Read bahnar Yo 16 Bible Online

Yo 16 - bahnar bible

Yo 16

¹“Inh bơtho iĕm tôm tơdrong 'noh wă kơ iĕm huay kơ achăng lê̆ Inh.

²Ning-mônh lu sư gô pơpuh iĕm đơ̆ng hnam akŭm lu sư. Ning-mônh mơ̆n lu sư khan pơlôch iĕm khan trŏ kơ 'Bok Kei-Dei wă.

³Lu sư gô pơm kơ iĕm thoi noh kơlih kơ lu sư ưh kơ băt kơ 'Bă Inh păng ưh kơ băt kơ Inh mơ̆n.

⁴Inh roi kơ iĕm tơdrong noh dang ei na lăp iĕm tơ'bơ̆p tơpă ning-mônh na iĕm gô 'blŏk tơdrong noh đơ̆ng Inh pơma păng iĕm dang ei. Hơdrol sơ̆ Inh ưh kơ roi tơdrong 'noh, kơlih kơ Inh oei hơdai hăm iĕm.

⁵“Na dang ei Inh wă brŏk tơ 'Bok mă wơh Inh. Mă-lei iĕm ưh kơ đei tơchĕng tơdrong Inh wă brŏk tơ Sư.

⁶Iĕm sơ'ngon 'biơ̆ kơlih kơ Inh roi kơ iĕm gô đei tơdrong anat anot truh tơ iĕm.

⁷Inh khan kơ iĕm tơpăt, Inh brŏk tơ 'Bă Inh đĕch 'lơ̆ng hloh dang ei. Dah Inh ưh kơ brŏk tơ Sư dang ei lei 'Bok Dŏng Mơnat ưh kơ jur tơ iĕm ôh. Inh jah brŏk na Inh wơh Sư jur tơ iĕm.

⁸Lăp Sư jur, Sư tơbăt ăn kơ lu bơngai ala teh âu lu sư đei tơdrong yoch; Sư tơbăt ăn kơ lu sư Inh, Inh 'lơ̆ng tơpăt; păng tơbăt kơ lu sư gah tơdrong 'Bok Kei-Dei wă phak lu bơngai ưh kơ lui kơ Sư.

⁹'Bok Dŏng Mơnat gô tơbăt ăn kơ lu sư đei tơdrong yoch kơlih kơ lu sư ưh kơ lui kơ Inh.

¹⁰Sư tơbăt kơ lu sư Inh pơm 'lơ̆ng tơpăt kơlih kơ Inh brŏk tơ 'Bă Inh 'Bok Kei-Dei, na iĕm ưh pă 'bôh Inh dơ̆ng.

¹¹Sư tơbăt ăn kơ lu sư gah tơdrong 'Bok Kei-Dei wă phak tơpă lu bơngai mă ưh kơ lui kơ Sư, kơlih kơ Sư sek tơlang boih yang Satan mă pơgơ̆r tơ ala teh âu.

¹²“Inh oei đei lơ tơdrong wă pơma păng iĕm dơ̆ng, mă-lei lu iĕm ưh kơ kĕ iŏk pơđĭ ôh dang ei.

¹³Mă-lei lăp Yang Bơhngol 'Lơ̆ng mă tơbăt ăn kơ iĕm tơdrong 'Bok Kei-Dei ei truh, Sư bơtho ăn kơ iĕm tôm tơdrong 'Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng 'Bă Inh. Sư kư̆m bơtho gah tơdrong ning-mônh mơ̆n.

¹⁴Sư ư-ang kơ Inh kơlih kơ Sư bơtho iĕm dôm tơdrong Inh.

¹⁵Dôm tơdrong 'Bă Inh kư̆m thoi tơdrong Inh mơ̆n, kơlih kơ thoi noh na Inh khan Yang Bơhngol 'Lơ̆ng gô bơtho iĕm dôm tơdrong Inh.

¹⁶“Pă 'biơ̆ iĕm ưh pă 'bôh Inh boih. Mă-lei đơ̆ng rŏng kơ noh ưh kơ đunh mơ̆n iĕm 'bôh Inh dơ̆ng.”

¹⁷Na lu bơngai pơhrăm păng Sư tơjet dih băl: “Sư khan kơ bơ̆n thoi yơ ei khan: ‘Pă 'biơ̆ dơ̆ng iĕm ưh pă 'bôh Inh boih, mă-lei đơ̆ng rŏng kơ noh ưh kơ đunh mơ̆n iĕm 'bôh Inh dơ̆ng?’ Sư khan: ‘Iĕm ưh kơ 'bôh Inh kơlih kơ Inh wă brŏk tơ 'Bă Inh.’

¹⁸Bĭ Sư khan ‘pă 'biơ̆’ ei, Sư khan kiơ? Bơ̆n ưh kơ hlôh Sư pơma kiơ ei.”

¹⁹Yêsu băt kơ lu sư wă jet Sư tơdrong 'noh na Sư khan kơ lu sư thoi âu: “Inh khan pă 'biơ̆ noh, lu iĕm ưh pă 'bôh Inh boih, na đơ̆ng rŏng kơ noh ưh kơ đunh mơ̆n, iĕm gô 'bôh Inh dơ̆ng; hăm trŏ tơdrong noh ưh, iĕm jet dih băl hei?

²⁰Inh khan kơ iĕm tơpă wă kơ iĕm băt: Pă 'biơ̆ lu iĕm nhơ̆m hmoi ơh ol. Mă-lei lu bơngai ala teh âu 'nă hal. Pă 'biơ̆ mơ̆n jơhngơ̆m iĕm gô sơ'ngon, klaih kơ noh iĕm gô chhơp dơ̆ng.

²¹Thoi bơngai drŏ-kăn, truh năr sư wă jê̆ tơpŭ, sư sơ'ngon kơlih kơ sư jĭ. Hlôi sư tơpŭ boih sư hiơt kơ tơdrong jĭ sư kơlih kơ sư chhơp yua kơ đei hơ'lơ̆p boih.

²²Iĕm kư̆m thoi noh mơ̆n. Dang ei iĕm sơ'ngon. Mă-lei Inh gô tơ'bơ̆p iĕm dơ̆ng na jơhngơ̆m iĕm chhơp hiôk chơt tơpă, ưh kơ đei bu gơh pơm kơ iĕm sơ'ngon dơ̆ng.

²³“Hơtai ei kơnh iĕm huay pă kăl jet Inh dơ̆ng boih mă tôm tơdrong kiơ kiơ. Inh khan kơ iĕm tơpăt, kơlih kơ iĕm bơngai lui kiơ̆ Inh na 'Bă Inh gô tơgŭm ăn kơ iĕm dôm tơdrong iĕm apinh Sư.

²⁴Iĕm athei apinh 'Bă Inh, thoi âu: Yua kơ nhôn lui kơ Kon Ih Yêsu na nhôn apinh Ih wă kơ Ih ăn kơ nhôn tơdrong noh. Iĕm apinh Sư thoi noh, gô đei kơ iĕm tơpă. Thoi noh na iĕm chơt hiôk chhơp kơ jơhngơ̆m iĕm tơpă. Mă-lei đơ̆ng sơ̆ khơ̆ dang ei iĕm tam mă krao khan apinh Sư thoi noh 'mơ̆i.

²⁵“Inh bơtho iĕm dôm tơdrong 'noh păng nơ̆r pơtih gia ngăl. Mă ning-mônh kơnh Inh ưh pă bơtho păng nơ̆r pơtih gia boih. Inh gô pơma hơdah hloi gah tơdrong 'Bă Inh.

²⁶Hơtai ei kơnh iĕm krao khan hăm anăn Inh apinh 'Bă Inh ăn tơdrong kiơ kiơ, Inh ưh pă kăl apinh Sư wă tơdŏng iĕm boih,

²⁷kơlih kơ 'Bă Inh 'mêm mơnat kơ iĕm tơpă. Sư 'mêm kơ iĕm yua kơ iĕm 'mêm kơ Inh păng lui kơ Inh jur đơ̆ng 'Bă Inh 'Bok Kei-Dei.

²⁸Inh jur đơ̆ng 'Bă Inh 'Bok Kei-Dei tơpă oei hơdai iĕm tơ ala teh âu. Dang ei Inh jăk đơ̆ng ala teh âu brŏk tơ 'Bă Inh dơ̆ng.”

²⁹Lu bơngai pơhrăm păng Sư khan: “Dang ei nhôn băt kơ Ih pơma hơdah tôm tơdrong; Ih ưh pă pơma păng nơ̆r pơtih gia boih.

³⁰Na dang ei nhôn băt kơ Ih, băt tôm tơdrong păng nhôn ưh pă kăl jet Ih dơ̆ng. Thoi noh boih na nhôn lui kơ Ih jur đơ̆ng 'Bok Kei-Dei tơpă.”

³¹Yêsu khan kơ lu sư: “Dang ei iĕm lui hă?

³²Mă-lei pă 'biơ̆ kơnh, wă jê̆ truh boih, đĭ-đăng kơ lu iĕm kơdâu sơlah gah kơdih kơdih brŏk tơ hnam tŭk kơdrô̆ Inh đĕch. Mă tơpă Inh ưh kơ oei kơdrô̆ Inh ôh. 'Bă Inh oei hơdai păng Inh.

³³Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm 'nĕ kơ sơ'ngon hŏ yua kơ tôm tơdrong ala teh âu thuơ kơ Inh ngăl boih.”