Read bahnar Jang 14 Bible Online

Jang 14 - bahnar bible

Jang 14

¹Tơ Pơlei Ikôni bre sư kư̆m mơ̆t tơ hnam akŭm đe Juđê bơtho đe mơ̆n. Bre sư bơtho hơgei tơpă na lơ bơngai Juđê păng lơ bơngai nai lui kơ Kră Yang Yêsu.

²Lu bơngai Juđê mơ'nah ưh kơ wă lui kơ Yêsu. Sư pơhlŭ lu bơngai nai mă ưh kơ khŭl sư wă kơ sư areh kơ lu bơngai lui kơ Yêsu.

³Bre Pôl păng 'Barna'ba oei tơ pơlei ei kư̆m đunh 'biơ̆ mơ̆n. Kră Yang tơgŭm bre sư bơtho kư̆m nuih tơpă. Kră Yang ăn kơ bre sư pơm tơdrong mơsêh mơyang wă kơ đe băt kơ bre sư bơtho tơdrong 'Bok Kei-Dei tơpă, wă pơklaih kon bơngai đơ̆ng tơdrong yoch.

⁴Lăm kon pơlei pơla lu mơ'nah oei kiơ̆ gah đe Juđê, mơ'nah oei kiơ̆ gah jơ̆ng 'bang Yêsu Krist.

⁵Na bơngai Juđê păng bơngai nai, lu mơ'nah pôm đon păng lu yŏng sư, lu mơ'nah ưh mơ̆n. Lu bơngai pôm đon păng yŏng sư ei, sư wă klơ̆m bre Pôl păng 'Barna'ba păng tơmo.

⁶Lăp bre sư kơtơ̆ng tơdrong noh, bre sư kơdâu jăk tơ dêh char Likanê. Tơ ei bre sư chă bơtho Tơdrong 'Nao 'Lơ̆ng tơ Pơlei Litrơ, Pơlei Dibơ păng lu pơlei tơring kiơ̆ ei mơ̆n.

⁸Tơ Pơlei Litrơ đei minh 'nu bơngai jơ̆ng jo, đơ̆ng đe tơpŭ kơ sư sơ̆ ưh kơ gơh yak.

⁹Bơngai jo ei mơ̆ng Pôl bơtho Tơdrong 'Nao 'Lơ̆ng, Pôl lăng muh măt sư, băt kơ sư wă lui kơ 'Bok Kei-Dei, na gơh klaih kơ jĭ.

¹⁰Na Pôl pơma re khan kơ sư: “Ih iung bĕ, dơ̆ng mă tơpăt.” Na bơngai jo ei iung yak hloi.

¹¹Lu kon pơlei pơla 'bôh Pôl pơm thoi noh na lu sư pơma 'bơ̆r re lăm nơ̆r Likanê sư thoi âu: “Âu nhen yang jur jing bơngai.”

¹²Lu sư ngêh kơ 'Barna'ba yang Jupitê. Na lu sư ngêh kơ Pôl yang Merkuwơ, yua kơ Pôl ling-lang pơma kơ bre sư, thoi đe jô̆ yang Merkuwơ hơgei pơma.

¹³Bơngai pơm yang kơ yang Jupitê đei hnam yang tơ jih pơlei. Sư anhăk ba rơmo păng pơkao, sư 'măn 'bơ̆t 'măng dur pơlei. Sư hơdai păng kon pơlei pơla wă soi sơmah kơ bre Pôl păng 'Barna'ba.

¹⁴Lăp bre Pôl păng 'Barna'ba kơtơ̆ng lu sư wă soi sơmah kơ bre sư, na bre sư hek ao sư kơdih kơlih kơ bre sư lăng tơdrong 'noh glăi tơpă. Na bre sư kơdâu hloi tơkan 'bơ̆t anê̆ đe tơpôl lơ, bre sư khan thoi âu:

¹⁵“Ơ bre, iĕm wă pơm kiơ? Nhi kư̆m kon bơngai lei-lăi thoi iĕm mơ̆n. Nhi wă bơtho kơ iĕm Tơdrong 'Nao 'Lơ̆ng, wă kơ iĕm tŭk lê̆ dôm lu yang iĕm pơm kơkuh noh mă ưh kơ yua kiơ, na iĕm lui kiơ̆ kơ 'Bok Kei-Dei đĕch. 'Bok Kei-Dei arih ling-lang. Sư pơjing plĕnh teh, đak dơsĭ păng đĭ-đăng sem tơmam oei lăm ala teh đak.

¹⁶Đơ̆ng sơ̆ 'Bok Kei-Dei ăn kơ đĭ-đăng khŭl bơngai pơm kiơ̆ kơ lu sư wă.

¹⁷Mă-lei 'Bok Kei-Dei ăn kơ iĕm dôm tơdrong Sư mơnat wă kơ iĕm băt kơ Sư oei arih. Sư ăn kơ iĕm đak 'mi đơ̆ng plĕnh, trŏ kơ bơyan đei 'ba lơ, đei tơmam sŏng sa mah rơkah rơkai. Păng Sư ăn kơ iĕm đei jơhngơ̆m chơt hiôk.”

¹⁸Bre Pôl pơma thoi noh na lu sư tŭk lê̆ dôm tơdrong lu sư wă soi sơmah kơ bre Pôl noh. Mă-lei lu sư kư̆m oei wă soi sơmah ră mơ̆n. Yua kơ bre Pôl khan kơ lu sư, na lu sư lê̆ dơ̆ng.

¹⁹Đơ̆ng rŏng kơ noh lu bơngai Juđê đơ̆ng Pơlei Antiôs păng Pơlei Ikôni năm tơ ei păng pơhlŭ lu kon pơlei pơla. Lu sư klơ̆m Pôl păng tơmo. Lu sư ngêh kơ Pôl lôch boih na lu sư dui hor Pôl tơ jih pơlei.

²⁰Na đơ̆ng noh lu bơngai lui năm truh tơ ei oei lăng tăp dăr kơ Pôl. Pôl sư iung hloi năm mơ̆t tơ pơlei dơ̆ng. Năr dơning bre Pôl păng 'Barna'ba năm tơ Pơlei Dibơ.

²¹Bre sư bơtho Tơdrong 'Nao 'Lơ̆ng tơ Pơlei Dibơ ei, đei lơ bơngai lui kơ Kră Yang Yêsu. Đơ̆ng noh na bre sư brŏk tơ Pơlei Litrơ, Pơlei Ikôni păng Pơlei Antiôs.

²²Tơ rim pơlei ei bre sư bơtho khan kơ lu bơngai lui, wă kơ lu sư lui mă kơjăp. Bre sư khan bơ̆n athei đei lơ tơdrong pơmat-tat adrol 'mơ̆i na gơh mơ̆t tơ dêh char 'Bok Kei-Dei.

²³Tơ rim pơlei bre sư kư̆m rơih ăn kơ lu sư wă kơ đei lu kră wei-lăng bơngai lui. Na bre sư ơ̆t kơ por krao khan, na bre sư krao khan apinh Kră Yang tơgŭm đĭ-đăng lu bơngai kră ei yua kơ lu sư lui kơ Kră Yang.

²⁴Đơ̆ng noh bre sư năm yak brih apŭng Pisidi truh tơ apŭng Pamphili.

²⁵Bre sư bơtho Tơdrong 'Nao 'Lơ̆ng tơ Pơlei Perga. Đơ̆ng noh bre sư năm tơ Pơlei Atali.

²⁶Đơ̆ng Pơlei Atali bre sư tŏk thŏng-nan năm tơ Pơlei Antiôs lăm dêh char Siri. Tơ pơlei ei sơ̆ đe krao khan kơ 'Bok Kei-Dei apinh 'Bok Kei-Dei tơgŭm bre sư năm bơtho tơdrong Sư. Bre sư năm bơtho đang boih na brŏk tơ pơlei ei dơ̆ng mơ̆n.

²⁷Lăp truh tơ pơlei ei boih, bre sư krao akŭm bơngai lui. Bre sư roi đĭ tơdrong 'Bok Kei-Dei tơgŭm bre sư păng tơdrong 'Bok Kei-Dei ăn kơ lu bơngai tơmoi mă ưh kơ khŭl Juđê lui kiơ̆ kơ 'Bok Kei-Dei.

²⁸Bre sư oei hơdai păng lu bơngai lui tơ pơlei ei đunh năr 'biơ̆ mơ̆n.