Read bahnar Jang 26 Bible Online

Jang 26 - bahnar bible

Jang 26

¹Na pơtao Agripa khan kơ Pôl: “Dang ei ăn kơ ih gơh pơma dŏng akâu ih kơdih.” Na Pôl yơ̆r ti pơma hloi dŏng kơdih akâu:

²“Ơ pơtao Agripa, jơhngơ̆m inh chơt hiôk yua kơ năr âu inh gơh pơma dŏng akâu inh kơdih 'bơ̆t anăp ih, dôm tơdrong lu bơngai Juđê jâu inh âu.

³Jơhngơ̆m inh chơt hiôk yua kơ ih băt đĭ lu tơdrong juăt bơngai Juđê hăm lu tơdrong sư pơjah dih băl, na ih gơh sek tơlang tơpăt tơdrong inh. Na inh apinh ih adrin mơ̆ng inh 'biơ̆ hŏ.

⁴“Đĭ-đăng bơngai Juđê băt kơ inh arih thoi yơ mă inh oei 'lơ̆p sơ̆ khơ̆ dang ei, mă tơ dêh char inh, mă tơ Pơlei Jêrusalem.

⁵Lu sư kư̆m băt mơ̆n hăm gơh ră roi kơ ih mơ̆n tơdah lu sư wă, đơ̆ng sơ̆ inh kiơ̆ khŭl đe Pharisi. Lăm lu bơngai Juđê khŭl Pharisi boih adrin tơpă wă kiơ̆ tơdrong juăt bơngai Juđê.

⁶Iĕm sek tơlang tơdrong inh âu dang ei yua kơ inh lui kơ 'Bok Kei-Dei gô tơiung arih lu bơngai lôch kiơ̆ kơ Sư pơkă hăm lu kơdră bơ̆n sơ̆.

⁷Đĭ-đăng mơjĭt-'bar khŭl adrĕch bơngai Juđê bơ̆n chang gô 'Bok Kei-Dei ăn tơdrong Sư pơkă 'noh. Yua kơ thoi noh lu bơ̆n ling-lang oei kơkuh kơ 'Bok Kei-Dei hăm đĭ jơhngơ̆m bơ̆n. Ơ 'bok pơtao, yua kơ inh kư̆m chang gô tơdrong pơkă 'noh mơ̆n, lu bơngai Juđê jâu inh.

⁸Ơ lu bơngai Juđê, yua kơ kiơ lu iĕm ưh kơ tơchĕng lui kơ 'Bok Kei-Dei tơiung arih kon bơngai đơ̆ng lôch?

⁹“Sơ̆ inh kư̆m wă pơrăm tơpă lu bơngai lui kiơ̆ kơ Yêsu, sư bơngai Pơlei Nasaret.

¹⁰Inh kư̆m pơm thoi noh tơpă tơ Pơlei Jêrusalem. Lu 'bok soi tih ăn kơ inh năm rôp tah lê̆ lơ lu bơngai mă lui kơ Yêsu lăm hnam phak. Lăp đe khan wă pơlôch lu sư, inh kư̆m wă mơ̆n.

¹¹Sơ̆ inh kư̆m ling-lang năm jơ̆p tơ lu hnam akŭm chă teh lu sư wă kơ lu sư achăng lê̆ gah tơdrong lui kơ Yêsu. Inh areh tơpă kơ lu sư na inh kư̆m năm tơ pơlei dêh char nai wă pơm kơnê̆ kơ lu sư.

¹²“Thoi noh lu 'bok soi tih ăn kơ inh hla bơar phep chă năm tơ Pơlei Đamas chă pơrăm pơm kơnê̆ kơ lu bơngai lui kơ Yêsu tơ ei.

¹³Ơ 'bok pơtao, hơtai ei lăp truh 'năr dơ̆ng, inh oei năm rok trong inh 'bôh hloi ŭnh pơchrang hơdah đơ̆ng plĕnh, pơchrang tăp dăr kơ inh hăm lu bơngai năm hơdai hăm inh. Ŭnh ei mơnhal hloh kơ măt 'năr.

¹⁴Klaih kơ noh nhôn huŏng hơtat hloi đơ̆ng kơdŭ aseh hăm inh kơtơ̆ng hloi nơ̆r đơ̆ng plĕnh pơma thoi âu, nơ̆r Juđê: ‘Ơ Sôl, Inh pơm kiơ kơ ih, na ih pơm kơnê̆ kơ Inh? Ih pơm kơnê̆ kơ Inh na ih đei tơdrong pơrăm kơdih akâu thoi lĕ kơ rơmo ưh kơ chu, na sư kơtong 'bơm 'long sơnguĕt suĕng tơ'ngla sư puh sư.’

¹⁵Inh apinh Sư: ‘Ơ 'Bok, anăn Ih bu?’ Na Kră Yang Yêsu khan: ‘Inh Yêsu mă ih areh kơ Inh.

¹⁶Ih iung wăi. Inh năm tơ ih wă kơ ih jang tơdrong Inh. Ih athei roi kơ đe tơdrong ih 'bôh Inh năr âu boih. Ih gô 'bôh Inh dơ̆ng hăm kư̆m roi tơdrong ih 'bôh Inh hăm dôm tơdrong Inh tơbăt ăn kơ ih.

¹⁷Inh wơh ih năm bơtho lu bơngai tơmoi mă ưh kơ trŏ bơngai Juđê. Hăm Inh gô wei-lăng ih wă kơ lu bơngai Juđê hăm lu bơngai tơmoi ưh kơ pơrăm lê̆ ih.

¹⁸Inh gô wơh ih wă kơ pơlar măt lu bơngai tơmoi wă kơ lu sư gơh 'bôh Tơdrong 'Nao 'Lơ̆ng, wă kơ lu sư gơh jăk đơ̆ng măng mu, na oei lăm hơdah, wă kơ sư jăk đơ̆ng yang Satan, na năm tơ 'Bok Kei-Dei. 'Bok Kei-Dei gô pơklaih lu sư đơ̆ng dôm tơdrong yoch hăm jô̆ lu sư jing bơngai 'lơ̆ng tơpăt thoi đĭ-đăng lu bơngai lui kơ Inh.’

¹⁹“Ơ pơtao Agripa, inh pơm kiơ̆ kơ Kră Yang Yêsu athei inh ei.

²⁰Thoi noh na inh bơtho đe tơ Pơlei Đamas hơdrol, klaih kơ noh inh năm bơtho tơ Pơlei Jêrusalem, hăm inh năm bơtho jơ̆p-jang dêh char Juđê păng lu dêh char tơmoi. Inh bơtho athei lu sư tơbral kơdih đơ̆ng tơdrong yoch hăm lui kơ 'Bok Kei-Dei, na pơm kiơ̆ tơdrong 'lơ̆ng wă kơ đe băt kơ lu sư tơbral kơdih tơpă.

²¹Kơlih kơ inh pơm thoi noh, na lu bơngai Juđê rôp inh lăm hnam akŭm 'Bok Kei-Dei tơm, na wă pơlôch inh ră.

²²Mă-lei đơ̆ng sơ̆ khơ̆ dang ei 'Bok Kei-Dei wei-lăng hăm tơgŭm inh, na dang ei inh dơ̆ng 'bơ̆t âu bơtho tơdrong Yêsu. Inh bơtho kơ đĭ-đăng, mă lu bơngai pơm tih, mă lu bơngai iĕ, lei-lăi đĕch. Tơdrong inh bơtho kư̆m lei-lăi thoi Môis hăm thoi lu bơngai pơtruh nơ̆r 'Bok Kei-Dei khan lê̆ hơdrol sơ̆.

²³Đơ̆ng sơ̆ sư bơtho khan 'Bok Krist khŏm đei tơdrong pơmat na lôch, klaih kơ noh iung arih đơ̆ng lôch hơdrol kơ lu bơ̆n. Na 'Bok Krist bơtho khan kơ lu bơngai Juđê hăm lu bơngai nai khan, dah lui kơ Sư na lu sư gơh klaih đơ̆ng tơdrong yoch.”

²⁴Pôl pơma dŏng kơdih akâu truh 'bơ̆t âu boih na Phêtus pơma re kơ sư hloi: “Ơ Pôl, ih wơnh tơpă âu. Yua kơ ih hŏk lơ na ih wơnh.”

²⁵Pôl khan kơ sư: “Ơ Phêtus, inh ưh kơ wơnh ôh. Inh pơma ưh kơ sĭ thoi bơngai suai sik ôh, inh pơma tơpăt thoi bơngai hơdrăl.

²⁶Inh pơma kơ pơtao Agripa ưh kơ đei anat ôh yua kơ sư băt gah tơdrong inh pơma hei. Sư 'bôh păng kơtơ̆ng lu tơdrong noh tơpă yua kơ đe kơtơ̆ng ang lu tơdrong 'noh jơ̆p-jang boih.

²⁷Ơ 'bok Agripa, ih lui kơ tơdrong lu bơngai pơtruh nơ̆r 'Bok Kei-Dei khan lê̆ adrol sơ̆, inh băt kơ ih lui tơpă.”

²⁸Agripa khan kơ Pôl: “Ih bơtho thoi noh ih ngêh kơ inh wă lui kơ Yêsu Krist dang ei hloi hă?”

²⁹Pôl khan: “Tơdah ih lui kơ Yêsu Krist hloi dang ei, dah ning-mônh dơ̆ng, kư̆m bưh. Mă-lei inh krao khan kơ 'Bok Kei-Dei apinh Sư tơgŭm ih, ơ 'bok pơtao păng đĭ-đăng iĕm mă mơ̆ng inh bơtho năr âu, wă kơ iĕm jing bơngai lui kơ Yêsu kư̆m lei-lăi thoi inh mơ̆n. Mă-lei inh ưh kơ wă đe chô̆ iĕm hăm tơlei glang mam thoi lĕ kơ đe chô̆ inh âu ôh.”

³⁰Đang kơ Pôl pơma thoi noh na pơtao Agripa, yă Bêrênis, hăm 'bok kuan tih Phêtus păng đĭ-đăng lu bơngai lăm ei iung na lĕch hloi đơ̆ng hnam ei. Lu sư pơma tơkhan dih băl: “Bơngai âu ưh kơ đei pơm tơdrong kiơ mă wă pơlôch sư dah tah sư lăm hnam phak ôh iih?”

³²Agripa khan kơ Phêtus: “Bơngai âu hơtai ki dah sư ưh kơ đei apinh wă năm tơ 'bok pơtao tơm Rôm lei ih gơh tơlĕch sư đơ̆ng hnam phak dang ei.”