Read bahnar Jang 13 Bible Online

Jang 13 - bahnar bible

Jang 13

¹Lăm lu bơngai lui tơ Pơlei Antiôs đei lu bơngai pơtruh nơ̆r 'Bok Kei-Dei păng lu bơngai bơtho nơ̆r 'Bok Kei-Dei. Anăn lu sư: 'Barna'ba, Simiôn mă đe kư̆m anăn Niger, Lusiu đơ̆ng Pơlei Siren, Sôl păng Manahen. Manahen đe rong sư hơdai 'bok kuan tih Hêrôt hơtai sư oei iĕ sơ̆.

²Minh năr ei, lu sư ơ̆t kơ por, yua kơ sư wă krao khan kơ 'Bok Kei-Dei. Na Yang Bơhngol 'Lơ̆ng khan kơ lu sư: “Iĕm ăn kơ Inh bre 'Barna'ba păng Sôl wă kơ bre sư gơh jang kiơ̆ kơ Inh ăn kơ bre sư.”

³Lu sư oei ơ̆t kơ por wă krao khan. Đơ̆ng 'noh lu sư pel kơ̆l bre sư, wơh hloi bre sư năm bơtho tơdrong 'Bok Kei-Dei. Bre 'Barna'ba păng Pôl năm bơtho tơ bŏl Chiprơ

⁴Yua kơ Yang Bơhngol 'Lơ̆ng wơh bre sư năm na bre sư năm hloi tơ Pơlei Sêlusi. Đơ̆ng noh na bre sư tŏk thŏng-nan năm tơ bŏl đak đe anăn Chiprơ.

⁵Bre sư truh tơ Pơlei Salêmin dêh Chiprơ ei boih, bre sư bơtho tơdrong 'Bok Kei-Dei tơ lu hnam akŭm đe Juđê. Yôhan mă đe kư̆m anăn Markôs sư kư̆m năm hơdai păng bre sư wă tơgŭm bre sư mơ̆n.

⁶Lu sư năm jơ̆p kơ bŏl đak Chiprơ ei, truh tơ Pơlei Papôih. Tơ pơlei ei lu sư tơ'bơ̆p minh 'nu bơngai pơjâu Juđê. Sư khan 'Bok Kei-Dei ăn kơ sư pơma khan lê̆ hơdrol mă-lei 'Bok Kei-Dei ưh kơ ăn kơ sư ôh. Anăn bơngai pơjâu ei 'Barjasu.

⁷Sư kư̆m pơm buăl păng 'bok kuan tih dêh Chiprơ. 'Bok kuan tih ei, anăn sư Sêjus Pôlus, sư bơngai hơgei. Sư krao 'Barna'ba păng Sôl năm bơtho tơdrong 'Bok Kei-Dei kơ sư.

⁸Mă-lei bơngai pơjâu ei, Êlimas, Êlimas anăn sư lăm nơ̆r Grĕk, sư tang găn bre Sôl păng 'Barna'ba wă kơ 'bok kuan tih ưh kơ lui kơ Kră Yang.

⁹Đe kư̆m anăn Sôl, noh Pôl. Na Pôl 'bĕnh kơ Yang Bơhngol 'Lơ̆ng. Pôl lăng bơngai pơjâu ei pơnhên khan hloi: “E bơngai plơ̆ plĕch hơlĕnh kơ đe ling-lang. E kon yang Satan, tang găn tơdrong 'lơ̆ng Kră Yang. Inh wă bơtho tơdrong 'Bok Kei-Dei tơpăt mă-lei e khan inh hơlĕnh. Ưh kơ trŏ inh hơlĕnh ôh, e hơlĕnh kơ tơdrong Kră Yang 'Bok Kei-Dei.

¹⁰

¹¹Na dang ei 'Bok Kei-Dei gô phak e. E gô tol măt minh yuh, ưh kơ 'bôh hơdah.” Na bơngai pơjâu ei tol măt hloi. Sư hơwơi chă hơbơ̆ đe wă kơ đe tơgŭm dui ba sư.

¹²'Bok kuan tih wei dêh char ei, sư 'bôh tơdrong hlĭch thoi noh na sư lui hloi kơ Kră Yang Yêsu. Sư mơ̆ng hlĭch tơpă tơdrong lu bơngai bơtho tơdrong Kră Yang 'Bok Kei-Dei.

¹³Đơ̆ng Pơlei Papôih Pôl păng lu buăl sư tŏk thŏng-nan năm tơ Pơlei Perga lăm dêh Pamphili. Mă-lei Markôs achăng lê̆ bre buăl sư brŏk tơ Pơlei Jêrusalem dơ̆ng.

¹⁴Đơ̆ng Pơlei Perga bre sư năm tơ Pơlei Antiôs lăm dêh char Pisidi. Năr pơdơh bre sư năm mơ̆t tơ hnam akŭm đe Juđê na lu sư akŭm lăm ei.

¹⁵Đang kơ đe đŏk hla bơar tơdrong juăt 'Bok Kei-Dei pơkă păng tơdrong bơngai pơtruh nơ̆r 'Bok Kei-Dei boih, na lu kră wei-lăng lăm hnam akŭm lu đe Juđê khan kơ bre sư: “Ơ bre 'nhŏng oh, tơdah biĕm đei tơdrong wă bơtho kơ kon pơlei pơla, bơtho bĕ.”

¹⁶Đơ̆ng noh na Pôl iung yơ̆r ti păng khan: “Ơ lu bơngai Isơrael păng lu bơngai tơmoi năm kơkuh kơ 'Bok Kei-Dei, apinh iĕm mơ̆ng inh bĕ.

¹⁷Inh roi gah tơdrong lu bơngai Isơrael. Lu bơngai Isơrael kơkuh kơ 'Bok Kei-Dei. 'Bok Kei-Dei rơih lu 'bok kơdră bơ̆n sơ̆. Na hơtai lu sư oei tơ dêh Êyiptơ thoi lĕ kơ tơmoi đĕch, mă-lei 'Bok Kei-Dei ăn kơ lu sư rai đunh rai lơ tơpă. Yua kơ Kră Yang 'Bok Kei-Dei pơm hăm tơdrong mơsêh mơyang Sư kơdih na Sư tơlĕch lu sư đơ̆ng dêh char Êyiptơ.

¹⁸Kơplah puăn-jĭt sơnăm lu bơngai Isơrael pơm lơ tơdrong ưh kơ chu kơ 'Bok Kei-Dei tơ char glă. Mă-lei 'Bok Kei-Dei 'mêm mơnat kơ lu sư tơpă.

¹⁹Đơ̆ng hơdrol sơ̆ lu bơngai Isơrael oei chang gô Kră Yang 'Bok Kei-Dei wă ăn kơ lu sư teh đak Kanaan ei dang oei pă puăn-hrĕng pơđăm-jĭt sơnăm 'mơ̆i na truh. Na truh boih puăn-hrĕng pơđăm-jĭt sơnăm, Kră Yang 'Bok Kei-Dei pơlôch pơrăm tơpơh khŭl bơngai ei na teh đak lu đe ei 'Bok Kei-Dei ăn kơ lu bơngai Isơrael. 'Bok Kei-Dei ăn kơ lu sư đei lu kră sek tơlang kơdih sư truh tơ 'bok Samuel, bơngai pơtruh nơ̆r 'Bok Kei-Dei sơ̆.

²⁰

²¹“Đơ̆ng noh lu bơngai Isơrael apinh 'Bok Kei-Dei ăn kơ lu sư đei minh 'nu bơngai wă pơm pơtao lu sư. Na 'Bok Kei-Dei ăn kơ lu sư 'bok Sôl pơm pơtao lu sư. Sôl ei sư kon 'bok Kis, sư bơngai đơ̆ng adrĕch adrung 'bok Bênjamin. Sư pơgơ̆r puăn-jĭt sơnăm.

²²Klaih kơ noh 'Bok Kei-Dei tơlĕch 'bok pơtao Sôl, tơplih Đawit dơ̆ng pơm pơtao lu sư. Na 'Bok Kei-Dei jô̆ kơ Đawit thoi âu: ‘Inh lăp đon păng Đawit kon 'bok Jesê, sư gô pơm kiơ̆ kơ Inh wă ling-lang.’

²³'Bok Kei-Dei ăn Yêsu Kon Sâu Đawit wă dŏng pơklaih lu bơngai Isơrael, kiơ̆ kơ Sư pơkă sơ̆.

²⁴Hơdrol kơ Yêsu wă truh Yôhan bơtho kơ đĭ-đăng bơngai Isơrael athei sư tơbral kơdih tơdrong yoch na pơm 'batem hloi.

²⁵Lăp Yôhan pơm wă jê̆ keh tôm tơdrong jang sư boih, na sư khan: ‘Iĕm ngêh kơ inh bu? Ưh kơ sĭ iĕm chang gô inh ôh, iĕm chang gô Bơngai wă truh đơ̆ng rŏng kơ inh kơnh. Sư 'Bok tih tơpă. Dah Sư athei inh yaih ăn tơlei chơkhŏ Sư, inh kư̆m ưh kơ hơnhŏ mơ̆n, mă ưh kơ pơ̆n ngơk lăng Sư ôh.’

²⁶“Ơ lu 'nhŏng oh adrĕch adrung kon sâu Abraham păng lu bơngai tơmoi năm kơkuh kơ 'Bok Kei-Dei, Kră Yang 'Bok Kei-Dei ăn kơ bơ̆n dang ei tơdrong dŏng pơklaih.

²⁷Lu bơngai Pơlei Jêrusalem păng lu kră pơgơ̆r bơngai Juđê, lu sư ưh kơ kơnăl kơ Yêsu 'Bok Dŏng Pơklaih ôh. Rim năr pơdơh Sa'bat lu sư kơtơ̆ng đe đŏk sơ̆p hla bơar lu bơngai khan lê̆ hơdrol gah Yêsu sơ̆. Mă-lei lu sư ưh kơ hlôh ôh. Lu sư pơma jâu wă pơlôch Yêsu đĕch, na 'blep thoi lu bơngai khan lê̆ hơdrol sơ̆ tơpă.

²⁸Ưh kơ đei bơngai bu 'bôh tơdrong Yêsu pơm kơnê̆ ôh. Lu sư kư̆ kơ jâu đĕch. Lu sư apinh Pilat pơlôch Sư tăm.

²⁹Lu sư pơm kơ Yêsu dôm tơdrong pơkă lê̆ hơdrol lăm sơ̆p hla bơar 'Bok Kei-Dei đang boih na đe tơjur akâu Sư đơ̆ng 'long pơglang na 'măn akâu Sư tơ bơsat.

³⁰Mă-lei 'Bok Kei-Dei tơiung arih Sư đơ̆ng lôch.

³¹Na Yêsu tơ'bôh akâu Sư tơ lu buăl Sư đunh năr mơ̆n. Lu buăl Sư ei năm hơdai juăt păng Yêsu ling-lang hơdrol kơ Sư tam mă lôch sơ̆, đơ̆ng dêh char Galilê truh tơ Pơlei Jêrusalem. Na dang ei lu buăl Sư ei bơtho tơdrong Yêsu kơ lu bơngai Isơrael.

³²Nhi năm tơ âu wă bơtho ăn kơ iĕm Tơdrong 'Nao 'Lơ̆ng. Tơdrong 'Bok Kei-Dei pơkă kơ lu kơdră bơ̆n sơ̆ khan wă ăn Kon Sư pơgơ̆r bơ̆n, dang ei Sư ăn kơ lu bơ̆n kon sâu lu sư 'bôh tơdrong noh boih. Truh boih tơdrong noh yua kơ Sư tơiung arih Yêsu đơ̆ng lôch. 'Noh thoi đe chih lăm sơ̆p hla bơar Tơdrong Hơriso, Tơdrong Hơri mă 'bar: 'Bok Kei-Dei khan: ‘Ih boih Kon Inh, đơ̆ng năr âu Inh wă ăn kơ Ih pơgơ̆r.’

³³

³⁴'Bok Kei-Dei khan thoi âu gah tơdrong Sư tơiung Kon Sư đơ̆ng lôch pă đei lôch dơ̆ng: ‘Inh gô ăn kơ Ih tơdrong 'lơ̆ng; thoi Inh pơkă kơ Đawit sơ̆, Inh gô ăn tơpă.’

³⁵Kư̆m đei chih tơ âu tơ nai dơ̆ng: ‘Ih ưh kơ ăn akâu Inh mă Kon 'lơ̆ng Ih jing ôm ôh.’

³⁶Gah Đawit, lăp sư oei arih sư pơm kiơ̆ kơ 'Bok Kei-Dei wă. Na sư lôch, đe 'bŭ akâu sư hơdai păng lu 'bok sư, akâu sư jing ôm.

³⁷Mă-lei akâu Yêsu ưh kơ jing ôm ôh yua kơ 'Bok Kei-Dei tơiung arih Sư đơ̆ng lôch.

³⁸Ơ lu 'nhŏng oh, inh wă kơ iĕm băt tơpă tơdrong âu: Yua kơ Yêsu na iĕm gơh klaih đơ̆ng tơdrong yoch.

³⁹Bơ̆n kiơ̆ tơdrong juăt Môis đĕch, bơ̆n ưh kơ gơh klaih đơ̆ng tơdrong yoch. Mă-lei dah bơ̆n lui kơ Yêsu, bơ̆n gơh klaih đĭ đơ̆ng tơdrong yoch bơ̆n.

⁴⁰Na iĕm kơchăng bĕ, hli kơ nơ̆r bơngai khan lê̆ hơdrol gô 'blep kơ iĕm tơpă. Sư khan thoi âu sơ̆:

⁴¹'Bok Kei-Dei khan: ‘Ơ lu iĕm bơngai che bơle kơ Inh, iĕm lăng, iĕm gô sơleng kơ đon, pă tam băt kơnh iĕm lôch. Inh pơm tơdrong mơsêh mơyang lăm chăl iĕm arih, đe gô roi kơ iĕm tơdrong noh, mă-lei iĕm ưh kơ wă lui.’ ”

⁴²Lăp bre Pôl păng 'Barna'ba lĕch đơ̆ng hnam akŭm đe Juđê ei, đe apinh bre sư năm năr pơdơh đơ̆ng rŏng dơ̆ng wă bơtho tơdrong noh dơ̆ng mơ̆n.

⁴³Lăp lu kon pơlei pơla brŏk đơ̆ng hnam akŭm tơ hnam sư kơdih kơdih, kư̆m đei lơ bơngai Juđê păng lơ bơngai mă ưh kơ khŭl Juđê kư̆m pơlei noh mơ̆n mă lui kơ 'Bok Kei-Dei ngăl, lu sư yak hơdai bre Pôl păng 'Barna'ba. Na bre sư bơtho rah rok trong. Hơtai sư oei yak hơdai sư bơtho thoi âu: “'Bok Kei-Dei 'mêm mơnat kơ bơ̆n tơpă na bĕ bơ̆n kư̆ lui kơ Kră Yang Yêsu mă kơjăp đĕch.”

⁴⁴Năr pơdơh đơ̆ng rŏng đĭ-đăng pơlei năm akŭm tơ hnam akŭm đe Juđê dơ̆ng wă mơ̆ng bre Pôl păng 'Barna'ba bơtho tơdrong 'Bok Kei-Dei.

⁴⁵Lăp đe Juđê 'bôh lơ bơngai năm akŭm tơpă, lu sư 'nhĕng. Lu sư pơjăm Pôl păng che bơle kơ sư, jâu sư khan bơngai kơnê̆.

⁴⁶Mă-lei bre Pôl păng 'Barna'ba pơma tơwih kơ lu sư kư̆m nuih tơpă mơ̆n. Bre sư khan thoi âu: “Nhi bơtho tơdrong 'Bok Kei-Dei kơ lu iĕm bơngai Juđê hơdrol 'mơ̆i ră mă trŏ. Mă-lei iĕm ưh kơ wă mơ̆ng tơdrong 'Bok Kei-Dei. Iĕm ưh kơ chu thoi noh iĕm ưh kơ đei arih păng Sư ling-lang ôh ning-mônh, lei nhi lê̆ kơ bơtho iĕm đĕch. Nhi bơtho pôm lu bơngai nai.

⁴⁷Yua kơ Kră Yang pơkă kơ nhôn sơ̆ thoi âu: ‘Inh rơih ih pơm ŭnh pơchrang hơdah kơ đĭ-đăng khŭl bơngai, wă kơ đĭ-đăng khŭl bơngai jơ̆p kơ teh đak gơh klaih đơ̆ng tơdrong yoch.’ ”

⁴⁸Pôl pơma thoi noh boih, na lu bơngai lăm noh mơ̆n mă ưh kơ bơngai Juđê, lu sư kơtơ̆ng thoi noh jơhngơ̆m lu sư chơt hiôk tơpă. Lu sư khan: “Nơ̆r 'Bok Kei-Dei hiôk 'lơ̆ng tơpă iih?” Na lu bơngai 'Bok Kei-Dei rơih wă kơ sư arih ling-lang, lu sư lui kơ Kră Yang Yêsu.

⁴⁹Lu sư bơtho tơdrong Kră Yang jơ̆p kơ tơring Antiôs ei.

⁵⁰Lăm Pơlei Antiôs ei đei lu bơngai drŏ-kăn, sư kư̆m lui kơ 'Bok Kei-Dei, đe ư-ang tơdrong jang sư păng tơdrong sư mơdrŏng. Na lu bơngai Juđê pơhlŭ lu drŏ-kăn ei păng lu kră pơlei sư, yua kơ lu sư areh tơpă kơ bre Pôl păng 'Barna'ba. Na lu sư pơpuh bre sư đơ̆ng tơring ei.

⁵¹Na bre sư sơpuih 'bruih tơ jơ̆ng bre sư wă tơbăt kơ lu sư, lu sư bơngai yoch. Na bre Pôl năm hloi tơ Pơlei Ikôni.

⁵²Gah lu bơngai lui kơ Kră Yang Yêsu tơ Pơlei Antiôs, lu sư chơt hiôk tơpă păng lu sư 'bĕnh kơ Yang Bơhngol 'Lơ̆ng. Na Yang Bơhngol 'Lơ̆ng tơgŭm lu sư ling-lang.