Read bahnar Yo 19 Bible Online

Yo 19 - bahnar bible

Yo 19

¹Thoi noh Pilat năm ba Yêsu ăn kơ lu linh sư teh tach Sư păng sơnguĕt.

²Lu linh gơ̆ jơla, pơm tơlei agăl pơyơ̆l kơ kơ̆l Yêsu, pơhrŭk ăn kơ Sư ao tai 'brê pơm thoi pơtao.

³Klaih kơ noh lu sư năm tơ anăp Yêsu khan: “Kơkuh kơ Ih 'Bok Pơtao bơngai Juđê.” Păng lu sư tap tơ'bŏk Yêsu.

⁴Pilat lĕch dơ̆ng khan kơ lu bơngai Juđê: “Gô inh krao Sư tơ âu wă kơ iĕm băt inh ưh kơ 'bôh Sư đei tơdrong yoch kiơ ôh.”

⁵Klaih kơ noh na Yêsu lĕch. Sư yơ̆l tơlei agăl jơla păng hrŭk ao tai 'brê. Pilat khan: “Iĕm lăng bĕ bơngai 'nâu.”

⁶'Bôh Yêsu boih, lu 'bok soi tih hăm lu linh ôr pơret khan: “Pơ̆ng Sư tơ 'long pơglang, pơ̆ng pơlôch Sư tơ 'long pơglang.” Pilat khan: “Lu iĕm iŏk Sư bĕ, pơ̆ng pơlôch Sư tơ 'long pơglang. Gah inh, inh ưh kơ 'bôh Sư pơm yoch kiơ ôh.”

⁷Lu Juđê drơ̆ng khan: “Nhôn đei tơdrong juăt, kiơ̆ thoi tơdrong juăt 'noh athei pơlôch Sư kơlih kơ Sư khan Sư Yang, Kon 'Bok Kei-Dei.”

⁸Pilat kơtơ̆ng thoi noh sư rai hli.

⁹Sư mơ̆t dơ̆ng tơ hnam birô păng jet Yêsu: “Ih đơ̆ng yơ?” Yêsu ưh kơ đei drơ̆ng tơwih kơ sư ôh.

¹⁰Pilat khan: “Lơliơ Ih kuă pơma hăm inh? Ih ưh kơ băt inh gơh achăng Ih dah pơ̆ng pơlôch Ih tơ 'long pơglang hă?”

¹¹Yêsu khan: “Dah 'Bok Kei-Dei ưh kơ ăn ih pơm thoi noh, ih ưh kơ gơh pơm kơ Inh ôh. Yua kơ 'noh bơngai mă pơjao lê̆ Inh kơ ih, sư yoch hloh kơ ih.”

¹²Kơtơ̆ng thoi noh, Pilat wă dêh achăng Yêsu. Mă-lei lu Juđê ôr pơret: “Dah ih achăng bơngai âu, ih jing pă buăl hăm 'bok pơtao tơm bơ̆n, Sêsar. Bơngai bu wă pôk akâu sư kơdih pơm pơtao, bơngai 'noh wă ayăt kơ 'bok pơtao tơm bơ̆n.”

¹³Pilat kơtơ̆ng lu sư pơma thoi noh, sư năm ba Yêsu tơ 'ngoaih. Pilat tơoei 'bơ̆t tang-dŏ sek tơlang tơ lăm cham đe krao cham lơ̆k tơmo. Nơ̆r Juđê khan Gabatha.

¹⁴Năr noh lăp 'năr wă suăn dơ̆ng, năr đe oei hơmet wă pơm Giĕng Năm Brih, Pilat khan kơ lu Juđê: “Âu 'Bok Pơtao iĕm.”

¹⁵Lu sư ôr pơret: “Nhôn ưh kơ wă bơngai 'noh. Pơ̆ng pơlôch Sư tơ 'long pơglang.” Pilat khan dơ̆ng: “Inh pơ̆ng pơlôch 'Bok Pơtao iĕm hă?” Mă-lei lu 'bok soi tih khan: “Nhôn đei minh 'nu Sêsar đĕch pơm pơtao nhôn.”

¹⁶Thoi noh Pilat pơjao ăn kơ lu sư Yêsu wă pơ̆ng pơlôch tơ 'long pơglang. Lu sư anhăk ba Yêsu hloi.

¹⁷Yêsu tôi ba 'long pơglang kơdih Sư, năm tơ anih đe anăn kông kơting kơ̆l bơngai lôch. Nơ̆r Juđê khan, Gôlgôtha.

¹⁸Tơ noh boih đe pơ̆ng Sư tơ 'long pơglang. Pơ̆ng hơdai Yêsu kư̆m đei 'bar 'nu bơngai nai, minh 'nu gah 'ma minh 'nu gah 'ngiĕo, na Yêsu tŏk-bŏk.

¹⁹Pilat chih minh hlak gơ'bang athei đe pơ̆ng 'bơ̆t 'long pơglang. Gơ'bang 'noh chih thoi âu: “Yêsu, Pơlei Nasaret, Pơtao đe Juđê.”

²⁰Lơ bơngai Juđê đŏk lăng gơ'bang 'noh yua kơ anih đe pơ̆ng pơlôch Yêsu 'noh jê̆ Pơlei Jêrusalem. Gơ'bang 'noh chih păng nơ̆r Juđê, nơ̆r Rôm păng nơ̆r Grĕk.

²¹Lu 'bok soi tih năm khan kơ Pilat: “Ih 'nĕ kơ chih khan: ‘'Bok Pơtao đe Juđê.’ Ih athei chih thoi âu: ‘Bơngai âu pơang akâu Sư kơdih khan Pơtao lu bơngai Juđê.’ ”

²²Mă-lei Pilat khan: “Tơdrong noh, inh chih đang boih.”

²³Pơ̆ng Yêsu tơ 'long pơglang boih, lu linh iŏk hơbĕn ao Sư păng hek asong băl puăn chăl, minh 'nu iŏk minh chăl. Lu sư kư̆m iŏk ao tai Yêsu mơ̆n, ao 'noh đe tanh pơm hơbĕn ao kơtă, đơ̆ng ako truh tơ jơ̆ng.

²⁴Lu linh pơma băl tơduă lu sư khan: “Lu bơ̆n 'nĕ pă hek ao 'nâu, gô bơ̆n hlang lăng 'mơ̆i, na băt bu gơh iŏk.” 'Noh 'blep trŏ thoi sơ̆p hla bơar 'Bok Kei-Dei khan lê̆ hơdrol thoi âu: “Lu sư hek asong băl hơbĕn ao Inh, klaih kơ 'noh hlang iŏk ao tai Inh.” Thoi noh lu linh pơm rok tơdrong 'noh.

²⁵Jê̆ 'long pơglang đe pơ̆ng Yêsu 'noh đei mĕ Sư, duch Sư, Mari akăn Klôpas păng Mari Pơlei Mađơla.

²⁶Yêsu 'bôh mĕ Sư păng bơngai pơhrăm păng Sư mă Sư 'mêm. Sư khan kơ mĕ Sư thoi âu: “Ơ duch, 'noh kon ih.”

²⁷Păng khan kơ bơngai pơhrăm păng Sư: “'Noh mĕ ih.” Đơ̆ng năr noh bơngai pơhrăm ei anhăk ba mĕ Yêsu oei tơ hnam sư.

²⁸Yêsu băt tôm tơdrong đang boih. Wă kơ pơm 'blep trŏ thoi sơ̆p hla bơar 'Bok Kei-Dei khan lê̆ hơdrol, Sư khan: “Inh 'maih nhă đak.”

²⁹Tơ noh đei minh pơnhan sik 'nhŭ. Na đe iŏk tơmam thoi tơpu dơyĕn, tŏt 'bơ̆t 'long, djrŭ tơ sik 'nhŭ, klaih kơ noh 'me 'bơ̆t 'bơ̆r Yêsu.

³⁰Trip sik 'nhŭ ei boih, Yêsu khan: “Dôm tơdrong đang boih.” Na Sư kŭp kơ̆l, pơjao bơhngol Sư kơ 'Bok Kei-Dei, kơtĕch jơhngơ̆m hloi.

³¹Lu bơngai Juđê năm apinh Pilat wă gơ̆ lê̆ jơ̆ng lu bơngai mă đêl pơ̆ng tơ 'long pơglang, wă kơ lu sư jah lôch na gơh tơjur 'bŭ atâu lu sư. Lu sư pơm thoi noh hơdrol kơ năr pơdơh Sa'bat, kơlih kơ năr Sa'bat lu sư kuă kơ lê̆ atâu tơ kơpal 'long pơglang, kơlih kơ năr Sa'bat 'noh năr lu sư khan năr kăl hloh tơpă, yua kơ trŏ năr pơm giĕng.

³²Thoi noh lu linh năm gơ̆ jơ̆ng bơngai gah âu hăm pah to, 'bar 'nu bơngai đe pơ̆ng pơlôch hơdai hăm Yêsu 'noh.

³³Mă-lei lu sư năm tơ Yêsu, 'bôh Sư lôch boih, thoi noh na lu sư ưh pă gơ̆ jơ̆ng Yêsu dơ̆ng.

³⁴Mă-lei minh 'nu linh iŏk tơju 'bet rơhiĕo Yêsu, na pham păng đak lĕch đơ̆ng rơka Sư.

³⁵Bơngai mă 'bôh tơdrong 'noh, sư ră roi kơ bơ̆n, sư pơma tơpăt. Sư băt sư pơma tơpăt 'lơ̆ng. Sư wă kơ lu iĕm lui mơ̆n.

³⁶Tơdrong 'noh 'blep trŏ thoi sơ̆p hla bơar 'Bok Kei-Dei khan lê̆ hơdrol thoi âu: “Ưh kơ đei minh pôm kơting Sư tơgơ̆ ôh.”

³⁷Sơ̆p hla bơar 'Bok Kei-Dei kư̆m đei khan thoi âu dơ̆ng: “Lu sư gô lăng Bơngai mă đêl lu sư 'bet.”

³⁸Đei minh 'nu bơngai đơ̆ng Pơlei Armơthê, anăn sư Yôsep, sư bơngai lui kơ Yêsu mơ̆n, mă-lei sư ôn tơdrong lui sư yua kơ sư hli kơ lu bơngai Juđê. Yôsep 'noh năm apinh Pilat wă iŏk 'bŭ atâu Yêsu. Pilat kư̆m ăn mơ̆n. Thoi noh sư iŏk atâu Yêsu.

³⁹Nikôđem, 'bok mă đêl năm ngôi tơ Yêsu kơmăng sơ̆, sư kư̆m năm hơdai păng Yôsep mơ̆n. Sư chĕp ba dang pơđăm-jĭt kilô pơgang 'bâu phu.

⁴⁰Thoi noh bre sư tơjur atâu Yêsu păng asu ăn che kok hăm tă pơgang 'bâu phu 'noh, kiơ̆ kơ lu Juđê juăt kơ hơmet wă 'bŭ atâu.

⁴¹Tơ anih đe pơ̆ng pơlôch Yêsu 'noh đei minh hlak pơgar, lăm pơgar 'noh đei minh pôm bơsat 'nao, tam mă đei tah atâu.

⁴²Yua kơ wă truh năr Sa'bat boih păng bơsat 'noh kư̆m jê̆ mơ̆n, thoi noh bre sư tah atâu Yêsu lăm bơsat ei hloi.