Read bahnar Rom 7 Bible Online

Rom 7 - bahnar bible

Rom 7

¹Ơ lu 'nhŏng oh, iĕm kư̆m băt boih gah tơdrong pơm kiơ̆ tơdrong juăt, kon bơngai bơ̆n pơm kiơ̆ tơdrong juăt kơplah bơ̆n oei arih đĕch, mưh lôch boih bơ̆n ưh pă gơh kiơ̆ dơ̆ng.

²Na kiơ̆ kơ tơdrong juăt bơ̆n hmă khan, dah bơngai drŏ-kăn đei klo, sư athei oei kơ klo sư truh tơ klo sư lôch, sư ưh pă tơchĕng kơ tơdrong juăt hli kơ pơm yoch kơ klo sư dơ̆ng boih.

³Na dah klo sư oei arih, akăn sư iŏk klo nai, sư noh kơđang kơ̆l ako 'brơh kơ klo sư. Mă-lei dah klo sư lôch boih, sư ưh pă hli kơ tơdrong juăt dơ̆ng boih păng mă sư iŏk klo nai đe kư̆m huay pă jô̆ kơ sư pơm yoch boih.

⁴Ơ 'nhŏng oh, tơdrong noh wă pơtih gia kơ bơ̆n dang bơ̆n lôch kiơ̆ Yêsu tơ 'long pơglang sơ̆ boih, na bơ̆n huay pă wă gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă dơ̆ng ôh. Yua kơ dang bơ̆n iŏk bơngai nai boih, wă khan bơ̆n iŏk Yêsu Krist mă 'Bok Kei-Dei tơiung arih đơ̆ng lôch. Dang ei bơ̆n jang tơdrong Sư dang bơ̆n pơyua 'Bok Kei-Dei boih.

⁵Hơdrol sơ̆ bơ̆n oei kiơ̆ kơ akâu bơ̆n kơdih, na 'maih pơm tôm tơdrong yoch. Bơ̆n băt kơ tơdrong juăt 'Bok Kei-Dei pơkă noh khă kuă ăn bơ̆n pơm yoch ră, mă-lei bơ̆n oei pơm yoch rai dêh khŏm khŏm truh tơ lôch.

⁶Mă-lei dang ei bơ̆n dang lôch kiơ̆ Yêsu Krist na bơ̆n ưh pă kăl gơnang kơ akâu bơ̆n kơdih wă kiơ̆ tơdrong juăt 'Bok Kei-Dei pơkă sơ̆. Yua kơ thoi noh na bơ̆n athei lui yom kơ 'Bok Kei-Dei, ưh pă gơnang akâu kơdih wă kiơ̆ tơdrong so mă Môis chih pơkă sơ̆, bơ̆n kiơ̆ kơ tơdrong arih 'nao đơ̆ng Yang Bơhngol 'Lơ̆ng ăn.

⁷Mă-lei iĕm 'nĕ tơchĕng khan inh jô̆ kơ tơdrong juăt 'Bok Kei-Dei pơkă ưh kơ 'lơ̆ng, ưh ôh hŏ. Tơdrong juăt 'Bok Kei-Dei pơkă 'lơ̆ng tơpă. Sư tơbăt ăn kơ bơ̆n đei tơdrong yoch. Tơ̆ng bơ̆n ưh kơ đei tơdrong juăt 'Bok Kei-Dei pơkă, lei bơ̆n ưh kơ băt bơ̆n đei tơdrong yoch ôh. Pơtih gia kơ akâu inh kơdih thoi âu: Sơ̆ inh ưh kơ băt kơ tơdrong juăt 'Bok Kei-Dei khă kuă ăn bơ̆n 'nhĕng mŭk tơmam đe, mưh 'nhĕng jing yoch tơpă; na inh ưh kơ băt kơ tơdrong 'nhĕng noh yoch.

⁸Lăp inh băt, inh 'nhĕng rai dêh, đơ̆ng 'bơ̆t noh boih inh băt kơ inh kơdih pơm yoch. Dah bơ̆n ưh kơ băt kơ tơdrong juăt khă bơ̆n pơm yoch, lei bơ̆n dă 'biơ̆ kơ pơm yoch.

⁹Sơ̆ kơplah inh tam mă băt kơ tơdrong yoch, inh oei hiôk; lăp đơ̆ng năr inh băt kơ tơdrong pơm yoch, jơhngơ̆m inh ưh pă hiôk boih, inh băt kơ inh trŏ kơ 'Bok Kei-Dei wă phak pơlôch.

¹⁰Mă-lei 'Bok Kei-Dei pơkă kơ bơ̆n tơdrong juăt noh sơ̆ wă kơ bơ̆n oei arih hiôk ră, mă-lei tơdrong juăt noh wă ăn kơ inh lôch.

¹¹Inh ngêh kơ tơdrong juăt 'Bok Kei-Dei pơkă noh sơ̆ wă ăn kơ inh arih hiôk, na 'nâu khan rai tơbăt kơ inh bơngai yoch trŏ kơ wă lôch răm. 'Noh yua kơ tơdrong kơnê̆ oei lăm jơhngơ̆m inh pơm kơ inh yoch.

¹²Dôm tơdrong mă 'Bok Kei-Dei pơkă, tơdrong 'lơ̆ng, tơdrong trŏ tơpă.

¹³Na ưh kơ sĭ tơdrong juăt 'Bok Kei-Dei pơkă mă 'lơ̆ng noh pơm kơ inh trŏ kơ wă lôch răm ôh. Tơdrong juăt 'Bok Kei-Dei tơbăt kơ inh bơngai yoch, mă inh yoch noh yua kơ tơdrong kơnê̆ oei lăm jơhngơ̆m inh, sư pơm kơ inh yoch kơ tơdrong juăt 'Bok Kei-Dei pơkă na trŏ kơ lôch răm. Thoi noh bơ̆n băt boih tơdrong kơnê̆ oei lăm jơhngơ̆m bơ̆n kơnê̆ tơpă.

¹⁴Bơ̆n băt mơ̆n tơdrong juăt 'Bok Kei-Dei pơkă trŏ tơpă; na kiơ̆ thoi inh bơngai tơrăn ưh kơ kĕ kiơ̆ tơdrong juăt noh, na jing đĭch kơ tơdrong yoch inh tơpă.

¹⁵Na inh đĭ pă hiôk boih, đon hơdơ̆r 'bơ̆r apơi wă kơ pơm 'lơ̆ng ngăl ră, mă-lei ưh kơ pơm; kuă kơ pơm yoch ră mă-lei oei pơm.

¹⁶Inh băt dôm tơdrong juăt 'Bok Kei-Dei pơkă trŏ tơpă, rŏ kuă kơ pơm yoch mă-lei oei pơm.

¹⁷'Noh ưh kơ sĭ inh wă pơm yoch ôh, inh pơm yoch yua kơ đei tơdrong kơnê̆ oei lăm jơhngơ̆m, pơm kơ inh yoch.

¹⁸Na dang ei inh băt boih tơdrong 'lơ̆ng hoh-hoy kơ oei lăm inh hơya tŏ sĕt, tă ling kơnê̆ ngăl. Kiơ̆ kơ đon hơdơ̆r 'bơ̆r apơi wă kơ pơm 'lơ̆ng ngăl ră, mă-lei ưh kơ kĕ.

¹⁹Rŏ kơ kĕ, mă-lei oei ưh.

²⁰Kuă ră, oei pơm, noh inh băt tơpă ưh kơ sĭ inh pơrơ̆ng ôh, yua kơ tơdrong kơnê̆ oei lăm jơhngơ̆m inh tih dêh, na inh oei pơm oei pơm.

²¹Tơdrong pơm 'lơ̆ng, inh tôch adrin adran ră boih, oei ưh kơ kĕ 'mơ̆i, chu pơm yoch hơnơ̆ng.

²²Jơhngơ̆m klơm klak inh 'maih kiơ̆ tôm tơdrong juăt 'Bok Kei-Dei pơkă ră.

²³Mă-lei tơdrong kơnê̆ lăm akâu inh pơgăn, tơdrong kơnê̆ noh rôp pơgŏ inh, wă kơ inh pơm yoch.

²⁴Na inh âu boih bơngai ưh kơ yua tơpă, tơdrong kơnê̆ 'bĕnh kơ akâu ling-lang, na inh wă lôch đĕch boih. Dang ei bu gơh dŏng inh âu?

²⁵Jơhngơ̆m klơm klak inh 'maih kiơ̆ tôm tơdrong juăt 'Bok Kei-Dei pơkă ră, mă-lei ưh kơ kĕ, đĭ jing đĭch tơdrong kơnê̆. Na dang ei inh bơnê kơ 'Bok Kei-Dei mơnat kơ inh, đơ̆ng tơdrong kơnê̆ 'noh pơklaih ăn kơ inh rơngei boih. Păng inh bơnê kơ Kră Yang Yêsu Krist kư̆m tơgŭm inh mơ̆n.