Read bahnar Rom 10 Bible Online

Rom 10 - bahnar bible

Rom 10

¹Ơ lu 'nhŏng oh, inh wă tơpă kơ lu bơngai Isơrael klaih đơ̆ng tơdrong yoch. Inh krao khan kơ 'Bok Kei-Dei apinh tơdrong noh ling-lang.

²Inh băt mơ̆n lu sư adrin kiơ̆ tơdrong 'Bok Kei-Dei; mă-lei inh hli kơ lu sư kiơ̆ ưh kơ 'blep thoi 'Bok Kei-Dei wă.

³Lu sư ưh kơ băt kơ 'Bok Kei-Dei ăn kơ lu sư Yêsu, athei gơnang kơ Yêsu na gơh jing bơngai 'lơ̆ng hăm 'Bok Kei-Dei. Na 'nâu lu sư gơnang kơ akâu lu sư kiơ̆ tơdrong juăt 'Bok Kei-Dei pơkă, lu sư ưh kơ gơh klaih ôh.

⁴Đĭ-đăng bơngai athei gơnang kơ Yêsu đĕch, 'Bok Kei-Dei jô̆ jing bơngai 'lơ̆ng hăm Sư. Bơ̆n gơnang kơ Yêsu thoi noh ưh pă kăl kơ gơnang kơ akâu kơdih kiơ̆ tơdrong juăt 'Bok Kei-Dei pơkă dơ̆ng ôh.

⁵Môis chih sơ̆ khan, bu wă kơ 'lơ̆ng hăm 'Bok Kei-Dei, sư athei kiơ̆ tơdrong juăt 'Bok Kei-Dei pơkă mă truh um nhen tơnen tơpă na sư 'lơ̆ng hăm 'Bok Kei-Dei gơh arih ling-lang.

⁶Mă-lei tơdrong lui kơ Yêsu wă kơ 'lơ̆ng hăm 'Bok Kei-Dei ưh kơ anat ôh. Bơ̆n băt ưh kơ anat, na bơ̆n 'nĕ kơ pơma khan: Năm bĕ, bu tŏk krao kơ bơ̆n Yêsu đơ̆ng plĕnh,

⁷dah đơ̆ng dêh atâu anhăk kơ bơ̆n tơ âu wă kơ Sư pơklaih bơ̆n.

⁸'Noh ưh kơ kăl ôh. Tơ̆ng bơ̆n tŏk chă, noh kư̆m anat lei-lăi thoi bơ̆n gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă sơ̆, kư̆m ưh kơ gơh klaih đơ̆ng tơdrong yoch ôh. Bơ̆n băt pôm lui kơ Yêsu Krist đĕch klaih tơpă đơ̆ng tơdrong yoch. Nhôn bơtho ăn kơ iĕm tơdrong lui kơ Yêsu Krist noh ưh kơ ataih, ưh kơ anat ôh; sư jê̆ jê̆ dang 'bơ̆t 'bơ̆r păng lăm jơhngơ̆m đon bơ̆n đĕch.

⁹'Noh wă khan dah 'bơ̆r bơ̆n ră roi kơ đe khan bơ̆n lui kơ Yêsu Krist Kră Yang bơ̆n, noh jơhngơ̆m đon bơ̆n lui kơ 'Bok Kei-Dei tơiung arih Yêsu đơ̆ng lôch boih, dôm noh đĕch bơ̆n klaih boih đơ̆ng tơdrong yoch.

¹⁰Dah jơhngơ̆m đon bơ̆n lui thoi noh, 'Bok Kei-Dei jô̆ bơ̆n bơngai 'lơ̆ng hăm Sư. 'Bơ̆r bơ̆n ră roi kơ đe thoi noh, Sư pơklaih bơ̆n đơ̆ng tơdrong yoch.

¹¹Hla bơar 'Bok Kei-Dei roi gah tơdrong 'Bok Krist thoi âu: “Bu lui kơ Sư, bơngai noh huay kơ hli minh tơdrong kiơ ôh.”

¹²Kră Yang Yêsu Krist Sư lăng rim khŭl bơngai lei-lăi đĕch, ưh kơ phara ôh. Sư lăng bơngai Isơrael kư̆m dang bơngai nai. Sư wei-lăng tơgŭm tơpă rim khŭl bơngai mă băt kơ krao khan apinh Sư.

¹³'Noh kư̆m thoi hla bơar 'Bok Kei-Dei khan sơ̆ thoi âu: “Đĭ-đăng bơngai mă băt kơ krao khan apinh Sư, Kră Yang tơgŭm pơklaih lu sư lei-lăi đĕch.”

¹⁴Mă-lei dah ưh kơ đei bơngai năm bơtho, thoi yơ đe gơh krao khan adrol? Ưh kơ đei bơngai năm bơtho, thoi yơ đe gơh lui adrol? Ưh kơ đei bơngai năm bơtho thoi yơ đe gơh kơtơ̆ng adrol?

¹⁵Kră Yang ưh kơ đei wơh đe năm bơtho, thoi yơ đe gơh năm bơtho adrol? Mă-lei Sư đei wơh đe năm bơtho boih, yua kơ hla bơar Sư đei roi thoi âu: “Bơ̆n 'bôh đe bơtho tơdrong 'nao 'lơ̆ng jơhngơ̆m bơ̆n hiôk dêh iih?”

¹⁶Mă đei đe năm bơtho tơdrong 'nao 'lơ̆ng ưh kơ sĭ đe lui đĭ hloi ôh, yua kơ tơdrong noh 'blep thoi tơdrong Êsai chih roi sơ̆ thoi âu: “Ơ Kră Yang, nhôn bơtho tơdrong Ih ră đe kuă kơ lui.”

¹⁷Gah lu bơ̆n, bơ̆n lui boih, noh đơ̆ng đe năm bơtho tơdrong 'nao 'lơ̆ng Yêsu Krist na bơ̆n lui.

¹⁸Inh wă jet iĕm, bơngai Isơrael tam kơtơ̆ng tơdrong 'Bok Kei-Dei? Lu sư kơtơ̆ng boih, lăm hla bơar 'Bok Kei-Dei kư̆m roi thoi noh: “Đe năm bơtho tơdrong Kră Yang jơ̆p-jang kơ teh đak, đơ̆ng hơlĕch truh tơ bơmơ̆t, đơ̆ng yă-nơ̆m truh tơ gơal.”

¹⁹Na inh wă jet iĕm thoi âu dơ̆ng: Lu bơngai Isơrael hăm hlôh đe bơtho tơdrong Yêsu? Lu sư hlôh mơ̆n kuă kơ lui đĕch. 'Noh kư̆m thoi Môis chih roi lăm hla bơar 'Bok Kei-Dei pơma kơ lu bơngai Isơrael sơ̆ thoi âu: “Tơ̆ng lei, Inh wă tơgŭm lu dêh nai mă Inh ưh kơ gan 'mêm kơ lu sư sơ̆, wă kơ lu sư hlôh dang ei, na lu iĕm gô 'nhĕng lu sư, hil areh kơ lu sư.”

²⁰Tơdrong noh Êsai kư̆m chih pơjăm lu bôl sư bơngai Isơrael, mă-lei sư ưh kơ hli, sư chih kiơ̆ kơ nơ̆r 'Bok Kei-Dei thoi âu: “Lu bơngai mă ưh kơ băt chă Inh sơ̆, dang ei lu sư 'bôh Inh boih păng kơnăl kơ Inh, yua kơ Inh wih tơbăt kơ lu sư akâu Inh dơ̆ng.”

²¹Gah lu bơngai Isơrael 'Bok Kei-Dei khan: “Inh oei chang gô lu bơngai Isơrael ling-lang wă kơ lu sư jah wih tơ Inh, mă-lei lu sư oei arăng kơ̆l ưh kơ wă wih ôh.”