Read bahnar Jang 23 Bible Online

Jang 23 - bahnar bible

Jang 23

¹Pôl hue lăng lu kră sek tơlang na khan: “Ơ lu 'nhŏng oh, đơ̆ng sơ̆ khơ̆ dang ei inh pơm tơpăt, na jơhngơ̆m inh ưh kơ hli 'bơ̆t anăp 'Bok Kei-Dei.”

²'Bok soi tơm, anăn sư Anania, kơtơ̆ng thoi noh, sư athei lu bơngai oei 'bơ̆t jê̆ Pôl tap Pôl 'bơ̆t kang.

³Pôl pơma kơ 'bok soi tơm ei khan: “Ih athei đe tap inh, na 'Bok Kei-Dei gô tap ih mơ̆n, ih bơngai 'bơ̆r đak klak ŭnh. Ih sek tơlang tơdrong inh kiơ̆ kơ tơdrong juăt bơ̆n ră, mă-lei ih athei đe tap inh; ih pơm thoi noh ưh kơ trŏ kơ tơdrong juăt bơ̆n ôh. 'Noh ih dơ̆ng pơm yoch kơ tơdrong juăt bơ̆n.”

⁴Lu bơngai oei jê̆ Pôl ei khan kơ Pôl: “Ih pơma hơwĕng kơ bơngai soi kơ 'Bok Kei-Dei lah, 'Bok Kei-Dei pôk sư 'bok soi tơm.”

⁵Pôl khan: “Ơ lu 'nhŏng oh, inh ưh kơ băt kơ sư 'bok soi tơm ôh. Inh băt mơ̆n sơ̆p hla bơar 'Bok Kei-Dei chih athei bơ̆n 'nĕ pơma hơwĕng kơ kră pơgơ̆r lu bơ̆n.”

⁶Lăm lu kră sek tơlang, Pôl kơnăl kơ lu sư 'bar khŭl bơngai lui phara, khŭl Sađusê păng khŭl Pharisi. Na Pôl khan: “Ơ lu 'nhŏng oh, inh bơngai Pharisi. 'Bă inh kư̆m bơngai Pharisi lei-lăi mơ̆n. Dang ei iĕm sek tơlang tơdrong inh yua kơ inh lui kơ lu bơngai lôch iung arih ning-mônh.”

⁷Lăp lu bơngai khŭl Pharisi păng lu bơngai khŭl Sađusê kơtơ̆ng Pôl pơma thoi noh, na lu sư pơjah dih băl hloi, ưh pă pôm đon ôh.

⁸Đơ̆ng sơ̆ lu bơngai Pharisi khan kon bơngai gô iung arih đơ̆ng lôch ning-mônh. Na lu bơngai Sađusê khan ưh. Lu bơngai Pharisi khan đei linh jang 'lơ̆ng păng lu yang nai. Lu bơngai Sađusê khan ưh kơ đei ôh, đei 'Bok Kei-Dei đĕch. Yua kơ thoi noh na lu sư pơjah dih băl.

⁹Lu sư pơma re đơđơu đơđao mao. Đei lu 'bok thây bơtho tơdrong juăt Juđê khŭl Pharisi, lu sư wă kơ jei sư na sư iung pơma dŏng Pôl khan hloi thoi âu: “Bơngai âu ưh kơ đei pơm tơdrong kiơ ôh. Rŏ lăng sư đei linh jang 'lơ̆ng pơma khan kơ sư kơlĕ.”

¹⁰Lu kră sek tơlang ei pơjah dih băl rai pran truh kơ 'bok tih linh hli kơ lu kră sek tơlang wă pơjĭ Pôl dêh. Na sư athei lu linh sư năm tơ tŏk-bŏk đe wă dui iŏk Pôl đơ̆ng tŏk-bŏk bơngai tơpôl ei wă anhăk Pôl tơ kơđông.

¹¹Măng kơnh Kră Yang Yêsu dơ̆ng jê̆ Pôl hăm khan kơ Pôl: “Ih 'nĕ kơ hli. Ih bơtho tơdrong Inh tơ Pơlei Jêrusalem âu boih, na ih athei bơtho tơdrong Inh tơ Pơlei Rôm dơ̆ng.”

¹²Pơgê dơning dơ̆ng lu bơngai Juđê mơ'nah akŭm pơđâu wă pơlôch Pôl. Lu sư pơma hiap kơdih khan: “Dah bơ̆n sŏng sa nhă đak tam mă pơlôch Pôl, mă bơ̆n lôch kơ 'Bok Kei-Dei pơrăm.”

¹³Lu bơngai pơđâu ei hloh kơ puăn-jĭt 'nu.

¹⁴Na lu sư năm tơ 'bok soi tih păng lu kră sek tơlang hăm khan thoi âu: “Tơdah nhôn sŏng sa tam mă pơlôch Pôl, lu nhôn lôch kơ 'Bok Kei-Dei pơrăm.

¹⁵Na dang ei nhôn wă kơ iĕm apinh 'bok tih linh ăn kơ Pôl năm tơ lu iĕm, khan iĕm wă pơma tơdrong Pôl dơ̆ng. Na lăp lu linh năm ba sư oei năm rok trong, na lu nhôn wă răp pơlôch Pôl hloi.”

¹⁶Mon Pôl kơtơ̆ng thoi noh na mon Pôl kơdâu mơ̆t tơ kơđông linh, roi hloi kơ Pôl.

¹⁷Na Pôl krao minh 'nu 'bok phŏ linh păng khan: “Apinh ih năm ba bơngai tơdăm âu tơ 'bok yŏng ih. Sư đei tơdrong wă pơma hăm yŏng ih.”

¹⁸Na 'bok phŏ linh ei năm ba mon Pôl truh tơ 'bok yŏng sư na khan hloi: “Bơngai bơnă, anăn sư Pôl, krao inh na apinh inh năm ba bơngai tơdăm âu tơ ih. Sư đei tơdrong wă pơma hăm ih.”

¹⁹'Bok tih linh rôp ti mon Pôl chông ba sư tơ nai, na jet sư: “E wă roi kơ inh tơdrong kiơ?”

²⁰Mon Pôl khan: “Lu bơngai Juđê wă apinh ih athei ih anhăk mih Pôl tơ lu sư năr dơning. Lu sư khan wă sek tơlang mih Pôl dơ̆ng.

²¹Apinh ih 'nĕ chu kơ lu sư hŏ yua kơ lu sư đei loi puăn-jĭt 'nu bơngai wă răp pơlôch mih Pôl. Đĭ-đăng lu sư ei pơkă dih băl păng hiap akâu sư kơdih khan: ‘Dah bơ̆n sŏng sa nhă đak tam mă pơlôch Pôl lei jah ăn 'Bok Kei-Dei pơrăm bơ̆n đĕch 'lơ̆ng hloh.’ Lu sư hơmet tôm boih. Lu sư oei chang gô ih anhăk mih Pôl năm tơ lu kră sek tơlang đĕch dang ei.”

²²'Bok tih linh khan kơ sư: “Tơdrong e roi kơ inh 'nâu hei, e lê̆ kơ chă roi kơ đe hŏ.” Na sư athei mon Pôl brŏk.

²³Yua kơ tơdrong noh boih na 'bok tih linh krao hloi 'bar 'nu phŏ sư na khan: “Biĕm krao 'bar-hrĕng 'nu linh năm jơ̆ng hoh, tơpơh-jĭt 'nu linh hao aseh, 'bar-hrĕng 'nu linh chĕp tak. Athei lu sư hơmet bĕ năm tơ Pơlei Sêsarê tơsĭn jơ măng kơnh.

²⁴Mă 'bar 'nu biĕm kư̆m athei đei aseh mơ̆n wă ăn kơ Pôl hao kiơ̆. Biĕm hăm lu linh athei chông ba Pôl truh tơ 'bok kuan tih Phêlik.”

²⁵'Nâu 'bok tih linh chih kơthơ:

²⁶“Anăn inh Klôt Lisia chih kơthơ âu kơ 'bok kuan tih Phêlik. Hmach kơ ih 'bok.

²⁷Lu bơngai Juđê rôp bơngai âu na wă jê̆ pơlôch sư ră mă-lei inh kơtơ̆ng đe khan sư bơngai Rôm na inh hăm lu linh inh tơdŏng sư.

²⁸Inh wă kơ băt lu bơngai Juđê jâu sư tơdrong kiơ, na inh chông ba sư tơ lu kră sek tơlang bơngai Juđê.

²⁹Mă-lei inh 'bôh sư ưh kơ đei tơdrong wă pơlôch dah tah sư lăm hnam phak ôh. Lu bơngai Juđê jâu sư gah tơdrong juăt lu sư đĕch.

³⁰Na đơ̆ng rŏng kơ noh inh kơtơ̆ng ang lu bơngai Juđê wă răp pơlôch sư, na inh athei hloi lu linh inh năm ba sư tơ ih. Inh athei lu bơngai jâu sư năm tơ ih mơ̆n wă kơ lu sư jâu sư 'bơ̆t anăp ih.”

³¹Lu bơngai linh chu 'bok yŏng lu sư wơh. Măng âu lu sư năm ba Pôl truh tơ Pơlei Antipatrih.

³²Năr dơning dơ̆ng lu bơngai linh mă năm jơ̆ng hoh, lu sư brŏk tơ kơđông lu sư tơ lăm Pơlei Jêrusalem. Na lu bơngai linh hao aseh chông ba Pôl.

³³Truh tơ Pơlei Sêsarê lu sư ăn hla kơthơ kơ 'bok kuan tih Phêlik hăm jao Pôl tơ sư.

³⁴'Bok kuan tih đŏk lăng kơthơ ei na jet Pôl: “Ih đơ̆ng dêh char ayơ?” Pôl khan: “Inh đơ̆ng dêh char Salisia.”

³⁵'Bok kuan tih khan: “Gô lu bơngai wă jâu ih truh, na inh gô sek tơlang tơdrong ih.” Klaih kơ noh sư athei lu linh sư gak Pôl lăm hnam 'bok kuan tih. Hnam ei đêl pơtao Hêrôt pơm sơ̆.