Read bahnar Jang 18 Bible Online

Jang 18 - bahnar bible

Jang 18

¹Đơ̆ng rŏng kơ 'noh Pôl năm đơ̆ng Pơlei Aten truh tơ Pơlei Kôrintô.

²Tơ ei sư tơ'bơ̆p minh 'nu bơngai Juđê anăn sư Akila. Bơngai ei mĕ sư tơpŭ sư tơ dêh char Pôntơ. Sư păng akăn sư, anăn sư Prisil, 'nao jăk đơ̆ng dêh char Itali yua kơ pơtao Klôt athei đĭ-đăng bơngai Juđê jăk đơ̆ng lăm Pơlei Rôm.

³Bre sư bơ̆jang tơdrong pơm hnam tua-la-tăng na Pôl năm oei hloi tơ hnam bre sư, jang hơdai păng sư yua kơ Pôl juăt kơ jang tơdrong noh mơ̆n. Pôl kư̆m bơtho rah tơdrong 'Bok Kei-Dei.

⁴Rim năr pơdơh Pôl năm akŭm tơ hnam akŭm bơngai Juđê bơtho lu bơngai Juđê păng lu bơngai Grĕk wă kơ đĭ-đăng lu sư păng Juđê lui kơ Kră Yang Yêsu.

⁵Lăp bre Silas păng Timôthê truh tơ Pơlei Kôrintô đơ̆ng dêh char Masêđôn, na Pôl lê̆ tơdrong pơm hnam tua-la-tăng iŏk gah tơdrong bơtho sư dơ̆ng, bơtho lu bơngai Juđê khan Yêsu boih 'Bok Krist mă 'Bok Kei-Dei ăn wă pơgơ̆r bơ̆n.

⁶Na lu bơngai Juđê areh kơ Pôl păng che bơle kơ sư. Na Pôl sơpuih 'bruih tơ ao sư kơdih păng khan: “Dah 'Bok Kei-Dei phak iĕm ning-mônh măk ai iĕm boih hŏ, yua kơ iĕm ưh kơ lui kơ Yêsu. Đơ̆ng âu tơ anăp inh năm bơtho lu bơngai nai đĕch boih, inh pă wă boih bơtho khŭl Juđê bơ̆n pơlei âu.”

⁷Pôl ưh pă bơtho boih lu bơngai Juđê ei. Na sư năm bơtho tơ hnam minh 'nu bơngai ưh kơ khŭl Juđê, anăn sư Titơ Jơtơ. Bơngai ei lui kơ 'Bok Kei-Dei đơ̆ng sơ̆. Hnam sư jê̆ hnam akŭm bơngai Juđê.

⁸Kripơ kră wei-lăng hnam akŭm bơngai Juđê, sư tam mă lui kơ Kră Yang Yêsu na đơ̆ng Pôl bơtho sư, na sư păng đĭ-đăng hnam dơnŏ sư kư̆m lui mơ̆n. Kư̆m đei lơ bơngai nai dơ̆ng lăm Pơlei Kôrintô mơ̆ng Pôl bơtho lu sư, na lu sư lui hloi kơ Kră Yang Yêsu păng iŏk 'batem.

⁹Minh măng ei Pôl apo 'bôh Kră Yang Yêsu pơma păng sư khan: “Ih 'nĕ kơ hli păng ih 'nĕ kơ tŭk tơdrong jang ih. Ih kư̆ bơtho ling-lang đĕch.

¹⁰Yua kơ Inh oei hơdai păng ih ling-lang ưh kơ đei bu gơh pơrăm ih ôh, yua kơ đei lơ bơngai lăm pơlei âu gô lui kơ Inh.”

¹¹Pôl oei tơ Pơlei Kôrintô ei minh sơnăm minh puăt bơtho kon pơlei pơla tơdrong 'Bok Kei-Dei.

¹²Lăp Galiôn tŏk pơm kră pơgơ̆r tơ dêh char Grĕk, lu bơngai Juđê pơđâu băl pôm đon na lu sư năm rôp Pôl anhăk sư tơ anih lu kră sek tơlang.

¹³Lu bơngai Juđê khan kơ 'bok Galiôn thoi âu: “Bơngai âu athei đe lui kơkuh kơ 'Bok Kei-Dei ưh kơ trŏ thoi tơdrong juăt bơ̆n, na ih athei phak sư.”

¹⁴Pôl 'nao wă pơma khan kơ lu sư ră, na Galiôn găn 'bơ̆r Pôl pơma. Sư wă kơ akâu sư kơdih đĕch pơma. Na Galiôn pơma dŏng Pôl. Sư khan kơ lu bơngai Juđê thoi âu: “Tơdah bơngai âu pơm tơdrong kơnê̆ lei inh chu mơ̆ng lu iĕm.

¹⁵Mă-lei tơdrong âu gah nơ̆r sư bơtho đĕch, na dang ei gô mơ̆ng tơdrong juăt iĕm kơdih đĕch. Iĕm athei sek tơlang kơdih, inh ưh kơ wă mơ̆ng iĕm dơ̆ng.”

¹⁶Na Galiôn athei lu linh sư pơpuh lu bơngai Juđê mă jâu Pôl đơ̆ng hnam sek tơlang ei.

¹⁷Lu kon pơlei pơla ưh kơ khŭl Juđê rôp minh 'nu lăm khŭl Juđê ei anăn sư Sôten. Sư kră hnam akŭm bơngai Juđê. Lu sư teh hloi Sôten 'bơ̆t anăp lu kră sek tơlang. Na Galiôn sư ưh kơ tang găn ôh.

¹⁸Đơ̆ng rŏng kơ noh Pôl oei tơ Pơlei Kôrintô kư̆m đunh 'biơ̆ mơ̆n. Klaih kơ noh sư tơklah đơ̆ng bơngai lui wă năm tơ dêh char Siri. Bre Prisil păng Akila kư̆m kiơ̆ hơdai păng sư mơ̆n. Lu sư năm tơ Pơlei Sankrê. Tơ ei Pôl yuă sŏk. Đunh boih sư ưh kơ yuă sŏk yua kơ sư pơkă hăm 'Bok Kei-Dei tơdrong kiơ kiơ. Dang ei sư pơm đang tơdrong sư pơkă noh na sư gơh yuă sŏk dơ̆ng.

¹⁹Klaih kơ noh lu sư tŏk thŏng-nan năm tơ Pơlei Êphêsô. Truh tơ Pơlei Êphêsô boih, bre Prisil păng Akila, bre sư oei hloi tơ ei. Pôl năm akŭm tơ hnam akŭm bơngai Juđê tơ Pơlei Êphêsô bơtho păng pơjah hăm lu bơngai Juđê.

²⁰Lu bơngai Juđê ei apinh Pôl oei păng lu sư khŏm khŏm mă-lei Pôl ưh kơ chu sư.

²¹Lăp Pôl wă năm đơ̆ng Pơlei Êphêsô sư khan kơ lu sư: “Dah 'Bok Kei-Dei wă kơ inh wih bơtho iĕm lei inh gô brŏk bơtho iĕm.” Klaih kơ noh na Pôl tŏk thŏng-nan năm đơ̆ng Pơlei Êphêsô năm truh tơ Pơlei Sêsarê. Đơ̆ng noh sư năm hloi tơ Pơlei Jêrusalem hơpong kơ lu bơngai lui tơ ei. Klaih kơ noh sư năm truh tơ Pơlei Antiôs lăm dêh char Siri.

²³Sư oei tơ ei kư̆m đunh năr 'biơ̆ mơ̆n. Đơ̆ng noh sư năm tơ dêh char Galati păng dêh char Phiji bơtho păng tơgŭm lu bơngai lui athei lu sư lui mă kơjăp.

²⁴Đei minh 'nu bơngai Juđê, anăn sư Apôlê. Mĕ sư tơpŭ kơ sư tơ Pơlei Aleksandrê. Sư bơngai 'bơ̆r đon bơtho hơgei tơpă păng hlôh đĭ dôm sơ̆p hla bơar 'Bok Kei-Dei.

²⁵Sư pơhrăm tơdrong Kră Yang Yêsu boih păng jơhngơ̆m sư wă tơpă gah bơtho tơdrong Yêsu. Sư bơtho tơdrong Yêsu kư̆m trŏ mơ̆n mă-lei sư băt ưh tam mă tôm ôh. Sư bơtho tơdrong 'batem, sư bơtho kiơ̆ kơ Yôhan đĕch; sư tam mă băt tơdrong 'batem hăm anăn Kră Yang Yêsu Krist.

²⁶Apôlê năm tơ Pơlei Êphêsô bơtho tơ hnam akŭm bơngai Juđê. Sư bơtho kư̆m nuih tơpă mơ̆n. Lăp Prisil păng Akila mơ̆ng sư bơtho bre sư anhăk ba sư truh tơ hnam bre sư. Bre sư bơtho ăn kơ Apôlê tơdrong 'Bok Kei-Dei wă kơ sư hlôh băt tôm 'biơ̆.

²⁷Apôlê kư̆m wă năm tơ dêh char Grĕk mơ̆n. Na lu bơngai lui tơ Pơlei Êphêsô tơgŭm sư chih kơ sư kơthơ wă chĕp ba ăn kơ lu buăl lui tơ dêh char Grĕk, apinh lu bơngai lui ei sơng iŏk sư. Lăp Apôlê truh tơ char Grĕk boih, Apôlê bơtho tơgŭm tơpă kơ lu bơngai 'Bok Kei-Dei mơnat ăn lui kơ Yêsu boih.

²⁸Sư pơjah hơgei tơpă păng lu bơngai Juđê, jei sư ngăl. Sư yua sơ̆p hla bơar 'Bok Kei-Dei tơbăt ăn kơ lu bơngai Juđê Yêsu boih 'Bok Krist mă 'Bok Kei-Dei ăn wă kơ pơgơ̆r bơ̆n.