Read bahnar Jang 5 Bible Online

Jang 5 - bahnar bible

Jang 5

¹Đei minh 'nu bơngai nai dơ̆ng, anăn sư Anania, akăn sư Sepir; bre sư tĕch mir đei jên na klo sư iŏk lê̆ minh pah, minh pah klo sư ăn kơ lu jơ̆ng 'bang Yêsu. Akăn sư kư̆m băt mơ̆n klo sư 'măn lê̆ minh pah ei.

³Mă-lei Pêtrôs khan: “Ơ Anania, lơliơ yang Satan pơhlŭ ih na ih hơlĕnh kơ Yang Bơhngol 'Lơ̆ng? Ih iŏk 'măn lê̆ jên mir ih minh pah mă-lei nơ̆r ih khan ăn đĭ hloi. Mă-lei nhôn ưh kơ đei pơgŏ ih ôh yua kơ mir noh mir ih kơdih, jên noh kư̆m lei-lăi mơ̆n. Kơlih kơ kiơ ih pơm tơdrong kơnê̆ thoi noh? Mă noh kơ sĭ ih hơlĕnh kơ bơngai ôh, ih hơlĕnh kơ 'Bok Kei-Dei đĕch mă tơpă 'noh.”

⁵Anania sư kơtơ̆ng Pêtrôs khan thoi noh, sư pơ̆k lôch hloi. Lu bơngai kơtơ̆ng tơdrong noh lu sư hli tơpă.

⁶Lu bơngai tơdăm oei ngôi 'bơ̆t ei lơ̆k asu ăn kơ Anania khăn na lu sư tung 'bŭ Anania.

⁷Đơ̆ng rŏng Anania lôch dang pêng jơ, akăn Anania mơ̆t tơ anih đêl klo sư lôch ei, sư ưh kơ băt kơ klo sư lôch ôh.

⁸Pêtrôs jet sư: “Ih roi kơ inh, hăm trŏ kơ biĕm tĕch mir dôm noh đĕch dah kiơ?” Na sư khan: “Trŏ boih, dôm noh tơpă.”

⁹Pêtrôs khan kơ sư: “Lơliơ ih hơdai wang pôm đon păng klo ih lĕ na biĕm wă pơlong Yang Bơhngol 'Lơ̆ng 'Bok Kei-Dei? To ih lăng deh, lu bơngai mă 'bŭ klo ih, lu sư 'nao wih đơ̆ng 'bŭ sư, dơ̆ng 'bơ̆t 'măng to, lu sư wă tung 'bŭ ih lei-lăi thoi klo ih mơ̆n.”

¹⁰Yă Sepir pơ̆k lôch 'bơ̆t jơ̆ng Pêtrôs hloi. Lăp lu đe tơdăm truh mơ̆t tơ hnam ei, 'bôh yă Sepir lôch dơ̆ng, lu sư tung 'bŭ yă Sepir kư̆m jê̆ klo sư mơ̆n.

¹¹Đĭ-đăng bơngai lui păng bơngai nai, lu sư hli tơpă yua kơ 'bôh 'bar 'nu bơngai lôch thoi noh.

¹²Lu bơngai jơ̆ng 'bang Yêsu pơm lơ tơdrong mơsêh mơyang đơ̆ng Kră Yang ăn. Lu bơngai lui pôm jơhngơ̆m akŭm tơ pra hnam 'Bok Kei-Dei tơm mă đe anăn Pra Sôlômôn.

¹³Đe nai ưh kơ pơ̆n akŭm păng sư, mă-lei đe khan kơ sư bơngai 'lơ̆ng tơpă.

¹⁴Lu bơngai lui kơ Kră Yang Yêsu mă drŏ-nglo mă drŏ-kăn, rai đunh rai lơ, đe mah anhăk ba lu bơngai jĭ jăn tơ trong tơ'bĭch sư tơ giơng dah tơ sơkok wă kơ yơ̆p ngôi Pêtrôs năm brih 'bơm lu bơngai jĭ jăn ei na lu sư klaih.

¹⁶Tăp dăr Pơlei Jêrusalem lu kon pơlei pơla lơlang lơlap năm anhăk ba lu bơngai jĭ jăn păng lu bơngai yang mơ̆t. Na đĭ-đăng kơ lu sư klaih ngăl.

¹⁷Thoi noh na 'bok soi tơm păng lu bôl sư khŭl đe Sađusê areh klai khŭl bơngai jơ̆ng 'bang Yêsu, tah lu sư tơ hnam phak.

¹⁹Mă-lei đei linh jang 'lơ̆ng đơ̆ng Kră Yang 'Bok Kei-Dei năm pơih ăn kơ lu sư 'măng kơmăng tơlĕch lu sư păng khan:

²⁰“Năm tơ hnam akŭm 'Bok Kei-Dei tơm bĕ, bơtho kơ kon pơlei pơla gah tơdrong iĕm arih 'nao.”

²¹Lu sư kơtơ̆ng thoi noh na 'năr lĕch pơgê dơning sư năm bơtho tơ hnam akŭm 'Bok Kei-Dei tơm thoi đêl. 'Bok soi tơm păng lu bôl sư năm truh tơ hnam sư akŭm. Sư krao lu kră sek tơlang păng khŭl lu kră dêh Juđê. Đơ̆ng noh lu sư wơh linh năm ba lu bơngai phak tơ lu kră sek tơlang ră.

²²Mă-lei lăp lu linh truh tơ hnam phak 'biao ưh kơ 'bôh lu sư lăm ei. Na lu linh brŏk tơ đe kră sek tơlang păng khan:

²³“Nhôn 'bôh ră 'măng hnam phak khuă kơjăp păng lu bơngai gak oei 'bơ̆t 'măng ei, mă-lei lăp nhôn pơih 'măng 'biao ưh kơ 'bôh bu lăm noh.”

²⁴Yŏng linh wei hnam akŭm 'Bok Kei-Dei tơm păng lu 'bok soi tih kơtơ̆ng thoi noh, lu sư sơleng kơ đon tơpă păng ưh kơ băt lu jơ̆ng 'bang tơ yơ boih.

²⁵Na blư 'bôh minh 'nu bơngai brŏk đơ̆ng hnam akŭm 'Bok Kei-Dei tơm. Na bơngai ei roi kơ lu kră sek tơlang, sư khan: “Lu bơngai mă iĕm tah tơ hnam phak noh brei, sư dang ei oei bơtho kon pơlei pơla tơ hnam akŭm 'Bok Kei-Dei tơm.”

²⁶Na 'bok yŏng linh păng lu linh sư năm rôp dơ̆ng jơ̆ng 'bang Yêsu. Mă-lei lu linh ưh kơ đei pơm kơnê̆ ôh yua kơ lu sư hli kơ kon pơlei klơ̆m lu sư păng tơmo.

²⁷Lu linh ei anhăk ba lu jơ̆ng 'bang Yêsu truh 'bơ̆t anăp lu kră sek tơlang. 'Bok soi tơm khan kơ lu jơ̆ng 'bang Yêsu:

²⁸“Nhôn khă iĕm bơtho tơdrong Yêsu boih, mă-lei iĕm oei bơtho tơdrong Sư jơ̆p kơ Pơlei Jêrusalem păng iĕm bơtho jâu nhôn pơlôch Yêsu mơ̆n.”

²⁹Pêtrôs tơl tang lu bôl sư: “Nhôn athei chu Kră Yang 'Bok Kei-Dei đĕch, nhôn ưh kơ wă chu kon bơngai ôh.

³⁰'Bok Kei-Dei boih, khŭl bơ̆n bơngai Isơrael lui kơ Sư mă đơ̆ng 'bok kơdră bơ̆n sơ̆. Iĕm pơ̆ng pơlôch Yêsu tơ 'long pơglang tơpă. Mă-lei 'Bok Kei-Dei tơiung arih Yêsu đơ̆ng lôch.

³¹'Bok Kei-Dei atŏk Yêsu anih gah 'ma kơ Sư, ăn Yêsu pơm 'Bok Pơgơ̆r bơ̆n. Sư kư̆m pơm 'Bok Dŏng Pơklaih bơ̆n mơ̆n, wă kơ bơngai Isơrael bơ̆n tơbral tơdrong yoch bơ̆n kơdih kơdih na 'Bok Kei-Dei pơklaih yoch bơ̆n.

³²Nhôn 'bôh tơpă lu tơdrong noh na roi kơ iĕm. Yang Bơhngol 'Lơ̆ng kư̆m tơbăt ăn kơ nhôn tơdrong noh mơ̆n yua kơ 'Bok Kei-Dei ăn Yang Bơhngol 'Lơ̆ng kơ đĭ-đăng bơngai chu lui kơ Sư.”

³³Lu kră sek tơlang kơtơ̆ng thoi noh, sư hil mơmĭl tơpă wă pơlôch lu jơ̆ng 'bang Yêsu.

³⁴Mă-lei đei minh 'nu bơngai kơdră sek tơlang iung pơma. Sư bơngai khŭl đe Pharisi, anăn sư Gemel. Sư bơngai bơtho tơdrong juăt Juđê păng đĭ-đăng bơngai ư-ang kơ sư. Sư athei bơngai gak tơlĕch lu jơ̆ng 'bang Yêsu tơ 'ngoaih tŏ sĕt.

³⁵Klaih kơ noh sư khan thoi âu: “Ơ 'nhŏng oh bơngai Isơrael, iĕm sek tơlang lu bơngai âu iĕm kơchăng bĕ.

³⁶Thuđa sơ̆, sư pơang kơdih akâu pơm 'bok tih, kư̆m đei dang puăn-hrĕng 'nu bơngai kiơ̆ sư. Mă-lei đe pơlôch sư, na đĭ-đăng bơngai kiơ̆ sư tơklah tơklang pă gơh pơm thoi yơ boih.

³⁷Klaih kơ noh, lăp 'bok pơtao chih iŏk anăn bơngai sơ̆, đei Juđa bơngai đơ̆ng dêh Galilê, sư pơsô̆ pơsôr đe kiơ̆ sư, mă-lei sư kư̆m lôch lei-lăi mơ̆n păng đĭ-đăng bơngai kiơ̆ sư tơklah tơklang.

³⁸Thoi noh na dang ei inh khan kơ iĕm 'nĕ pơm kiơ kơ lu jơ̆ng 'bang Yêsu âu, lê̆ đĕch. Dah tơdrong sư lĕch đơ̆ng kon bơngai pơm đĕch, tơdrong sư 'noh gô hiong.

³⁹Mă-lei dah tơdrong sư 'noh lĕch đơ̆ng 'Bok Kei-Dei, iĕm ưh kơ layơ gơh pơrăm lu sư. Iĕm pơm kơnê̆ kơ lu sư, noh dang iĕm wă blah 'Bok Kei-Dei.”

⁴⁰Kơtơ̆ng thoi noh lu bôl kră sek tơlang chu sư. Lu sư krao jơ̆ng 'bang Yêsu mơ̆t hloi athei lu linh teh lu sư. Klaih kơ noh đe khă lu sư bơtho tơdrong Yêsu dơ̆ng, tơlĕch hloi lu sư.

⁴¹Na lu jơ̆ng 'bang Yêsu lĕch đơ̆ng hnam sek tơlang ei, lu sư hiôk jơhngơ̆m yua kơ 'Bok Kei-Dei ăn kơ lu sư pŭ anat yua kơ tơdrong Yêsu.

⁴²Rim năr sư oei bơtho Tơdrong 'Nao 'Lơ̆ng Yêsu Krist phŏ phŏ kơnh tơ hnam akŭm 'Bok Kei-Dei tơm, phŏ phŏ kơnh tơ hnam kơdih.