Read bahnar Rom 16 Bible Online

Rom 16 - bahnar bible

Rom 16

¹Âu duch nă bơ̆n yă Phêbê wă năm ngôi hơpong tơ iĕm. Sư bơngai jang lăm hnam 'Bok Kei-Dei tơ Pơlei Sankrê. Sư bơngai 'lơ̆ng, na inh apinh iĕm sơng iŏk sư mă trŏ 'biơ̆ hŏ, yua kơ sư kư̆m hơdai bơngai lui kơ Kră Yang Yêsu Krist thoi bơ̆n. Păng inh wă kơ iĕm tơgŭm sư tôm tơmam sư kăl yua, yua kơ sư bơngai tơgŭm đe dêh sơ̆, truh tơ inh sư kư̆m tơgŭm mơ̆n.

³Na dang ei inh wă jet gia tôm kơ iĕm tơ âu: Bĭ bre Prisil păng Akila bre sư thoi yơ dang ei? Sơ̆ bre sư jang tơdrong Kră Yang Yêsu Krist hơdai hăm inh.

⁴Sơ̆ inh đei tơdrong đe wă pơlôch, na bre sư tơdŏng inh, bre sư nuih dêh ưh kơ hli kơ đe wă pơlôch hăm bre sư. Na inh păng đĭ-đăng bơngai lui tơmoi bơnê kơ bre sư tơpă.

⁵Inh kư̆m đei nơ̆r jet gia lu bơngai mă juăt kơ akŭm tơ hnam bre sư. Inh kư̆m đei nơ̆r jet gia Êpanet, inh 'mêm kơ sư tơpă. Lăm dêh Asi sư boih lui kơ Yêsu Krist hơdrol kơ đe.

⁶Inh kư̆m đei nơ̆r wă jet gia duch Mari, sư jang tơgŭm iĕm gleh tơpă.

⁷Inh đei nơ̆r jet gia bre Andrônik păng Junnia, bre sư 'nhŏng oh inh; sơ̆ bre sư kư̆m oei tơ lăm hnam phak hơdai hăm inh. Lu jơ̆ng 'bang Yêsu Krist kư̆m ư-ang kơ bre sư mơ̆n. Bre sư lui kơ Yêsu Krist hơdrol kơ inh.

⁸Inh đei nơ̆r jet gia Ampliat, inh 'mêm kơ sư yua kơ sư lui kơ Kră Yang Yêsu Krist.

⁹Inh kư̆m wă jet gia lăng Uban, sư kư̆m jang tơdrong Yêsu Krist hơdai hăm bơ̆n. Păng inh kư̆m wă jet gia Satach, inh 'mêm kơ sư tơpă.

¹⁰Inh đei nơ̆r jet gia Apelơ, sư đei tơdrong gleh mă-lei sư oei lui kơ Yêsu Krist kơjăp. Inh kư̆m wă jet gia lăng hnam dơnŏ đe Rihtô sư thoi yơ.

¹¹Inh kư̆m wă jet gia lăng 'nhŏng inh Hêrô păng inh kư̆m wă jet gia hnam dơnŏ đe Narri lu mă lui kơ Kră Yang Yêsu Krist.

¹²Păng inh kư̆m wă jet gia lăng bre duch Triphen păng duch Triphô, bre sư kư̆m hơdai jang tơdrong Kră Yang Yêsu Krist. Păng inh wă jet gia duch Phersi, inh băt sư jang tơdrong Kră Yang Yêsu Krist gleh dêh na bơ̆n 'mêm kơ sư tơpă.

¹³Inh kư̆m đei nơ̆r wă jet gia Ruphus, đe ư-ang kơ sư tơpă yua kơ sư lui kơ Kră Yang Yêsu Krist kơjăp. Inh kư̆m wă jet gia mĕ sư thoi yơ, mă mĕ sư kư̆m dang mĕ inh mơ̆n.

¹⁴Inh kư̆m wă jet gia lăng lu đe âu thoi yơ: Asin, Plêgon, Hêmes, Pattrô, Hemmơ păng đĭ-đăng kơ lu 'nhŏng oh mă oei hơdai lu sư.

¹⁵Inh kư̆m wă jet gia Philô păng yă Jula, Nerê, hăm mŏ mai sư; păng Ôlem păng đĭ-đăng bơngai lui mă oei hăm lu sư.

¹⁶Đĭ-đăng kơ iĕm jing 'nhŏng oh lui kơ Yêsu Krist, na apinh iĕm sơng iŏk rôp băl ti wă kơ băt tơdrong 'mêm băl. Đĭ-đăng bơngai lui kơ Yêsu Krist rim kơ anih tă leng kơ jet gia iĕm ngăl.

¹⁷Ơ 'nhŏng oh, iĕm athei kơchăng hli kơ iĕm lui jrok kiơ̆ lu bơngai lui ưh kơ tat, hli kơ iĕm achăng lê̆ tơdrong lui tơpăt mă đe juăt kơ bơtho; na iĕm athei weh 'biơ̆ đơ̆ng lu sư. Lu sư wă pơrăm lu bơngai lui bơ̆n, chă pơjah pơjăng păng bơ̆n.

¹⁸Dôm lu bơngai thoi noh lu sư ưh kơ jang tơdrong Kră Yang bơ̆n Yêsu Krist tơpă ôh, sư jang wă 'me akâu sư kơdih đĕch, sư pơma kơ đe rơngơp dêh, na lu đe mă 'bônh kơ lui kiơ̆ kơ sư.

¹⁹Mă-lei gah iĕm, đĭ-đăng kơ đe băt kơ iĕm lui kơjăp tơpă, thoi noh na jơhngơ̆m inh hiôk dêh. Păng inh wă kơ iĕm hơgei, gơh tơchĕng tơdrong trŏ sư thoi yơ, tơdrong glăi sư thoi yơ. Inh ưh kơ wă kơ iĕm hơgei gah tơdrong kơnê̆ ôh.

²⁰'Bok Kei-Dei wă kơ bơ̆n gơh oei hiôk hăm bôl buăl, thoi noh na Sư ưh kơ ăn kơ tơdrong kơnê̆ pran hloh kơ iĕm, Sư ăn kơ iĕm pran hloh kơ tơdrong kơnê̆; noh dang Sư ăn kơ iĕm juă bơhlơ̆r kơ̆l yang Satan. 'Noh na inh apinh Kră Yang Yêsu Krist wei-lăng iĕm.

²¹Timôthê, sư bơngai jang hơdai inh, sư kư̆m đei nơ̆r jet gia iĕm mơ̆n. Na lu đe âu dơ̆ng kư̆m lei-lăi: Lusiu, Jason, Sôssi, lu sư 'nhŏng oh inh ngăl kư̆m hơdai jet gia iĕm mơ̆n.

²²Anăn inh Terruis, Pôl athei inh chih tơgŭm sư kơthơ âu, inh kư̆m hơdai jet gia đĭ-đăng kơ iĕm bơngai lui kơ Kră Yang Yêsu Krist tơ iĕm âu.

²³Na âu akâu inh kơdih Pôl pơma dơ̆ng. Inh oei tơ hnam Guơs păng đĭ kơ nhôn juăt akŭm tơ hnam sư, sư kư̆m đei nơ̆r jet gia pơma dơnuh hăm iĕm mơ̆n.

²⁴Êrat sư bơngai chĕp jên đe pơlei păng bôl bơ̆n Kuat, bre sư kư̆m đei nơ̆r jet gia iĕm mơ̆n.

²⁵Bơnê kơ 'Bok Kei-Dei, Sư boih gơh tơgŭm iĕm lui kơjăp, inh bơtho iĕm tơdrong 'nao 'lơ̆ng Yêsu Krist wă kơ iĕm băt Sư gơh ăn kơ iĕm lui kơjăp. Tơdrong Yêsu Krist âu lu kră sơ̆ ưh tam kơtơ̆ng ôh.

²⁶Mă-lei dang ei 'Bok Kei-Dei tơbăt ăn kơ bơ̆n boih, Sư tơbăt ăn kơ bơ̆n lăm tơdrong lu bơngai pơtruh nơ̆r Sư chih roi sơ̆. Sư wă kơ đĭ-đăng bơngai jơ̆p kơ teh đak băt kơ tơdrong 'nao 'lơ̆ng Yêsu Krist, wă kơ đĭ-đăng bơngai lui kơ Sư.

²⁷'Bok Kei-Dei arih ling-lang, minh 'nu Sư đĕch Kră Yang hlôh wao tôm tơdrong. Bơ̆n sơđơ̆ng kơ Yêsu Krist na bơ̆n băt ư-ang kơ 'Bok Kei-Dei ling-lang ưh kơ layơ tôch. A-men.