Read bahnar Jang 24 Bible Online

Jang 24 - bahnar bible

Jang 24

¹Đơ̆ng rŏng kơ noh pơđăm năr, 'bok soi tơm, anăn sư Anania, năm tơ Pơlei Sêsarê. Kư̆m đei lu kră sek tơlang mơ'nah, hăm minh 'nu bơngai pơma tang lu kră sek tơlang, anăn sư Têtulus, năm hơdai hăm sư mơ̆n. Lu sư ei năm 'bơ̆t anăp 'bok kuan tih Phêlik wă pơma jâu Pôl.

²'Bok kuan tih Phêlik athei lu linh tơlĕch Pôl 'bơ̆t anăp sư. Klaih kơ noh Têtulus iung pơma jâu Pôl thoi âu: “Kơkuh kơ ih Phêlik. Yua kơ ih pơgơ̆r hơgei tơpă na đơ̆ng sơ̆ nhôn đei tơdrong hiôk-hian. Yua kơ ih tơgŭm nhôn ling-lang, đei tơdrong 'lơ̆ng rŏ jơ̆p kơ dêh char nhôn, yua kơ đơ̆ng ih tơgŭm ngăl.

³Na nhôn bơnê kơ ih tơpă, ơ Phêlik.

⁴Inh ưh kơ wă pơma đunh ôh, kơnh hiong kơ jơ ih, na dang ei inh apinh ih mơ̆ng inh pơma 'biơ̆ bĕ, ih lĕ 'bok.

⁵Bơngai 'nâu sư pơm kơnê̆ ling-lang. Sư pơhlŭ lu bơngai Juđê tơhil băl jơ̆p kơ teh đak. Sư pơm kră pơgơ̆r lu đe Nasaret.

⁶Sư kư̆m wă pơm kơnê̆ ră kơ hnam akŭm 'Bok Kei-Dei tơm, mă-lei nhôn rôp sư. Nhôn wă sek tơlang sư kiơ̆ kơ tơdrong juăt nhôn kơdih ră;

⁷na 'bok tih linh, anăn sư Lisia păng lu linh sư mơ̆n năm tơgar rôp iŏk sư âu đơ̆ng nhôn.

⁸Klaih kơ noh Lisia athei lu bơngai wă jâu Pôl năm tơ ih. Tơdah ih jet Pôl na ih gô băt đơ̆ng sư, sư pơm tơpă dôm lu tơdrong nhôn jâu sư ei.”

⁹Đang kơ Têtulus pơma, lu bơngai Juđê oei lăm hnam sek tơlang ei kư̆m pơma jâu kơ Pôl mơ̆n. Lu sư khan: “Tơdrong Têtulus pơma noh trŏ tơpă.”

¹⁰Đơ̆ng noh Phêlik athei Pôl pơma. Pôl khan thoi âu: “Inh băt kơ ih sek tơlang lăm dêh char âu đunh sơnăm boih, na inh ưh kơ hli pơma dŏng akâu kơdih.

¹¹Tơdah ih wă jet tơdrong inh, ih gô băt ưh tam mă đunh ôh, 'nao lăp mơjĭt-'bar năr đĕch hơdrol kơ năr âu inh năm tơ Pơlei Jêrusalem wă kơkuh kơ 'Bok Kei-Dei tơpă ră.

¹²Na lu bơngai Juđê ưh kơ 'bôh inh pơjah hăm bu ôh. Lu sư ưh kơ 'bôh inh pơhlŭ kon pơlei pơla tơhil băl lăm hnam akŭm 'Bok Kei-Dei tơm ôh, dah lăm lu hnam akŭm nai, dah lăm anih nai dơ̆ng lăm pơlei lei-lăi mơ̆n.

¹³Lu sư jâu inh, mă-lei lu sư ưh kơ đei 'bôh inh pơm kơnê̆ tơdrong kiơ ôh.

¹⁴Mă-lei pôm lu tơdrong âu inh pơm tơpă: Đơ̆ng sơ̆ lu 'bok kơdră nhôn lui kơkuh kơ 'Bok Kei-Dei. Inh kư̆m lui kơ 'Bok Kei-Dei mơ̆n kiơ̆ kơ Tơdrong 'Nao 'Lơ̆ng Sư. Lu bơngai Juđê khan tơdrong 'noh ưh kơ trŏ kơ tơpă ôh. Mă-lei inh lui kơ đĭ-đăng dôm tơdrong chih lăm sơ̆p hla bơar tơdrong juăt Môis hăm lu bơngai pơtruh nơ̆r 'Bok Kei-Dei sơ̆.

¹⁵Inh kư̆m lui kơ 'Bok Kei-Dei gô tơiung arih đĭ-đăng bơngai đơ̆ng lôch ning-mônh, mă lu bơngai 'lơ̆ng mă lu bơngai kơnê̆. Lu bơngai jâu inh âu kư̆m lui thoi noh mơ̆n.

¹⁶Inh ling-lang adrin wă kơ đei jơhngơ̆m 'lơ̆ng 'bơ̆t anăp 'Bok Kei-Dei hăm kon bơngai.

¹⁷“Kơplah 'bar pêng sơnăm inh ưh kơ brŏk tơ Pơlei Jêrusalem. Na ki inh brŏk wă kơ chĕp ba jên đe mơnat ăn kơ lu bơngai Juđê nhôn. Inh kư̆m wă pơyơ̆r ăn kơ 'Bok Kei-Dei tơmam.

¹⁸Inh năm tơ hnam akŭm 'Bok Kei-Dei tơm pơm kiơ̆ tơdrong juăt Môis wă kơ rơgoh hăm wă pơyơ̆r ăn kơ Kră Yang tơmam. Hơtai ei đei lu bơngai Juđê đơ̆ng dêh char Asi 'bôh inh lăm ei. Mă-lei ưh kơ đei bơngai lơ hơdai hăm inh ôh, kư̆m ưh kơ đei tơdrong areh dih băl.

¹⁹Lu bơngai Juđê mă 'bôh inh ei sư khan đei tơdrong wă jâu inh, mă-lei lu sư ưh kơ 'bôh năm 'bơ̆t anăp ih wă jâu inh.

²⁰Dang ei ih ăn lu kră sek tơlang tơ âu đĕch roi kơ ih sư sek tơlang inh ki tơ Pơlei Jêrusalem inh đei tơdrong kơnê̆ kiơ hăm lu sư.

²¹Pôm tơdrong âu inh pơma 'bơ̆t anăp lu kră sek tơlang, inh khan thoi âu: ‘Iĕm sek tơlang tơdrong inh năr âu yua kơ inh lui kơ lu bơngai lôch iung arih ning-mônh.’ Pôm tơdrong âu đĕch inh khan kơ sư na liơ lu sư gơh jâu inh tơdrong noh đĕch?”

²²'Bok kuan tih Phêlik kư̆m băt lơ tơpă gah tơdrong lui kiơ̆ kơ Yêsu. Na năr ei sư kuă kơ sek tơlang dơ̆ng. Sư khan: “'Bok tih linh Lisia truh tơ âu, inh gô sek tơlang mă tôch 'mơ̆i tơdrong lu iĕm âu.”

²³Phêlik athei linh sư gak Pôl, mă-lei ăn kơ Pôl rơhơi 'biơ̆ mơ̆n păng ăn lu bôl buăl sư năm tơdŏng mơnat dôm tơdrong Pôl wă.

²⁴Đunh 'biơ̆ dang 'bar pêng năr đơ̆ng noh 'bok kuan tih Phêlik năm tơ ei dơ̆ng. Akăn sư kư̆m năm hơdai hăm sư mơ̆n. Anăn sư Drusil. Sư bơngai Juđê. Phêlik krao Pôl năm tơ sư. Na bre sư mơ̆ng Pôl bơtho gah tơdrong lui kơ Kră Yang Yêsu Krist.

²⁵Pôl bơtho tơdrong bơ̆n athei pơm 'lơ̆ng tơpăt, bơ̆n athei kơchăng kơdih hli kơ pơm tơdrong kơnê̆, hăm tơdrong 'Bok Kei-Dei gô sek tơlang kơ bơ̆n ning-mônh. 'Bok Phêlik kơtơ̆ng Pôl bơtho thoi noh, sư hli, na sư khan kơ Pôl: “Dang ei asong ih brŏk tơ anih ih; gô layơ dơ̆ng inh đei jơ rơwơn na inh krao ih wă mơ̆ng ih bơtho dơ̆ng.”

²⁶Phêlik kư̆m ngêh kơ Pôl wă ăn kơ sư jên na wă tơlĕch sư, na sư krao Pôl kư̆m lơ 'măng mơ̆n na pơma dơnuh hăm sư.

²⁷Đơ̆ng rŏng kơ noh 'bar sơnăm Phêtus tơplih Phêlik pơm kuan tih. Phêlik wă kơ lu bơngai Juđê lăp đon kơ sư, na sư ưh kơ tơlĕch Pôl đơ̆ng hnam phak.