Read bahnar Yo 5 Bible Online

Yo 5 - bahnar bible

Yo 5

¹Klaih kơ noh Yêsu năm hơpong tơ lu bơngai Juđê pơm la-giĕng sŏng sa tih tơ Pơlei Jêrusalem.

²Tơ Pơlei Jêrusalem đei minh tŭm dơnâu đak 'bơ̆t jê̆ 'măng tơm pơlei mă đe anăn 'Măng Triu. Đak dơnâu ei lăm nơ̆r Juđê anăn khan dơnâu Betsatha. Tơ noh đei pơđăm tŏ prơng hnam.

³Tơ ala prơng noh đei lơ bơngai 'bĭch păn kơ jĭ jăn. Lu mơ'nah măt tol, mơ'nah ti kue, mơ'nah jơ̆ng jo go kơdŭ. Lu bơngai jĭ ei chang gô đak dơnâu tơglăk,

⁴yua kơ phŏ phŏ đei linh jang 'lơ̆ng 'Bok Kei-Dei jur tơ đak dơnâu ei, wă pơm kơ đak dơnâu ei tơglăk. Na bơngai bu mă hơbĕch dah kơtah lăm dơnâu ei hơdrol kơ đe, sư noh klaih hloi kơ jĭ sư.

⁵Lăm ei đei minh 'nu bơngai jĭ đunh đei pêng-jĭt tơhngam sơnăm boih.

⁶Na Yêsu 'bôh sư 'bĭch lăm ei. Păng Yêsu băt kơ bơngai ei jĭ đunh tơpă na Yêsu jet sư: “Ih hăm wă klaih kơ jĭ?”

⁷Bơngai jĭ ei khan: “Ơ 'Bok, 'bơ̆t đak tơglăk inh ưh kơ đei bôl hiot tơdŏng inh jur lăm đak dơnâu. Na ling-lang jei đe ngăl jur hơdrol kơ inh.”

⁸Klaih kơ noh Yêsu khan: “Ih iung bĕ, lôm sơkok ih chĕp brŏk kơ ih bĕ.”

⁹Bơngai jĭ ei klaih hloi, lôm sơkok sư iung nơnăm hloi wă brŏk. Năr ei năr pơdơh Sa'bat.

¹⁰Thoi noh boih na lu bơngai Juđê khan kơ bơngai 'nao klaih ei khan: “Năr âu năr giĕng lah. Ih 'nĕ tung anhăk sơkok ih.”

¹¹Bơngai 'nao klaih kơ jĭ ei khan kơ lu sư: “Kơlih kơ 'Bok mă pơklaih inh hei Sư athei inh khan: Lôm sơkok ih chĕp brŏk kơ ih bĕ.”

¹²Lu bơngai Juđê jet sư: “'Bok bu athei ih lôm sơkok ih brŏk ei?”

¹³Bơngai 'nao klaih kơ jĭ ei, sư ưh kơ băt anăn 'Bok mă pơklaih jĭ sư hei, kư̆m ưh pă 'bôh Sư tăm yua kơ đei bơngai tơpôl 'bơ̆t ei na Yêsu năm tơ nai boih.

¹⁴Đơ̆ng rŏng kơ noh Yêsu 'bôh bơngai Sư pơklaih noh tơ lăm hnam akŭm 'Bok Kei-Dei tơm na Yêsu khan kơ sư thoi âu: “Dang ei ih klaih boih, ih 'nĕ pă pơm yoch dơ̆ng, kơnh ih pŭ tơdrong trăp hloh kơ noh.”

¹⁵Bơngai 'nao klaih kơ jĭ ei năm khan kơ đe Juđê Yêsu pơklaih sư.

¹⁶Kơlih kơ tơdrong noh na lu bơngai Juđê wă pơm kơnê̆ kơ Yêsu, kơlih kơ Sư pơklaih đe jĭ lăm năr pơdơh Sa'bat.

¹⁷Yêsu khan kơ lu bơngai Juđê ei thoi âu: “'Bă Inh oei jang ling-lang truh dang ei ưh kơ đei pơdơh na Inh athei jang lei-lăi thoi Sư mơ̆n.”

¹⁸Kơlih kơ tơdrong noh lu bơngai Juđê chă tơdrong wă kơ gơh rôp pơlôch Sư, yua kơ lu sư khan Yêsu tŭk tơdrong kơ̆m lăm năr pơdơh Sa'bat; păng khan 'Bok Kei-Dei 'Bă Sư, dang wă khan Sư tih atŏ hăm 'Bok Kei-Dei.

¹⁹Yêsu khan kơ lu bơngai Juđê ei: “Inh khan kơ iĕm tơpăt, Inh Kon Sư ưh kơ gơh jang kiơ̆ kơ Inh ôh. Inh athei jang kiơ̆ kơ Sư đĕch. 'Bă Sư jang thoi yơ Kon Sư jang thoi noh mơ̆n.

²⁰'Bă Sư 'mêm kơ Kon Sư na tơ'bôh kơ Kon Sư tôm tơdrong 'Bă Sư jang. 'Bă Sư gô ăn kơ Kon Sư jang wă pơm gah tơdrong mơsêh mơyang hloh kơ tơdrong pơklaih bơngai jĭ noh hei, wă kơ iĕm lăng hlĭch kơ đon.

²¹Yua kơ 'Bă Inh gơh tơiung arih kon bơngai đơ̆ng lôch na Inh Kon Sư kư̆m thoi Sư mơ̆n, Inh gơh ăn tơdrong arih kơ kon bơngai gô mơ̆ng kơ Inh wă.

²²'Bă Sư ưh kơ sek tơlang kon bơngai ôh. Sư ăn Kon Sư đĕch sek tơlang,

²³wă kơ đĭ-đăng bơngai lui yom kơ Kon Sư kư̆m thoi lu sư lui yom kơ 'Bă Sư. Bơngai bu ưh kơ lui yom kơ Kon Sư, bơngai 'noh kư̆m dang sư ưh kơ lui yom kơ 'Bă Sư, yua kơ Kon Sư đơ̆ng 'Bă Sư wơh.

²⁴Inh khan kơ iĕm tơpă, bơngai bu mơ̆ng Inh bơtho păng lui hloi kơ 'Bok Kei-Dei mă wơh Inh, bơngai 'noh ning-mônh sư gô oei hơdai hăm 'Bok Kei-Dei arih ling-lang păng Inh huay pă sek tơlang tơdrong sư boih. Sơ̆ sư kiơ̆ tơdrong lôch mă-lei dang ei sư kiơ̆ tơdrong arih.

²⁵“Inh khan tơpăt kơ iĕm dơ̆ng, ning-mônh kư̆m thoi dang ei mơ̆n, lu bơngai lôch gô kơtơ̆ng nơ̆r Kon 'Bok Kei-Dei krao sư, na bu mă mơ̆ng Sư krao, sư 'noh gô iung arih.

²⁶'Noh kư̆m thoi 'Bă Sư gơh pơm tôm tơdrong arih, na 'Bă Sư ăn kơ Kon Sư gơh pơm tôm tơdrong arih thoi Sư mơ̆n.

²⁷'Bă Sư ăn kơ Kon Sư sek tơlang kon bơngai, yua kơ Kon Sư jur jing bơngai.

²⁸Na Inh bơtho iĕm thoi noh, iĕm 'nĕ tơchĕng hlĭch kơ đon. Ning-mônh đĭ-đăng lu bơngai lôch oei lăm bơsat kơtơ̆ng 'bơ̆r Inh krao sư,

²⁹na lu sư lĕch đơ̆ng bơsat. Lu bơngai đei đon 'lơ̆ng tơpăt sư iung arih đơ̆ng noh sư gô arih ling-lang. Lu bơngai pơm kơnê̆, sư iung arih đơ̆ng noh Inh gô phak sư.

³⁰“Inh ưh kơ pơm kiơ̆ thoi Inh wă ôh. Inh kơtơ̆ng 'Bă Inh pơma kơ Inh thoi yơ, Inh sek tơlang kiơ̆ thoi Sư pơma 'noh mơ̆n. Tơdrong Inh sek tơlang Inh sek tơlang mă tơpăt kiơ̆ thoi Sư, kơlih kơ Inh ưh kơ wă kiơ̆ thoi Inh kơdih, Inh athei pơm trŏ thoi 'Bă Inh mă wơh Inh wă.

³¹“Dah ưh kơ đei bu nai pơma bơ̆ng Inh, lei iĕm ưh kơ lui kư̆m bưh.

³²Mă-lei đei minh 'nu nai pơma bơ̆ng Inh tơpă păng Inh kư̆m băt kơ Sư pơma tơpăt tơpă tơdrong Inh.

³³Iĕm lu bơngai Juđê puh lu jơ̆ng 'bang iĕm năm tơ Yôhan, na Yôhan sư pơma bơ̆ng tơdrong Inh tơpă.

³⁴Mă-lei Inh ưh kơ kăl kon bơngai pơma bơ̆ng Inh ôh. Inh khan kơ iĕm thoi âu: Yôhan bơtho tơpăt, wă kơ iĕm lui kơ nơ̆r Sư bơtho, na 'Bok Kei-Dei pơklaih yoch iĕm.

³⁵Yôhan thoi ŭnh kơđeng nhơk hơdah. Iĕm mơ̆ng sư bơtho hiôk chơt tơpă ră, mă-lei lăp minh yuh đĕch.

³⁶Mă-lei Inh đei minh 'nu tih hloh kơ Yôhan, Sư tơbăt ăn kơ iĕm tơdrong Inh. Na dôm tơdrong mơsêh mơyang đơ̆ng Sư ăn kơ Inh, na Inh bơ̆jang ahrei âu, dôm tơdrong noh wă kơ iĕm băt 'Bă Inh wơh Inh tơpă.

³⁷“'Bă Inh mă wơh Inh, Sư pơma bơ̆ng gah Inh. Lu iĕm ưh kơ layơ kơtơ̆ng Sư pơma păng iĕm ưh kơ lah 'bôh akâu Sư thoi yơ.

³⁸Păng dôm tơdrong Sư pơma iĕm ưh kơ wă iŏk lăm jơhngơ̆m iĕm tăm, yua kơ iĕm ưh kơ lui kơ Inh mă sư wơh.

³⁹“Lu iĕm đŏk lăng sơ̆p hla bơar 'Bok Kei-Dei ling-lang, khan wă kơ đei tơdrong arih ling-lang. Sơ̆p hla bơar 'Bok Kei-Dei boih roi tơdrong Inh,

⁴⁰mă-lei iĕm ưh kơ wă năm iŏk tơdrong arih đơ̆ng Inh ôh.

⁴¹“Inh ưh kơ wă kon bơngai ang Inh hơgei ôh, Inh wă kơ 'Bă Inh đĕch lăp đon kơ Inh.

⁴²Mă-lei gah iĕm, Inh băt lăm to iĕm ưh kơ wă 'mêm kơ 'Bok Kei-Dei tơpă.

⁴³'Bă Inh 'Bok Kei-Dei wơh Inh jur tơ ala teh âu, mă-lei iĕm ưh kơ wă sơng iŏk Inh ôh. Na bơngai nai năm kơdih sư, noh iĕm tơkan sơng iŏk sư hloi.

⁴⁴Na lơliơ iĕm gơh lui lĕ? Ling-lang iĕm wă kơ bôl iĕm lăp đon kơ iĕm. Minh 'nu Kră Yang 'Bok Kei-Dei đĕch tih hloh tơpă mă-lei iĕm ưh kơ wă Sư lăp đon kơ iĕm.

⁴⁵“Iĕm khan iĕm lui kơ Môis bơtho, na 'Bok Kei-Dei wă pơklaih iĕm. Mă-lei iĕm ưh kơ lui tơpă ôh yua kơ Môis roi tơdrong Inh tơpă, mă-lei iĕm ưh kơ wă lui kơ Inh. Lăp 'Bă Inh sek tơlang ning-mônh Môis gô jô̆ iĕm bơngai kơchu na Inh huay kơ kăl jô̆ iĕm ôh.

⁴⁶Dah iĕm lui kơ nơ̆r Môis tơpă, noh iĕm kư̆m wă lui kơ Inh mơ̆n, kơlih kơ sư chih roi tơdrong Inh.

⁴⁷Mă-lei dah iĕm ưh kơ lui kơ tơdrong sư chih roi, lơliơ iĕm gơh lui kơ nơ̆r Inh bơtho lĕ?”