Read bahnar Yo 17 Bible Online

Yo 17 - bahnar bible

Yo 17

¹Đang kơ Yêsu pơma thoi noh boih na Sư ngoi tơ plĕnh krao khan kơ 'Bă Sư: “Ơ 'Bă, truh jơ Inh boih. Apinh Ih atŏk Inh Kon Ih brŏk oei păng Ih bĕ dang ei wă kơ Inh gơh pơư pơang anăn Ih dơ̆ng.

²Thoi Ih ăn kơ Inh pơgơ̆r đĭ-đăng bơngai, Inh gơh ăn kơ kon bơngai mă Ih pơjao kơ Inh gô arih ling-lang păng ba.

³Lu sư đei tơdrong arih ling-lang yua kơ lu sư lui kơ Ih Kră Yang 'Bă Tơm kơpal plĕnh păng băt kơ Inh Yêsu Krist mă Ih wơh jur tơ ala teh âu.

⁴Inh pơư pơang anăn Ih kơ lu bơngai oei tơ ala teh âu; Inh pơm keh boih dôm tơdrong jang mă Ih pơkă ăn kơ Inh.

⁵Na dang ei ơ 'Bă, atŏk inh brŏk oei păng Ih mă hiôk hơiă bĕ 'Bă, kư̆m thoi Inh oei hơdai hăm Ih mă hơdrol kơ Ih pơjing plĕnh teh sơ̆ hiôk hơiă tơpă.

⁶“Inh roi tơbăt tôm tơdrong Ih kơ lu bơngai ala teh mă Ih pơjao ăn kơ Inh boih. Lu sư bơngai Ih, mă Ih pơjao ăn kơ Inh. Lu sư răk dôm nơ̆r Ih.

⁷Dang ei lu sư băt tôm tơdrong Ih pơjao ăn kơ Inh lĕch đơ̆ng Ih ngăl.

⁸Inh bơtho ăn kơ lu sư tôm tơdrong mă Ih pơkă ăn kơ Inh. Tôm lu tơdrong 'noh lu sư răk kơdih kơdih boih. Lu sư băt kơ Inh jur đơ̆ng Ih tơpă păng lu sư băt kơ Ih wơh Inh.

⁹“Inh krao khan kơ Ih apinh Ih tơgŭm mơnat kơ lu sư. Dang ei Inh ưh kơ krao khan apinh Ih, wă kơ Ih tơgŭm đĭ-đăng bơngai ala teh ôh. Inh krao khan kơ Ih wă kơ Ih tơgŭm lu bơngai mă Ih pơjao ăn kơ Inh, yua kơ lu sư bơngai Ih.

¹⁰Dôm lu bơngai Inh dang bơngai Ih păng đĭ-đăng bơngai Ih dang bơngai Inh mơ̆n. Lu sư kư̆m pơư pơang Inh.

¹¹Na dang ei Inh pă oei tơ ala teh âu dơ̆ng, pôm lu sư đĕch oei tơ teh âu. Inh wă tŏk tơ Ih boih. Ơ 'Bă, Ih 'lơ̆ng tơpăt, apinh Ih yua mơsêh mơyang Ih wei-lăng lu sư mă kơjăp kư̆m thoi Ih pơjao kơ Inh tơdrong mơsêh mơyang. Na apinh Ih wei-lăng lu sư wă kơ lu sư pôm đon, kư̆m thoi ba pôm đon dih băl.

¹²Kơplah Inh oei hơdai lu sư, Inh yua mơsêh mơyang đơ̆ng Ih pơjao kơ Inh, na Inh wei-lăng lu sư kơjăp. Inh wei-lăng lu sư, lăm lu sư ưh kơ đei bu hiong ôh; lăp minh 'nu bơngai đĕch hiong. Mă-lei trŏ kơ sư wă hiong 'mơ̆i kơlih kơ 'blep trŏ thoi đe chih khan lê̆ hơdrol lăm sơ̆p hla bơar Ih.

¹³“Na dang ei Inh wă tŏk oei hơdai păng Ih, mă-lei hơdrol kơ Inh wă tŏk Inh roi kơ Ih dôm nơ̆r âu wă kơ lu sư hiôk chơt tơduă lu sư, kư̆m thoi ba hiôk chơt tơduă ba.

¹⁴Inh bơtho ăn kơ lu sư tơdrong Ih pơkă, na lu bơngai ala teh hil areh kơ lu sư, kơlih kơ lu sư ưh kơ sĭ bơngai đơ̆ng ala teh âu, kư̆m thoi Inh ưh kơ sĭ bơngai đơ̆ng ala teh âu mơ̆n.

¹⁵Inh ưh kơ apinh Ih iŏk lu sư đơ̆ng ala teh âu ôh, Inh apinh Ih wei-lăng lu sư mă kơjăp wă kơ lu sư hlôi đơ̆ng yang kơnê̆ Satan.

¹⁶Lu sư ưh kơ sĭ bơngai đơ̆ng ala teh, kư̆m thoi Inh ưh kơ sĭ khŭl bơngai đơ̆ng ala teh âu mơ̆n.

¹⁷Apinh Ih tơbăt ăn kơ lu sư tôm tơdrong Ih, wă kơ lu sư gơh jang tơdrong Ih pran kơtang lăp đon rim lu sư kơdih kơdih, trŏ thoi Ih wă.

¹⁸Inh wơh lu sư năm jơ̆p-jang kơ teh đak âu, kư̆m thoi Ih wơh Inh jur tơ ala teh âu mơ̆n.

¹⁹Inh chu ăn akâu Inh tang yua kơ lu sư, wă pơm trŏ thoi Ih wă, wă kơ lu sư kư̆m pơyơ̆r ăn akâu lu sư chu kiơ̆ thoi Ih wă, yua kơ lu sư băt tơdrong Ih boih.

²⁰“Inh ưh kơ đei apinh Ih wă tơgŭm lu sư đĕch ôh. Inh apinh Ih tơgŭm dôm lu bơngai mă lui kơ Inh yua kơ đơ̆ng nơ̆r lu sư bơtho.

²¹Inh wă kơ Ih ăn kơ lu sư pơgơ̆p băl minh jơhngơ̆m minh đon. Ơ 'Bă, ba minh jơhngơ̆m minh đon, na Inh wă kơ Ih ăn kơ lu sư oei pôm đon păng ba, wă kơ lu bơngai ala teh âu 'bôh thoi noh na lui kơ Ih wơh Inh.

²²Ih ăn kơ Inh oei hơdai hăm Ih hiôk hơiă tơpă, na Inh kư̆m asong ăn kơ lu sư thoi noh mơ̆n, wă kơ lu sư pôm đon dih băl kư̆m thoi ba pôm đon mơ̆n.

²³Inh pôm đon hăm lu sư păng ba pôm đon dih băl, wă kơ lu sư pôm đon tơduă lu sư mơ̆n; na lu bơngai ala teh âu băt kơ Ih wơh Inh tơpă păng lu bơngai ala teh gô băt kơ Ih 'mêm kơ lu bơngai pơhrăm păng Inh, noh kư̆m thoi Ih 'mêm kơ Inh mơ̆n.

²⁴“Ơ 'Bă, Ih pơjao boih lu sư kơ Inh na Inh wă kơ lu sư tŏk oei hơdai hăm Inh, na lu sư gô 'bôh Inh oei hơdai hăm Ih hiôk hơiă tơpă, yua kơ Ih đei ăn kơ Inh thoi noh. Ih 'mêm kơ Inh hơdrol kơ đei plĕnh teh.

²⁵Ơ 'Bă Inh, Ih 'lơ̆ng tơpăt, lu bơngai ala teh âu ưh kơ băt kơ Ih, mă-lei Inh băt kơ Ih păng lu sư âu băt kơ Ih wơh Inh.

²⁶Inh tơhlôh kơ lu sư dôm tơdrong Ih. Păng Inh oei tơhlôh kơ lu sư wă kơ lu sư băt tơpă Ih 'mêm kơ lu sư, kư̆m thoi Ih 'mêm kơ Inh; păng Inh gô oei lăm lu sư mơ̆n.”