm kơ akâu sư kơdih ala teh âu, sư 'noh gô arih ling-lang hơdai păng 'Bok Kei-Dei.

²⁶Bơngai lui jang tơdrong Inh, sư 'noh athei lui kiơ̆ Inh mă tơpă. Bơngai lui jang tơdrong Inh, sư 'noh gô oei hơdai hăm Inh ling-lang păng 'Bă Inh gô ăn kơ sư tơdrong apah.”

²⁷“Dang ei jơhngơ̆m Inh sơ'ngon 'biơ̆, na Inh wă pơma lơliơ? Dah Inh khan: ‘Ơ 'Bă, apinh Ih 'nĕ ăn tơdrong anat anot âu truh tơ Inh,’ lei ưh kơ trŏ ôh, kơlih kơ 'Bă Inh 'Bok Kei-Dei wơh Inh jur tơ teh âu wă kơ Inh pŭ tơdrong anat anot âu boih.

²⁸Ơ 'Bă, Inh wă kơ Ih pơư pơang anăn Ih bĕ.” Na đei hloi 'bơ̆r tơl đơ̆ng plĕnh ti khan thoi âu: “Inh pơư pơang anăn Inh boih păng Inh gô pơư pơang anăn Inh dơ̆ng.”

²⁹Lu bơngai tơpôl oei 'bơ̆t ei kơtơ̆ng nơ̆r 'noh, lu mơ'nah khan grơ̆m, lu mơ'nah dơ̆ng khan linh jang 'lơ̆ng 'Bok Kei-Dei pơma păng Yêsu.

³⁰Yêsu khan: “'Bơ̆r Sư pơma thoi noh ưh kơ sĭ yua kơ Inh ôh, yua kơ iĕm, wă kơ iĕm băt kơ Inh đơ̆ng 'Bok Kei-Dei tơpă.

³¹Dang ei 'Bă Inh wă sek tơlang tơ ala teh âu, Sư pơpuh yang Satan mă pơgơ̆r teh âu.

³²Lăp đe atol Inh na Inh gô dui iŏk đĭ-đăng bơngai năm tơ Inh ngăl.”

³³Yêsu khan thoi noh wă kơ lu đe ei băt kơ Sư lôch thoi yơ.

³⁴Lu bơngai tơpôl lơ ei khan kơ Yêsu: “Nhôn đŏk lăng lăm sơ̆p hla bơar 'Bok Kei-Dei khan: 'Bok Krist arih ling-lang ưh kơ layơ lôch. Na Ih khan đe gô atol pơlôch Kon Bơngai tơ 'long pơglang. Kon Bơngai ei bu? Ưh kơ sĭ 'Bok Krist hă?”

³⁵Na Yêsu khan kơ lu sư gah akâu Sư kơdih: “Măt 'năr oei pơchrang tơ'bôh ăn kơ iĕm ưh pă đunh boih. Na iĕm athei dah lui kơ Inh dang ei kơplah Inh oei tơ âu, hli kơ măng mu klơ̆p măt iĕm; yua kơ bơngai bu nơnăm lăm măng mu, bơngai 'noh sư ưh kơ 'bôh trong.

³⁶Na Inh âu boih tơdrong hơdah pơchrang ăn kơ iĕm, na iĕm jah lui kơ Inh bĕ, na iĕm oei lăm tơdrong hơdah ling-lang.” Đang Sư bơtho thoi noh boih na Sư weh ôn tơ anih nai.

³⁷Yêsu pơm lơ tơdrong mơsêh mơyang 'bơ̆t anăp lu sư ră, mă-lei lu sư ưh kơ lui kơ Sư.

³⁸'Noh 'blep trŏ tơpă thoi Êsai chih khan lê̆ hơdrol sơ̆ thoi âu: “Ơ Kră Yang, đe ưh kơ lui kơ tơdrong nhôn bơtho; păng đe ưh kơ lui kơ mơsêh mơyang đơ̆ng ti Ih pơm.”

³⁹Lu sư ưh kơ lui kơlih kơ Êsai đei khan lê̆ thoi âu:

⁴⁰“Inh Kră Yang ăn măt lu sư jing tol, păng ăn kơ lu sư arăng kơ̆l, wă kơ măt lu sư ưh kơ gơh 'bôh, păng đon lu sư ưh kơ hlôh. Kơlih kơ thoi noh na lu sư ưh kơ wă wih tơ Inh, wă kơ Inh pơklaih tơdrong yoch lu sư.”

⁴¹Êsai khan thoi noh kơlih kơ 'Bok Kei-Dei tơ'bôh kơ sư 'Bok Krist sơ̆, Sư 'lơ̆ng rŏ tơpă, na Êsai chih roi tơdrong 'Bok Krist.

⁴²Mă-lei kư̆m đei lơ mơ̆n lu kră pơm tih lăm dêh Juđê lui kơ Yêsu. Mă-lei lu sư ưh kơ roi kơ đe tơdrong sư lui ôh, kơlih kơ lu sư hli kơ lu bơngai Pharisi băt kơ lu sư lui, na bơngai Pharisi ưh kơ ăn mơ̆t akŭm lăm hnam akŭm 'Bok Kei-Dei.

⁴³Lu kră ei wă kơ lu bôl buăl sư lăp đon kơ lu sư hloh kơ lu sư wă kơ 'Bok Kei-Dei lăp đon kơ lu sư.

⁴⁴Na Yêsu bơtho 'bơ̆r re khan: “Bơngai bu lui kơ Inh, ưh kơ sĭ sư lui kơ Inh đĕch ôh, sư kư̆m lui kơ 'Bă Inh mă wơh Inh.

⁴⁵Păng bơngai bu 'bôh Inh, sư dang 'bôh 'Bă Inh mă wơh Inh mơ̆n.

⁴⁶Inh jur tơ ala teh âu wă pơchrang hơdah kơ kon bơngai, na đĭ-đăng bơngai mă lui kơ Inh huay kơ oei lăm măng mu ôh.

⁴⁷Bơngai bu mơ̆ng nơ̆r Inh bơtho, mă-lei sư ưh kơ lui, bơngai 'noh Inh ưh kơ sek tơlang sư ôh; kơlih kơ Inh jur tơ ala teh âu ưh kơ sĭ wă sek tơlang kon bơngai ôh. Inh jur tơ ala teh âu wă pơklaih kon bơngai yoch.

⁴⁸Bơngai bu ưh kơ lui kơ Inh, 'Bok Kei-Dei gô phak sư năr tôch ning-mônh, yua kơ sư ưh kơ răk dôm nơ̆r Inh bơtho.

⁴⁹Yua kơ ưh kơ sĭ Inh bơtho tơdrong Inh kơdih ôh. 'Bă Inh mă wơh Inh, Sư pơkă kơ Inh bơtho thoi yơ, na Inh bơtho thoi noh mơ̆n.

⁵⁰Inh băt tơdrong Sư pơkă ăn kơ kon bơngai noh gô ăn kon bơngai arih ling-lang. Dôm tơdrong Inh bơtho đơ̆ng 'Bă Inh ăn kơ Inh ngăl.”