Read bahnar Yo 4 Bible Online

Yo 4 - bahnar bible

Yo 4

¹Kră Yang Yêsu băt kơ lu bơngai Pharisi kơtơ̆ng ang đei lơ bơngai kiơ̆ Sư păng iŏk 'batem hloh loi kơ bơngai kiơ̆ Yôhan.

²Mă tơpă ưh kơ sĭ Yêsu ôh pơm kơ đe 'batem. Lu bơngai pơhrăm păng Sư đĕch pơm kơ đe 'batem.

³Yêsu băt kơ lu bơngai Pharisi kơtơ̆ng ang thoi noh boih na Sư đơ̆ng dêh Juđê brŏk tơ dêh Galilê.

⁴Sư năm drong hloi dêh Samari.

⁵Yêsu năm truh tơ Pơlei Sikar lăm dêh Samari. Pơlei ei jê̆ mir Jakôp mă ăn kơ kon sư Yôsep sơ̆.

⁶Tơ noh đei sơlŭng đak Jakôp sơ̆. Kơplah ei 'năr tŏk-bŏk dơ̆ng, Yêsu yak gleh tơpă yua kơ yak trong ataih. Na Sư pơdơh ngôi 'bơ̆t đak sơlŭng ei.

⁷Klaih kơ noh blư 'bôh minh 'nu bơngai drŏ-kăn, sư khŭl bơngai Samari năm sŏ đak. Yêsu khan kơ sư: “Asong Inh nhă đak ih bĕ.”

⁸Lu bơngai pơhrăm păng Sư kơplah noh ưh pă tơ noh boih, lu sư đĭ năm răt tơmam sa tơ pơlei đe.

⁹Na duch Samari ei khan kơ Sư: “Liơ Ih bơngai Juđê apinh inh drŏ-kăn Samari athei inh asong Ih đak nhă? Sư pơma thoi noh yua kơ lu bơngai Juđê kơ̆m kơ pơma dơnuh hăm bơngai Samari.”

¹⁰Yêsu khan kơ sư: “Dah ih băt kơ tơdrong 'Bok Kei-Dei wă ăn kơ ih păng dah ih băt kơ Inh bơngai thoi yơ mă apinh đak ih nhă na dah ih apinh Inh, Inh ăn hloi kơ ih đak mă ih gơh arih ling-lang.”

¹¹Duch ei khan kơ Sư: “Ơ 'Bok, Ih ưh kơ đei gơhnŏk wă sŏ đak, na thoi yơ Ih gơh sŏ yua kơ sơlŭng đak âu jrŭ? Na Ih khan wă sŏ đak ăn kơ inh arih, Ih wă sŏ đơ̆ng yơ?

¹²Bĭ Ih hăm tih hloh kơ 'bok bơ̆n Jakôp mă ăn kơ nhôn đak sơlŭng âu? Sư, lu kon sư păng sem dơrong sư nhă hơdai minh pôm sơlŭng đak âu sơ̆.”

¹³Yêsu khan kơ sư: “Bơngai bu nhă đak âu, kơnh sư rơhing 'maih nhă dơ̆ng.

¹⁴Bơngai bu nhă đak đơ̆ng Inh ăn, kơnh sư huay pă rơhing boih. Đak mă Inh ăn kơ sư thoi lĕ đak mơlĕch, sư ro jur suŏn lăm to bơngai mă nhă 'noh, pơm kơ bơngai noh gơh arih ling-lang.”

¹⁵Thoi noh na duch ei khan: “Ơ 'Bok, asong inh nhă đak ei bĕ, wă kơ inh huay pă rơhing 'maih nhă dơ̆ng păng wă kơ inh huay pă năm sŏ đak âu.”

¹⁶Yêsu khan kơ duch ei: “Ih năm krao klo ih năm kiơ̆ ih tơ âu dơ̆ng bĕ.”

¹⁷Duch ei khan: “Inh ưh kơ đei klo.” Yêsu khan: “Trŏ boih ih khan ưh kơ đei klo.

¹⁸Đơ̆ng sơ̆ ih đei pơđăm 'nu klo boih; bĭ bơngai mă oei kơ ih dang ei noh ưh kơ trŏ kơ klo ih ôh, yua kơ biĕm tam mă pơkong. Trŏ boih ih khan ưh kơ đei klo.”

¹⁹Duch ei khan kơ Sư: “Ơ 'Bok, inh băt boih Ih, Ih bơngai pơtruh nơ̆r 'Bok Kei-Dei.

²⁰Lu yă 'bok nhôn sơ̆ khan trŏ kơ kơkuh kơ 'Bok Kei-Dei tơ kông âu. Mă gah iĕm khan athei đe năm kơkuh kơ 'Bok Kei-Dei tơ Pơlei Jêrusalem đĕch trŏ.”

²¹Yêsu khan kơ sư: “Ơ duch, Inh wă khan kơ ih tơpă, ning-mônh đe huay pă năm kơkuh kơ 'Bă bơ̆n 'Bok Kei-Dei tơ kông âu dah tơ Pơlei Jêrusalem dơ̆ng boih.

²²Lu iĕm bơngai Samari, iĕm khan kơkuh kơ 'Bok Kei-Dei mơ̆n mă-lei lu iĕm ưh kơ hlôh tơdrong 'Bok Kei-Dei thoi yơ. Pôm lu nhôn bơngai Juđê đĕch hlôh tơpă gah tơdrong 'Bok Kei-Dei. Thoi noh yơh na lu bơngai Juđê tơpă đei bơngai wă pơklaih kon bơngai.

²³Ning-mônh, kư̆m thoi dang ei mơ̆n, lu bơngai mă kơkuh kơ 'Bă bơ̆n 'Bok Kei-Dei mă trŏ ưh kơ sĭ sư kơkuh păng jơ̆ng dah păng ti sư đĕch ôh. Sư kơkuh lăm jơhngơ̆m đon sư. Sư kơkuh mă tơpă na 'Bok Kei-Dei lăp đon kơ lu bơngai mă kơkuh kơ Sư thoi noh.

²⁴'Bok Kei-Dei Sư Yang tơpă na lu bơngai mă kơkuh kơ Sư athei kơkuh mă tơpă hăm đĭ jơhngơ̆m đon sư.”

²⁵Duch ei khan kơ Yêsu: “Inh băt kơ 'Bok Mêsi mă đe anăn 'Bok Krist Sư gô truh wă pơgơ̆r kon bơngai, mưh Sư truh boih Sư roi ăn kơ nhôn tôm tơdrong.”

²⁶Yêsu khan: “'Bok 'noh jơ̆ Inh âu boih, Sư mă oei pơma păng ih dang ei âu. Inh boih 'Bok Krist.”

²⁷Kơplah noh blư 'bôh hloi lu bơngai pơhrăm păng Sư wih. Lu sư 'bôh Yêsu pơma dơnuh păng duch noh lu sư pơwao hlĭch. Mă-lei lu sư ưh kơ jet Yêsu khan: “Ih pơma kiơ?” Dah: “Kơlih kơ kiơ Ih pơma dơnuh păng duch âu?” Lu sư ưh kơ đei jet pơma thoi noh ôh.

²⁸Na duch ei 'măn lê̆ ge đak sư 'bơ̆t ei, na kơdâu wih tơ pơlei roi kơ đe păng pơtơm đe khan:

²⁹“Bĕ bơ̆n năm lăng bĕ. Bơngai ei hlĭch dêh roi 'blep dôm tơdrong inh pơm tơpă. Na iĕm tơchĕng bơngai 'noh hăm trŏ kơ 'Bok Krist tơpă dah ưh?”

³⁰Na đĭ-đăng kon pơlei pơla luh năm lăng Sư.

³¹Kơplah lu sư oei nơnăm rok trong tam mă truh tơ Yêsu, na lu bơngai pơhrăm păng Sư khan kơ Sư thoi âu: “Ơ 'Bok Thây, sŏng sa bĕ.”

³²Yêsu khan kơ lu sư: “Inh đei tơmam sa boih, mă-lei lu iĕm ưh kơ băt ôh.”

³³Na lu bơngai pơhrăm păng Sư pơma dih băl: “Đe ăn kơ Sư tơmam sa tơpă dah kiơ?”

³⁴Yêsu khan kơ lu sư: “Tơmam sa Inh jơ̆ Inh athei pơm kiơ̆ kơ 'Bok Kei-Dei wơh Inh jang mă keh tơdrong Sư. 'Noh boih tơmam sa Inh.

³⁵Hăm trŏ kơ lu iĕm khan thoi âu: ‘Pă puăn khei truh bơyan kĕch 'ba?’ Mă-lei Inh khan kơ iĕm thoi âu: ‘Iĕm iung tơmang lăng kon pơlei pơla to. Lu sư wă lui kơ 'Bok Kei-Dei boih, kư̆m dang lĕ mir 'ba đe mă đum boih. Na dang ei bơ̆n kơchăng wă kĕch iŏk đĕch.

³⁶Na bơngai bu adrin bơtho đe lui kơ 'Bok Kei-Dei, bơngai 'noh 'Bok Kei-Dei gô apah sư, kư̆m lei-lăi thoi tơ'ngla mir apah đe jang kĕch 'ba mir sư. Lu bơngai jang pơm mir, sư đei 'ba lơ tơpă; lu bơngai jang tơdrong 'Bok Kei-Dei kư̆m thoi noh mơ̆n. Sư krao lơ bơngai lui kơ 'Bok Kei-Dei, na lu bơngai lui kơ sư bơtho 'noh gô arih ling-lang. Bơngai mă bơtho đe hơdrol păng bơngai mă bơtho đe đơ̆ng rŏng na đe lui hloi kơ sư bơtho, bre noh, bre sư chơt hiôk lei-lăi đĕch.’

³⁷'Noh trŏ kơ nơ̆r đe khan hmă thoi âu: ‘Bơngai âu rei 'ba mă-lei truh bơyan kĕch, bơngai nai kĕch 'ba noh.’

³⁸Na Inh wơh iĕm năm kĕch 'ba mă đêl đe rei, wă kơ iĕm kĕch dŏng bơngai mă rei 'noh.”

³⁹Đei lơ tơpă kon pơlei Samari lui kơ Yêsu kơlih kơ duch pơlei noh roi kơ lu sư khan: “Bơngai ei roi 'blep tôm tơdrong đêl inh pơm.”

⁴⁰Thoi noh boih na lăp lu sư truh tơ Yêsu boih, lu sư apinh Yêsu oei păng lu sư. Na Yêsu oei păng lu sư 'bar năr.

⁴¹Păng đei lơ bơngai nai dơ̆ng lui kơ Yêsu. Lu bơngai âu lui đơ̆ng Yêsu bơtho kơdih.

⁴²Lu bơngai lui đơ̆ng rŏng khan kơ duch ei thoi âu: “Nhôn lui kơ Sư dang ei ưh kơ sĭ nhôn băt đơ̆ng ih ôh. Nhôn lui kơ Sư dang ei yua kơ nhôn kơtơ̆ng Sư bơtho na nhôn băt hloi kơ Sư 'Bok Dŏng Pơklaih kon bơngai tơpă.”

⁴³Đơ̆ng rŏng kơ 'bar năr ei Yêsu wih hloi tơ dêh Galilê.

⁴⁴Yêsu khan thoi âu: “Lu bơngai pơtruh nơ̆r 'Bok Kei-Dei thoi Inh âu, lu bơngai pôm tơring păng sư ưh kơ wă chu yom kơ sư, lu bơngai tơring nai dơ̆ng chu yom kơ sư. Na Inh kư̆m thoi noh mơ̆n.”

⁴⁵Lăp Yêsu truh tơ dêh Galilê na lu bơngai Galilê sơng iŏk Sư. Lu sư băt kơ Yêsu kơlih kơ đêl lu sư năm tơ Pơlei Jêrusalem lăm năr đe pơm giĕng, na lu sư 'bôh tôm tơdrong Yêsu pơm tơ'bôh ăn mơsêh mơyang Sư tơ pơlei ei.

⁴⁶Yêsu năm tơ Pơlei Kanna lăm dêh Galilê dơ̆ng, pơlei mă đêl Yêsu tơlĕch mơsêh mơyang Sư pơm kơ đak 'blăng jing đak sik hơmu. Na tơ Pơlei Kapernum đei minh 'nu bơngai pơm 'bok kuan, sư bơ̆jang iĕ 'biơ̆ kơ 'bok pơtao. Na kơplah noh kon sư jĭ dêh.

⁴⁷Thoi noh 'bok kuan ei băt kơ Yêsu đơ̆ng dêh Juđê truh tơ dêh Galilê boih, na 'bok kuan ei năm hloi truh tơ Yêsu tơ Pơlei Kanna. Sư apinh Yêsu jur pơklaih kon sư jĭ dêh tơ Pơlei Kapernum.

⁴⁸Yêsu khan kơ sư: “Dah Inh ưh kơ pơm tơdrong mơsêh mơyang lei iĕm ưh kơ wă lui kơ Inh ôh.”

⁴⁹Na 'bok ei khan kơ Yêsu: “Ơ 'Bok, apinh Ih jah năm tơ hnam inh. Inh hli kơ kon inh lôch hơdrol.”

⁵⁰Yêsu khan kơ 'bok ei: “Brŏk kơ ih bĕ, kon ih huay kơ lôch ôh. Na 'bok ei lui kơ nơ̆r Yêsu pơma. Na 'bok kuan ei brŏk hloi.”

⁵¹Kơplah sư oei yak rok trong na sư tơ'bơ̆p lu đĭch sư giong khan kơ sư. Lu sư khan: “Kon ih klaih boih.”

⁵²Na 'bok kuan ei jet lu đĭch sư khan: “Sư 'nao klaih layơ?” Lu sư khan: “Klaih đơ̆ng mônh jơ 'năr lăp glơh brei, sư klaih hloi kơ bơlŏ.”

⁵³'Bok kuan ei băt hloi kơplah mônh jơ 'năr glơh brei 'blep hloi kơ jơ Yêsu khan kơ sư, khan kon sư huay kơ lôch. Thoi noh na 'bok kuan ei lui hloi kơ Yêsu păng đĭ-đăng hnam dơnŏ sư kư̆m lui mơ̆n.

⁵⁴Tơdrong mơsêh mơyang âu Yêsu tơ'bôh 'bơ̆t Sư năm đơ̆ng dêh Juđê 'nao truh tơ dêh Galilê kư̆m thoi tơdrong mơsêh Sư pơm sik hơdrol ki, Sư kư̆m tơ'bôh kơ đe 'bơ̆t Sư năm đơ̆ng dêh Juđê 'nao truh tơ dêh Galilê mơ̆n.