Read bahnar Yo 21 Bible Online

Yo 21 - bahnar bible

Yo 21

¹Đơ̆ng rŏng kơ noh Yêsu tơ'bôh akâu Sư minh wơ̆t dơ̆ng kơ lu bơngai pơhrăm păng Sư tơ jih đak dơsĭ Galilê. Sư tơ'bôh akâu Sư thoi âu:

²Pêtrôs, Thôm mă đe anăn sư Kon Kơmar, Nathanel đơ̆ng Pơlei Kanna dêh Galilê păng 'bar 'nu kon Sêbêđê păng 'bar 'nu bơngai pơhrăm buăl sư, lu sư akŭm pơđâu tơduă lu sư.

³Pêtrôs khan kơ lu buăl sư: “Inh wă năm traih ka.” Lu buăl sư khan: “Nhôn wă kiơ̆ ih mơ̆n.” Na đĭ-đăng lu sư tŏk thŏng-nan năm traih jal. Lu sư traih prăt măng mă-lei 'nhŏ kơ đei minh găr.

⁴Lăp 'năr lĕch chră pơnang 'năr chrang kơ kông, na Yêsu dơ̆ng 'bơ̆t jih đak, lu bơngai pơhrăm păng Sư ưh kơ băt kơnăl kơ Sư.

⁵Yêsu khan kơ lu sư: “Ơ tơpôl lu dăm, iĕm traih jal hăm đei rôp kiơ?” Lu sư khan: “Nhôn hoh-hoy kơ rôp minh găr.”

⁶Yêsu khan kơ lu sư: “Iĕm traih lăng gah 'ma kơ thŏng-nan, 'bơ̆t noh đei ka lơ.” Na lu sư traih hloi 'bơ̆t ei, ka puh jal lu sư lơ tơpă, lu sư ưh kơ kĕ hiot atŏk jal.

⁷Bơngai pơhrăm păng Yêsu mă Sư 'mêm kơeng tơpă, sư khan kơ Pêtrôs: “'Noh Kră Yang bơ̆n Yêsu.” Lăp Pêtrôs kơtơ̆ng thoi noh boih na sư hrŭk ao sư hloi, yua kơ kơplah sư oei traih jal hei sư ưh kơ hrŭk ao. Hrŭk ao đang boih na sư kơtah hloi tơ đak năm tơkan hloi tơ Yêsu. Thŏng-nan ataih kơ jih đak ei dang minh-hrĕng thưk.

⁸Lu buăl sư oei lăm thŏng-nan na lu sư hiot jal mă ka puh lơ ei tŏk tơ kông.

⁹Lăp lu sư tŏk tơ kông boih, lu sư 'bôh ŭnh ngar păng gơnap ka oei phang kơpal ŭnh ei păng đei 'bĕng mi mơ̆n.

¹⁰Na Yêsu khan kơ lu sư: “Anhăk tơ âu 'bar pêng hlak ka đêl iĕm rôp.”

¹¹Na Pêtrôs tŏk kơpal thŏng-nan hiot hloi jal ei atŏk kơpal kông. Jal ei ka puh, ling ka tih tih ngăl mah minh-hrĕng pơđăm-jĭt pêng tŏ ka. Ka sư lơ dang noh ngơnh kơ jal sư huay kơ hiah.

¹²Yêsu khan kơ lu sư: “Năm sa tơ âu bĕ.” Mă-lei lu sư ưh kơ đei bu pơ̆n jet Sư: “Ih bu?” Yua kơ lu sư băt kơ Sư Kră Yang Yêsu.

¹³Na Yêsu iŏk 'bĕng mi asong kơ lu sư iŏk hloi; ka asong lei-lăi mơ̆n.

¹⁴Yêsu tơ'bôh akâu Sư kơ lu bơngai pơhrăm păng Sư pêng 'măng kơ âu boih đơ̆ng rŏng kơ Sư iung arih đơ̆ng lôch.

¹⁵Lu sư achăng sa boih na Yêsu jet Simôn Pêtrôs thoi âu: “Ơ Simôn kon Yôhan, ih hăm 'mêm kơ Inh hloh kơ lu buăl ih âu 'mêm kơ Inh?” Pêtrôs drơ̆ng: “Ơ Kră Yang, Ih băt mơ̆n inh 'mêm kơ Ih.” Yêsu khan kơ sư: “Lei ih rong kon triu Inh.”

¹⁶Yêsu jet Pêtrôs 'măng mă 'bar: “Ơ Simôn, kon Yôhan, ih hăm 'mêm kơ Inh?” Pêtrôs drơ̆ng: “Tơpă, ơ Kră Yang, Ih băt mơ̆n inh 'mêm kơ Ih.” Yêsu khan kơ sư: “Lei ih rong triu Inh.”

¹⁷Yêsu jet truh pêng 'măng khan: “Ơ Simôn, kon Yôhan, ih hăm 'mêm kơ Inh?” Thoi noh Pêtrôs jing sơ'ngon kơlih kơ Yêsu jet sư pêng 'măng boih, na Pêtrôs khan: “Ơ Kră Yang, Ih băt tôm tơdrong, tơdrong inh 'mêm kơ Ih, Ih băt mơ̆n.” Yêsu khan kơ sư: “Lei ih rong triu Inh.

¹⁸Inh khan kơ ih tơpă wă kơ ih băt: Hơtai ih oei moh sơ̆ ih gơh hrŭk hơbĕn ao ih năm tơ yơ yơ mơ̆ng kơ ih wă. Mă-lei lăp ih kră ning-mônh ih gô plaih ti ih, na đe nai gô chô̆ ti ih dui ih tơ anih mă ih ưh kơ wă.”

¹⁹Yêsu khan thoi noh Sư roi tơdrong Pêtrôs gô lôch lơliơ wă kơ bơ̆n bơnê kơ 'Bok Kei-Dei yua kơ sư gô mơ̆ng kơ 'Bok Kei-Dei wă. Klaih kơ noh na Yêsu khan: “Bĕ kiơ̆ Inh.”

²⁰Pêtrôs glĕch lăng na 'bôh hloi minh 'nu bơngai kiơ̆ bre sư, bơngai pơhrăm mă Yêsu 'mêm kơeng, bơngai mă sư oei jê̆ Yêsu, jet Yêsu ki, sư khan: “Ơ 'Bok, bu wă plơ̆ plĕch kơ Ih?” Sư jet noh 'bơ̆t kơplah sŏng sa ki.

²¹Pêtrôs 'bôh bơngai noh na jet Yêsu: “Ơ Kră Yang, bĭ bơngai âu ning-mônh sư gô thoi yơ?”

²²Yêsu khan kơ sư: “Dah Inh wă kơ sư arih sot truh Inh jur dơ̆ng ning-mônh ngê̆ kiơ kơ ih jet? Ih kư̆ lui kơ Inh đĕch.”

²³Yêsu pơma thoi noh ră, na lu 'nhŏng oh bơngai lui đei nơ̆r kơtơ̆ng ang khan: Minh 'nu bơngai pơhrăm păng Yêsu ei ưh kơ layơ lôch. Mă-lei Yêsu ưh kơ đei pơma khan sư ưh kơ đei lôch ôh. Sư khan: “Dah Inh wă kơ sư arih sot truh Inh jur dơ̆ng ning-mônh ngê̆ kiơ kơ ih jet?” Sư pơma thoi noh đĕch.

²⁴Dôm nơ̆r pơma âu đơ̆ng bơngai pơhrăm păng Yêsu ei, bơngai mă Sư 'mêm kơeng. Sư chih roi ăn kơ bơ̆n lăm sơ̆p hla bơar âu. Păng bơ̆n kư̆m băt dôm tơdrong sư chih pơma tơpăt ngăl.

²⁵Tơdrong Yêsu pơm oei lơ tơdrong nai ră mơ̆n. Dah bơ̆n chih roi tôm tơdrong Sư pơm, inh tơchĕng teh âu hrăt ưh kơ gơh 'măn sơ̆p hla bơar ră roi tơdrong Sư pơm.