Read bahnar Jang 22 Bible Online

Jang 22 - bahnar bible

Jang 22

¹“Ơ lu mih ma 'nhŏng oh, apinh lu iĕm mơ̆ng inh 'biơ̆ bĕ. Inh wă pơma tơdrong đêl iĕm jô̆ kơ inh athei iĕm tŭk lê̆ tơdrong juăt Môis, inh athei iĕm tơpă dah ưh.”

²Lu sư kơtơ̆ng Pôl pơma nơ̆r Juđê lu sư thĕng tơpă. Pôl khan:

³“Inh 'nâu bơngai Juđê tơpă. Mĕ inh tơpŭ kơ inh sơ̆ tơ Pơlei Tarsơ dêh char Salisia. Hơtai inh oei 'lơ̆p sơ̆ inh oei tơ Pơlei Jêrusalem âu. Inh năm hŏk pơhrăm tơ 'bok thây Gemel. Inh pơhrăm tôm tơdrong juăt lu 'bok kơdră bơ̆n sơ̆. Inh hăt kơ kiơ̆ tôm tơdrong 'Bok Kei-Dei kư̆m lei-lăi thoi lĕ kơ đĭ-đăng lu iĕm dang ei mơ̆n.

⁴Sơ̆ inh areh kơ lu bơngai lui kơ Yêsu, truh tơ inh rôp pơlôch lu sư. Inh rôp lu bơngai kiơ̆ Yêsu mă drŏ-nglo mă drŏ-kăn, tah hloi lu sư tơ hnam phak.

⁵'Bok soi tơm hăm lu bơngai kră sek tơlang, lu kră pơgơ̆r bơngai Juđê băt kơ inh pơm thoi noh tơpă sơ̆. Lu sư boih chih ăn kơ inh kơthơ wă pơtruh kơ lu 'nhŏng oh bơngai Juđê tơ Pơlei Đamas. Na inh năm tơ Pơlei Đamas wă rôp lu bơngai lui kơ Yêsu, chô̆ lu sư chông ba năm tơ Pơlei Jêrusalem wă phak lu sư.

⁶“Lăp 'năr dơ̆ng, hơtai inh oei năm rok trong wă jê̆ truh tơ Pơlei Đamas boih inh 'bôh hloi ŭnh pơchrang rang hơdah tơpă, đơ̆ng plĕnh pơchrang tăp dăr kơ inh.

⁷Inh huŏng hơtat hloi đơ̆ng kơdŭ aseh hăm kơtơ̆ng hloi nơ̆r pơma kơ inh thoi âu: ‘Ơ Sôl, Inh pơm kiơ kơ ih na ih pơm kơnê̆ kơ Inh?’

⁸Inh khan kơ Sư: ‘Ơ 'Bok, anăn Ih bu?’ Sư khan: ‘Inh Yêsu đơ̆ng Pơlei Nasaret mă ih areh kơ Inh.’

⁹Lu bơngai năm hơdai hăm inh hơtai ei, sư 'bôh gah ŭnh pơchrang hơdah đĕch, gah nơ̆r Yêsu pơma kơ inh lu sư ưh kơtơ̆ng ôh.

¹⁰Na inh jet Yêsu: ‘Ơ Kră Yang, Ih wă kơ inh pơm kiơ dang ei?’ Kră Yang Yêsu khan kơ inh thoi âu: ‘Ih iung bĕ, năm tơ Pơlei Đamas. Tơ ei đe gô khan kơ ih, Inh wă ăn kơ ih jang tơdrong kiơ kơnh.’

¹¹Hơtai ei pêng năr dơ̆ng, măt inh bơbul ưh kơ 'bôh hơdah kơlih kơ ŭnh pơchrang rang hơdah tơpă tơ inh hei. Na lu bôl inh năm hơdai hăm inh rôp ti chông ba inh truh tơ Pơlei Đamas.

¹²“Tơ Pơlei Đamas ei đei minh 'nu bơngai anăn sư Anania. Sư ling-lang pơm kiơ̆ tơdrong juăt bơ̆n. Đĭ-đăng bơngai Juđê lăm Pơlei Đamas băt kơ sư bơngai 'lơ̆ng.

¹³Anania năm hơpong tơ inh. Na sư dơ̆ng jê̆ inh păng khan kơ inh: ‘Ơ 'nhŏng, dang ei ih gơh 'bôh hơdah dơ̆ng.’ Na inh gơh 'bôh hơdah hloi. Na inh 'bôh sư oei 'bơ̆t jê̆ inh.

¹⁴Anania khan kơ inh: ‘Lu kơdră bơ̆n sơ̆ lui kơkuh kơ 'Bok Kei-Dei. 'Bok Kei-Dei boih rơih iŏk ih, wă kơ ih băt dôm tơdrong Sư pơm, Sư wă kơ ih 'bôh Kon 'lơ̆ng tơpăt Sư păng kơtơ̆ng Kon Sư pơma.

¹⁵Sư rơih ih wă kơ ih ră roi kơ đĭ-đăng bơngai gah tơdrong ih 'bôh Yêsu boih, hăm tơdrong ih kơtơ̆ng nơ̆r Sư pơma.

¹⁶Na dang ei ih gô kiơ? Ih iung wăi, năm iŏk 'batem, krao khan kơ Yêsu wă kơ ih klaih đơ̆ng tơdrong yoch.’

¹⁷“Inh brŏk tơ Pơlei Jêrusalem. Hơtai inh oei krao khan kơ 'Bok Kei-Dei tơ lăm hnam akŭm 'Bok Kei-Dei tơm, inh 'bôh Kră Yang Yêsu nhên tơpă. Sư khan kơ inh: ‘Ih dah lĕch đơ̆ng Pơlei Jêrusalem mă tĕnh bĕ. Lu kon pơlei pơla ưh kơ wă lui kơ tơdrong ih bơtho gah Inh.’

¹⁹Inh khan kơ Sư: ‘Ơ Kră Yang, inh tơchĕng lu sư kư̆m wă lui mơ̆n yua kơ lu sư băt boih kơ inh năm jơ̆p-jang tơ lu hnam akŭm sơ̆ rôp tah lu bơngai lui kơ Ih lăm hnam phak hăm teh lu sư.

²⁰Hơtai đe pơlôch Êtien, bơngai bơtho Tơdrong 'Nao 'Lơ̆ng Ih, inh kư̆m tơ ei mơ̆n; inh wă kơ đe pơlôch Êtien păng inh wei-lăng ao lu bơngai pơlôch sư.’

²¹Na Kră Yang Yêsu khan kơ inh: ‘Năm bĕ. Inh wơh ih năm bơtho lu đe pơlei ataih, lu bơngai tơmoi ưh kơ sĭ bơngai Juđê.’ ”

²²Lu bơngai Juđê chu mơ̆ng Pôl pơma kơ lu sư tôch 'bơ̆t Yêsu wơh sư năm bơtho pơlei tơmoi. Lu sư kơtơ̆ng tơdrong noh na lu sư ơh, pơma re khan: “Pơlôch Pôl bĕ. Sư bơngai kơnê̆, ưh kơ trŏ ăn kơ sư arih ôh.”

²³Lu sư pơma re, lu sư hơwơ̆t ao lu sư hăm săi teh pơnŭk.

²⁴Na 'bok tih linh athei lu linh sư tơmơ̆t Pôl lăm kơđông. 'Bok tih linh athei lu linh sư teh Pôl wă kơ sư jah roi mă tơpăt kơlih kơ 'bok tih linh ưh tam băt tơdrong kiơ lu bơngai tơpôl lơ areh kơ sư.

²⁵Lu linh chô̆ Pôl wă kơ teh sư. Na Pôl khan kơ 'bok phŏ linh oei 'bơ̆t ei thoi âu: “Iĕm ưh kơ gơh teh inh ôh, yua kơ inh bơngai Rôm lei-lăi thoi iĕm mơ̆n, na lu đe kră tam mă năm sek tơlang tơdrong inh.”

²⁶'Bok linh kơtơ̆ng Pôl pơma thoi noh, na sư năm tơ 'bok yŏng sư jet hloi: “Ih wă pơm kiơ kơ bơngai âu, sư bơngai Rôm lah?”

²⁷Na 'bok tih linh ei năm tơ Pôl hăm jet: “Apinh ih roi kơ inh, ih hăm trŏ kơ bơngai Rôm tơpă dah ưh?” Na Pôl khan kơ sư: “Tơpă yơh inh bơngai Rôm.”

²⁸'Bok tih linh khan: “Inh âu bơngai Rôm yua kơ inh apah kơ đe jên lơ tơpă.” Pôl khan: “Inh bơngai Rôm yua kơ 'bă inh bơngai Rôm mơ̆n.”

²⁹Na lu linh mă chô̆ Pôl hăm wă teh sư ei, lu sư weh ataih đơ̆ng Pôl. 'Bok tih linh băt kơ sư bơngai Rôm boih sư kư̆m hli lei-lăi thoi lu 'noh mơ̆n kơlih kơ sư athei lu linh chô̆ Pôl wă teh sư hei.

³⁰'Bok tih linh wă kơ băt kơnăl tơpă tơdrong kiơ lu bơngai Juđê jâu areh kơ Pôl, na năr dơning dơ̆ng sư krao akŭm lu 'bok soi tih păng đĭ-đăng lu kră sek tơlang. Sư athei lu linh yaih tơlei glang mam đêl chô̆ sư na anhăk sư dơ̆ng 'bơ̆t anăp lu kră sek tơlang.