Read bahnar Yo 8 Bible Online

Yo 8 - bahnar bible

Yo 8

²Na pơgê hrôih dơning Yêsu hơloh năm tơ hnam akŭm 'Bok Kei-Dei tơm tơ Pơlei Jêrusalem. Na đĭ-đăng bơngai tơ ei năm mơ̆ng Sư bơtho, na Sư tơoei bơtho lu đe ei.

³Kơplah Yêsu oei bơtho lu sư na lu 'bok thây bơtho tơdrong juăt đe Juđê păng lu bơngai Pharisi, lu sư anhăk ba minh 'nu bơngai drŏ-kăn tơ Yêsu. Bơngai drŏ-kăn ei đe 'bôh sư ngôi pơyô kư̆ kă tơpă. Na lu sư athei drŏ-kăn mă ngôi pơyô kư̆ kă ei dơ̆ng 'bơ̆t anăp đe tơpôl.

⁴Lu sư khan kơ Yêsu thoi âu: “Ơ 'Bok Thây, bơngai drŏ-kăn âu đe 'bôh sư ngôi pơyô kư̆ kă.

⁵Na Môis sơ̆ chih pơkă lăm tơdrong juăt bơ̆n khan bơngai bu pơm yoch thoi noh athei klơ̆m pơlôch sư păng tơmo. Na bĭ Ih khan thoi yơ?”

⁶Lu sư jet thoi noh, lu sư wă pơlong lăng Yêsu, wă kơ Sư pơma ưh kơ trŏ tơdrong juăt đe Juđê, na lu sư wă jâu Yêsu 'bơ̆t anăp đe kră sek tơlang. Mă-lei Yêsu kŭp kơ̆l, ti Sư chih ngôi tơ teh.

⁷Lu đe ei nŏng jet Sư 'bơ'bel. Na Sư ngơk khan kơ lu đe ei thoi âu: “Lăm lu iĕm bơngai bu tam lah pơm yoch, iĕm ăn kơ sư klơ̆m duch 'noh păng tơmo hơdrol kơ lu bơngai mă pơm yoch.”

⁸Klaih kơ noh Sư kŭp kơ̆l chih ngôi teh dơ̆ng.

⁹Lu sư kơtơ̆ng Yêsu khan kơ lu sư thoi noh, na lu sư lĕch brŏk pơtoi, đơ̆ng lu kră hơdrol truh tơ lu bơngai tơdăm đơ̆ng rŏng. Na oei pă Yêsu păng duch ei đĕch oei lăm ei.

¹⁰Na Yêsu ngơk lăng duch ei khan kơ sư thoi âu: “Tơ yơ lu đe noh hei duch? Hăm đei bu wă jâu areh kơ ih dơ̆ng ưh?”

¹¹Drŏ-kăn ei khan: “Ơ 'Bok Thây, ưh pă đei bu jâu areh kơ inh dơ̆ng ôh.” Na Yêsu khan: “Inh kư̆m ưh kơ jâu ih mơ̆n. Na dang ei brŏk mă 'lơ̆ng kơ ih bĕ, 'nĕ pă pơm yoch dơ̆ng hŏ.”

¹²Yêsu bơtho dơ̆ng thoi âu: “Inh pơchrang hơdah kơ kon bơngai jơ̆p-jang kơ teh đak wă kơ sư băt tơdrong 'Bok Kei-Dei. Bơngai bu kiơ̆ Inh sư huay năm lăm măng mu kiơ̆ tơdrong yoch, sư gô đei Inh pơchrang hơdah kơ sư păng ăn sư arih ling-lang.”

¹³Thoi noh lu bơngai Pharisi khan kơ Sư: “'Noh Ih pơang tơdrong Ih kơdih ưh kơ đei bu nai pơma bơ̆ng Ih, nhôn ưh kơ wă lui kơ Ih ôh.”

¹⁴Yêsu khan kơ lu sư: “Mă Inh pơma tơdrong Inh kơdih, Inh pơma trŏ tơpă, yua kơ Inh băt kơdih Inh bơngai đơ̆ng yơ, wă wih tơ yơ. Mă-lei lu iĕm ưh kơ hlôh Inh bơngai đơ̆ng yơ, gô wih tơ yơ noh ôh.

¹⁵Iĕm sek tơlang tơdrong Inh kiơ̆ kơ đon iĕm tơchĕng kơdih. Gah Inh ưh kơ đei sek tơlang bu ôh.

¹⁶Mă-lei dah Inh wă sek tơlang, Inh athei sek tơlang mă tơpăt, ưh kơ sĭ sek tơlang hơdrô̆ Inh ôh, nhi 'Bă Inh mă wơh Inh sek tơlang hơdai.

¹⁷Lăm tơdrong juăt iĕm, đei chih thoi âu: Dah đei bơngai đe wă sek tơlang, bơngai đe wă sek tơlang noh sư athei đei 'bar 'nu pơma bơ̆ng sư 'mơ̆i wă kơ đe băt sư pơma tơpăt dah ưh.

¹⁸Na gah Inh, akâu Inh kơdih păng 'Bă Inh mă wơh Inh pơma bơ̆ng Inh wă kơ iĕm băt tơdrong Inh pơma tơpăt.”

¹⁹Lu sư jet: “'Bă Ih tơ yơ?” Yêsu khan: “Yua kơ iĕm ưh kơ băt kơ Inh, na iĕm kư̆m ưh kơ băt kơ 'Bă Inh mơ̆n. Dah iĕm băt kơ Inh lei iĕm kư̆m băt kơ 'Bă Inh mơ̆n.”

²⁰Yêsu bơtho tơdrong âu, Sư bơtho lăm hnam akŭm 'Bok Kei-Dei tơm, 'bơ̆t anih đe tah jên pơyơ̆r kơ Kră Yang. Mă-lei ưh kơ đei ti bu chro rôp Sư ôh, yua kơ tam trŏ 'Bok Kei-Dei ăn.

²¹Yêsu bơtho dơ̆ng lu sư thoi âu: “Inh gô jăk tơ nai, na iĕm gô chă Inh mă-lei ưh kơ 'bôh. Păng iĕm gô lôch yua kơ tơdrong yoch iĕm. Iĕm ưh kơ gơh truh tơ anih Inh ôh.”

²²Lu đe Juđê khan: “Ô tơpă yơh, Sư wă pơlôch akâu Sư dah kiơ na Sư khan: ‘Iĕm ưh kơ gơh truh tơ anih Inh’?”

²³Na Yêsu khan kơ lu sư: “Iĕm bơngai đơ̆ng ala teh âu, Inh bơngai đơ̆ng kơpal plĕnh ti.

²⁴Kơlih kơ thoi noh na Inh khan kơ iĕm boih, iĕm gô lôch yua kơ tơdrong yoch iĕm. Dah iĕm ưh kơ lui kơ Inh đơ̆ng plĕnh ti iĕm gô lôch yua kơ tơdrong yoch iĕm tơpă.”

²⁵Lu sư jet: “Ih bu?” Yêsu khan: “Inh bơngai mă roi kơ iĕm sơ̆ boih.

²⁶Inh oei đei lơ tơdrong wă pơma păng iĕm mơ̆n gah tơdrong wă sek tơlang iĕm. 'Bok mă wơh Inh Sư pơma ling-lang tơpăt na Inh kơtơ̆ng Sư pơma thoi yơ, Inh bơtho đe kư̆m thoi noh mơ̆n.”

²⁷Dôm lu đe noh ưh kơ hlôh Yêsu roi kơ lu sư 'Bă Sư 'Bok Kei-Dei.

²⁸Kơlih kơ lu sư ưh kơ hlôh thoi noh na Yêsu wih roi dơ̆ng kơ lu sư: “Lăp đang kơ iĕm pơ̆ng pơlôch Inh Kon Bơngai ning-mônh, 'bơ̆t ei boih iĕm băt kơ Inh Kon Sư. Păng iĕm gô băt kơ Inh ưh kơ pơm kiơ̆ thoi Inh tơchĕng kơdih. Inh kơtơ̆ng Sư pơma thoi yơ, na Inh bơtho đe kư̆m thoi noh mơ̆n.

²⁹'Bă Inh mă wơh Inh, Sư oei hơdai păng Inh ling-lang. Sư ưh kơ achăng lê̆ kơdrô̆ Inh ôh, yua kơ Inh ling-lang pơm trŏ thoi Sư wă.”

³⁰Yêsu pơma thoi noh na đei lơ bơngai lui kơ Sư.

³¹Na Yêsu khan kơ lu bơngai Juđê mă lui kơ Sư boih: “Dah iĕm răk kiơ̆ tơdrong Inh bơtho khŏm khŏm, lei iĕm bơngai kiơ̆ Inh tơpă boih.

³²Na iĕm gô băt tơdrong 'Bok Kei-Dei tơpă, thoi noh na iĕm gô rơngei.”

³³Na lu bơngai kiơ̆ ei khan kơ Yêsu: “Nhôn kon sâu Abraham. Nhôn ưh kơ lah đĭch đe. Lơliơ Ih khan: ‘Iĕm gô rơngei’?”

³⁴Yêsu khan kơ lu sư: “Inh khan kơ iĕm tơpăt, iĕm ưh kơ rơngei ôh, yua bơngai bu pơm yoch ling-lang, bơngai 'noh sư dang đĭch mơ̆n yua kơ tơdrong yoch sư.

³⁵Bơngai đĭch đe sư ưh kơ atŏ yŏng sư ôh; pôm kon yŏng sư atŏ 'bă sư.

³⁶Thoi noh na dah Kon Sư ăn iĕm rơngei, na iĕm gô rơngei tơpă.

³⁷Inh băt mơ̆n iĕm kon sâu Abraham, mă-lei iĕm wă pơlôch Inh. Iĕm ưh kơ wă lui yom kơ Inh bơtho hơya tŏ sĕt 'biơ̆.

³⁸Inh roi kơ iĕm tơdrong mă Inh 'bôh kơplah Inh oei hơdai păng 'Bă Inh. Na iĕm pơm kiơ̆ iĕm kơtơ̆ng đơ̆ng 'bă iĕm.”

³⁹Lu sư khan kơ Yêsu: “Abraham boih 'bă nhôn.” Yêsu khan kơ lu sư: “Dah iĕm kon Abraham tơpă lei iĕm pơm kiơ̆ thoi sư pơm.

⁴⁰Mă-lei dang ei iĕm wă pơlôch Inh, sơmă Inh roi kơ iĕm tơpăt tơdrong Inh kơtơ̆ng đơ̆ng 'Bă Inh 'Bok Kei-Dei đĕch. Abraham sư ưh kơ wă pơlôch đe ôh.

⁴¹Iĕm pơm kiơ̆ kơ 'bă iĕm đĕch.” Lu sư khan: “Nhôn ưh kơ kiơ̆ yang nai ôh. 'Bok Kei-Dei đĕch 'Bă nhôn.”

⁴²Yêsu khan kơ lu sư: “Ưh ôh. Dah 'Bok Kei-Dei 'Bă iĕm tơpă lei iĕm kư̆m 'mêm kơ Inh mơ̆n, yua kơ Inh jur đơ̆ng 'Bok Kei-Dei. Inh năm bơtho iĕm ưh kơ sĭ Inh 'maih kơdih đĕch ôh. Inh jur tơ âu yua kơ Sư wơh Inh.

⁴³Inh tơhlôh ăn kơ iĕm thoi noh boih, kơlih kơ kiơ iĕm ưh kơ wao tơdrong Inh bơtho? Hăm trŏ iĕm arăng kơ̆l ưh kơ wă lui kơ nơ̆r Inh bơtho?

⁴⁴'Noh 'bă iĕm yang Satan, na iĕm pơm kiơ̆ kơ sư wă kơ sư lăp đon kơ iĕm. Đơ̆ng blŭng-a sơ̆ sư nŏng kơ chă pơlôch đe păng sư ưh kơ pơma tơpăt tŏ sĕt 'biơ̆, yua kơ sư ưh kơ layơ pơm tơpăt. Sư hơlĕnh ling-lang. Sư pơm yŏng pơjing gah tơdrong hơlĕnh.

⁴⁵Mă-lei Inh âu pơma bơtho iĕm tơdrong tơpăt ră iĕm ưh kơ lui kơ Inh. 'Noh yua kơ đon iĕm kư̆m ưh kơ tơpăt mơ̆n.

⁴⁶“Lăm lu iĕm ưh kơ đei bu 'bôh Inh pơm yoch kiơ. Dah Inh pơma tơpăt lơliơ iĕm ưh kơ wă lui kơ Inh?

⁴⁷Bơngai bu đơ̆ng 'Bok Kei-Dei, bơngai 'noh mơ̆ng nơ̆r 'Bok Kei-Dei. Iĕm ưh kơ mơ̆ng nơ̆r 'Bok Kei-Dei noh iĕm ưh kơ sĭ đơ̆ng 'Bok Kei-Dei ôh.”

⁴⁸Lu bơngai Juđê khan kơ Sư: “Trŏ boih nhôn khan Ih bơngai Samari yang mơ̆t.”

⁴⁹Yêsu khan: “Inh ưh kơ đei yang mơ̆t ôh. Inh pơư pơang anăn 'Bă Inh ră, na iĕm nŏng kơ pơma pơjăm pơjuă Inh.

⁵⁰Inh ưh kơ chă pơư pơang akâu Inh kơdih ôh. Đei minh 'nu 'Bok, Sư wă pơư pơang Inh păng Sư gô sek tơlang tơdrong bơ̆n âu tơpăt.

⁵¹Inh khan kơ iĕm tơpăt, bơngai bu răk nơ̆r Inh bơtho, bơngai 'noh huay kơ lôch ôh.”

⁵²Lu bơngai Juđê khan kơ Sư: “Dang ei nhôn băt kơ Ih bơngai yang mơ̆t tơpă boih. Abraham lôch boih, lu bơngai pơtruh nơ̆r 'Bok Kei-Dei sơ̆ kư̆m hơdai lôch đĭ, mă Ih khan bơngai bu răk nơ̆r Ih bơtho, bơngai 'noh huay kơ lôch.

⁵³Ih hăm tih hloh kơ 'bok kơdră bơ̆n Abraham? Sư lôch boih, lu bơngai pơtruh nơ̆r 'Bok Kei-Dei sơ̆ kư̆m lôch boih. Na dang ei đe pôk Ih pơm kiơ boih?”

⁵⁴Yêsu khan kơ lu sư: “Dah Inh pơma pơang kơdih akâu đĕch trŏ mơ̆n iĕm ưh kơ lui kơ Inh. Mă-lei pôm 'Bă Inh đĕch pơang akâu Inh. 'Bă Inh noh iĕm khan Sư Kră Yang iĕm,

⁵⁵mă-lei iĕm ưh kơ băt kơ Sư ôh. Inh băt kơ Sư tơpă. Dah Inh khan Inh ưh kơ băt kơ Sư, lei Inh bơngai hơlĕnh thoi iĕm mơ̆n. Inh băt kơ Sư tơpă, na Inh băt kơ răk nơ̆r Sư.

⁵⁶'Bă iĕm Abraham hiôk chơt kơlih kơ sư băt sư gô 'bôh năr Inh truh. Sư 'bôh boih na sư hiôk chơt tơpă.”

⁵⁷Na lu bơngai Juđê khan kơ Sư: “Ih tam truh pơđăm-jĭt sơnăm, thoi yơ Ih gơh 'bôh Abraham?”

⁵⁸Yêsu khan kơ lu sư: “Inh khan kơ iĕm tơpăt, hơdrol kơ Abraham tam mă đei, Inh đei boih.”

⁵⁹'Bơ̆t ei lu sư iŏk hloi tơmo wă klơ̆m Sư ră; mă-lei Sư ôn akâu Sư kơdih hloi lĕch đơ̆ng hnam akŭm 'Bok Kei-Dei tơm ei.