Read bahnar Jang 2 Bible Online

Jang 2 - bahnar bible

Jang 2

¹Truh Năr Giĕng Pangtơkôt, lu bơngai lui kơ Yêsu akŭm minh anih.

²Lu sư kơtơ̆ng grơu đei re jơwa đơ̆ng plĕnh thoi lĕ kial hơbŭt tih 'bĕnh kơ hnam hloi.

³Lu sư 'bôh pla ŭnh jruh rim 'bơ̆t lu sư.

⁴Yang Bơhngol 'Lơ̆ng mơ̆t 'bĕnh kơ rim 'nu lu sư. Na lu sư pơtơm pơma phara hloi nơ̆r kiơ̆ thoi Yang Bơhngol 'Lơ̆ng ăn kơ lu sư pơma.

⁵Lăm năr 'noh tơ Pơlei Jêrusalem, đei lơ lu đe Juđê, lu sư mă 'maih kơkuh kơ 'Bok Kei-Dei; lu sư năm đơ̆ng jơ̆p-jang kơ dêh char năm tơ Pơlei Jêrusalem.

⁶Lăp lu sư kơtơ̆ng jơwa 'noh hei lu sư wang năm tơkan. Lu sư sơleng kơ đon yua kơ lu sư kơtơ̆ng lu jơ̆ng 'bang Yêsu pơma thoi nơ̆r pơma teh đak sư kơdih.

⁷Đĭ-đăng lu sư wang hlĭch hlăch păng khan: “Lu bơngai 'noh tơring Galilê ngăl.

⁸Mă-lei lơliơ bơ̆n mơ̆ng sư pơma thoi pơma nơ̆r bơ̆n kơdih?

⁹Bơ̆n phŏ phŏ đei bôl mơ'nah đơ̆ng dêh char Parthê, mơ'nah đơ̆ng dêh char Mêđơ, mơ'nah đơ̆ng dêh char Êlam, mơ'nah đơ̆ng dêh char Mesôpôtôme, mơ'nah đơ̆ng dêh char Juđê; kư̆m đei mơ'nah đơ̆ng Kapadôs, kư̆m đei mơ'nah đơ̆ng dêh char Pôntơ, kư̆m đei dơ̆ng mơ'nah đơ̆ng dêh char Asi.

¹⁰Mơ'nah đơ̆ng dêh char Phiji, kư̆m đei mơ'nah đơ̆ng dêh char Pamphili, mơ'nah đơ̆ng dêh char Êyiptơ, kư̆m đei mơ'nah đơ̆ng tơring Siren lăm dêh char Libi. Đơ̆ng Pơlei Rôm kư̆m đei mơ̆n, mơ'nah bơngai Juđê, lu mơ'nah bơngai nai kiơ̆ tơdrong juăt Juđê.

¹¹Bơ̆n đơ̆ng dêh char Kret, mơ'nah đơ̆ng dêh char Arabia. Dôm lu bơ̆n âu đei lơ dêh char tơpă, mă-lei bơ̆n kơtơ̆ng sư pơma tôm đĭ lu nơ̆r kon bơngai bơ̆n phara. Lu sư roi dôm lu tơdrong mơsêh mơyang 'Bok Kei-Dei pơm.”

¹²Na lu kon tơring wang hlĭch hlăch hăm ưh kơ băt tơchĕng lơliơ dơ̆ng. Thoi noh lu sư pơma băl tơduă lu sư khan: “Lơliơ tơdrong 'nâu?”

¹³Sơmă đei lu mơ'nah pơjăm khan: “Lu sư suai.”

¹⁴Đơ̆ng noh Pêtrôs dơ̆ng hơdai hăm lu mơjĭt-mônh 'nu bôl sư. Sư bơtho kơ lu bơngai oei tơ ei khan: “Ơ lu kon Juđê hăm lu bơngai oei tơ lăm Pơlei Jêrusalem, iĕm mơ̆ng inh pơma bĕ; iĕm athei băt tơdrong 'nâu.

¹⁵Lu nhôn âu ưh kơ suai ôh, yua kơ dang ei 'nao lăp tơsĭn jơ pơgê.

¹⁶Mă-lei tơdrong 'noh hei, đei bơngai pơtruh nơ̆r 'Bok Kei-Dei anăn sư Jôel, sư khan lê̆ hơdrol thoi âu:

¹⁷‘'Bok Kei-Dei khan: Lăm năr hơtuch kơnh, Inh wă ăn Yang Bơhngol Inh kơ jơ̆p-jang bơngai. Lu kon drŏ-nglo drŏ-kăn sư wă pơma nơ̆r khan lê̆ hơdrol, lu tơdăm gô apo 'bôh lu tơdrong mă ưh tam mă truh, lu 'bok kră gô apo mơ̆n.

¹⁸Na lăm năr 'noh kơnh Inh gô ăn Yang Bơhngol Inh kơ đĭ-đăng kơ lu đĭch đam Inh mă drŏ-nglo drŏ-kăn, na lu sư gô pơma nơ̆r khan lê̆ hơdrol.

¹⁹Inh gô pơm tơdrong hlĭch hlăch tơ kơpal plĕnh, hăm tơ'bôh tơdrong pha tơ ala teh; 'noh lu pham, ŭnh hăm 'nhui.

²⁰Măt 'năr jing măng mu, măt khei wă jing thoi pham, hơdrol kơ năr 'lơ̆ng, năr đe pơư pơang anăn 'Bok Kei-Dei tam mă truh.

²¹Thoi noh bu mă krao khan kơ Kră Yang, sư gơh klaih đơ̆ng tơdrong răm.’ ”

²²Pêtrôs oei pơma: “Ơ lu đe Isơrael, mơ̆ng inh bĕ. Yêsu Pơlei Nasaret, bơngai mă 'Bok Kei-Dei wơh Sư pơm tơdrong mơsêh mơyang, pơm tơdrong hlĭch hlăch, tơ'bôh kơ iĕm tơdrong chrơp, 'Bok Kei-Dei yua Sư pơm lu tơdrong 'noh tơ lăm lu iĕm, thoi lu iĕm đei băt boih.

²³Đe rôp Sư kiơ̆ thoi 'Bok Kei-Dei pơkă lê̆ hơdrol. Lu iĕm pơlôch Sư. Lu iĕm athei lu bơngai pơm kơnê̆ pơ̆ng pơlôch Sư tơ 'long pơglang.

²⁴Mă-lei 'Bok Kei-Dei kuă ăn Sư lôch răm na pơklaih Sư đơ̆ng tơdrong 'noh, ăn Sư iung arih dơ̆ng, yua kơ Sư ưh kơ đei lôch ling-lang ôh. Đe ưh kơ gơh rôp pơkơ̆ng Sư lăm tơdrong lôch ôh.

²⁵Đawit khan lê̆ hơdrol gah tơdrong Yêsu thoi âu: ‘Inh băt Kră Yang 'Bok Kei-Dei oei păng Inh ling-lang, Sư oei jê̆ Inh wă kơ Inh huay kơ hli.

²⁶Yua kơ thoi noh jơhngơ̆m Inh hiôk chơt, Inh roi tơdrong hiôk Inh kơ đe. Akâu Inh lôch, mă-lei akâu Inh gô iung arih dơ̆ng,

²⁷kơlih kơ Ih ưh kơ đei achăng tŭk Inh lăm anih bơngai lôch ôh, Ih kư̆m ưh kơ ăn Kon 'Lơ̆ng Ih lôch ôm ôh.

²⁸Ih tơiung arih Inh đơ̆ng lôch; yua kơ Ih oei păng Inh, jơhngơ̆m Inh gô hiôk chơt tơpă.’ ”

²⁹Pêtrôs oei pơma: “Ơ 'nhŏng oh, inh wă pơma kơ iĕm mă nhên gah Đawit 'bok kơdră bơ̆n sơ̆. Đawit lôch boih. Klaih kơ noh đe 'bŭ sư. Bơsat sư tơ Pơlei Jêrusalem kư̆m oei khơ̆ dang ei mơ̆n.

³⁰'Bok pơtao Đawit bơngai khan lê̆ hơdrol. 'Bok Kei-Dei pơkă kơ sư khan, kon sâu sư ning-mônh gô pơm Pơtao kư̆m lei-lăi thoi sư sơ̆ mơ̆n.

³¹Đawit băt kơ 'Bok Krist mă 'Bok Kei-Dei ăn wă pơgơ̆r bơ̆n, Sư gô iung arih dơ̆ng na Đawit khan thoi âu: 'Bok Kei-Dei ưh kơ đei achăng tŭk Sư lăm anih bơngai lôch, akâu Sư ưh kơ jing ôm ôh.

³²“Bơngai Yêsu mă nhôn bơtho âu, 'Bok Kei-Dei tơiung arih Sư đơ̆ng lôch boih. Nhôn 'bôh Sư iung arih tơpă.

³³'Bok Kei-Dei atŏk Yêsu anih gah 'ma kơ Sư. 'Bok Kei-Dei ăn kơ Yêsu Yang Bơhngol 'Lơ̆ng kiơ̆ kơ Sư pơkă. Na Yêsu ăn kơ nhôn Yang Bơhngol 'Lơ̆ng mơ̆n. Yua kơ thoi noh iĕm 'bôh tơdrong mơsêh mơyang hei.

³⁴Đawit ưh kơ đei tŏk tơ plĕnh ôh, mă-lei sư khan: ‘Kră Yang 'Bok Kei-Dei khan kơ Yŏng Kơdră inh thoi âu: Ih kư̆ oei gah 'ma kơ Inh pơgơ̆r,

³⁵tơ̆p Inh blah rôp lu bơngai mă ayăt kơ Ih thuơ tơ kơnơl jơ̆ng Ih.’

³⁶Inh wă kơ đĭ-đăng bơngai Isơrael băt mă nhên: Yêsu mă iĕm pơ̆ng pơlôch tơ 'long pơglang, Sư boih 'Bok Kei-Dei ăn pơm Yŏng bơ̆n păng 'Bok Krist mă pơgơ̆r bơ̆n kư̆m Sư mơ̆n.”

³⁷Kơtơ̆ng tơdrong 'noh boih, lu kon tơring mơn lăm jơhngơ̆m sư na jet Pêtrôs hăm lu bôl sư khan: “Ơ 'nhŏng oh, nhôn athei pơm lơliơ wă klaih đơ̆ng tơdrong yoch?”

³⁸Pêtrôs khan: “Iĕm athei tơbral kơdih tơdrong yoch iĕm. Iĕm athei iŏk 'batem hăm anăn Yêsu Krist wă kơ Sư pơklaih tơdrong yoch iĕm, Sư ăn kơ iĕm Yang Bơhngol 'Lơ̆ng.

³⁹'Nâu nơ̆r 'Bok Kei-Dei Sư pơkă ăn kơ iĕm, kơ lu kon sâu iĕm păng lu bơngai mă oei tơ ataih đơ̆ng bơ̆n, dôm lu bơngai 'Bok Kei-Dei Kră Yang bơ̆n krao iŏk wă lui kơ Sư.”

⁴⁰Pêtrôs bơtho lơ tơdrong dơ̆ng hăm pơlung lu sư thoi âu: “Lu iĕm athei weh đơ̆ng adrĕch adrung bơngai pơm kơnê̆ 'nâu.”

⁴¹Thoi noh lu bơngai mă iŏk nơ̆r bơtho 'noh, lu sư iŏk 'batem. Lăm năr 'nei đei dang pêng-rơbâu 'nu bơngai mơ̆t tơ lu bơngai lui.

⁴²Rim năr lu sư mơ̆ng lu jơ̆ng 'bang bơtho. Lu sư pơgơ̆p băl thoi 'nhŏng oh, sŏng sa 'blŏk hơdơ̆r kơ Yêsu hăm krao khan kơ 'Bok Kei-Dei hơdai.

⁴³Đĭ-đăng bơngai tơring ei hli, yua kơ lu jơ̆ng 'bang pơm lơ tơdrong mơsêh chrơp.

⁴⁴Lu bơngai lui pơgơ̆p băl, dôm lu mŭk tơmam sư jing hơdai.

⁴⁵Lu sư tĕch mŭk tơmam, chŭn mir sư, asong băl jên kơ rim 'nu lu sư kiơ̆ kơ kăl yua.

⁴⁶Rim năr lu sư akŭm tơ hnam akŭm 'Bok Kei-Dei tơm, hăm akŭm tơ lăm hnam sư kơdih. Lu sư sŏng sa hơdai dih băl 'blŏk hơdơ̆r kơ Yêsu. Lu sư chơt hiôk tơpă.

⁴⁷Lu sư bơnê kơkuh kơ 'Bok Kei-Dei. Lu kon tơring tơrang kư̆m hơiă kơ lu sư. Rim năr đei bơngai lui na Kră Yang pơklaih lu sư păng tơmơ̆t lu đe noh tơ lăm khŭl bơngai lui.