Read bahnar Jang 3 Bible Online

Jang 3 - bahnar bible

Jang 3

¹Pêtrôs păng Yôhan năm tơ hnam akŭm 'Bok Kei-Dei tơm. Sư pơtơm dih băl đơ̆ng pêng jơ kơsơ̆ wă akŭm krao khan păng đe.

²Đei minh 'nu bơngai hơwen hơwo đơ̆ng nge, đơ̆ng mĕ sư tơpŭ. Rim năr đei bơngai năm tung ba sư tơ hnam akŭm 'Bok Kei-Dei tơm tơoei sư 'bơ̆t 'măng tơm. 'Măng tơm ei đe anăn 'Măng Tơm 'Lơ̆ng Rŏ. Na bơngai hơwen hơwo ei apinh jên lu bơngai năm akŭm.

³Lăp sư 'bôh bre Pêtrôs păng Yôhan wă mơ̆t akŭm, sư apinh jên bre sư.

⁴Bre Pêtrôs lăng sư pơnhên. Đơ̆ng noh Pêtrôs khan: “Bơngai hơwen hơwo, ih lăng nhi.”

⁵Na sư lăng bre sư. Sư ngêh kơ bre Pêtrôs wă ăn kơ sư jên.

⁶Mă-lei Pêtrôs khan kơ sư: “Inh ưh kơ đei jên ôh, mă-lei inh tơgŭm ih. Yua anăn Yêsu Krist Pơlei Nasaret, yak bĕ.”

⁷Đơ̆ng noh Pêtrôs rôp ti sư gah 'ma tơiung sư. Jơ̆ng sư jing pran hloi.

⁸Sư iung 'ngrơh gơh yak. Sư hơdai wang mơ̆t tơ hnam akŭm 'Bok Kei-Dei hơdai bre Pêtrôs păng Yôhan mơ̆n. Sư yak 'lơ̆ng, jơhngơ̆m sư hiôk păng sư bơnê kơ 'Bok Kei-Dei pơklaih sư.

⁹Đĭ-đăng bơngai lăm hnam akŭm ei 'bôh sư gơh yak păng bơnê kơ 'Bok Kei-Dei.

¹⁰Đe kơnăl kơ sư đêl hmă oei 'bơ̆t 'măng tơm apinh jên. Na đe lăm hnam ei sơleng kơ đon yua kơ sư gơh yak boih.

¹¹Bơngai hơwen hơwo ei rôp ti bre Pêtrôs păng Yôhan. Lu sư oei 'bơ̆t pra hnam akŭm 'Bok Kei-Dei tơm, anăn Pra Sôlômôn. Na đĭ-đăng bơngai tơ ei sơleng kơ đon năm tơ lu sư.

¹²Pêtrôs 'bôh lu sư năm na khan kơ lu sư: “Ơ khŭl Isơrael, iĕm ưh pơwao kiơ kơ đon, na iĕm lăng 'bloh kơ nhi tơdrong nhi pơklaih bơngai hơwen hơwo âu khan tơdrong mơsêh nhi pơm kơdih yua kơ nhi bơngai 'lơ̆ng? Ưh ôh.

¹³'Nâu dơ̆ng, lu kơdră bơ̆n sơ̆ thoi đe Abraham, Isăk, Jakôp, sư lui kơ 'Bok Kei-Dei. Na dang ei 'Bok Kei-Dei pôk atŏk Kon Sư Yêsu pơm tih. Ki iĕm jao Yêsu tơ Pilat wă sek tơlang Yêsu bơngai 'lơ̆ng tơpăt, na Pilat wă achăng Sư ră, mă-lei lu iĕm ưh kơ wă kơ Yêsu ôh. Lu iĕm khan wă pơ̆ng pơlôch Sư tơ 'long pơglang đĕch. Iĕm apinh Pilat tơlĕch ăn kơ iĕm bơngai juăt kơ pơlôch đe,

¹⁵iĕm pơlôch Yêsu bơngai mă gơh ăn kơ bơ̆n arih ling-lang. Mă-lei 'Bok Kei-Dei tơiung arih Sư boih. Nhôn kư̆m 'bôh Sư arih boih tơpă.

¹⁶Yua kơ Yêsu, bơngai âu jing pran dơ̆ng. Iĕm băt boih kơ bơngai hơwen hơwo âu đơ̆ng sơ̆. Yua kơ nhôn gơnang kơ Yêsu tơpă na bơngai hơwen hơwo âu gơh klaih. Dang ei iĕm 'bôh sư klaih boih.

¹⁷“Ơ đe 'nhŏng oh, iĕm ưh kơ băt kơ Sư na iĕm pơlôch Sư Kon 'Bok Kei-Dei, lu 'bok tih iĕm kư̆m hơdai ưh kơ băt mơ̆n.

¹⁸Mă-lei tơdrong noh trŏ kơ 'Bok Kei-Dei pơkă sơ̆. 'Bok Kei-Dei yua đĭ-đăng lu bơngai khan lê̆ hơdrol sơ̆ pơkă 'Bok Krist gô lôch pơmat.

¹⁹Dang ei iĕm athei tơbral, wih tơ 'Bok Kei-Dei dơ̆ng, na 'Bok Kei-Dei gô pơklaih yoch iĕm păng ăn kơ iĕm hiôk chơt;

²⁰Sư gô wơh Yêsu Krist 'Bok Dŏng Pơklaih mă Sư rơih boih jur wă pơgơ̆r bơ̆n.

²¹Dang ei Yêsu oei tơ plĕnh truh tơ năr tôch kơnh. Sư wă jur tơ teh dơ̆ng na Sư gô pơm ming tôm tơdrong 'nao 'lơ̆ng dơ̆ng, kư̆m thoi 'Bok Kei-Dei ăn lu bơngai khan lê̆ hơdrol sơ̆.

²²Thoi Môis khan sơ̆: ‘'Bok Kei-Dei gô ăn kơ iĕm minh 'nu bơngai đơ̆ng khŭl bơ̆n wă pơtruh nơ̆r Sư kư̆m thoi inh mơ̆n. Iĕm athei chu mơ̆ng dôm nơ̆r Sư pơma kơ iĕm.

²³Bơngai bu ưh kơ chu yom Sư, iĕm athei pơlôch tŭk sư.’

²⁴Đĭ-đăng bơngai pơtruh nơ̆r 'Bok Kei-Dei sơ̆ jô̆ đơ̆ng 'bok Samuel kư̆m khan lê̆ hơdrol gah tơdrong Yêsu mă bơ̆n 'bôh dang ei.

²⁵“Bơ̆n boih kon sâu lu bơngai khan lê̆ hơdrol noh. 'Bok Kei-Dei pơkă ăn kơ lu 'bok kơdră bơ̆n sơ̆, Sư kư̆m pơkă ăn kơ bơ̆n lei-lăi mơ̆n. Sư khan kơ Abraham: ‘Yua kơ đei minh 'nu Kon Sâu ih na đĭ-đăng khŭl bơngai ala teh gô hiôk.’

²⁶'Bok Kei-Dei wơh Kon Sư năm tơ bơ̆n đe khŭl Isơrael hơdrol 'mơ̆i wă pơklaih đĭ-đăng kơ bơ̆n đơ̆ng tơdrong yoch ăn kơ bơ̆n hiôk ling-lang.”