Read bahnar Jang 16 Bible Online

Jang 16 - bahnar bible

Jang 16

¹Đơ̆ng noh bre Pôl păng Silas năm tơ Pơlei Dibơ păng năm tơ Pơlei Litrơ. Tơ Pơlei Litrơ ei đei lơ bơngai lui păng đei minh 'nu bơngai anăn sư Timôthê. Mĕ sư bơngai Juđê kư̆m lui mơ̆n, 'bă sư bơngai Grĕk.

²Lu bơngai lui tơ Pơlei Litrơ păng Pơlei Ikôni jô̆ Timôthê bơngai 'lơ̆ng.

³Pôl wă kơ Timôthê năm hơdai păng sư bơtho tơdrong 'Bok Kei-Dei. Na sư kăt tơdra akar Timôthê wă kơ lu bơngai Juđê oei tơ tơring ei huay kơ ơh klai, yua kơ đĭ-đăng bơngai Juđê ei băt kơ 'bă sư bơngai Grĕk.

⁴Đơ̆ng noh na đe Pôl năm jơ̆p pơlei. Sư ră roi tơdrong lu jơ̆ng 'bang Yêsu păng lu kră wei-lăng bơngai lui tơ Pơlei Jêrusalem ată lăm kơthơ ei ki. Lu đe Pôl bơtho khan lu sư kiơ̆ lu tơdrong ată tơpăt.

⁵Na rim pơlei, lu bơngai lui rai đunh rai lơ rai kơjăp rai pran lui kơ Kră Yang 'Bok Kei-Dei.

⁶Lu đe Pôl yak brih apŭng Phiji păng dêh char Galati yua kơ Yang Bơhngol 'Lơ̆ng ưh kơ ăn kơ lu sư bơtho tơdrong 'Bok Kei-Dei tơ dêh char Asi.

⁷Lăp lu sư truh tơ jih apŭng Misi ei lu sư wă mơ̆t tơ dêh char Bithini, mă-lei Yang Bơhngol 'Lơ̆ng đơ̆ng Kră Yang Yêsu ưh kơ ăn lu sư mơ̆t tơ ei ôh.

⁸Na lu sư năm găn apŭng Misi truh tơ Pơlei Trôs.

⁹Truh tơ Pơlei Trôs boih Pôl tep kơmăng sư apo 'bôh minh 'nu bơngai đơ̆ng dêh char Masêđôn pơma kơ sư khan: “Apinh ih năm tơ dêh char Masêđôn tơgŭm lu nhôn 'biơ̆.”

¹⁰Pôl apo 'bôh thoi noh, sư hơđơ̆r đơ̆ng tep khan hloi kơ nhôn hơmet tơmam yak năm tơ dêh char Masêđôn, yua kơ nhôn băt kơ 'Bok Kei-Dei krao nhôn bơtho Tơdrong 'Nao 'Lơ̆ng Sư tơ char Masêđôn boih.

¹¹Na nhôn tŏk thŏng-nan đơ̆ng Pơlei Trôs năm tơpăt tơ bŏl đak đe anăn bŏl Samôtras. Năr dơning dơ̆ng nhôn năm truh tơ Pơlei Nêapôlis, lăm dêh char Masêđôn.

¹²Tơ ei nhôn jur đơ̆ng thŏng-nan năm tơ Pơlei Philip. Pơlei Philip ei tih tơpă hloh kơ lu pơlei nai tơring ei. Tơ Pơlei Philip ei đei lơ bơngai Rôm oei. Nhôn oei tơ pơlei ei kư̆m đunh 'biơ̆ mơ̆n.

¹³Truh năr pơdơh nhôn năm tơ jih pơlei ei, cheng đak krong. Tơ ei đei anih đe juăt kơ akŭm krao khan kơ 'Bok Kei-Dei. Na nhôn bơtho lu bơngai drŏ-kăn năm akŭm tơ ei.

¹⁴Lăm lu drŏ-kăn oei mơ̆ng nhôn ei đei minh 'nu anăn sư Liđa. Sư bơngai đơ̆ng Pơlei Thiatir. Sư bơngai juăt kơ mơdro tĕch che jơk păng sư lui kơkuh kơ 'Bok Kei-Dei đơ̆ng sơ̆. Na Kră Yang 'Bok Kei-Dei tơgŭm sư lui kơ nơ̆r Pôl bơtho.

¹⁵Na yă Liđa păng đĭ-đăng hnam dơnŏ sư iŏk 'batem. Sư khan kơ nhôn: “Yah iĕm băt tơchĕng inh lui kơ Kră Yang Yêsu boih, inh apinh iĕm tŏk 'bĭch tơ hnam inh.” Sư pơtơm 'bĭch tơ hnam sư na nhôn tŏk 'bĭch pơdơh tơ hnam sư hloi.

¹⁶Minh năr ei hơtai nhôn năm tơ anih akŭm krao khan nhôn tơ'bơ̆p minh 'nu bơngai adruh sư đĭch đe. Sư bơngai yang mơ̆t pơm kơ sư wơnh. Na yang kơnê̆ ăn kơ sư pơm pơjâu khan lê̆ hơdrol. Lu yŏng đĭch ei yua jên đơ̆ng đĭch sư chă pơma khan kơ đe na đe ăn kơ bơngai adruh yang mơ̆t ei, na lu yŏng sư jing mơdrŏng.

¹⁷Adruh ei năm kiơ̆ nhôn đe Pôl, sư pơma 'bơ̆r re khan: “Lu bơngai âu jang tơdrong 'Bok Kei-Dei Kră Yang tih hloh. Lu sư bơtho ăn kơ iĕm tơdrong 'Bok Kei-Dei wă pơklaih iĕm đơ̆ng tơdrong yoch.”

¹⁸Adruh ei kiơ̆ nhôn rim năr khŏm khŏm, truh tơ Pôl sư pă kĕ ĕnh boih. Na Pôl hue lăng adruh ei păng khan kơ yang kơnê̆: “Inh yua anăn Yêsu Krist, inh athei e lĕch đơ̆ng bơngai adruh âu.” Na yang kơnê̆ ei lĕch hloi.

¹⁹Thoi noh yŏng sư 'bôh ưh pă yua đơ̆ng sư boih, na jên lu sư kư̆m ưh pă lơ boih, lu sư rôp hloi bre Pôl păng Silas, anhăk ba bre sư tơ kră pơlei tơ tŏk-bŏk kơchơ.

²⁰Lu sư ăn kơ linh wei 'bơ̆t anăp lu kră pơlei na khan thoi âu: “Bơngai âu pơm rŭng răng kơnê̆ tơ pơlei bơ̆n. Bre sư bơngai Juđê.

²¹Bre sư bơtho tơdrong juăt ưh kơ trŏ tơdrong juăt bơ̆n. Bơ̆n bơngai Rôm ưh kơ gơh kiơ̆ tơdrong juăt sư noh ôh.”

²²Lu kon pơlei pơla kư̆m jâu bre sư mơ̆n. Thoi noh na lu kră pơgơ̆r hek tŭk ao bre sư, athei hloi lu linh teh bre sư.

²³Lu linh teh bre sư teh dêh tơpă, klaih kơ noh tah bre sư lăm hnam phak. Lu kră pơlei athei kră wei-lăng hnam phak gak mă kơchăng.

²⁴Kơtơ̆ng thoi noh na kră wei-lăng hnam phak ei tah bre sư tơ lăm tŏk-bŏk hnam phak păng dơlŏng jơ̆ng bre sư mơ̆n.

²⁵Dang mơjĭt-'bar jơ tŏk-bŏk măng bre Pôl păng Silas oei krao khan păng hơri bơnê kơ 'Bok Kei-Dei. Đĭ-đăng tơduă lu sư bơngai phak mơ̆ng bre sư ngăl.

²⁶'Bơ̆t ei teh pơpơ̆ hloi kơkiơ̆ng. Hơyuh teh ei pơpơ̆ truh tơ hnam ei mah kyĭng kiơ̆ng. 'Măng tơpơih đĭ, glang mam tơyaih đĭ đơ̆ng lu bơngai phak lăm ei.

²⁷Na kră wei-lăng hnam phak ei iung đơ̆ng tep 'bôh 'măng tơpơih đĭ, na sư ngêh lu bơngai phak kơdâu jăk đĭ boih. Na sư toh anglop đao wă 'bet pơlôch kơdih akâu ră.

²⁸Mă-lei Pôl pơma pơret khan kơ sư: “Ih 'nĕ pơrăm kơdih akâu, nhôn oei tôm lăm âu, ưh kơ đei bu hiong ôh.”

²⁹Na kră wei-lăng hnam phak ei athei đe tơ̆k kơ sư ŭnh wă kơ hơdah, na sư tơluh năm tơ đe ei, sơtơ̆p kŭl-tăng 'bơ̆t anăp bre Pôl păng Silas. Jơhngơ̆m 'bok wei-lăng ei hli tơrơ tơpă.

³⁰Na sư tơlĕch bre Pôl păng Silas tơ 'ngoaih păng jet bre sư: “Ơ bre 'bok, pơm liơ inh gơh klaih đơ̆ng tơdrong yoch?”

³¹Na bre Pôl khan kơ sư: “Ih lui kơ Kră Yang Yêsu Krist na ih gơh klaih, ih păng hnam dơnŏ ih kư̆m klaih lei-lăi mơ̆n.”

³²Na bre Pôl păng Silas bơtho tơdrong Kră Yang 'Bok Kei-Dei kơ sư păng đĭ-đăng hnam dơnŏ sư.

³³'Bơ̆t ei oei kơmăng ră mơ̆n, mă-lei kră wei-lăng hnam phak ei ôp 'nhao rơka jĭ bre Pôl păng Silas. Klaih kơ noh sư păng hnam dơnŏ sư iŏk 'batem hloi.

³⁴Sư atŏk bre Pôl păng Silas tơ hnam sư, ăn tơmam sŏng sa kơ bre sư. Jơhngơ̆m sư păng hnam dơnŏ sư chơt hiôk yua kơ lui kơ 'Bok Kei-Dei boih.

³⁵Pơgê dơning lu kră pơlei wơh lu yŏng linh wă tơlĕch bre Pôl păng Silas.

³⁶Kră wei-lăng hnam phak ei pơtruh kơ Pôl khan: “Lu kră pơlei khan kơ inh, athei inh pơtruh kơ biĕm nơ̆r lu sư khan ưh pă wă phak biĕm boih. Na dang ei ăn biĕm lĕch đơ̆ng hnam phak boih, năm kơ biĕm mă 'lơ̆ng bĕ.”

³⁷Mă-lei Pôl khan kơ lu yŏng linh thoi âu: “Nhi bơngai Rôm lei-lăi thoi iĕm mơ̆n. Mă-lei lu kră pơlei năr brei sư tam mă sek tơlang tơdrong nhi, athei lu linh pơjĭ nhi hloi, 'bơ̆t anăp kon pơlei pơla tăm. Na đơ̆ng noh sư tah nhi lăm hnam phak. Na dang ei sư tơlĕch nhi ưh kơ đei roi kơ đe. Sư pơm thoi noh ưh kơ trŏ ôh. Na dang ei nhi athei lu kră pơlei năm tơ âu pơma tơdrong tơlĕch nhi âu.”

³⁸Lu yŏng linh pơtruh nơ̆r noh tơ kră pơlei. Na lu kră pơlei kơtơ̆ng bre sư bơngai Rôm, lu sư hli yua kơ pơm ưh kơ lăp kơ bre sư brei.

³⁹Na lu kră pơlei năm tơ bre Pôl păng Silas na lu sư khan: “Nhôn apinh biĕm 'nĕ jô̆ yo. Na dang ei lu nhôn tơlĕch biĕm đơ̆ng hnam phak boih na nhôn apinh biĕm jăk đơ̆ng pơlei âu.”

⁴⁰Na bre Pôl păng Silas đơ̆ng hnam phak ei năm tơ hnam yă Liđa hơpong kơ lu bơngai lui. Bre sư bơtho khan kơ lu sư wă kơ sư lui mă kơjăp đei jơhngơ̆m chơt hiôk. Đơ̆ng rŏng kơ 'noh bre sư jăk đơ̆ng pơlei ei.