Read bahnar Rom 14 Bible Online

Rom 14 - bahnar bible

Rom 14

¹Gah lu bơngai lui mă ưh tam mă hlôh tôm tơdrong, bơ̆n athei 'mêm kơ sư mơ̆n. Bơ̆n 'nĕ kơ pơjah pơjăng tơdrong sư ưh tam mă hlôh noh.

²Pơtih gia minh 'nu bơngai lui, sư hlôh boih tơdrong 'Bok Kei-Dei na sư gơh sa tôm tơdrong tơmam sa. Minh 'nu bơngai lui nai ưh tam mă hlôh, sư sŏng sa mơh 'nhot đĕch, ưh kơ sa 'nhĕm.

³Na bơngai mă gơh sa tôm tơdrong 'nhĕm 'nhot noh 'nĕ kơ pơjăm bơngai mă giĕng kơ sa. Bơngai mă giĕng kơ sa kư̆m 'nĕ kơ pơjăm bơngai mă gơh sa, yua kơ bơngai mă gơh sa noh 'Bok Kei-Dei kư̆m jô̆ khan kon Sư mơ̆n.

⁴Dah bơ̆n pơjăm sư, dang bơ̆n sek tơlang đĭch đe, khan bơngai đĭch noh pơm ưh kơ lăp kơ yŏng sư. Bơ̆n gô mơ̆ng kơ yŏng sư sek tơlang kơdih đĕch, gơh jô̆ kơ sư pơm 'lơ̆ng pơm ưh. Yŏng sư noh wă khan Yêsu Krist, Yŏng sư noh gơh tơgŭm sư lui kơjăp khŏm khŏm.

⁵Na tơdrong âu dơ̆ng: Đei lu buăl bơ̆n bơngai lui mơ'nah khan, mưh trŏ kơ năr giĕng pơm giĕng, athei oei pơdơh kiơ̆ kơ bơngai Juđê juăt sơ̆. Mă-lei lu buăl nai mơ'nah khan năr noh lei-lăi kơ năr nai đĕch, ưh kơ đei khan năr giĕng ôh. Tơdrong noh gô mơ̆ng kơ bơ̆n tơchĕng kơdih mă-lei bơ̆n athei tơchĕng mă nhên 'mơ̆i na băt kơ năr giĕng tơpă dah ưh, gơh oei kiơ̆ dah ưh.

⁶Bơngai mă oei kiơ̆ rim kơ năr giĕng, yua kơ sư 'mêm kơ 'Bok Kei-Dei na sư oei kiơ̆. Na tơdrong sa 'nhĕm 'nhot kư̆m thoi noh; bơngai mă tơchĕng gơh sa sư kư̆m 'mêm kơ 'Bok Kei-Dei mơ̆n; bơngai mă tơchĕng khan giĕng kơ sa, sư kư̆m 'mêm kơ 'Bok Kei-Dei. Bơngai mă gơh sa sư băt tôm tơdrong tơmam sa 'Bok Kei-Dei pơjing wă ăn kơ kon bơngai sa na sư bơnê kơ 'Bok Kei-Dei. Bơngai mă giĕng kơ sa sư kư̆m lei-lăi, sư giĕng kơ sa yua kơ sư wă kơkuh kơ 'Bok Kei-Dei na sư kư̆m bơnê kơ 'Bok Kei-Dei mơ̆n.

⁷Bĭ tơdrong Sư ăn kơ bơ̆n arih, ưh kơ sĭ Sư ăn kơ bơ̆n arih wă pơyua akâu bơ̆n arih hiôk jơnap ôh. Tơdrong lôch kư̆m lei-lăi, ưh kơ sĭ Sư ăn kơ bơ̆n lôch wă pơyua akâu bơ̆n ôh.

⁸Bơ̆n arih wă pơyua Kră Yang, bơ̆n lôch kư̆m lei-lăi thoi noh. Mă arih, mă lôch gô mơ̆ng kơ Sư đĕch ưh kơ gơh pơyua akâu bơ̆n ôh.

⁹Truh trong tơdrong lôch, tơdrong arih, pôm Yêsu Krist đĕch truh, pôm Sư đĕch gơh pơgơ̆r bơngai lôch, bơngai arih.

¹⁰Yua kơ thoi noh na lơliơ iĕm gơh sek tơlang 'nhŏng oh khan bơngai yoch bơngai ưh? Lơliơ iĕm gơh pơjăm sư lĕ? Ning-mônh đĭ-đăng bơ̆n gô dơ̆ng 'bơ̆t anăp 'Bok Kei-Dei sek tơlang ngăl.

¹¹Tơdrong noh gô 'blep thoi đe chih roi tơ lăm sơ̆p hla bơar 'Bok Kei-Dei sơ̆ thoi âu: “Inh 'Bok Kei-Dei Kră Yang iĕm, Inh đei tơpă păng Inh arih ling-lang, na ning-mônh đĭ-đăng kon bơngai sơtơ̆p kŭl-tăng kơkuh kơ Inh păng ư-ang Inh.”

¹²'Bok Kei-Dei khan thoi noh boih, na ning-mônh đĭ-đăng kon bơngai bơ̆n gô roi tơdrong arih bơ̆n 'bơ̆t anăp Sư.

¹³Bơ̆n băt tơdrong noh thoi noh boih, na bơ̆n 'nĕ pă chă sek tơlang dih băl khan bơngai yoch bơngai ưh, bơ̆n 'nĕ kơ pơm kơ sư hơwơ̆l hli kơ sư jing yoch.

¹⁴Yua kơ inh lui kơ Yêsu Krist păng inh gơnang kơ Sư tơpă, na inh băt tôm tơdrong tơmam sa, ưh kơ đei tơmam sa ayơ bơ̆n sa khan yoch. Đơ̆ng đon bơ̆n tơchĕng khan yoch đĕch na jing yoch.

¹⁵Na đơ̆ng âu tơ anăp dah 'nhŏng oh bơngai lui bơ̆n khan 'nĕ kơ sa tơmam noh bơ̆n giĕng, bơ̆n kư̆m 'nĕ kơ sa kiơ̆ kơ sư khan. Dah bơ̆n kư̆ kơ sa, đe jô̆ bưh kiơ bưh, noh ưh kơ 'lơ̆ng ôh, hli kơ sư hơwơ̆l, dang bơ̆n pơyoch sư mơ̆n. Păng bơ̆n jing ưh kơ đei tơdrong 'mêm kơ 'nhŏng oh thoi Yêsu lôch tang bơ̆n, yua kơ hơlŏng bơlŭk bơ̆n đĕch.

¹⁶Tơmam sa kiơ bơ̆n tơchĕng gơh sa, mă-lei đe khan ưh, noh bơ̆n 'nĕ kơ sa, hli kơ đe jô̆ kơ bơ̆n bơngai yoch.

¹⁷Na bơ̆n bơngai mă 'Bok Kei-Dei pơgơ̆r boih, mah kăl kiơ kơ sa 'nhĕm 'nhot thoi noh, mah 'nhĕng kiơ kơ đe sa et tơdrong 'noh. Tơdrong bơ̆n pơm 'lơ̆ng kơ 'Bok Kei-Dei, tơdrong bơ̆n pơm 'lơ̆ng kơ bôl buăl, tơdrong bơ̆n chơt ngă 'nă hal yua kơ đei Yang Bơhngol 'Lơ̆ng, tơdrong noh bơ̆n kăl.

¹⁸Bơngai mă lui yom kơ Yêsu thoi noh, bơngai noh 'Bok Kei-Dei lăp đon, mă tơduă kon bơngai kư̆m lăp đon mơ̆n.

¹⁹Yua kơ thoi noh na bơ̆n athei adrin 'biơ̆ tơdrong pơm hiôk kơ bôl buăl hăm 'nhŏng oh bơ̆n kơdih, rai băt tơgŭm băl lui kơjăp.

²⁰Tơdrong sa et iĕ ioch đĕch na wă pơrăm 'nhŏng oh bôl buăl kiơ̆ tơdrong 'Bok Kei-Dei. Bơ̆n băt dôm tơmam sa bơ̆n gơh sa ngăl, mă-lei dah 'nhŏng oh bơ̆n yoch yua kơ bơ̆n sa, noh măk ai kơ bơ̆n mă sa noh boih yua kơ bơ̆n dang pơyoch sư.

²¹Tơ̆ng bơ̆n kuă kơ pơyoch 'nhŏng oh bôl buăl, lei bơ̆n 'nĕ kơ pơm minh tơdrong kiơ kiơ hli kơ sư yoch, thoi lĕ kơ sa 'nhĕm 'nhot, dah et sik, dah tơdrong kiơ kiơ nai.

²²Mă tơdrong sa et, mă tơdrong kiơ, bơ̆n tơchĕng gơh, mă bơ̆n 'nĕ roi kơ đe, gô mơ̆ng kơ 'Bok Kei-Dei đĕch bơtho bơ̆n. Dah bơ̆n tơchĕng trŏ lei lăm jơhngơ̆m bơ̆n mơn kơ hiôk ưh kơ hli kơ yoch ôh.

²³Mă tơdrong sa, mă tơdrong kiơ kiơ noh nai bơ̆n tơchĕng khan băt giĕng băt ưh, mă-lei bơ̆n kư̆ kơ pơm, noh bơ̆n yoch boih yua kơ bơ̆n ưh kơ kiơ̆ kơ đon lui bơ̆n.