Read bahnar Jang 27 Bible Online

Jang 27 - bahnar bible

Jang 27

¹Lu 'bok tih khan wă athei Pôl năm tơ dêh char Itali wă năm tơ 'bok pơtao tơm Rôm. Inh Luka kư̆m wă năm kiơ̆ hơdai hăm Pôl mơ̆n. Na lu 'bok tih jao Pôl hăm lu bơngai bơnă nai ăn kơ minh 'nu bơngai anăn sư Julus. Sư 'bok yŏng linh lăm khŭl linh đe anăn khŭl Ôgut mă-lei sư wei lăp minh grŭp đĕch.

²Nhôn tŏk minh pôm thŏng-nan, thŏng-nan ei đơ̆ng Pơlei Adramit ki na wă năm tơ lu pơlei dêh char Asi. Aritak sư bơngai đơ̆ng Pơlei Têsalônik, dêh char Masêđôn kư̆m năm hăm nhôn mơ̆n. Na thŏng-nan nhôn ei năm đơ̆ng Pơlei Sêsarê.

³Na năr dơning nhôn truh tơ Pơlei Siđôn. 'Bok yŏng linh, anăn sư Julus, mơnat kơ Pôl, na ăn kơ sư jur đơ̆ng thŏng-nan năm ngôi tơ lu buăl sư tơ pơlei ei. Julus kư̆m ăn kơ buăl Pôl tơgŭm Pôl lu tơdrong sư wă kăl.

⁴Đơ̆ng noh nhôn năm dơ̆ng. Yua kơ kial dơhlu hơdrơ̆k, na nhôn năm gah 'ma bŏl đak Chiprơ. Kiơ̆ ei ưh kơ gan đei kial dơhlu thoi hei dơ̆ng ôh.

⁵Đơ̆ng 'noh dơ̆ng nhôn năm găn hloi đak dơsĭ brih kơ dêh char Salisia hăm dêh char Pamphili, na truh tơ Pơlei Mira tơ lăm dêh char Lisi.

⁶Lăp truh tơ ei boih, 'bok yŏng linh chă đei minh pôm thŏng-nan nai đơ̆ng Pơlei Aleksandrê wă năm tơ dêh char Itali. Na sư athei lu nhôn tŏk thŏng-nan ei.

⁷Đei kial dơhlu hơdrơ̆k, na kơplah 'bar pêng năr nhôn năm adar adar đĕch. Nhôn năm anat tơpă, na truh tơ Pơlei Kơnat. Nhôn ưh kơ gơh năm tơpăt yua kơ kial dơhlu hơdrơ̆k, na nhôn weh gah 'ngiĕo năm brih gah anih kueng kơdrô̆ đe anăn Sôlêmon tơ bŏl đak đe anăn bŏl đak Kret. Nhôn oei năm gah 'ngiĕo kơ bŏl đak Kret, kiơ̆ ei kial dơhlu dă 'biơ̆.

⁸Nhôn năm jê̆ tơ kông ei kư̆m oei đei kial mơ̆n, nhôn wơ̆r anat tơpă, na nhôn truh tơ anih đe anăn anih thŏng-nan gơh dơ̆ng minh 'bôt. Anih ei jê̆ Pơlei Lasê.

⁹Nhôn oei tơ ei kư̆m đunh 'biơ̆ mơ̆n. Năr giĕng đe Juđê đang boih, na kơplah 'noh thŏng-nan năm kơpal đak dơsĭ hơmơt dêh yua kơ kial hơbŭt. Na Pôl khan kơ lu đe ei thoi âu:

¹⁰“Ơ bre, bơ̆n năm đơ̆ng âu dơ̆ng hơmơt dêh hli kơ thŏng-nan hăm lu tơmam lăm thŏng-nan âu gô hiong, bơ̆n gô lôch mơ̆n.”

¹¹Mă-lei 'bok yŏng linh sư ưh kơ chu kơ Pôl pơma ôh, sư chu pôm bơngai wơ̆r thŏng-nan hăm tơ'ngla thŏng-nan ei đĕch.

¹²Nhôn oei tơ anih ei kư̆m ưh kơ 'lơ̆ng ôh yua kơ kial dơhlu hơbŭt tih ei lăm bơyan 'mi, na lu bơngai hao thŏng-nan ei wă năm tơ đak dơsĭ dơ̆ng, wă năm truh tơ Pơlei Phênik. Pơlei Phênik kư̆m tơ bŏl đak ei mơ̆n na tơ ei kial đơ̆ng hơlĕch hăm đơ̆ng gah yă-nơ̆m dơhlu dă 'biơ̆. Lu sư wă oei tơ ei lăp oei hơtai bơyan 'mi.

¹³Klaih kơ noh kial dơhlu dă 'biơ̆ đơ̆ng gah gơal, na lu bơngai oei lăm thŏng-nan ei dui atŏk mam pơkơ̆ng thŏng-nan tơ kơpal boih na gơh năm. Nhôn năm jê̆ jih bŏl đak Kret.

¹⁴Mă-lei nhôn năm ưh kơ đunh đei hloi kial hơbŭt dơhlu đơ̆ng bŏl đak, đơ̆ng gah hơlĕch.

¹⁵Kial ei dơhlu anhăk thŏng-nan, nhôn ưh kơ gơh wơ̆r thŏng-nan yua kơ kial dơhlu hơdrơ̆k. Thoi noh na lu nhôn gô mơ̆ng kơ kial dơhlu anhăk thŏng-nan nhôn đĕch.

¹⁶Nhôn brih gah gơal bŏl đak đe anăn bŏl đak Kaođa, na kial dă 'biơ̆. Đơ̆ng ki nhôn dui minh pôm plŭng đơ̆ng rŏng kơ thŏng-nan, na nhôn adrin tơpă wă atŏk plŭng ei tơ kơpal thŏng-nan.

¹⁷Nhôn atŏk plŭng kơpal thŏng-nan boih, na chô̆ thŏng-nan hăm tơlei lơ dăr gah 'ngoaih kơ thŏng-nan, yua kơ nhôn hli kơ thŏng-nan pơchah. Lu sư hli kơ thŏng-nan năm khŏm khŏm na 'bơm hloi bŏl chuơh tơ jih đak dơsĭ lăm dêh char Libi. Na lu sư yaih tơjur lê̆ che đơ̆ng thŏng-nan, na kial dơhlu kơdrô̆ thŏng-nan đĕch.

¹⁸Năr dơning dơ̆ng kial oei hơbŭt khŏm khŏm thoi brei na lu sư iŏk tơmam chơ đơ̆ng thŏng-nan tŭk lê̆ lăm đak dơsĭ.

¹⁹Năr dơmônh dơ̆ng lu sư yaih tŭk lê̆ lu tơmam yua lăm thŏng-nan hăm ti sư kơdih.

²⁰Đunh năr tơpă nhôn ưh kơ gơh 'bôh măt 'năr păng ưh kơ 'bôh sơnglŏng. Kial oei dơhlu hơbŭt khŏm khŏm, lu nhôn pă ngêh kơ arih boih.

²¹Lu bơngai lăm thŏng-nan ei ơ̆t kơ sŏng sa đunh boih, na Pôl dơ̆ng 'bơ̆t anăp lu sư hăm khan: “Ơ bre, dah iĕm chu nơ̆r inh khan kơ bơ̆n ki na bơ̆n 'nĕ kơ năm đơ̆ng bŏl đak Kret ki, lei bơ̆n huay kơ hiong đĭ tơmam bơ̆n.

²²Mă-lei dang ei inh apinh iĕm 'nĕ pă hli. Đĭ-đăng kơ bơ̆n ưh kơ đei bu lôch ôh, kơdrô̆ thŏng-nan đĕch gô hiong răm.

²³Inh lui kơkuh kơ Kră Yang 'Bok Kei-Dei, Sư kư̆m wei-lăng inh mơ̆n. Măng hei linh jang 'lơ̆ng đơ̆ng 'Bok Kei-Dei năm tơ inh păng khan: ‘Ơ Pôl, ih 'nĕ pă hli. Ning-mônh ih gô dơ̆ng 'bơ̆t anăp pơtao tơm bơngai Rôm tơpă. 'Bok Kei-Dei kư̆m mơnat kơ đĭ-đăng lu bơngai năm hơdai hăm ih mơ̆n na lu sư kư̆m huay kơ lôch.’

²⁴

²⁵Na iĕm 'nĕ pă hli yua kơ inh lui kơ 'Bok Kei-Dei gô pơm kiơ̆ kơ linh jang 'lơ̆ng khan.

²⁶Mă-lei kial dơhlu thŏng-nan bơ̆n, thŏng-nan bơ̆n gô hơtŭt 'bơm bŏl đak.”

²⁷Kial oei dơhlu thŏng-nan nhôn tơ đak dơsĭ khŏm khŏm truh mơjĭt-puăn năr. Đe anăn đak dơsĭ ei Adria. Dang mơjĭt-'bar jơ kơmăng 'nei, lu bơngai wei thŏng-nan băt kơ nhôn năm wă jê̆ truh tơ jih đak boih.

²⁸Na lu sư tơjur tơlei pơtŏ wă băt kơ đak jrŭ dang yơ. Lu sư pơtŏ đak truh tơ 'bar-jĭt plaih. Pă 'biơ̆ dơ̆ng sư pơtŏ jrŭ oei mơjĭt-pơđăm plaih.

²⁹Lu sư hli kơ thŏng-nan hơtŭt 'bơm tơmo tih na lu sư tơjur lăm đak puăn tŏ mam trăp yua wă pơkơ̆ng gah rŏng thŏng-nan. Hăm lu sư chang 'năr dah lĕch đĕch boih, yua kơ lu sư hli kơ thŏng-nan ei kơtĕch.

³⁰Lu bơngai wei thŏng-nan ei wă chă tơdrong gơh klĕnh đơ̆ng thŏng-nan. Lu sư tơjur plŭng tơ đak khan wă tơjur mam gah anăp thŏng-nan, mă-lei lu sư wă kơdâu klĕnh đĕch.

³¹Na Pôl khan kơ 'bok yŏng linh hăm lu linh sư: “Tơdah lu tơ'ngla wei thŏng-nan jăk, bơ̆n gô lôch đĭ-đăng.”

³²Na lu bơngai linh kăt tơlei đơ̆ng chô̆ plŭng ei, achăng plŭng tơ đak.

³³Wă jê̆ 'năr lĕch boih na Pôl apinh đĭ lu sư sŏng sa. Pôl khan: “Bơ̆n nŏng kơ chang gô kial dơhlu dă 'biơ̆ ơ̆t kơ sŏng sa mơjĭt-puăn năr boih.

³⁴Na dang ei inh wă kơ bơ̆n sŏng sa wă kơ bơ̆n pran huay kơ rơmơ̆n. Iĕm 'nĕ pă mah hli dêh hŏ, inh băt ưh kơ đei bu jĭ kiơ ôh.”

³⁵Hlôi kơ pơma thoi noh, Pôl iŏk 'bĕng mi, krao khan bơnê kơ 'Bok Kei-Dei 'bơ̆t anăp đĭ-đăng lu sư, na phĕ hloi 'bĕng mi ei sa.

³⁶Na lu sư ưh pă gan mah hli dêh boih. Đĭ-đăng kơ lu sư kư̆m sŏng sa mơ̆n.

³⁷Đĭ-đăng lu nhôn oei kơpal thŏng-nan ei đei 'bar-hrĕng tơpơh-jĭt tơdrâu 'nu bơngai.

³⁸Lu nhôn sŏng sa phĭ mah boih, na nhôn tŭk lê̆ pơđĭ phe lăm đak dơsĭ wă kơ thŏng-nan huay kơ trăp.

³⁹'Năr lĕch boih na nhôn 'bôh bŏl đak noh mă-lei lu bơngai wei thŏng-nan ei, lu sư ưh kơ băt dêh char đe bu ei. Na sư tơmang 'bôh sơlam kông ei đei pơlao chuơh, na lu sư wă wơ̆r thŏng-nan mơ̆t sơlam chuơh ei.

⁴⁰Na lu sư kăt tơlei đêl chô̆ mam pơkơ̆ng, na tơhuŏng tŭk lê̆ lăm đak. Lu sư yaih tơlei chô̆ 'long wơ̆r na đơ̆ng noh lu sư atŏk che chô̆ 'bơ̆t anăp thŏng-nan, wă kơ kial dơhlu năm tơ anăp.

⁴¹Na thŏng-nan năm 'blep hloi sơlam bŏl đak, mă-lei đei bŏl iĕ ala kơ đak, na kơtơh thŏng-nan hơtŭt 'bơm bŏl iĕ. Thŏng-nan ưh pă gơh năm dơ̆ng. Na đak dơsĭ ei poh-yă tih tơpă, đak tơglăk gah rŏng thŏng-nan pơchah hloi.

⁴²Lu linh sư tơchĕng wă pơlôch đĭ lu bơngai bơnă, yua kơ lu sư hli kơ mơ'nah gơh glơi đak na kơdâu jăk tơ nai.

⁴³Mă-lei 'bok yŏng linh ưh kơeng wă pơlôch Pôl, na păng ưh kơ ăn pơlôch đĭ-đăng bơngai phak. Mă hơdrol sư athei lu bơngai gơh glơi kơtah tơ đak glơi tŏk tơ kông.

⁴⁴Đơ̆ng rŏng kơ noh sư athei lu bơngai mă ưh kơ gơh glơi đak iŏk tơ̆r dah đơ̆ng tơmam thŏng-nan pơchah, na sư gơh tŏk. Thoi noh đĭ-đăng kơ nhôn tŏk tơ kông huay kơ đei tơdrong răm kiơ ôh.