Read bahnar Yo 13 Bible Online

Yo 13 - bahnar bible

Yo 13

¹Năr ei minh năr hơdrol kơ Năr Giĕng Năm Brih. Yêsu băt năr Sư wă jăk đơ̆ng ala teh âu tŏk brŏk tơ 'Bă Sư wă jê̆ truh boih. Sư 'mêm tơpă kơ lu bơngai lui kơ Sư, na Sư khŏm ăn akâu Sư lôch tang bơ̆n.

²Yêsu hăm lu bơngai pơhrăm păng Sư sŏng sa hơdai. Yang Satan pơhlŭ Juđa Ikariôt, kon Simôn, na Juđa wă plơ̆ plĕch kơ Yêsu boih.

³Yêsu băt kơ 'Bă Sư ăn kơ Sư gơh pơm tôm tơdrong. Păng Sư băt Sư kơdih jur đơ̆ng 'Bok Kei-Dei păng wă tŏk tơ 'Bok Kei-Dei dơ̆ng.

⁴Na kơplah noh Yêsu iung plôh ao 'ngoaih Sư păng iŏk kơn chô̆ 'bơ̆t rơhiĕo Sư kơdih.

⁵Klaih kơ noh Sư tuh đak lăm kơthao na ôp jơ̆ng lu bơngai pơhrăm păng Sư, na sut păng kơn mă đêl Sư chô̆ 'bơ̆t rơhiĕo Sư noh.

⁶Lăp truh tơ Pêtrôs, Pêtrôs jet Sư thoi âu: “Ơ 'Bok, Ih wă ôp kiơ kơ jơ̆ng inh?”

⁷Yêsu khan: “Dang ei ih ưh kơ băt Inh wă pơm kơ kiơ, kơnh ih gô băt.”

⁸Pêtrôs khan: “Inh ưh kơ hơnhŏ Ih ôp jơ̆ng inh na inh ưh kơ layơ ăn Ih ôp jơ̆ng ôh.” Yêsu khan: “Dah Inh ưh kơ ôp jơ̆ng ih, lei ih ưh pă pơm jơ̆ng 'bang Inh boih.”

⁹Na Pêtrôs khan: “Ơ 'Bok, lei ưh kơ sĭ Ih ôp jơ̆ng inh đĕch ôh, Ih ôp tôm kơ jơ̆ng ti muh măt inh hloi.”

¹⁰Yêsu khan: “Bơngai bu hum boih, bơngai 'noh sư rơgoh đĭ boih. Sư ưh pă kăl ôp ti 'nhao muh măt sư dơ̆ng ôh. Sư kăl pôm ôp jơ̆ng sư đĕch. Đĭ-đăng kơ iĕm rơgoh ngăl boih, pă minh 'nu ưh kơ rơgoh.”

¹¹Yêsu băt boih gah bơngai wă plơ̆ plĕch kơ Sư. Kơlih kơ thoi noh Sư khan: “Pă minh 'nu ưh kơ rơgoh.”

¹²Sư ôp tôm kơ jơ̆ng lu sư boih, na Sư iŏk hrŭk ao 'ngoaih Sư, na wih tơ anih Sư. Lăm anih Sư ei Sư jet lu đe ei: “Iĕm hăm hlôh Inh pơm kiơ kơ iĕm thoi noh hei?

¹³Iĕm krao Inh 'Bok Thây iĕm păng Yŏng iĕm. Iĕm krao Inh thoi noh bưh mơ̆n yua kơ Inh 'Bok Thây iĕm păng Yŏng iĕm tơpă.

¹⁴Inh 'Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm.

¹⁵Inh ôp jơ̆ng iĕm noh, Inh pơm tơ'bôh kơ iĕm hơdrol wă kơ iĕm pơm kiơ̆ dih băl thoi noh.

¹⁶Inh khan kơ iĕm tơpăt, đĭch ưh kơ lah tih hloh kơ yŏng sư. Bơngai mă đe wơh, ưh kơ lah tih hloh kơ bơngai wơh sư.

¹⁷Na dang ei iĕm băt boih tơdrong 'noh, yua kơ Inh bơtho. Dah iĕm răk tơdrong 'noh lei iĕm gô hiôk chơt tơduă iĕm tơpă.

¹⁸“Inh pơma tơdrong noh, ưh kơ pơma tôm kơ lu iĕm ôh, yua kơ Inh băt lê̆ hơdrol boih dôm lu bơngai mă Inh rơih. Na lăm sơ̆p hla bơar 'Bok Kei-Dei khan: ‘Đei minh 'nu bơngai sŏng sa hơdai păng Inh, sư wă plơ̆ plĕch kơ Inh.’ Yua kơ chih lê̆ hơdrol sơ̆ lăm sơ̆p hla bơar 'Bok Kei-Dei, na dang ei bơ̆n gô 'bôh tơpă.

¹⁹Inh roi kơ iĕm tơdrong sư âu hơdrol kơ sư wă plơ̆ plĕch kơ Inh, wă kơ iĕm lui kơ Inh Kră Yang tơpă.

²⁰Inh khan kơ iĕm tơpă wă kơ iĕm băt: Bơngai bu sơng iŏk bơngai mă Inh wơh, bơngai 'noh dang sơng iŏk Inh. Bơngai bu sơng iŏk Inh, noh dang sư sơng iŏk 'Bă Inh mă wơh Inh.”

²¹Đơ̆ng rŏng kơ Yêsu roi tơdrong 'noh Sư sơ'ngon tơpă na Sư pơma hơdah hloi gah tơdrong 'noh. Sư khan: “Inh khan kơ iĕm tơpăt, đei minh 'nu lăm lu iĕm wă plơ̆ plĕch kơ Inh.”

²²Lu bơngai pơhrăm Sư chă hue lăng dih băl. Lu sư sơleng kơ đon ưh kơ băt bu wă plơ̆ plĕch kơ Sư.

²³Minh 'nu bơngai pơhrăm păng Sư mă Sư 'mêm kơeng tơpă, sư oei jê̆ Yêsu.

²⁴Na Pêtrôs jet bơngai ei khan: “Yêsu khan ei bu wă plơ̆ plĕch kơ Sư?”

²⁵Na bơngai ei rĭ jê̆ Yêsu na pơma jet Yêsu: “Ơ 'Bok, bu wă plơ̆ plĕch kơ Ih ei?”

²⁶Yêsu khan: “Dang ei Inh iŏk 'bĕng mi djrŭ lăm đak 'nhĕm na ăn, bơngai bu iŏk, bơngai ei boih plơ̆ plĕch kơ Inh.” Na Yêsu iŏk 'bĕng mi djrŭ lăm đak 'nhĕm ăn kơ Juđa kon Simôn Ikariôt iŏk.

²⁷Lăp Juđa iŏk 'bĕng mi ei yang Satan mơ̆t lăm jơhngơ̆m sư hloi. Na Yêsu khan kơ Juđa: “Ih jah năm wăi, na ih jah pơm tơdrong ih wă pơm.”

²⁸Lu bơngai pơhrăm păng Yêsu oei sŏng sa hơdai hăm Sư tơ ei ưh kơ hlôh Yêsu khan kơ Juđa tơdrong kiơ.

²⁹Yua kơ Juđa wei-lăng kơdŭng jên lu sư, na lu mơ'nah ngêh kơ Yêsu khan kơ sư năm răt tơmam sa, hiă wă sa lăm năr giĕng ei thâu, dah mơnat ăn kơ bơngai dơnuh kơlĕ.

³⁰Juđa iŏk 'bĕng mi ei na lĕch hloi tơ 'ngoaih. Kơplah ei măng mu yua kơ 'năr mơ̆t boih.

³¹Đơ̆ng rŏng kơ Juđa lĕch na Yêsu khan: “Inh băt kơ dang ei đe gô ư-ang Inh Kon Bơngai. Hăm đe gô ư-ang kơ 'Bă Inh 'Bok Kei-Dei ăn Inh lôch tang kon bơngai.

³²Kơlih kơ đe ư-ang kơ 'Bok Kei-Dei ăn Inh lôch tang kon bơngai, na 'Bok Kei-Dei wă ăn kơ đe ư-ang Inh Kon Bơngai. Sư wă ăn kơ đe ư-ang Inh dang ei boih.

³³“Ơ tơpôl lu dăm, Inh oei hơdai hăm iĕm ưh pă đunh boih. Iĕm gô chă Inh; kư̆m thoi Inh khan kơ lu bơngai Juđê ki, lu iĕm ưh kơ gơh truh tơ anih Inh ôh.

³⁴Na dang ei Inh wă pơkă ăn kơ iĕm tơdrong 'nao âu: Inh wă kơ iĕm băt 'mêm mơnat dih băl. Iĕm athei băt 'mêm mơnat dih băl kư̆m thoi Inh 'mêm mơnat kơ iĕm.

³⁵Dah iĕm đei đon 'mêm mơnat dih băl, lei đĭ-đăng bơngai băt kơ iĕm lui kơ Inh.”

³⁶Na Pêtrôs jet Sư: “Ơ 'Bok, Ih wă năm tơ yơ?” Yêsu khan: “Mă Inh năm tơ yơ, dang ei ih ưh kơ gơh kiơ̆ Inh ôh; gô ning-mônh ih gơh kiơ̆.”

³⁷Pêtrôs jet Sư: “Kơlih kơ kiơ inh ưh kơ gơh kiơ̆ Ih dang ei? Inh chu lôch kiơ̆ Ih.”

³⁸Yêsu khan: “Ih khan wă chu lôch kiơ̆ Inh hă? Inh khan kơ Ih tơpă, hơdrol kơ iĕr ŏ pơgê dơning, ih gô sơngah kơ Inh pêng 'măng, ih khan ih ưh kơ băt kơ Inh.”