Read bahnar Jang 10 Bible Online

Jang 10 - bahnar bible

Jang 10

¹Tơ Pơlei Sêsarê đei minh 'nu bơngai anăn sư Kôrnei. Sư 'bok yŏng linh lăm khŭl linh đe anăn khŭl Itali, mă-lei sư wei lăp minh grŭp đĕch.

²Sư ưh kơ sĭ bơngai Juđê mơ̆n mă-lei sư păng đĭ hnam dơnŏ sư lui kơkuh kơ 'Bok Kei-Dei. Sư kư̆m hơlăng kơ đe Juđê tơmam păng krao khan ling-lang kơ 'Bok Kei-Dei.

³Minh năr ei dang pêng jơ kơsơ̆, 'bok Kôrnei 'bôh linh jang 'lơ̆ng đơ̆ng 'Bok Kei-Dei năm mơ̆t tơ hnam sư. Linh jang 'lơ̆ng khan kơ sư: “Ơ Kôrnei.”

⁴Na 'bok Kôrnei lăng sư. Sư hli dêh. Na 'bok Kôrnei khan: “Ơ 'bok, Ih wă kơ kiơ?” Na linh jang 'lơ̆ng ei khan: “'Bok Kei-Dei kơtơ̆ng ih krao khan ling-lang păng 'bôh ih hơlăng kơ đe kon pơlei pơla tơmam, na 'Bok Kei-Dei wă tơgŭm ih.

⁵Na dang ei ih athei bơngai jang kơ ih năm tơ Pơlei Japa krao minh 'nu bơngai anăn sư Pêtrôs.

⁶Sư oei păng minh 'nu bơngai jang akar, anăn sư Simôn. Hnam sư jê̆ đak dơsĭ.”

⁷Đơ̆ng rŏng kơ linh jang 'lơ̆ng brŏk, 'bok Kôrnei krao 'bar 'nu bơngai jang kơ sư păng minh 'nu linh juăt awih awăn păng sư. Linh ei kư̆m lui kơ 'Bok Kei-Dei mơ̆n.

⁸Kôrnei roi kơ lu sư đĭ tơdrong sư 'bôh linh jang 'lơ̆ng hei, athei hloi lu sư năm tơ Pơlei Japa chă Pêtrôs.

⁹Năr dơning dơ̆ng lu sư năm wă jê̆ truh tơ Pơlei Japa. Lăp truh 'năr dơ̆ng, Pêtrôs tŏk tơ anih hnam mă kơpal sư wă krao khan kơ 'Bok Kei-Dei.

¹⁰Sư pơngot wă sa. Kơplah đe oei hơmet tơmam sa kơ sư, sư 'bôh plĕnh tơpơih păng 'bôh anŭng che đơ̆ng plĕnh jruh 'bơ̆t anăp sư.

¹¹

¹²Lăm ei Pêtrôs 'bôh tôm kơ kon sem dơrong păng sem bri, đei bơ̆n 'bih kơep lep-ler bơ̆n sem păr.

¹³Klaih kơ noh sư kơtơ̆ng nơ̆r pơma đơ̆ng plĕnh thoi âu: “Ơ Pêtrôs, iung bĕ pơlôch 'buh sa lu kon sem âu.”

¹⁴Mă-lei Pêtrôs khan: “Ơ Kră Yang, inh ưh kơ gơh sa ôh, yua kơ inh ưh kơ lah sa lu tơmam âu, kơlih kơ tơdrong juăt nhôn giĕng ưh kơ gơh sa.”

¹⁵Na Pêtrôs kơtơ̆ng dơ̆ng thoi âu: “Dôm tơmam âu 'Bok Kei-Dei khan 'lơ̆ng boih, ưh kơ đei giĕng ôh; na ih khan giĕng. Thoi noh ih pơma ưh kơ trŏ păng Sư dơ̆ng.”

¹⁶Pêng 'măng Pêtrôs kơtơ̆ng nơ̆r đơ̆ng plĕnh pơma thoi noh. Klaih kơ noh che noh tŏk dơ̆ng tơ plĕnh.

¹⁷Na Pêtrôs khan: “Inh tơchĕng thoi yơ kih tơdrong noh hei?” Na bơngai đơ̆ng Kôrnei truh boih tơ Pơlei Japa. Na sư jet đe tơ yơ hnam Simôn. Đe tơ'bôh kơ sư. Na sư truh tơ 'măng hnam boih.

¹⁸Sư jet bơngai hnam ei: “Pêtrôs hăm oei tơ âu?”

¹⁹Pêtrôs sư oei tơchĕng tơdrong sư 'bôh hei, na Yang Bơhngol 'Lơ̆ng khan kơ sư: “Pêng 'nu bơngai truh tơ âu, sư chă ih.

²⁰Ih jur mă tĕnh bĕ, năm hơdai păng lu sư, ưh kơ đei tơdrong kiơ ôh, yua kơ Inh athei sư năm tơ âu. Na dang ei ih 'nĕ pă tơchĕng giĕng tơdrong mơ̆t lăm hnam tơmoi ưh kơ khŭl Juđê.”

²¹Na Pêtrôs jur tơ lu sư khan hloi: “Inh boih bơngai iĕm chă, iĕm wă tơdrong kiơ?”

²²Lu sư khan: “'Bok Kôrnei sư yŏng linh, sư athei nhôn năm tơ ih tơ âu. Sư bơngai tơpăt, lui kơ 'Bok Kei-Dei mơ̆n. Đĭ-đăng lu bơngai Juđê kư̆m khan sư 'lơ̆ng. Linh jang 'lơ̆ng đơ̆ng 'Bok Kei-Dei athei sư krao ih năm tơ hnam sư wă kơ sư gơh kơtơ̆ng nơ̆r ih bơtho.”

²³Na Pêtrôs athei sư mơ̆t tơ hnam sư păng athei sư 'bĭch minh măng tơ hnam sư ei. Pơgê dơning dơ̆ng lu sư iung năm hơdai. Kư̆m đei bơngai lui đơ̆ng Pơlei Japa ei năm hơdai păng sư mơ̆n.

²⁴Năr dơmônh dơ̆ng lu sư truh tơ Pơlei Sêsarê. Kôrnei chang gô lu sư. Sư kư̆m krao akŭm lu kơtum păng lu bôl buăl sư mơ̆n.

²⁵Lăp Pêtrôs truh tơ 'măng dur sư, na Kôrnei năm tơ anăp Pêtrôs. Kôrnei sơtơ̆p kŭl-tăng kơkuh kơ sư.

²⁶Mă-lei Pêtrôs rôp ti sư tơiung păng khan: “Iung bĕ. Inh kư̆m kon bơngai lei-lăi thoi ih mơ̆n.”

²⁷Bre sư oei pơma dơnuh mơ̆t hloi lăm hnam Kôrnei. Pêtrôs 'bôh lơ bơngai akŭm lăm hnam ei.

²⁸Pêtrôs khan kơ lu sư: “Iĕm kư̆m băt boih tơdrong juăt nhôn bơngai Juđê ưh kơ ăn nhôn mơ̆t tơ hnam đe tơmoi phara khŭl păng ngôi hơdai păng đe. Mă-lei 'Bok Kei-Dei tơbăt kơ inh nhên boih, inh ưh kơ gơh jô̆ kơ bơngai phara khŭl kơnê̆ ôh.

²⁹Thoi noh na lăp iĕm krao inh, inh năm hloi. Apinh iĕm roi kơ inh iĕm đei tơdrong kiơ na iĕm krao inh âu.”

³⁰Na 'bok Kôrnei khan kơ Pêtrôs: “Puăn năr kơ âu boih, dang jơ âu mơ̆n, pêng jơ kơsơ̆, inh oei lăm hnam inh âu, krao khan kơ Kră Yang 'Bok Kei-Dei. Na inh 'bôh hloi minh 'nu bơngai hrŭk ao kok hơdah, sư dơ̆ng 'bơ̆t anăp inh.

³¹Bơngai ei khan kơ inh: ‘Ơ Kôrnei, 'Bok Kei-Dei kơtơ̆ng ih krao khan păng Sư băt kơ ih hơlăng kơ đe tơmam na 'Bok Kei-Dei wă tơgŭm ih.

³²Na dang ei ih athei bơngai jang kơ ih năm tơ Pơlei Japa krao minh 'nu bơngai anăn sư Pêtrôs. Sư oei păng minh 'nu bơngai jang akar, anăn sư Simôn. Hnam sư jê̆ đak dơsĭ.’

³³Na inh athei bơngai jang kơ inh năm krao ih hloi. Na ih năm hloi tơ âu. Inh bơnê kơ ih tơpă. Nhôn akŭm tơ âu 'bơ̆t anăp 'Bok Kei-Dei mơ̆ng đĭ đơ̆ng nơ̆r Kră Yang 'Bok Kei-Dei athei ih bơtho.”

³⁴Na Pêtrôs pơma thoi âu: “Dang ei inh băt tơpă boih 'Bok Kei-Dei jô̆ đĭ-đăng bơngai lei-lăi đĕch.

³⁵Lăm rim khŭl bơngai, bơngai bu lui kơkuh kơ 'Bok Kei-Dei păng pơm trŏ thoi Sư wă, 'Bok Kei-Dei kư̆m lăp đon kơ lu sư lei-lăi ngăl.

³⁶'Bok Kei-Dei wơh Kon Sư Yêsu bơtho nơ̆r Sư tơ lu bơngai Isơrael. Nơ̆r noh Tơdrong 'Nao 'Lơ̆ng ăn kơ bơ̆n oei hiôk păng 'Bok Kei-Dei, yua kơ Kră Yang Yêsu Krist lôch tang bơ̆n, Sư Yŏng đĭ-đăng bơngai bơ̆n.

³⁷Iĕm băt boih tơdrong noh: Đơ̆ng rŏng kơ Yôhan bơtho tơdrong 'batem kơ đe, Yêsu năm jơ̆p kơ dêh đe Juđê, blŭng-a đơ̆ng dêh Galilê, bơtho tơdrong 'Bok Kei-Dei.

³⁸'Bok Kei-Dei ăn kơ Yêsu đơ̆ng Pơlei Nasaret Yang Bơhngol 'Lơ̆ng tơgŭm Sư pơm tơdrong mơsêh mơyang. Yêsu năm chă tơgŭm đe păng pơklaih đĭ-đăng bơngai đơ̆ng yang Satan pơđep. Yêsu gơh pơm thoi noh yua kơ 'Bok Kei-Dei tơgŭm Sư.

³⁹Nhôn kư̆m 'bôh mơ̆n đĭ tơdrong Sư pơm tơ dêh đe Juđê păng tơ Pơlei Jêrusalem. Đe pơ̆ng pơlôch Sư tơ 'long pơglang.

⁴⁰Mă-lei pêng năr đơ̆ng rŏng, 'Bok Kei-Dei tơiung arih Sư đơ̆ng lôch păng tơ'bôh akâu Sư kơ đe.

⁴¹Mă-lei Sư ưh kơ tơ'bôh akâu Sư kơ đĭ kon pơlei pơla ôh. Sư tơ'bôh akâu Sư kơ lu bơngai Sư rơih hơdrol wă pơm kơdranh kơ Sư iung arih boih. Sư tơ'bôh akâu Sư kơ nhôn. Nhôn sŏng sa hơdai păng Sư đơ̆ng rŏng kơ Sư iung arih.

⁴²Yêsu athei nhôn bơtho Tơdrong 'Nao 'Lơ̆ng kơ lu kon pơlei pơla, tơbăt ăn kơ đe tơdrong 'Bok Kei-Dei ăn kơ Yêsu sek tơlang dôm lu bơngai arih, bơngai lôch.

⁴³Yêsu boih, dôm lu bơngai pơtruh nơ̆r 'Bok Kei-Dei pơkă khan gô truh. Lu sư khan bơngai bu lui kơ Sư, 'Bok Kei-Dei gô pơklaih yoch sư. 'Bok Kei-Dei pơklaih yoch bơ̆n kơlih kơ Yêsu Krist lôch tang tơ 'long pơglang sơ̆.”

⁴⁴Kơplah Pêtrôs oei pơma na Yang Bơhngol 'Lơ̆ng jur oei tơ rim 'nu lu bơngai mă mơ̆ng nơ̆r Sư bơtho.

⁴⁵Lu bơngai lui đơ̆ng Pơlei Japa mă kiơ̆ Pêtrôs ei sư bơngai Juđê. Sư kơtơ̆ng lu kon pơlei ei pơma nơ̆r hlĭch ư-ang kơ 'Bok Kei-Dei, na sư băt 'Bok Kei-Dei ăn Yang Bơhngol 'Lơ̆ng kơ lu kon pơlei ei boih. Na sư sơleng kơ đon kơlih kơ sư lăng lu bơngai akŭm ei ưh kơ trŏ kơ khŭl bơngai Juđê thoi sư. Sư ngêh kơ 'Bok Kei-Dei wă ăn Yang Bơhngol 'Lơ̆ng kơ khŭl Juđê đĕch. Na Pêtrôs pơma kơ lu bôl sư thoi âu:

⁴⁶

⁴⁷“'Bok Kei-Dei ăn kơ rim 'nu lu bơngai âu Yang Bơhngol 'Lơ̆ng kư̆m lei-lăi thoi Sư ăn kơ bơ̆n Yang Bơhngol 'Lơ̆ng Sư sơ̆. Na dang ei inh jet iĕm hăm đei bu tang găn kuă ăn bơ̆n pơm 'batem kơ lu sư? Ưh kơ đei bu ôh, hăm trŏ?” Na bôl Pêtrôs drơ̆ng: “Trŏ boih, ưh kơ đei bu ôh.”

⁴⁸Đơ̆ng noh na Pêtrôs athei lu sư iŏk 'batem hăm anăn Yêsu Krist. Klaih kơ noh lu đe Kôrnei apinh Pêtrôs oei hăm sư 'bar pêng năr dơ̆ng.