Read bahnar Rom 2 Bible Online

Rom 2 - bahnar bible

Rom 2

¹Lăm lu iĕm mơ'nah jô̆ kơ đe pơm yoch, iĕm ưh kơ gơh khan kơ đe thoi noh ôh, yua kơ iĕm kư̆m hơdai pơm yoch lei-lăi. Iĕm jô̆ kơ đe pơm yoch noh dang iĕm khan kơ akâu iĕm kơdih pơm yoch.

²Bơ̆n băt boih 'Bok Kei-Dei wă phak dôm lu bơngai pơm yoch trŏ tơpă.

³Iĕm jô̆ kơ đe pơm yoch, iĕm kư̆m pơm yoch mơ̆n, iĕm tơchĕng iĕm pơm yoch 'Bok Kei-Dei ưh kơ phak ôh hă, na iĕm jô̆ kơ đe pơm yoch?

⁴'Bok Kei-Dei ưh kơ ăn kơ iĕm tơdrong gleh yua kơ iĕm ưh kơ đei tơdrong yoch hă? Ưh ôh. Sư ưh kơ ăn kơ iĕm tơdrong gleh yua kơ Sư wă kơ iĕm jah tơbral kơdih tơdrong yoch ră. Sư mơnat kơ iĕm tơpă na Sư ăn kơ iĕm oei hiôk khŏm khŏm. Mă-lei iĕm oei pơm yoch hơnơ̆ng đĕch ưh kơ đei tơbral ôh.

⁵Iĕm arăng kơ̆l tơpă na ưh kơ jah tơbral kơdih tơdrong yoch, thoi noh na rai đunh rai đei tơdrong yoch tih, na mưh truh năr 'Bok Kei-Dei sek tơlang ning-mônh Sư phak iĕm kư̆m tih thoi tơdrong yoch iĕm pơm noh mơ̆n.

⁶Sư gô sek tơlang 'blep dôm tơdrong đêl bơ̆n pơm.

⁷Bơngai bu adrin pơm 'lơ̆ng hăm 'Bok Kei-Dei wă kơ 'Bok Kei-Dei lăp đon ăn kơ sư arih hiôk chơt păng wă kơ akâu sư huay kơ lôch hiong, bơngai noh 'Bok Kei-Dei gô ăn kơ sư đei tơdrong arih ling-lang tơpă.

⁸Bơngai bu băt 'mêm kơ akâu sư kơdih, ưh kơ 'mêm kơ tơdrong 'Bok Kei-Dei, sư wă kiơ̆ tơdrong kơnê̆ ngăl, bơngai noh 'Bok Kei-Dei gô phak sư kơtang kơtĭt tơpă.

⁹Mă bơngai Juđê, mă bơngai nai, dah ưh kơ chu yom kơ nơ̆r 'Bok Kei-Dei, oei wă pơm kơnê̆ ling-lang, lu bơngai thoi noh 'Bok Kei-Dei wă phak lu sư pơmat-tat tơpă ning-mônh.

¹⁰Mă bơngai Juđê, mă bơngai nai, dah lu sư pơm 'lơ̆ng hăm 'Bok Kei-Dei, ning-mônh 'Bok Kei-Dei ăn kơ lu bơ̆n oei hơdai hăm Sư hiôk chơt ling-lang.

¹¹Tơdrong 'Bok Kei-Dei 'mêm kơ kon bơngai lei-lăi đĕch, ưh kơ phara ôh.

¹²Lu bơngai khŭl nai, lu sư ưh kơ băt kơ tơdrong juăt 'Bok Kei-Dei pơkă kơ lu bơngai Juđê sơ̆, na lu sư oei pơm yoch khŏm khŏm, ning-mônh 'Bok Kei-Dei kư̆m phak lu sư mơ̆n. Lu bơngai Juđê băt ră kơ tơdrong juăt 'Bok Kei-Dei pơkă noh, mă-lei lu sư oei pơm yoch, ning-mônh 'Bok Kei-Dei kư̆m phak lu sư mơ̆n, yua kơ lu sư ưh kơ kiơ̆ tơdrong Sư pơkă.

¹³'Bok Kei-Dei jô̆ bơ̆n bơngai 'lơ̆ng, ưh kơ sĭ yua kơ bơ̆n kơtơ̆ng tơdrong Sư pơkă đĕch ôh, yua kơ bơ̆n kiơ̆ tơdrong noh.

¹⁴Lu bơngai khŭl nai, lu sư ưh kơ băt tơdrong juăt 'Bok Kei-Dei pơkă, mă-lei lu sư mơ'nah pơm trŏ kơ tơdrong noh, yua kơ lăm to sư tơchĕng trŏ, na sư pơm kiơ̆ hloi.

¹⁵Bơ̆n 'bôh sư pơm tơdrong trŏ na bơ̆n băt kơ 'Bok Kei-Dei ăn kơ sư kơnăl tơdrong 'lơ̆ng tơdrong kơnê̆. Dah sư pơm yoch sư kư̆m băt kơdih pơm yoch. Dah sư pơm 'lơ̆ng sư kư̆m băt kơdih pơm 'lơ̆ng mơ̆n.

¹⁶Yua kơ thoi noh na mưh truh năr 'Bok Kei-Dei sek tơlang ning-mônh, Sư gô pơjao kơ Kon Sư Yêsu Krist sek tơlang kơ đĭ dôm tơdrong kon bơngai wă ôn. Inh khan kơ iĕm thoi noh yua kơ 'blep trŏ thoi tơdrong 'nao 'lơ̆ng 'Bok Kei-Dei wă kơ inh bơtho.

¹⁷Lu iĕm bơngai Juđê mơ'nah oei pơang bơngai Juđê iĕm, khan iĕm kiơ̆ tơdrong juăt 'Bok Kei-Dei pơkă sơ̆ na khan 'Bok Kei-Dei wei-lăng iĕm ling-lang.

¹⁸Iĕm băt boih 'Bok Kei-Dei wă kơ iĕm pơm thoi yơ păng iĕm kư̆m băt tơdrong trŏ dah tơdrong glăi, yua kơ iĕm pơhrăm tơdrong 'Bok Kei-Dei đơ̆ng đe bơtho iĕm boih.

¹⁹Iĕm khan iĕm pơm 'bok bơtho lu bơngai ưh kơ hlôh kiơ̆ tơdrong 'Bok Kei-Dei wă tơ'bôh trong kơ bơngai măt tol păng pơm ŭnh pơchrang hơdah kơ lu bơngai măng mu.

²⁰Iĕm bơtho lu bơngai ưh kơ hlôh păng lu bơngai oei moh. Păng iĕm băt tôm tơdrong hla bơar 'Bok Kei-Dei pơma trŏ tơpă.

²¹Mă-lei iĕm bơtho ăn kơ đe đĕch, akâu iĕm kơdih ưh kơ kiơ̆ ôh. Iĕm kuă kơ kiơ bơtho akâu iĕm kơdih? Na iĕm bơtho đe khan: 'Nĕ kơ tơtông. Bĭ iĕm hăm tơtông?

²²Iĕm bơtho đe 'nĕ pơm pơyô kư̆ kă, na bĭ iĕm hăm pơm? Iĕm hil kơ đe kơkuh kơ rup yang. Bĭ iĕm hăm tơtông iŏk tơmam đe kơkuh kơ rup yang noh ưh?

²³Iĕm khan kơ đe khan iĕm băt tơdrong juăt 'Bok Kei-Dei pơkă 'lơ̆ng tơpăt mă-lei iĕm oei pơm yoch, ưh kơ kiơ̆ tơdrong Sư pơkă noh. Iĕm pơm thoi noh đe rai pơjăm 'Bok Kei-Dei.

²⁴Tơdrong noh 'blep thoi sơ̆p hla bơar 'Bok Kei-Dei sơ̆ khan thoi âu: “Lu bơngai tơmoi nai pơjăm 'Bok Kei-Dei yua kơ lu bơngai Juđê ưh kơ kiơ̆ tơdrong juăt 'Bok Kei-Dei pơkă.”

²⁵Lu iĕm bơngai Juđê kăt tơdra akar khan kăl tơpă wă tơbăt kơ đe iĕm kiơ̆ tơdrong juăt 'Bok Kei-Dei pơkă truh um. Trŏ mơ̆n dah iĕm kiơ̆ tơdrong juăt 'Bok Kei-Dei pơkă truh um, lei tơdrong iĕm kăt tơdra akar noh kư̆m kăl mơ̆n. Mă-lei iĕm ưh kơ kiơ̆ tơdrong 'Bok Kei-Dei tơpă ôh, thoi noh tơdrong iĕm kăt tơdra akar dang ưh kơ yua ôh.

²⁶Lu bơngai nai ưh kơ kăt tơdra akar, mă-lei dah lu sư kiơ̆ tơdrong juăt 'Bok Kei-Dei tơpă, 'Bok Kei-Dei lăng lu sư kư̆m dang lu sư kăt tơdra akar mơ̆n.

²⁷Lu iĕm bơngai Juđê, 'Bok Kei-Dei chih pơkă ăn tơdrong juăt Sư đơ̆ng sơ̆ boih păng iĕm kư̆m kăt tơdra akar thoi 'Bok Kei-Dei pơkă mơ̆n. Mă-lei iĕm ưh kơ kiơ̆ tơdrong juăt Sư pơkă kơ iĕm noh ôh. Tă tơ lu bơngai nai dơ̆ng ưh kơ kăt tơdra akar, mă-lei lu sư mơ'nah kiơ̆ tơdrong juăt 'Bok Kei-Dei pơkă hloh loi kơ iĕm dơ̆ng. Thoi noh ning-mônh lu sư gô jô̆ kơ iĕm bơngai yoch tơpă.

²⁸Mă sư bơngai Juđê, dah sư ưh kơ kiơ̆ tơdrong juăt 'Bok Kei-Dei pơkă, 'Bok Kei-Dei kư̆m ưh kơ jô̆ sư bơngai Juđê ôh. Mă sư kăt tơdra akar, dah sư ưh kơ kiơ̆ tơdrong juăt 'Bok Kei-Dei pơkă, 'Bok Kei-Dei lăng tơdrong sư kăt akar noh ưh kơ yua kiơ ôh.

²⁹Bơngai bu wă kiơ̆ tơdrong 'Bok Kei-Dei, sư kiơ̆ hăm đĭ jơhngơ̆m đon sư, bơngai noh 'Bok Kei-Dei jô̆ sư bơngai Juđê. Dah bơ̆n adrin kiơ̆ Sư hăm đĭ jơhngơ̆m klơm klak, 'nĕ kiơ̆ pôm 'bơ̆r, bơngai noh 'Bok Kei-Dei jô̆ dang sư kăt tơdra akar mơ̆n. Dah bơ̆n pơm thoi noh, bơ̆n ưh kơ kăl kơ kon bơngai lăp đon kơ bơ̆n ôh, yua kơ bơ̆n đei 'Bok Kei-Dei lăp đon kơ bơ̆n boih.