Read bahnar Jang 11 Bible Online

Jang 11 - bahnar bible

Jang 11

¹Lu jơ̆ng 'bang Yêsu păng lu bơngai lui tơ dêh Juđê kơtơ̆ng ang kon tơmoi mă ưh kơ khŭl sư lui kơ tơdrong 'Bok Kei-Dei boih.

²Tơ Pơlei Jêrusalem đei lu bơngai Juđê khan kon tơmoi lui boih athei kăt tơdra akar. Lăp Pêtrôs truh tơ Pơlei Jêrusalem lu sư pơjah păng Pêtrôs. Lu sư khan:

³“Lơliơ ih năm hơpong kơ lu bơngai tơmoi mă ưh kơ kăt tơdra akar thoi bơ̆n? Ih kư̆m sŏng sa păng lu sư tăm.”

⁴Na Pêtrôs pơma tơwih kơ lu sư. Sư roi kơ lu sư đĭ tơdrong noh thoi âu:

⁵“Hơtai inh oei tơ Pơlei Japa ki, minh năr ei inh oei krao khan na inh 'bôh minh pôm tơmam anŭng che tih đơ̆ng plĕnh jruh 'bơ̆t anăp inh.

⁶Inh lăng lăm che ei 'bôh tôm kơ sem dơrong păng sem bri. Đei bơ̆n 'bih kơep lep-ler, bơ̆n sem păr.

⁷Đơ̆ng rŏng kơ noh inh kơtơ̆ng nơ̆r pơma đơ̆ng plĕnh kơ inh thoi âu: ‘Ơ Pêtrôs, iung bĕ, pơlôch 'buh sa lu kon sem âu.’

⁸Mă-lei inh khan kơ Sư thoi âu: ‘Ơ Kră Yang, inh ưh kơ gơh sa yua inh ưh kơ lah sa lu tơmam âu, yua kơ tơdrong juăt nhôn giĕng ưh kơ gơh sa.’

⁹Na inh kơtơ̆ng nơ̆r đơ̆ng plĕnh pơma dơ̆ng: ‘Dôm tơmam âu 'Bok Kei-Dei khan 'lơ̆ng boih, ưh kơ đei giĕng ôh; na ih khan giĕng. Thoi noh ih pơma ưh kơ trŏ păng Sư dơ̆ng.’

¹⁰Pêng 'măng inh kơtơ̆ng nơ̆r đơ̆ng plĕnh pơma thoi noh. Đơ̆ng rŏng kơ noh che 'noh tŏk dơ̆ng tơ plĕnh.

¹¹Hơtai ei pêng 'nu bơngai truh tơ hnam inh oei. Đe wơh lu sư năm tơ inh. Lu sư ei đơ̆ng Pơlei Sêsarê.

¹²Yang Bơhngol 'Lơ̆ng athei inh năm hơdai păng lu sư păng khan kơ inh thoi âu: ‘Ih 'nĕ pă tơchĕng giĕng tơdrong mơ̆t lăm hnam tơmoi ưh kơ khŭl Juđê.’ Bôl inh âu tơdrâu 'nu kư̆m năm hơdai hăm inh mơ̆n. Na nhôn mơ̆t tơ hnam Kôrnei.

¹³Sư roi kơ nhôn tơdrong sư 'bôh linh jang 'lơ̆ng đơ̆ng 'Bok Kei-Dei lăm hnam sư. Linh jang 'lơ̆ng ei khan kơ sư: ‘Ih athei bơngai jang kơ ih năm tơ Pơlei Japa krao minh 'nu bơngai, anăn sư Pêtrôs.

¹⁴Sư gô bơtho ih, na 'Bok Kei-Dei gô pơklaih ih păng đĭ-đăng hnam dơnŏ ih.’

¹⁵Lăp inh oei bơtho đĕch, Yang Bơhngol 'Lơ̆ng jur oei păng lu sư kư̆m thoi sư jur oei păng bơ̆n blŭng-a sơ̆ mơ̆n.

¹⁶Na inh 'blŏk kơ nơ̆r Kră Yang Yêsu khan sơ̆: ‘Yôhan pơm kơ iĕm 'batem păng đak, mă-lei 'Bok Kei-Dei gô pơm kơ iĕm 'batem phara, Sư gô ăn kơ iĕm Yang Bơhngol 'Lơ̆ng Sư.’

¹⁷'Bok Kei-Dei ăn kơ lu sư Yang Bơhngol 'Lơ̆ng thoi Sư ăn kơ bơ̆n sơ̆ lăp bơ̆n lui kơ Kră Yang Yêsu Krist, na Sư ăn kơ bơ̆n Yang Bơhngol 'Lơ̆ng hloi. Na inh ưh kơ wă găn 'Bok Kei-Dei ôh.”

¹⁸Lăp lu bôl Pêtrôs kơtơ̆ng Pêtrôs pơma thoi noh, lu sư chu hloi, huay pă pơjah dơ̆ng. Na lu sư ư-ang kơ 'Bok Kei-Dei păng khan: “'Noh 'Bok Kei-Dei ăn kơ kon tơmoi tơbral tơdrong yoch lu sư, wă kơ lu sư arih ling-lang kư̆m thoi bơ̆n mơ̆n.”

¹⁹Lăp đe pơlôch Êtien đe kư̆m pơm lơ tơdrong kơnê̆ kơ lu bơngai lui mơ̆n. Na lu bơngai lui kư̆m jăk truh tơ dêh Phênisi, dêh Chiprơ păng Pơlei Antiôs mơ̆n păng bơtho Tơdrong 'Nao 'Lơ̆ng kơ bơngai Juđê ngăl.

²⁰Lăm lu bơngai lui ei đei bơngai đơ̆ng dêh Chiprơ păng bơngai Pơlei Siren lu sư khŭl Juđê, mă-lei lu sư năm bơtho tơdrong Kră Yang Yêsu kơ lu kon tơmoi ưh kơ khŭl sư tơ Pơlei Antiôs.

²¹Kră Yang Yêsu Krist tơgŭm lu sư bơtho đe na đei lơ bơngai lui kiơ̆ kơ Kră Yang Yêsu.

²²Lu 'nhŏng oh bơngai lui tơ Pơlei Jêrusalem kơtơ̆ng ang tơdrong 'noh, na lu sư wơh minh 'nu 'Barna'ba năm tơ Pơlei Antiôs.

²³Lăp 'Barna'ba truh boih tơ Pơlei Antiôs, sư 'bôh 'Bok Kei-Dei tơgŭm lu sư tơpă. Na jơhngơ̆m 'Barna'ba chơt hiôk. Na 'Barna'ba pơlung lu sư khŏm khŏm wă kơ lu sư lui kơ Kră Yang Yêsu hăm đĭ jơhngơ̆m klơm klak lu sư kơdih.

²⁴'Barna'ba sư bơngai 'lơ̆ng, sư lui kơjăp păng sư 'bĕnh kơ Yang Bơhngol 'Lơ̆ng na Yang Bơhngol 'Lơ̆ng tơgŭm sư ling-lang. Na hơtai ei đei lơ bơngai lui kơ Kră Yang Yêsu.

²⁵Đơ̆ng rŏng kơ noh dơ̆ng, 'Barna'ba năm tơ Pơlei Tarsơ sư chă Sôl.

²⁶Lăp sư chă 'bôh boih, sư anhăk ba Sôl tơ Pơlei Antiôs. Kơplah minh sơnăm bre sư bơtho lu bơngai lui tơ Pơlei Antiôs. Bre sư bơtho tơdrong 'Bok Kei-Dei na lơ bơngai năm mơ̆ng. Tơ ei đe anăn lu bơngai lui, bơngai Krist. Đơ̆ng sơ̆ đe ưh kơ anăn thoi noh ôh.

²⁷Hơtai ei đei lu bơngai đơ̆ng Pơlei Jêrusalem năm tơ Pơlei Antiôs. Lu sư bơngai pơtruh nơ̆r 'Bok Kei-Dei.

²⁸Lăm lu sư ei đei minh 'nu bơngai anăn sư Abus. Lăp lu bơngai ei oei akŭm, Abus iung pơma. Na Yang Bơhngol 'Lơ̆ng ăn kơ sư khan lê̆ hơdrol gô đei tơdrong pơngot rơwĕt jơ̆p kơ teh đak. Na kơplah pơtao Klôt pơgơ̆r, kư̆m đei tơdrong pơngot rơwĕt.

²⁹Lăp lu bơngai lui kơtơ̆ng gô đei tơdrong pơngot rơwĕt, na lu sư wă tơra jên ăn kơ lu bôl sư lui tơ dêh Juđê. Na rim 'nu lu sư ăn jên kiơ̆ kơ akâu sư đei.

³⁰Na lu sư ăn jên kơ bre 'Barna'ba păng Sôl. Bre sư chĕp ba jên 'noh tơ dêh Juđê wă ăn kơ lu kră pơgơ̆r bơngai lui.