Read bahnar Yo 7 Bible Online

Yo 7 - bahnar bible

Yo 7

¹Đơ̆ng rŏng kơ noh Yêsu oei năm chă bơtho tơ dêh Galilê. Sư ưh pă năm bơtho tơ dêh Juđê boih kơlih kơ lu bơngai Juđê wă pơlôch Sư.

²Lăp wă jê̆ truh năr giĕng đe Juđê mă đe anăn Giĕng Bơsŭn,

³na lu oh Yêsu khan kơ Sư: “Ih jăk đơ̆ng âu năm tơ dêh Juđê wă kơ lu bơngai lui kơ Ih tơ ei 'bôh tơdrong mơsêh mơyang Ih pơm.

⁴Dah bơ̆n wă kơ đe băt kơ tơdrong jang bơ̆n, na bơ̆n ưh kơ gơh ôn tơdrong jang bơ̆n ôh. Dah Ih gơh pơm tơdrong mơsêh mơyang tơpă lei Ih athei pơm tơ'bôh 'bơ̆t anăp đe lơ wă kơ đe băt kơ Ih.”

⁵Lu oh Sư pơma thoi noh kơlih kơ lu sư ưh tam mă lui; oh Sư tăm mă ưh kơ lui kơ Sư tăm.

⁶Yêsu khan kơ lu oh Sư: “Ưh tam mă trŏ Inh wă năm tơ Pơlei Jêrusalem tơbăt kơ đe tơdrong Inh ôh. Mă-lei dah iĕm wă năm, layơ kư̆m bưh.

⁷Yua kơ iĕm tơduă kon bơngai ala teh âu, đe huay hil areh kơ iĕm ôh. Pôm Inh đĕch lu sư hil tơpă, kơlih kơ Inh tơ'bôh kơ lu sư tơdrong kơnê̆ lu sư pơm.

⁸Na iĕm năm hơpong bĕ năr giĕng noh. Gah Inh tam mă năm ôh, kơlih kơ tam mă trŏ kơ Inh wă năm.”

⁹Sư khan thoi noh boih na Sư oei lăm dêh Galilê đĕch năr noh.

¹⁰Đơ̆ng rŏng lu oh Sư năm hơpong tơ Pơlei Jêrusalem wă pơm giĕng ei, Yêsu kư̆m năm mơ̆n. Mă-lei Sư năm hrĕp ưh kơ ăn đe băt.

¹¹Trŏ năr giĕng ei boih lu bơngai Juđê chă Sư tơ noh. Lu sư khan: “Yêsu tơ yơ?”

¹²Lu kon pơlei pơla pơma 'bơm gah tơdrong Yêsu. Lu mơ'nah khan Sư bơngai 'lơ̆ng tơpăt; lu mơ'nah khan Sư ưh kơ 'lơ̆ng ôh, khan Sư chă hơlĕnh kơ kon pơlei pơla đĕch.

¹³Lu bơngai mă pơma thoi noh, lu sư ưh kơ pơma 'bơ̆t anăp đe tơpôl ôh kơlih kơ lu sư hli kơ lu kră sư.

¹⁴Lăp tŏk-bŏk năr giĕng ei na Yêsu mơ̆t lăm hnam akŭm 'Bok Kei-Dei tơm, na Sư bơtho đe lăm noh.

¹⁵Lu bơngai Juđê sơleng kơ đon yua kơ Yêsu bơtho hơgei tơpă. Lu sư pơma dih băl khan: “Lơliơ 'Bok âu ưh kơ đei chă pơhrăm tơ hnam trưng mă-lei Sư hơgei tôm tơdrong?”

¹⁶Yêsu khan kơ lu sư: “Tơdrong Inh bơtho âu ưh kơ sĭ lĕch đơ̆ng Inh ôh. Tơdrong âu lĕch đơ̆ng 'Bok Kei-Dei mă wơh Inh.

¹⁷Bơngai bu 'maih pơm kiơ̆ thoi 'Bok Kei-Dei wă, bơngai 'noh sư gô băt tơdrong Inh bơtho âu lĕch đơ̆ng 'Bok Kei-Dei tơpă, dah lĕch đơ̆ng Inh kơdih.

¹⁸Bơngai bu bơtho kiơ̆ kơ đon sư tơchĕng kơdih, bơngai 'noh sư wă pơang akâu sư kơdih đĕch. Mă-lei dah bơngai bu bơtho wă pơư pơang nơ̆r 'Bok mă wơh sư, bơngai 'noh bơtho tơpăt, ưh kơ đei layơ hơlĕnh.

¹⁹Hăm trŏ kơ Môis ată ăn kơ iĕm tơdrong juăt, mă-lei lăm lu iĕm ưh kơ đei bu răk tơdrong juăt noh? Na iĕm khan Inh ưh kơ răk tơdrong juăt Môis, na iĕm khan wă pơlôch Inh. Kơlih kơ kiơ iĕm wă pơlôch Inh noh?”

²⁰Lu kon pơlei pơla kơtơ̆ng sư pơma thoi noh na khan kơ sư: “'Noh Ih wơnh boih, bu đei chă wă pơlôch Ih? Ưh kơ đei bu ôh.”

²¹Yêsu khan: “Lăm năr pơdơh Sa'bat Inh pơklaih minh 'nu bơngai jĭ jăn, na iĕm khan Inh pơm ưh kơ trŏ.

²²Môis pơkă ăn kơ iĕm tơdrong kăt tơdra akar; mă tơpă ưh kơ sĭ kơ Môis ôh hơdrol. Tơdrong kăt tơdra akar noh đơ̆ng lu yă 'bok iĕm sơ̆ pơtơ̆p hơdrol. Na lăp năr pơdơh Sa'bat iĕm kư̆m jang kăt tơdra akar đe mơ̆n, yua kơ Môis pơkă thoi noh.

²³Iĕm jang kăt tơdra akar đe lăm năr pơdơh kư̆m gơh; liơ iĕm hil kơ Inh pơklaih bơngai jĭ jăn lăm năr pơdơh mơ̆n? Inh pơklaih bơngai jĭ jăn lăm năr pơdơh Sa'bat, noh trŏ hloh kơ iĕm kăt tơdra akar đe lăm năr pơdơh Sa'bat.

²⁴Iĕm 'nĕ kơ sek tơlang kiơ̆ kơ jơhngơ̆m iĕm pran. Iĕm athei sek tơlang mă tơpăt, athei tơchĕng mă tôm tơdrong hơdrol 'mơ̆i.”

²⁵Lăm lu kon pơlei pơla Jêrusalem đei bơngai mơ'nah khan: “Yêsu âu dah kiơ lu kră bơ̆n khan wă rôp pơlôch Sư ei?

²⁶Dang ei Sư oei bơtho 'bơ̆t anăp bơ̆n tơpôl, mă-lei lu kră bơ̆n ưh kơ đei pơm kiơ kơ Sư, noh lu kră bơ̆n băt kơ Sư 'Bok Krist mă gô pơgơ̆r bơ̆n tơpă boih dah kiơ dang ei?

²⁷Mă-lei bơ̆n băt kơ Sư ưh kơ sĭ 'Bok Krist ôh, kơlih kơ bơ̆n băt kơ Sư bơngai đơ̆ng yơ. Mă-lei dah 'Bok Krist truh bơ̆n ưh kơ băt Sư đơ̆ng yơ ôh.”

²⁸Yêsu băt kơ lu sư pơma thoi noh na Sư bơtho 'bơ̆r re lăm hnam akŭm 'Bok Kei-Dei tơm: “Lu iĕm khan iĕm băt kơ Inh bơngai đơ̆ng yơ. Mă tơpă ưh kơ sĭ Inh bơngai đơ̆ng noh ôh. Ưh kơ sĭ Inh truh tơ iĕm yua kơ akâu Inh wă kơdih ôh. 'Bok Kei-Dei wơh Inh tơpă. Mă-lei iĕm ưh kơ băt kơ Sư.

²⁹Inh băt kơ Sư tơpă kơlih kơ Inh jur đơ̆ng Sư, yua kơ Sư wơh Inh.”

³⁰Thoi noh na lu đe ei wă rôp Sư ră, mă-lei ưh kơ đei ti bu chro rôp Sư ôh, yua kơ tam trŏ 'Bok Kei-Dei ăn.

³¹Kư̆m đei lơ bơngai mơ'nah lui kơ Sư tơpă. Na lu đe ei khan: “Bơngai âu pơm lơ tơdrong mơsêh mơyang tơpă. Nhôn tơchĕng băt kơ Sư 'Bok Krist tơpă boih âu.”

³²Bơngai Pharisi kơtơ̆ng ang kon pơlei pơma 'bơm Yêsu thoi noh, na lu bơngai Pharisi păng lu 'bok soi tih wơh lu linh sư năm rôp Yêsu.

³³Na Yêsu khan kơ lu bơngai tơpôl: “Inh oei hơdai iĕm ưh pă đunh boih. Klaih kơ noh Inh wă wih tơ 'Bok mă wơh Inh.

³⁴Iĕm gô chă Inh mă-lei ưh kơ 'bôh. Iĕm ưh kơ gơh truh tơ anih Inh ôh.”

³⁵Lu bơngai Juđê pơma dih băl khan: “Bơngai âu Sư wă năm tơ yơ, Sư khan bơ̆n ưh kơ gơh 'bôh Sư dơ̆ng? Rŏ lăng Sư wă năm oei păng lu bơngai Juđê mă oei tơ dêh đe na bơtho lu bơngai dêh đe.

³⁶Păng Sư wă khan kiơ Sư khan: ‘Iĕm gô chă Inh mă-lei ưh kơ gơh 'bôh Inh,’ păng: ‘Iĕm ưh kơ gơh truh tơ anih Inh mơ̆n?’ ”

³⁷Tơpă wă tôch Năr Giĕng Bơsŭn ei, năr noh năr đe akŭm giĕng tih tơpă, na Yêsu iung dang dơ̆ng bơtho 'bơ̆r re khan: “Bơngai bu rơhing 'maih nhă đak, năm tơ Inh bĕ.

³⁸Bơngai bu lui kơ Inh sư gô đei đak glung ro lăm jơhngơ̆m sư păng ăn kơ sư arih ling-lang kư̆m thoi đe chih lăm sơ̆p hla bơar 'Bok Kei-Dei sơ̆.”

³⁹Sư khan thoi noh dang khan kơ lu bơngai lui kơ Sư gô đei Yang Bơhngol 'Lơ̆ng đơ̆ng 'Bok Kei-Dei ăn jur oei păng lu sư. Mă-lei kơplah noh 'Bok Kei-Dei tam mă ăn Yang Bơhngol 'Lơ̆ng ôh, kơlih Yêsu tam mă lôch iung arih tŏk tơ plĕnh.

⁴⁰Lu kon pơlei pơla kơtơ̆ng Yêsu pơma thoi noh boih, na lu bơngai mơ'nah khan: “'Bok âu boih 'Bok mă pơtruh nơ̆r 'Bok Kei-Dei tơpă mă bơ̆n chang gô Sư đơ̆ng sơ̆.”

⁴¹Lu mơ'nah dơ̆ng khan: “'Bok âu boih 'Bok Krist tơpă.” Đei lu mơ'nah dơ̆ng khan: “Ưh ôh. 'Bok âu sư lĕch đơ̆ng dêh Galilê mă-lei 'Bok Krist Sư ưh kơ lĕch đơ̆ng dêh Galilê ôh,

⁴²yua kơ đei lăm sơ̆p hla bơar 'Bok Kei-Dei đe chih khan 'Bok Krist lĕch đơ̆ng krung kơtum 'bok Đawit, đơ̆ng pơlei 'bok Đawit mơ̆n. Pơlei ei anăn Pơlei Betlehem lăm dêh char Juđê.”

⁴³Thoi noh na lu kon pơlei pơla tơklah băl đon gah tơdrong Yêsu.

⁴⁴Lu mơ'nah wă rôp Sư ră, mă-lei ưh kơ đei ti bu chro rôp Sư dơ̆ng.

⁴⁵Lu linh ei brŏk hoh đĕch tơ lu yŏng sư. Na lu yŏng sư 'bok soi tih păng lu đe Pharisi jet lu linh sư khan: “Lơliơ iĕm ưh kơ rôp anhăk Sư tơ âu?”

⁴⁶Lu linh sư khan: “Đơ̆ng sơ̆ tam lah đei bơngai bơtho hơgei dang Sư.”

⁴⁷Na lu bơngai Pharisi hil kơ lu sư: “'Noh iĕm hơdai wang lui kơ 'bơ̆r Sư bơtho hơlĕnh kơ kon pơlei pơla hăm trŏ?

⁴⁸Bĭ lu bơngai pơm tih, lu bơngai Pharisi, hăm đei hơdai lui kiơ̆ Sư? Ưh kơ đei bu ôh.

⁴⁹Iĕm kiơ̆ kơ lu kon pơlei pơla, lu sư jơ̆l ưh kơ hlôh lăm tơdrong juăt 'Bok Kei-Dei. Lu sư khŭl bơngai 'Bok Kei-Dei wă tŭk.”

⁵⁰Na đei minh 'nu bơngai sư kư̆m pơm tih lăm bơngai Pharisi, anăn sư Nikôđem, 'bok mă năm ngôi tơ Yêsu kơmăng sơ̆. Sư iung pơma tơduă lu sư pơm tih thoi âu:

⁵¹“Kiơ̆ kơ tơdrong juăt bơ̆n, ưh kơ gơh phak đe ôh dah lu kră tam mă mơ̆ng păng sek tơlang bơngai mă đe jâu noh, yua kơ bơ̆n ưh kơ băt sư pơm 'lơ̆ng ră dah sư pơm yoch.”

⁵²Na lu bôl buăl sư khan kơ sư: “Ih bơngai đơ̆ng dêh Galilê mơ̆n hă? Ih đŏk lăng lăm sơ̆p hla bơar 'Bok Kei-Dei bĕ, na ih gô băt đe ưh kơ đei chih roi khan bơngai mă pơtruh nơ̆r 'Bok Kei-Dei lĕch đơ̆ng dêh Galilê ôh, mă Sư âu lĕch đơ̆ng dêh Galilê.”

⁵³Klaih kơ noh đĭ-đăng lu sư brŏk tơklah tơ hnam kơdih.