Read bahnar Rom 6 Bible Online

Rom 6 - bahnar bible

Rom 6

¹Bơ̆n đei tơdrong yoch tih, mă-lei đei 'Bok Kei-Dei 'mêm kơ bơ̆n rai dêh. Mă-lei bơ̆n 'nĕ tơchĕng khan, lê̆ bơ̆n pơm yoch khŏm khŏm kư̆m bưh wă kơ 'Bok Kei-Dei 'mêm kơ bơ̆n rai hloh kơ noh, ưh ôh hŏ.

²Yua kơ bơ̆n bơngai dang lĕ kơ lôch boih, liơ gơh pơm yoch dơ̆ng?

³Kơplah bơ̆n iŏk 'batem sơ̆ rim 'nu kơ bơ̆n tơmơ̆t lăm Yêsu Krist dang lĕ kơ bơ̆n lôch păng Sư boih.

⁴Đe pơm 'batem kơ bơ̆n tơmôch bơ̆n lăm đak, noh dang đe 'bŭ bơ̆n minh pôm bong hăm Sư boih. Na 'Bok Kei-Dei yua mơsêh mơyang Sư tơiung arih Yêsu Krist đơ̆ng lôch, noh wă khan bơ̆n đei tơdrong arih 'nao ưh pă kiơ̆ tơdrong so dơ̆ng.

⁵Yua kơ bơ̆n dang lôch hơdai păng Yêsu na 'Bok Kei-Dei ăn bơ̆n arih 'nao ahrei âu, thoi ăn kơ Yêsu iung arih sơ̆ mơ̆n.

⁶Sơ̆ bơ̆n akâu so, mă-lei dang ei dang đe pơ̆ng pơlôch bơ̆n hơdai hăm Yêsu tơ 'long pơglang boih, wă tơhiong đĭ dôm tơdrong so na mă bơ̆n gơh rơngei đơ̆ng tơdrong yoch.

⁷Tơ̆ng bơ̆n lôch, bơ̆n rơngei boih đơ̆ng tơdrong yoch.

⁸Yua kơ bơ̆n dang lôch hơdai hăm Yêsu boih, na bơ̆n băt tơpă bơ̆n gô arih 'nao kiơ̆ thoi Sư mơ̆n, ưh pă layơ wă iŏk tơdrong so dơ̆ng.

⁹Bơ̆n băt 'Bok Kei-Dei tơiung arih Yêsu đơ̆ng lôch, Yêsu ưh pă layơ wă lôch dơ̆ng, Sư rơngei đơ̆ng tơdrong lôch boih.

¹⁰Yêsu lôch sơ̆ Sư hŭt đĭ dôm tơdrong yoch bơ̆n hloi; dang ei Sư arih, Sư jang tơdrong 'Bok Kei-Dei.

¹¹Akâu bơ̆n kư̆m thoi noh mơ̆n, dang bơ̆n lôch hŭt đĭ dôm tơdrong yoch, gơnang kơ Yêsu Krist đei arih 'nao kiơ̆ thoi Sư, na jang tơdrong 'Bok Kei-Dei lei-lăi.

¹²Akâu bơ̆n juăt kơ pơm yoch, bơ̆n athei gơ̆t 'nĕ pă ăn pơm yoch dơ̆ng. Ning-mônh akâu kon bơngai bơ̆n gô tơ'bơ̆p tơdrong lôch.

¹³Bơ̆n 'nĕ pă ăn akâu bơ̆n pơm yoch, bơ̆n athei pơjao akâu bơ̆n kơ 'Bok Kei-Dei đĕch, wă kơ 'Bok Kei-Dei wei-lăng chăl arih bơ̆n tơpăt ling-lang dang bơ̆n iung arih đơ̆ng lôch.

¹⁴Bơngai bu oei gơnang kơ akâu sư kơdih kiơ̆ tơdrong juăt 'Bok Kei-Dei pơkă ưh kơ kĕ ôh, lei bơngai 'noh sư oei pơm yoch hơnơ̆ng; bơ̆n athei gơnang kơ tơdrong Yêsu lôch tang bơ̆n păng tơgŭm bơ̆n, na bơ̆n huay pă pơm yoch.

¹⁵Dah bơ̆n ưh pă gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă, lei bơ̆n hơđơ̆ng tơpă, bơ̆n gô mơ̆ng kơ 'Bok Kei-Dei tơgŭm bơ̆n. Mă-lei bơ̆n 'nĕ tơchĕng khan dah bơ̆n ưh pă gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă, khan bơ̆n gơh pơm yoch. Ưh ôh.

¹⁶Iĕm băt mơ̆n, tơ̆ng bơ̆n đĭch đe, bơ̆n athei chu kơ yŏng tơ'ngla. Tơ̆ng bơ̆n đĭch gah tơdrong yoch, bơ̆n gô 'bôh tơdrong lôch. Tơ̆ng bơ̆n đĭch 'Bok Kei-Dei, bơ̆n athei chu kơ 'Bok Kei-Dei, bơ̆n gô 'bôh tơdrong bơ̆n chu jing bơngai 'lơ̆ng tơpăt.

¹⁷Sơ̆ iĕm đĭch gah tơdrong yoch ră, mă-lei bơnê kơ 'Bok Kei-Dei pơklaih iĕm rơngei boih yua kơ iĕm lui kơ tơdrong đe bơtho hăm đĭ jơhngơ̆m klơm klak.

¹⁸Dang ei iĕm klaih rơngei đơ̆ng tơdrong yoch boih, iĕm jing đĭch 'Bok Kei-Dei dơ̆ng wă pơm 'lơ̆ng tơpăt.

¹⁹Tơdrong pơm đĭch noh ưh kơ sĭ iĕm jing đĭch tơpă ôh, inh pơtih gia wă kơ iĕm hlôh đĕch. Yua kơ sơ̆ iĕm dang pơjao akâu iĕm pơm kơnê̆ kư̆ kă khŏm khŏm rai tih, na dang ei iĕm pơjao akâu iĕm kơ 'Bok Kei-Dei pơm 'lơ̆ng tơpăt thoi Sư boih.

²⁰Kơplah iĕm oei đĭch tơdrong yoch sơ̆, iĕm ưh kơ wă pơm tơdrong 'lơ̆ng tơdrong tơpăt ôh.

²¹Tơdrong iĕm pơm yoch sơ̆ ưh kơ đei tơgŭm iĕm minh tơdrong kiơ ôh. Dang ei iĕm băt mơlâu kơ tơdrong yoch iĕm sơ̆ boih; tơdrong bơ̆n pơm yoch bơ̆n gô lôch hiong đĕch.

²²Mă-lei dang ei iĕm rơngei boih đơ̆ng tơdrong yoch, jing đĭch 'Bok Kei-Dei. Iĕm đĭch dang ei noh pơyua iĕm jing bơngai 'lơ̆ng tơpăt gơh arih ling-lang.

²³Bu jang chă tơdrong yoch, apah sư tơdrong lôch. Mă-lei gah lu bơ̆n, dang ei 'Bok Kei-Dei ăn đĕch kơ bơ̆n arih ling-lang yua kơ bơ̆n lui kơ Kră Yang bơ̆n Yêsu Krist.