Read bahnar Jang 15 Bible Online

Jang 15 - bahnar bible

Jang 15

¹Đei bơngai đơ̆ng dêh char Juđê năm tơ Pơlei Antiôs bơtho lu bơngai lui khan: “Bơngai bu ưh kơ chu kăt tơdra akar sư kơdih kiơ̆ tơdrong juăt Môis pơkă sơ̆, lei ưh kơ gơh klaih đơ̆ng tơdrong yoch.”

²Kơlih kơ lu sư bơtho thoi noh, na bre Pôl păng 'Barna'ba pơjah pơjăng tơpă păng lu sư. Na lu bơngai lui wă kơ bre Pôl păng 'Barna'ba păng 'bar pêng 'nu dơ̆ng đơ̆ng Pơlei Antiôs năm tơ Pơlei Jêrusalem wă tơ'bơ̆p lu jơ̆ng 'bang Yêsu păng lu kră wei-lăng bơngai lui, pơđâu păng sư gah tơdrong kăt akar noh.

³Lu bơngai lui tơgŭm lu sư wă kơ gơh năm tơ Pơlei Jêrusalem. Na lu sư năm drong tơ dêh char Phênisi păng dêh char Samari roi kơ bơngai lui tơdrong lu bơngai tơmoi ưh kơ khŭl Juđê lui kơ Kră Yang Yêsu boih. Lăp lu bơngai lui kơtơ̆ng tơdrong noh, jơhngơ̆m lu sư chơt hiôk tơpă.

⁴Lăp lu sư truh tơ Pơlei Jêrusalem, lu jơ̆ng 'bang Yêsu păng lu kră wei-lăng bơngai lui păng đĭ-đăng lu bơngai lui chơt hiôk tơpă yua kơ 'bôh lu sư. Lu sư ră roi đĭ tơdrong 'Bok Kei-Dei tơgŭm lu sư pơm.

⁵Mă-lei kư̆m đei bơngai lui kơ Yêsu đơ̆ng khŭl đe Pharisi iung pơma thoi âu: “Lu bơngai tơmoi lui kơ Yêsu ei, lu sư athei chu kăt tơdra akar kơdih păng kiơ̆ dôm lu tơdrong juăt Môis pơkă.”

⁶Lu jơ̆ng 'bang Yêsu păng lu kră wei-lăng bơngai lui akŭm wă pơđâu gah tơdrong noh.

⁷Lu sư pơđâu kư̆m đunh 'biơ̆ mơ̆n. Klaih kơ noh Pêtrôs iung pơma thoi âu: “Ơ lu 'nhŏng oh, iĕm kư̆m băt tơdrong 'Bok Kei-Dei rơih inh đơ̆ng lu iĕm sơ̆, wă kơ inh năm bơtho lu bơngai tơmoi mă ưh kơ khŭl bơ̆n wă kơ sư gơh kơtơ̆ng Tơdrong 'Nao 'Lơ̆ng na lui kơ Kră Yang Yêsu.

⁸'Bok Kei-Dei băt jơhngơ̆m đon kon bơngai na Sư ăn kơ lu bơngai tơmoi ei Yang Bơhngol 'Lơ̆ng kư̆m thoi Sư ăn kơ bơ̆n. Thoi noh 'Bok Kei-Dei ăn kơ bơ̆n băt Sư wă kơ lu bơngai tơmoi ei mơ̆n.

⁹'Bok Kei-Dei 'mêm mơnat kơ bơ̆n păng lu bơngai tơmoi lei-lăi đĕch. Sư pơklaih tơdrong yoch lu sư yua kơ lu sư lui kơ Yêsu.

¹⁰Kơlih kơ kiơ iĕm wă pơlong 'Bok Kei-Dei? Iĕm wă kơ lu bơngai tơmoi mă lui ei pŭ tơdrong anat kơ răk dôm lu tơdrong Môis pơkă. Mă-lei tơdrong 'noh lu 'bok kơdră bơ̆n pŭ ưh kơ kĕ ôh păng bơ̆n kư̆m ưh kơ kĕ mơ̆n.

¹¹Bơ̆n băt bơ̆n klaih đơ̆ng tơdrong yoch yua kơ Kră Yang Yêsu 'mêm mơnat đĕch păng lu bơngai tơmoi kư̆m lei-lăi mơ̆n.”

¹²Lăp lu sư kơtơ̆ng Pêtrôs pơma thoi noh, lu sư pă đei drơ̆ng tơwih dơ̆ng. Pôm bre Pôl păng 'Barna'ba đĕch roi gah tơdrong Kră Yang 'Bok Kei-Dei tơgŭm bre sư pơm lơ tơdrong mơsêh mơyang 'bơ̆t anăp lu bơngai tơmoi mă ưh kơ khŭl Juđê.

¹³Lăp bre sư pơma đang boih, Yakơ iung pơma thoi âu dơ̆ng: “Ơ lu 'nhŏng oh, apinh iĕm mơ̆ng inh bĕ.

¹⁴Pêtrôs roi tơdrong 'Bok Kei-Dei mơnat kơ lu bơngai tơmoi hơdrol sơ̆ wă rơih lu bơngai tơmoi na lu bơngai tơmoi lu mơ'nah lui kiơ̆ kơ 'Bok Kei-Dei tơpă.

¹⁵Tơdrong noh 'blep kơ bơngai pơtruh nơ̆r 'Bok Kei-Dei khan lê̆ hơdrol sơ̆ chih tơ sơ̆p hla bơar 'Bok Kei-Dei thoi âu:

¹⁶‘Kră Yang 'Bok Kei-Dei khan: Đơ̆ng rŏng kơ noh dơ̆ng Inh gô ăn kơ adrĕch adrung Đawit pơgơ̆r dơ̆ng. Dang ei thoi lĕ kơ hnam sư oei hiah, Inh wă pơm ming dơ̆ng,

¹⁷wă kơ đĭ-đăng bơngai jơ̆p kơ teh đak lui kơ Inh, wă khan đĭ-đăng lu bơngai tơmoi mă ưh kơ khŭl lu Juđê, Inh wă kơ lu sư mơ̆n.

¹⁸Kră Yang 'Bok Kei-Dei khan thoi noh, Sư pơm 'blep tơdrong noh mơ̆n. Sư tơbăt kơ đe tơdrong noh đơ̆ng blŭng-a sơ̆.’

¹⁹Na inh tơchĕng thoi âu: Bơ̆n 'nĕ pơgŏ lu bơngai tơmoi mă lui kơ 'Bok Kei-Dei hŏ.

²⁰Mă-lei bơ̆n chih kơ sư kơthơ athei sư 'nĕ kơ sa tơmam đe sơmah kơ yang kơnê̆ yua kơ bơ̆n rơgoh boih. Bơ̆n 'nĕ ngôi pơyô kư̆ kă. 'Nĕ kơ sa pham dôm sem bơ̆n rong păng sem bri. Hơdrol kơ wă pơm tơmam sa bơ̆n athei kăt dah 'bet tŭk lê̆ pham sư.

²¹Gah tơdrong juăt Môis pơkă, lu bơngai Juđê bơtho tơdrong noh tơ rim pơlei mă đơ̆ng sơ̆. Lu sư đŏk sơ̆p hla bơar Môis tơ hnam akŭm rim kơ năr pơdơh.”

²²Đơ̆ng noh lu jơ̆ng 'bang Yêsu, lu kră wei-lăng bơngai lui păng đĭ-đăng bơngai lui mơ̆n, lu sư wă rơih lu bơngai năm tơ Pơlei Antiôs hơdai bre Pôl păng 'Barna'ba. Lu sư rơih minh 'nu bơngai đei 'bar anăn, Juđa 'Barsa'ba păng minh 'nu dơ̆ng, Silas. Bre sư ei lu bơngai lui lăp đon 'biơ̆ lăm lu bơngai lui.

²³Lu jơ̆ng 'bang Yêsu hăm lu kră wei-lăng bơngai lui ăn kơ lu sư chĕp hla kơthơ. Hla kơthơ ei chih thoi âu: “Nhôn lu jơ̆ng 'bang Yêsu păng lu kră wei-lăng bơngai lui, bơ̆n 'nhŏng oh. Nhôn hmach bơnê kơ đĭ-đăng kơ iĕm lăm kon tơmoi lui kơ 'Bok Kei-Dei, lu iĕm mă oei tơ Pơlei Antiôs, dêh char Siri păng dêh char Salisia.

²⁴Nhôn kơtơ̆ng ang lu bơngai đơ̆ng nhôn năm bơtho iĕm khan athei iĕm kăt tơdra akar păng răk dôm lu tơdrong juăt Môis pơkă. Đơ̆ng sơ̆ nhôn ưh kơ athei iĕm pơm thoi noh ôh, na dang ei iĕm hơwơ̆l boih. Lu bơngai athei iĕm răk dôm tơdrong juăt Môis pơkă noh, lu sư năm bơtho kơdih đĕch. Nhôn ưh kơ wơh sư ôh.

²⁵Na nhôn akŭm pơđâu na rơih 'bar 'nu bơngai nhôn wơh năm tơ iĕm. Bre sư năm hloi hơdai 'nhŏng oh bơ̆n bre Pôl păng 'Barna'ba. Bre sư bơ̆n 'mêm tơpă.

²⁶Bre Pôl păng 'Barna'ba adrin tơpă bơtho tơdrong Kră Yang Yêsu Krist, ưh kơ hli kơ lôch ôh.

²⁷Na nhôn wơh ăn kơ iĕm Juđa păng Silas. Bre sư gô khan kơ iĕm tơdrong bơtho âu mơ̆n.

²⁸Yang Bơhngol 'Lơ̆ng păng nhôn ưh kơ wă athei iĕm pơm lu tơdrong anat, mă-lei iĕm athei kiơ̆ lu tơdrong âu đĕch:

²⁹Iĕm 'nĕ kơ sa tơmam đe sơmah kơ yang kơnê̆ yua kơ bơ̆n rơgoh boih. 'Nĕ kơ sa pham dôm sem bơ̆n rong dah sem bri. Hơdrol kơ wă pơm tơmam sa bơ̆n athei kăt dah 'bet tŭk lê̆ pham sư 'noh; păng 'nĕ ngôi pơyô kư̆ kă. Yah iĕm pơm kiơ̆ kơ nơ̆r pơkă lăm kơthơ âu lei trŏ tơpă. Oei kơ iĕm mă 'lơ̆ng.”

³⁰Na lu bơngai năm ăn kơthơ ei đơ̆ng Pơlei Jêrusalem truh tơ Pơlei Antiôs. Lăp lu sư truh boih, lu sư krao akŭm đĭ-đăng bơngai lui păng ăn kơ lu sư kơthơ ei hloi.

³¹Na lu sư đŏk lăng kơthơ ei, jơhngơ̆m lu sư chơt hiôk tơpă yua kơ kơtơ̆ng tơdrong noh.

³²Đơ̆ng sơ̆ bre Juđa păng Silas bơngai pơtruh nơ̆r 'Bok Kei-Dei. Bre sư bơtho kư̆m đunh mơ̆n wă kơ lu sư chơt hiôk lăm tơdrong 'Bok Kei-Dei, wă kơ lu sư lui mă kơjăp.

³³Bre sư oei tơ Pơlei Antiôs kư̆m đunh 'biơ̆ mơ̆n. Klaih kơ noh lu bơngai lui pơjao tơdrong bơnê kơ bre sư. Na bre sư brŏk tơ lu bơngai lui tơ Pơlei Jêrusalem.

³⁴

³⁵Bre Pôl păng 'Barna'ba oei tơ Pơlei Antiôs kư̆m đunh 'biơ̆ mơ̆n. Bre sư đei lu bơngai nai dơ̆ng hơdai chă bơtho tơdrong Kră Yang 'Bok Kei-Dei tơ ei.

³⁶Kư̆m đunh mơ̆n đơ̆ng rŏng kơ noh dơ̆ng, Pôl khan kơ 'Barna'ba thoi âu: “Ơ 'Barna'ba, bĕ ba năm hơpong kơ 'nhŏng oh bơ̆n tơ rim pơlei đêl ba bơtho sơ̆ bĕ, đunh boih, ưh kơ băt sư lơliơ dang ei.”

³⁷Na 'Barna'ba khan: “Lei ba anhăk ba Markôs.”

³⁸Mă-lei Pôl tơchĕng khan: “Ưh kơ trŏ kơ anhăk ba sư, yua kơ sư achăng lê̆ ba tơ dêh char Pamphili sơ̆ jing pă đei kiơ̆ ba bơtho tơdrong 'Bok Kei-Dei tơ pơlei nai.”

³⁹Na bre Pôl păng 'Barna'ba pơjah pơjăng tơdrong noh khŏm khŏm na truh tơ bre sư tơklah dih băl. Đơ̆ng noh na 'Barna'ba anhăk Markôs tŏk thŏng-nan năm tơ dêh char Chiprơ.

⁴⁰Na Pôl anhăk Silas năm hơdai păng sư. Na lu bơngai lui krao khan apinh Kră Yang 'Bok Kei-Dei wei-lăng bre sư.

⁴¹Bre sư năm tơ dêh char Siri păng dêh char Salisia bơtho păng tơgŭm bơngai lui.