Read bahnar Jang 20 Bible Online

Jang 20 - bahnar bible

Jang 20

¹Đơ̆ng rŏng kơ tơdrong noh tôch boih, Pôl krao akŭm lu bơngai lui păng pơma pơlung lu sư wă kơ jơhngơ̆m lu sư chơt hiôk, kơlih kơ Pôl wă tơklah đơ̆ng lu sư năm tơ dêh char Masêđôn.

²Sư năm jơ̆p tơ dêh char Masêđôn ei bơtho tơgŭm tơpă kơ lu bơngai lui wă kơ lu sư lui mă kơjăp. Klaih kơ noh sư năm tơ dêh char Grĕk dơ̆ng.

³Pôl oei tơ ei pêng khei. Klaih kơ noh sư wă năm tơ dêh char Siri ră, na sư kơtơ̆ng lu bơngai Juđê wă rôp pơrăm lê̆ sư. Thoi noh na sư brŏk trong đêl sư năm hơdrol ei dơ̆ng, gah trong dêh char Masêđôn.

⁴Lu bơngai âu kư̆m năm kiơ̆ sư mơ̆n, lu anăn sư: Sôpatê kon Piru, sư đơ̆ng Pơlei Bêrê; bre Aritak păng Sêkônđa đơ̆ng Pơlei Têsalônik; Guơs đơ̆ng Pơlei Dibơ; Timôthê đơ̆ng Pơlei Litrơ; păng bre Tisĭk, Trôphĭm đơ̆ng dêh char Asi.

⁵Anăn inh Luka oei păng Pôl tơ Pơlei Philip. Na lu đe noh hei sư năm tơ Pơlei Trôs hơdrol kơ nhi boih na lu sư chang gô nhi Pôl tơ ei.

⁶Hơtai ei đe pơm giĕng bơnê kơ 'Bok Kei-Dei đe sa 'Bĕng Mi Ưh Kơ Đei 'Buih Pông. Hlôi đe sa giĕng ei đang boih, nhi năm đơ̆ng Pơlei đe Philip tŏk thŏng-nan năm tơ Pơlei Trôs. Pơđăm năr đơ̆ng rŏng kơ 'noh na nhi truh tơ Pơlei Trôs păng tơ'bơ̆p hloi lu bôl nhi năm năr hơdrol ki. Nhôn oei tơ Pơlei Trôs ei minh 'măng giĕng hloi.

⁷Kơsơ̆ năr mă mônh lăm giĕng nhôn akŭm wă kơkuh kơ 'Bok Kei-Dei păng sŏng sa hơpong dih băl. Na Pôl bơtho lu bơngai akŭm ei tơdrong 'Bok Kei-Dei. Sư bơtho đunh tơpă khŏm khŏm truh tơ mơjĭt-'bar jơ kơmăng, yua kơ sư wă tơklah dih băl năr dơning na nhôn athei ngôi hơpong dih băl mă hrăp.

⁸Nhôn akŭm tơ anih hnam gah kơpal. Lăm ei đei ŭnh kơđeng lơ.

⁹Lăm nhôn akŭm ei đei minh 'nu bơngai tơdăm, anăn sư Ơtik, sư tơoei 'bơ̆t 'măng-'mŏk. Hơtai Pôl oei bơtho khŏm khŏm na bơngai tơdăm ei sư pă kĕ kral boih na sư kơkôi khŏm khŏm jing tep hiơt hloi tơpă. Na sư huŏng đơ̆ng hnam ei tơ teh, đơ̆ng hnam anih pêng tơ̆ng tơ kơpal ti. Lu bơngai ei thar jur tơiung hloi sư ră, mă-lei sư lôch hloi boih.

¹⁰Mă Pôl kư̆m hơdai wang jur đơ̆ng hnam ei thar năm tơ bơngai tơdăm ei, brom 'bơ̆t klak sư hăm krôp sư, khan hloi kơ lu bơngai lui: “Iĕm 'nĕ kơ hli, Kră Yang 'Bok Kei-Dei ăn kơ sư arih dơ̆ng.”

¹¹Na đơ̆ng noh Pôl tŏk tơ hnam kơpal ti dơ̆ng, nhôn sa et wă 'blŏk hơdơ̆r kơ Yêsu. Na đơ̆ng noh nhôn sŏng sa hloi. Pôl pơma dơnuh păng lu bơngai lui khŏm khŏm truh tơ 'năr lĕch. Klaih kơ noh nhôn tơklah dih băl đơ̆ng tơduă lu sư.

¹²Na bơngai tơdăm ei arih 'lơ̆ng thoi đêl dơ̆ng, na lu bơngai lui năm ba truh tơ hnam sư, lu sư hiôk hơiă tơpă yua kơ sư oei arih.

¹³Pôl năm tơ Pơlei Asôs năm jơ̆ng hoh. Truh Pơlei Asôs boih sư wă tŏk thŏng-nan năm hơdai nhôn. Na sư khan kơ nhôn athei nhôn năm tơ sư ei trong đak na nhôn tŏk thŏng-nan đơ̆ng Pơlei Trôs năm tơ Pơlei Asôs, wă kơ tơ'bơ̆p sư.

¹⁴Lăp truh tơ Pơlei Asôs boih na Pôl tŏk thŏng-nan năm hơdai nhôn tơ Pơlei Mitilen.

¹⁵Đơ̆ng Pơlei Mitilen ei nhôn oei hao kơpal thŏng-nan đĕch ưh kơ jur ôh. Năr dơning dơ̆ng nhôn truh tơ bŏl đak đe anăn bŏl Chiôs, na nhôn năm brih kiơ̆ bŏl ei. Năr dơmônh dơ̆ng nhôn truh tơ bŏl đak đe anăn Samôs. Năr đơ̆ng rŏng dơ̆ng nhôn truh tơ Pơlei Milê.

¹⁶Pôl ưh kơ 'maih năm tơ Pơlei Êphêsô hli kơ hiong năr tơ dêh char Asi ei, yua kơ sư hăt wă năm jah truh tơ Pơlei Jêrusalem hơdrol kơ Năr Giĕng Pangtơkôt.

¹⁷Tơ Pơlei Milê Pôl đei wơh đe năm pơtruh nơ̆r sư tơ lu kră wei-lăng bơngai lui tơ Pơlei Êphêsô athei lu sư năm hơpong tơ sư tơ Pơlei Milê.

¹⁸Lăp lu sư truh tơ Pơlei Milê boih Pôl khan kơ lu sư: “Iĕm băt kơ inh bơngai thoi yơ đơ̆ng inh 'nao truh tơ dêh char Asi sơ̆ mă khơ̆ tơ bơ̆n tơklah dih băl.

¹⁹Iĕm băt thoi yơ inh pơm đĭch đam 'Bok Kei-Dei bơ̆jang tơdrong sư. Inh ưh kơ pơ̆n pơang akâu kơdih ôh. Inh 'bôh đe ưh kơ lui kơ Kră Yang Yêsu inh kư̆m nhơ̆m hmoi ơh kơdih akâu inh mơ̆n. Na lu bơngai Juđê kư̆m wă rôp pơrăm lê̆ inh.

²⁰Iĕm kư̆m băt mơ̆n inh bơtho ăn kơ iĕm tôm tơdrong wă tơgŭm iĕm. Inh ưh kơ hli bơtho dôm tơdrong 'Bok Kei-Dei 'bơ̆t anăp đe akŭm lơ, dah inh bơtho tơ rim hnam dơnŏ lu iĕm.

²¹Inh bơtho bơngai Juđê hăm bơngai nai lei-lăi đĕch mơ̆n, khan kơ sư athei tơbral kơdih tơdrong yoch sư, na brŏk tơ 'Bok Kei-Dei păng lui kơ Kră Yang bơ̆n Yêsu Krist.

²²“Na dang ei inh năm tơ Pơlei Jêrusalem yua kơ Yang Bơhngol 'Lơ̆ng athei inh năm. Inh ưh kơ băt ôh inh wă đei tơdrong kiơ tơ ei kơnh.

²³Tơ rim pơlei Yang Bơhngol 'Lơ̆ng pơma kơ inh khan lăp inh truh tơ Pơlei Jêrusalem inh gô đei tơdrong pơmat đe rôp tah inh tơ hnam phak.

²⁴Mă đe pơlôch inh kư̆m bưh, kư̆ mă inh gơh jang mă keh tơdrong Kră Yang Yêsu pơjao ăn kơ inh sơ̆. Tơdrong jang noh wă khan bơtho tơdrong 'lơ̆ng 'Bok Kei-Dei mơnat kơ bơ̆n, ăn kơ lu bơ̆n klaih đơ̆ng tơdrong yoch, đơ̆ng ti yang kơnê̆.

²⁵“Sơ̆ inh năm tơ rim lu iĕm, bơtho ăn kơ đĭ-đăng iĕm tơdrong 'Bok Kei-Dei wă pơgơ̆r iĕm thoi yơ. Na dang ei inh băt kơ iĕm ưh kơ đei layơ wă 'bôh akâu inh tơ ala teh âu dơ̆ng.

²⁶Na inh wă khan tơpă kơ lu iĕm dang ei: Tơdah 'Bok Kei-Dei phak iĕm ning-mônh, măk ai lu iĕm hŏ, yua kơ inh ưh kơ hli na bơtho iĕm tôm tơdrong 'Bok Kei-Dei.

²⁸Na iĕm athei kơchăng akâu kơdih hăm wei-lăng đĭ-đăng lu bơngai lui. Yang Bơhngol 'Lơ̆ng ăn kơ iĕm wei-lăng bơngai lui kư̆m thoi lĕ bơngai wei-lăng triu sư. Lu bơngai lui, sư kon 'Bok Kei-Dei, yua Kon pôm Sư Yêsu lôch tuh pham tang kon bơngai yoch.

²⁹Inh băt đơ̆ng rŏng kơ inh tơklah đơ̆ng lu iĕm, lu bơngai kơnê̆ pă jor wă năm tơ iĕm, wă pơhlŭ lu bơngai lui achăng lê̆ Kră Yang Yêsu. Lu sư thoi lĕ kŏ-so wă rôp sa triu.

³⁰Đơ̆ng lăm lu iĕm kơdih kư̆m gô đei bơngai bơtho tơdrong 'Bok Kei-Dei ưh kơ tơpăt wă kơ lu bơngai lui tơklah dih băl păng kiơ̆ sư.

³¹Na iĕm athei kơchăng. Iĕm 'nĕ kơ hiơt kơplah măng năr inh bơtho iĕm lăm pêng sơnăm sơ̆. Inh kư̆m nhơ̆m hmoi ơh yua kơ iĕm, hli kơ iĕm lui ưh kơjăp.

³²“Na dang ei inh apinh 'Bok Kei-Dei wei-lăng lu iĕm. Iĕm pơhrăm Tơdrong 'Nao 'Lơ̆ng sư na iĕm gô lui kơ Sư kơjăp. 'Bok Kei-Dei gô ăn kơ iĕm đei jơhngơ̆m pran, hăm Sư kư̆m ăn kơ iĕm dôm tơdrong hiôk 'lơ̆ng kư̆m thoi Sư ăn kơ đĭ-đăng bơngai mă Sư jô̆ 'lơ̆ng tơpăt.

³³Inh ưh kơ 'nhĕng jên đe dah hơbĕn ao đe ôh.

³⁴Iĕm kư̆m băt mơ̆n inh bơ̆jang păng ti đĕch wă 'me sa akâu inh kơdih hăm lu bôl buăl inh mơ̆n.

³⁵Thoi noh lăm tôm tơdrong inh tơ'bôh kơ iĕm bơ̆n athei jang gleh 'mơ̆i na gơh đei tơmam 'me rong akâu kơdih hăm athei đei đon tơdŏng mơnat kơ lu bơngai dơnuh hoh. Bơ̆n 'nĕ hiơt mă âu nơ̆r Kră Yang Yêsu khan pơkă kơ bơ̆n hơdrol sơ̆ thoi âu: ‘Tơdah đe tơgŭm bơ̆n, jơhngơ̆m bơ̆n kư̆m hiôk mơ̆n; dah bơ̆n tơgŭm đe, jơhngơ̆m bơ̆n hiôk hloh loi.’ ”

³⁶Hlôi Pôl pơma đang boih, Pôl păng đĭ-đăng lu sư sơtơ̆p kŭl-tăng, na Pôl krao khan kơ Kră Yang 'Bok Kei-Dei.

³⁷Đĭ-đăng lu sư nhơ̆m hmoi, chŭm tơkuăr Pôl hloi.

³⁸Lu sư sơ'ngon tơpă kơlih kơ Pôl khan sư, ưh pă đei layơ wă 'bôh lu sư tơ ala teh âu dơ̆ng. Klaih kơ noh lu sư năm ba Pôl tơ thŏng-nan.