Read bahnar Jang 7 Bible Online

Jang 7 - bahnar bible

Jang 7

¹'Bok soi tơm jet Êtien: “Hăm trŏ kơ ih pơm thoi noh tơpă dah ưh?”

²'Bok Êtien khan thoi âu: “Ơ đe 'nhŏng oh lu 'bok kră pơgơ̆r dêh bơ̆n, apinh iĕm mơ̆ng inh pơma 'biơ̆ bĕ. Tơ'ngla mơsêh mơyang 'Bok Kei-Dei năm tơ Abraham mă 'bok kră bơ̆n sơ̆ lăp Abraham oei tơ dêh Mesôpôtôme, hơdrol kơ sư wă năm oei tơ Pơlei Haran.

³'Bok Kei-Dei khan kơ sư thoi âu: ‘Ih jăk achăng kơtum kơtŏng 'nhŏng oh ih đơ̆ng dêh char ih âu, năm hloi oei tơ dêh nai mă Inh gô tơ'bôh kơ ih.’

⁴Thoi noh na Abraham jăk đơ̆ng dêh Mesôpôtôme năm oei tơ Pơlei Haran. Đơ̆ng rŏng kơ 'bă Abraham lôch, 'Bok Kei-Dei athei Abraham năm oei tơ dêh bơ̆n oei dang ei.

⁵'Bok Kei-Dei pơkă wă ăn kơ sư oei dêh char bơ̆n âu păng pơkă wă ăn kơ lu kon sư oei dêh char âu mơ̆n, mă-lei kơplah noh 'Bok Kei-Dei tam mă ăn kơ sư anih oei 'bơ̆t ayơ ôh. Hơtai ei Abraham kư̆m ưh kơ đei kon.

⁶'Bok Kei-Dei pơkă kơ sư thoi âu: ‘Lu kon sâu ih gô oei tơ dêh đe puăn-hrĕng sơnăm, kon sâu ih gô oei tơ ei thoi tơmoi đĕch. Đe gô ayăt kơ lu sư, rôp lu sư pơm đĭch đam.’

⁷Mă-lei Inh gô sek tơlang păng phak dêh ei, na lu kon sâu ih gô jăk đơ̆ng dêh ei na oei tơ dêh âu, kơkuh kơ Inh oei tơ dêh âu.

⁸'Bok Kei-Dei pơkă khan gô tơgŭm Abraham ling-lang, na Sư athei Abraham kăt tơdra akar lu kon sư wă kơ kon sư 'blŏk tơdrong 'Bok Kei-Dei pơkă wă tơgŭm sư ling-lang. Akăn Abraham tơpŭ minh 'nu kon anăn sư Isăk. Lăp 'bă sư kăt tơdra akar sư, Isăk 'nao tơhngam năr boih. Na Isăk pơjing minh 'nu kon anăn sư Jakôp. Na Jakôp pơjing mơjĭt-'bar 'nu kon, lu đe ei boih 'bok kơdră bơ̆n sơ̆.

⁹“Na lu 'bok kơdră bơ̆n ei sơ̆ gar oh sư, na tĕch oh sư Yôsep pơm đĭch đe tơ dêh Êyiptơ. Mă-lei 'Bok Kei-Dei wei-lăng Yôsep mơ̆n.

¹⁰Păng tơdrong anat anot sư 'Bok Kei-Dei kư̆m dŏng mơnat kơ sư mơ̆n. 'Bok Kei-Dei ăn kơ sư đei 'bơ̆r đon hơgei na 'bok pơtao Pharôn đe Êyiptơ lăp đon kơ Yôsep, na 'bok pơtao ăn kơ sư pơm kră pơgơ̆r dêh đe Êyiptơ păng pơgơ̆r hnam pơtao mơ̆n.

¹¹Hơtai ei đei tơdrong pơngot rơwĕt đĭ kơ dêh Êyiptơ păng dêh Kanaan, na đĭ-đăng bơngai đei tơdrong anat anot. Na lu 'bok kơdră bơ̆n sơ̆ ưh kơ đei tơmam sa ôh.

¹²Na Jakôp kơtơ̆ng dêh đe Êyiptơ đei tơmam sa 'ba lơ, na sư wơh lu kon sư năm tơ ei.

¹³Klaih kơ noh lu sư năm pă 'măng dơ̆ng na lu sư kơnăl kơ oh sư Yôsep. Mă đe kư̆m roi ăn kơ pơtao Pharôn gah tơdrong 'nhŏng oh đe Yôsep mơ̆n.

¹⁴Na Yôsep krao 'bă sư Jakôp păng đĭ-đăng 'nhŏng oh sư tơpơh-jĭt pơđăm 'nu năm oei păng sư.

¹⁵Na Jakôp năm oei tơ dêh char Êyiptơ. Sư lôch tơ ei hloi păng đĭ-đăng kon sư lu kơdră bơ̆n kư̆m lôch tơ ei mơ̆n.

¹⁶Đe tung atâu lu sư tơ Pơlei Sichem 'bŭ sư jê̆ bơsat Abraham. Abraham răt teh bơsat noh đơ̆ng đe Emmor. Lu sư oei tơ Pơlei Sichem.

¹⁷“Hơdrol sơ̆ 'Bok Kei-Dei pơkă wă ăn kơ Abraham păng lu kon sâu sư oei tơ dêh bơ̆n âu. Na năr 'Bok Kei-Dei pơkă ei wă jê̆ truh boih, na lu bơngai Isơrael sơ̆ mă oei tơ dêh char Êyiptơ rai lơ tơpă,

¹⁸truh minh 'nu pơtao tŏk pơgơ̆r tơ dêh Êyiptơ ưh kơ băt kơ Yôsep sơ̆ ôh.

¹⁹'Bok pơtao ei pơm kơnê̆ kơ lu 'bok kơdră bơ̆n sơ̆ păng sư pơgŏ lu sư athei hŭt pơơ̆t đĭ kon nge lu sư wă kơ lu kon nge jah lôch.

²⁰Hơtai ei đei mĕ Môis tơpŭ kơ sư. 'Bok Kei-Dei lăp đon kơ nge Môis mơ̆n. Mĕ 'bă sư rong nge Môis tơ hnam lăp pêng khei.

²¹Kơplah 'noh mĕ sư tah lăm bai năm tơ'bĭch tơ kơpơ̆ng đak krong. Na kon adruh 'bok pơtao iŏk 'me rong nge Môis, pơm kon kơdih hloi.

²²Truh Môis tơdăm 'lŏ boih, sư pơhrăm tôm tơdrong đe Êyiptơ. Sư bơngai 'bơ̆r đon tơpă, sư pơm tôm tơdrong hơgei.

²³“Truh tơ Môis puăn-jĭt sơnăm boih, sư tơchĕng wă năm hơpong tơ buôl sư đe Isơrael.

²⁴Môis 'bôh bơngai đơ̆ng dêh Êyiptơ pơm kơnê̆ kơ bôl Môis na sư năm tơdŏng bôl sư pơlôch hloi bơngai Êyiptơ ei.

²⁵Na Môis ngêh kơ đĭ-đăng lu bôl sư băt kơ 'Bok Kei-Dei wă ăn Môis tơiung pơklaih rơngei lu sư đơ̆ng dêh đe Êyiptơ ning-mônh mă-lei lu bôl sư ưh kơ băt.

²⁶Năr dơning dơ̆ng Môis sư 'bôh 'bar 'nu bôl sư tơteh dih băl. Na sư năm găn bre ei păng khan thoi âu: ‘Ơ bre âu, biĕm 'nhŏng oh dah ưh na kơlih tơdrong kiơ biĕm tơteh dih băl?’

²⁷Mă-lei bơngai mă đei tơdrong yoch ei tơweh Môis păng khan: ‘Bu athei ih tŏk pơgơ̆r nhôn păng tơdrong sek tơlang kơ nhôn tơ âu?

²⁸Ih năm găn nhi âu inh băt ih wă pơlôch inh thoi ih pơlôch bơngai Êyiptơ năr brei.’

²⁹Môis sư kơtơ̆ng bơngai mă tơhil băl ei khan kơ sư thoi noh, jơhngơ̆m sư hli tơpă, na sư kơdâu jăk tơ dêh Miđian, oei hloi tơ ei. Kơplah sư oei tơ ei, Môis sư iŏk akăn na akăn sư tơpŭ 'bar 'nu hơ'lơ̆p drŏ-nglo.

³⁰“Môis oei tơ ei puăn-jĭt sơnăm. Đơ̆ng rŏng kơ sư oei tơ ei puăn-jĭt sơnăm, truh tơ minh năr dơ̆ng sư năm tơ char glă jê̆ kông Sinai. Minh 'nu linh jang 'lơ̆ng đơ̆ng 'Bok Kei-Dei năm tơ 'long jê̆ Môis ei pơm kơ ŭnh sa 'long ei.

³¹Môis lăng ŭnh sa 'long ei sơleng kơ đon. Sư năm mă jê̆ 'long ei wă lăng na kơtơ̆ng nơ̆r 'Bok Kei-Dei khan kơ sư thoi âu:

³²‘Inh boih Kră Yang wei-lăng lu 'bok kơdră ih Abraham, Isăk, Jakôp.’ Na Môis hli tơrơ tơpă. Môis ưh kơ pơ̆n hue lăng Sư ôh.

³³Kră Yang 'Bok Kei-Dei akhan kơ sư thoi âu: ‘Ih plôh chơkhŏ ih bĕ, yua kơ ih oei jê̆ 'bơ̆t anăp Inh.

³⁴Inh 'bôh boih tơdrong đe Êyiptơ pơđep lu iĕm mă kon Inh. Inh kơtơ̆ng iĕm nhơ̆m hmoi na dang ei Inh jur wă dŏng mơnat kơ lu iĕm. Iung bĕ, Inh wơh ih năm tơ dêh Êyiptơ.’

³⁵Hơdrol kơ Môis wă jăk sơ̆ đe Isơrael ưh kơ wă kơ Môis na khan thoi âu: ‘Bu athei ih tŏk pơgơ̆r nhôn păng tơdrong sek tơlang kơ nhôn?’ Mă-lei lăp 'Bok Kei-Dei wơh linh jang 'lơ̆ng pơma păng pơm kơ 'long ŭnh sa ei, na 'Bok Kei-Dei ăn kơ Môis pơgơ̆r păng tơdŏng đe Isơrael đơ̆ng dêh Êyiptơ.

³⁶“Môis anhăk lu đe Isơrael đơ̆ng dêh Êyiptơ. 'Bok Kei-Dei ăn kơ Môis pơm tơdrong mơsêh mơyang tơ dêh Êyiptơ, tơ đak dơsĭ 'brê păng tơ char glă kơplah puăn-jĭt sơnăm.

³⁷Môis kư̆m khan kơ đe Isơrael thoi âu: ‘'Bok Kei-Dei gô ăn kơ iĕm minh 'nu bơngai đơ̆ng khŭl bơ̆n wă pơtruh nơ̆r Sư kư̆m thoi inh mơ̆n.’

³⁸Lăp lu đe Isơrael oei akŭm kơkuh kơ 'Bok Kei-Dei tơ char glă ei sơ̆ đei linh jang 'lơ̆ng 'Bok Kei-Dei pơma kơ Môis tơ kông Sinai, na Môis pơtruh nơ̆r ei kơ lu kơdră bơ̆n. Môis sư iŏk nơ̆r đơ̆ng 'Bok Kei-Dei wă ăn kơ bơ̆n arih ling-lang, pơtruh nơ̆r ei ăn kơ bơ̆n ră.

³⁹“Mă-lei lu kơdră bơ̆n sơ̆ ưh kơ chu kơ Môis ôh, ưh kơ wă kơ Môis pơgơ̆r lu sư. Lu sư 'maih wih tơ dêh Êyiptơ đĕch.

⁴⁰Na lu sư khan kơ 'bok Arôn: ‘Ih pơm kơ bơ̆n rup yang wă kơ bôl bơ̆n tung sư năm hơdrol kơ bơ̆n, na bơ̆n kiơ̆ đơ̆ng rŏng. Môis anhăk bơ̆n đơ̆ng dêh Êyiptơ ră mă-lei bơ̆n ưh kơ băt kơ sư năm tơ yơ dang ei.’

⁴¹Na hơtai ei lu sư pơm minh pôm rup yang kon rơmo hloi na lu sư gop tơmam soi khan gia kơ rơmo ei. Lu sư sŏng sa tih tơpă yua kơ rup yang ei lu sư pơm kơdih păng maih.

⁴²“Thoi noh na 'Bok Kei-Dei ưh pă wă kơ lu sư dơ̆ng ôh. 'Bok Kei-Dei ăn kơ lu sư kơkuh kơ măt 'năr, măt khei păng lu sơnglŏng tơ plĕnh ti đĕch. 'Noh thoi lu 'bok pơtruh nơ̆r 'Bok Kei-Dei khan: ‘Ơ lu đe Isơrael, iĕm ưh kơ sơmah kơ Inh Kră Yang iĕm 'Bok Kei-Dei kơplah iĕm oei puăn-jĭt sơnăm tơ char glă sơ̆.

⁴³Iĕm tung ba hnam yang Malŏk noh, păng rup sơnglŏng yang Rapan; dôm lu rup âu iĕm pơm kơdih wă kơkuh kơ sư đĕch, na Inh gô pơpuh lê̆ iĕm jăk oei tơ pah to Pơlei Babilôn.’

⁴⁴'Bok Êtien oei pơma: “Lu kră bơ̆n oei tơ char glă ei sơ̆, lu sư đei hnam akŭm kơkuh kơ 'Bok Kei-Dei. 'Bok Kei-Dei athei Môis pơm Bơsŭn Anih Akŭm ei kiơ̆ kơ 'Bok Kei-Dei tơ'bôh.

⁴⁵Lu kon sư dơ̆ng, lăp 'bok Jôsuê pơgơ̆r, lu sư tung ba hnam ei tơ dêh Kanaan mă bơ̆n oei dang ei, na 'Bok Kei-Dei pơpuh lê̆ lu bơngai mă oei tơ dêh Kanaan sơ̆ ăn kơ lu 'bok kơdră bơ̆n oei tơ dêh Kanaan. Hnam ei oei truh tơ Đawit pơm pơtao.

⁴⁶'Bok Kei-Dei lăp đon kơ Đawit, na Đawit apinh 'Bok Kei-Dei wă pơm hnam akŭm tih wă kơ 'Bok Kei-Dei oei. 'Bok Kei-Dei boih mă Jakôp lui kơkuh kơ Sư sơ̆.

⁴⁷Mă-lei Đawit ưh kơ pơm ôh hnam ei, yua kơ 'Bok Kei-Dei ưh kơ ăn kơ sư pơm. Mă-lei kon Đawit Sôlômôn pơm.

⁴⁸“Kră Yang 'Bok Kei-Dei ưh kơ wă oei ôh hnam kon bơngai pơm. 'Noh thoi bơngai pơtruh nơ̆r 'Bok Kei-Dei khan sơ̆:

⁴⁹‘Inh 'Bok Kei-Dei pơgơ̆r plĕnh păng teh, lơliơ iĕm gơh pơm ăn kơ Inh hnam oei lĕ? Inh ưh kơ kăl kơ hnam oei ôh.

⁵⁰Inh boih Kră Yang iĕm mă pơjing đĭ-đăng kơ plĕnh teh.’ ”

⁵¹Êtien oei pơma kơ lu kră sek tơlang thoi âu: “Ơ lu iĕm bơngai ngĕng mă ưh kơ chu. Iĕm ling-lang kuă kơ Yang Bơhngol 'Lơ̆ng pơgơ̆r, na iĕm pơm kơnê̆ kư̆m thoi lu 'bok kơdră iĕm sơ̆ mơ̆n.

⁵²Lu 'bok kơdră iĕm sơ̆ pơm kơnê̆ areh kơ đĭ-đăng bơngai pơtruh nơ̆r 'Bok Kei-Dei. Lu 'bok kơdră iĕm sơ̆ pơlôch lu bơngai mă pơkă lê̆ hơdrol kơ tơdrong 'Bok Krist bơngai mă 'lơ̆ng tơpăt wă truh. Na Sư truh boih mă-lei iĕm plĕch kơ Sư păng pơlôch Sư hloi.

⁵³Lu iĕm kơtơ̆ng boih nơ̆r 'Bok Kei-Dei ată đơ̆ng linh jang 'lơ̆ng Sư, mă-lei iĕm ưh kơ răk nơ̆r Sư ôh.”

⁵⁴Êtien pơma kơ lu 'bok sek tơlang ei 'lơ̆ng ră mơ̆n, mă lu 'bok sek tơlang ei tơkăp sơnĕnh hil mơmĭl areh kơ Êtien.

⁵⁵Mă-lei Êtien 'bĕnh kơ Yang Bơhngol 'Lơ̆ng na Yang Bơhngol 'Lơ̆ng tơgŭm sư tơpă. Sư ngoi lăng tơ plĕnh 'bôh ŭnh pơchrang hơdah đơ̆ng 'Bok Kei-Dei. Sư kư̆m 'bôh Yêsu oei gah 'ma kơ 'Bă Sư mơ̆n.

⁵⁶Na Êtien khan kơ lu 'bok sek tơlang ei khan: “Iĕm lăng, plĕnh tơpơih ti, inh 'bôh Kon Bơngai oei gah 'ma kơ 'Bă Sư 'Bok Kei-Dei.”

⁵⁷Na lu đe ei kơtơ̆ng Êtien pơma thoi noh, lu sư pơma 'bơ̆r re chĭt đon hloi,

⁵⁸păng tơluh rôp anhăk Êtien tơ jih pơlei wă klơ̆m sư păng tơmo. Na lu bơngai hơlĕnh kơ sư hei plôh ao lu sư kơdih, 'măn 'bơ̆t jơ̆ng Sôl, sư bơngai oei tơdăm.

⁵⁹Klaih kơ noh lu sư klơ̆m Êtien păng tơmo, wă kơ Êtien lôch. Lăp đơ̆ng ei, Êtien sư krao khan thoi âu: “Ơ Kră Yang Yêsu, apinh Ih iŏk bơhngol inh.”

⁶⁰Klaih kơ noh sư sơtơ̆p kŭl-tăng pơma 'bơ̆r re thoi âu: “Ơ Kră Yang, Ih 'nĕ jô̆ yo kơ lu bơngai pơlôch inh.” Na sư lôch hloi. Sôl kư̆m wă kơ đe pơlôch Êtien mơ̆n.