Read bahnar Jang 28 Bible Online

Jang 28 - bahnar bible

Jang 28

¹Lăp nhôn tŏk đơ̆ng đak tơ kông boih nhôn kơtơ̆ng đe khan bŏl đak âu đe anăn bŏl đak Malitơ.

²Lu bơngai nai oei tơ bŏl đak ei mơnat kơ nhôn na tơgŭm nhôn, yua kơ tơ ei bơyan 'mi păng tơngiĕt. Na lu bơngai ei rŭk ŭnh, na pơtơm nhôn nhur ŭnh sư ei.

³Pôl năm chă 'long ŭnh, na sư pơgơ̆p thim dơ̆ng 'long ŭnh, na đei hloi 'bih lĕch đơ̆ng ei yua kơ 'bih tơnŏ đơ̆ng ŭnh, na kăp pơđom hloi ti Pôl.

⁴Lu bơngai nai oei tơ bŏl đak ei 'bôh 'bih kăp pơđom ti Pôl, na lu sư pơma dih băl: “Rŏ lăng bơngai âu chă pơlôch đe rŏ lăng; mă-lei sư huay kơ lôch tơ đak dơsĭ iih, na dang ei yang Đêke kuă kơ lăng sư yua kơ sư pơm kơnê̆ kơ đe dêh, na sư wă lôch kơ 'bih choh.”

⁵Na Pôl tơtreh 'bih ei tơ ŭnh. Mă-lei Pôl huay kơ jĭ ôh.

⁶Lu sư oei lăng Pôl ngeh kơ ti Pôl wă pơ'ngeh, dah sư wă lôch hloi. Lu sư lăng khŏm khŏm 'bôh sư oei 'lơ̆ng thoi đêl, na lu sư khan dih băl dơ̆ng: “Sư âu yang tơpă iih, 'bih choh sư khan ưh kơ lôch.”

⁷Jê̆ 'bơ̆t ei đei mir Publiu, bơngai pơgơ̆r bŏl đak ei. Sư pơtơm nhôn mơ̆t tơ hnam sư, na nhôn oei păng sư pêng năr.

⁸'Bă Publiu ei oei păn kơ bơlŏ păng chroh hăk. Pôl mơ̆t tơ lăm anih sư păng krao khan kơ Kră Yang 'Bok Kei-Dei, na pel akâu sư păng pơklaih jĭ sư ei.

⁹Lu bơngai nai oei tơ bŏl đak ei kơtơ̆ng thoi noh, đĭ-đăng lu bơngai jĭ jăn năm tơ Pôl na Pôl kư̆m pơklaih lu sư mơ̆n.

¹⁰Lu sư ăn kơ nhôn tơmam kư̆m lơ mơ̆n. Hơtai nhôn wă yak tŏk tơ thŏng-nan yak đơ̆ng ei dơ̆ng lu sư ăn kơ nhôn đĭ tơmam nhôn kăl wă yak.

¹¹Nhôn oei tơ bŏl đak ei đei pêng khei boih na đĭ kơ bơyan 'mi păng tơngiĕt. Na nhôn chă thŏng-nan plơ̆ng. Thŏng-nan ei đe anăn Điôtkur. Thŏng-nan âu đơ̆ng Pơlei Aleksandrê, mă-lei oei tơ bŏl đak ei đĭ kơ bơyan 'mi.

¹²Na nhôn tŏk thŏng-nan năm truh tơ Pơlei Sirakus, oei tơ ei pêng năr.

¹³Đơ̆ng noh nhôn tŏk thŏng-nan năm truh tơ Pơlei Rêgiơ. Năr dơning dơ̆ng đei kial thu đơ̆ng gơal na nhôn yak truh tơ Pơlei Pusôl lăp 'bar năr đĕch.

¹⁴Na nhôn tơ'bơ̆p bơngai lui kơ Yêsu tơ ei păng lu sư pơtơm nhôn oei păng lu sư minh 'măng giĕng. Đơ̆ng noh nhôn năm jơ̆ng hoh wă năm tơ Pơlei Rôm.

¹⁵Lu 'nhŏng oh lui kơ Yêsu oei tơ Pơlei Rôm kơtơ̆ng ang nhôn wă năm tơ pơlei sư, na lu sư năm truh tơ Pơlei Appi păng Pơlei Tre Taberna, na lu sư sơng iŏk nhôn. Lăp Pôl tơ'bơ̆p lu sư, na Pôl khan bơnê kơ 'Bok Kei-Dei păng sư 'nă hal yua kơ sư 'bôh bôl sư.

¹⁶Nhôn truh tơ Pơlei Rôm, na đe ăn kơ Pôl oei hnam kơdrô̆, đei minh 'nu bơngai linh kiơ̆ wei-lăng sư.

¹⁷Nhôn oei tơ ei đei pêng năr boih na Pôl krao akŭm lu kră bơngai Juđê. Lăp sư akŭm boih Pôl khan kơ lu sư: “Ơ lu 'nhŏng oh, inh ưh kơ đei pơm kơnê̆ kơ lu bơngai Juđê bơ̆n dah tơdrong juăt lu kră bơ̆n sơ̆. Mă-lei lu bơngai Juđê đơ̆ng nai rôp inh tơ Pơlei Jêrusalem păng jao inh tơ lu bơngai Rôm.

¹⁸Lu bơngai Rôm sek tơlang tơdrong inh khan ưh kơ đei tơdrong kiơ ôh. Na lu sư ưh kơ gơh pơlôch inh. Na lu sư wă tơlĕch inh đĕch.

¹⁹Mă-lei lu bơngai Juđê ưh kơ chu kơ lu bơngai Rôm wă tơlĕch inh ôh. Na inh athei apinh 'bok kuan tih Phêtus ăn kơ 'bok pơtao tơm bơngai Rôm sek tơlang tơdrong inh. Mă-lei gah inh, ưh kơ đei jâu lu bơngai Juđê tơdrong kiơ ôh.

²⁰Kơlih yua kơ thoi noh inh apinh iĕm năm tơ âu wă kơ inh gơh tơ'bơ̆p iĕm păng pơma dơnuh păng iĕm. Âu iĕm lăng deh ti inh đe oei chô̆ păng tơlei glang mam yua kơ inh lui kơ 'Bok Dŏng Pơklaih bơ̆n. Đĭ lu bơngai Juđê kư̆m chang gô Sư mơ̆n.”

²¹Lu bơngai Juđê khan kơ Pôl: “Nhôn ưh kơ đei 'bôh hla kơthơ đơ̆ng dêh char Juđê roi gah tơdrong ih ôh. Lăm lu 'nhŏng oh nhôn đơ̆ng dêh char Juđê ưh kơ đei bơngai bu năm tơ âu roi tơdrong ih, khan ih pơm tơdrong kơnê̆.

²²Mă nhôn wă mơ̆ng tơdrong ih bơtho yua kơ lơ bơngai jơ̆p kơ teh đak khan khŭl iĕm kiơ̆ Yêsu ưh kơ 'lơ̆ng.”

²³Na Pôl hăm lu sư pơkă năr wă akŭm dơ̆ng. Truh năr ei boih lu sư lơ tơpă năm akŭm tơ hnam Pôl. Đơ̆ng pơgê truh kơsơ̆ Pôl bơtho lu sư gah tơdrong 'Bok Kei-Dei wă pơgơ̆r bơ̆n thoi yơ. Sư đŏk lăng đơ̆ng sơ̆p hla bơar tơdrong juăt Môis păng sơ̆p hla bơar lu bơngai pơtruh nơ̆r 'Bok Kei-Dei wă tơbăt kơ lu sư Yêsu boih 'Bok Dŏng Pơklaih tơpă.

²⁴Đei lu mơ'nah lui kơ nơ̆r Pôl bơtho, lu mơ'nah dơ̆ng ưh kơ lui.

²⁵Na lu sư wă tơklah dih băl brŏk tơ hnam kơdih, lu sư oei pơjah dih băl gah tơdrong Pôl bơtho. Hơdrol kơ lu sư wă brŏk, Pôl khan kơ lu sư thoi âu: “Yang Bơhngol 'Lơ̆ng ăn kơ bơngai pơtruh nơ̆r 'Bok Kei-Dei sơ̆, anăn sư Êsai, khan kơ lu 'bok kơdră bơ̆n sơ̆, na 'blep kơ iĕm ưh kơ lui dang ei.

²⁶Êsai khan thoi âu: ‘'Bok Kei-Dei khan kơ inh: Ih năm bơtho lu bơngai âu khan: Iĕm mơ̆ng inh bơtho khŏm khŏm ră, mă-lei iĕm ưh kơ hlôh; măt iĕm lăng khŏm khŏm ră mă ưh kơ 'bôh tơdrong kiơ.

²⁷Ih năm bơtho lu sư thoi noh yua kơ đon lu sư jing kơtul dêh; mă-lei lu sư oei wă pơchĭt đon sư kơdih khŏm khŏm 'mơ̆i, păng măt lu sư wă kơ tep ling-lang. Dah lu sư 'nĕ kơ pơm đon thoi noh, lei măt lu sư gơh 'bôh, đon lu sư kơtơ̆ng nhên, lu sư gơh tơchĕng kơdih băt wih tơ Inh 'Bok Kei-Dei, na Inh gô pơklaih đĭ dôm tơdrong yoch sư.’ ”

²⁸Pôl roi dơ̆ng thoi âu: “Na inh wă kơ iĕm băt kơ 'Bok Kei-Dei wă pơklaih lu bơngai tơmoi mă ưh kơ khŭl bơ̆n đơ̆ng tơdrong yoch mơ̆n. Lu sư gô lui kơ nơ̆r inh bơtho gah tơdrong Yêsu.”

²⁹Pôl pơma thoi noh boih na lu bơngai Juđê ei brŏk tơ hnam sư kơdih oei pơjah pơjăng dih băl gah tơdrong Pôl bơtho.

³⁰Pôl oei 'bar sơnăm tơ Pơlei Rôm lăm hnam sư mơng đơ̆ng đe. Pôl đih sơng dôm lu bơngai wă năm hơpong tơ sư.

³¹Pôl bơtho lu sư gah tơdrong 'Bok Kei-Dei wă pơgơ̆r bơ̆n păng tơdrong Kră Yang Yêsu Krist. Sư bơtho đe kư̆m nuih tơpă păng ưh kơ đei bu khă sư.