Read bahnar I Kor 12 Bible Online

I Kor 12 - bahnar bible

I Kor 12

¹Ơ 'nhŏng oh, dang ei inh wă roi ăn kơ iĕm mă nhên gah tơdrong hơgei Yang Bơhngol 'Lơ̆ng ăn kơ bơ̆n wă jang tơdrong 'Bok Kei-Dei.

²Iĕm kư̆m băt mơ̆n hơtai iĕm tam mă lui kơ 'Bok Kei-Dei sơ̆, iĕm ling-lang gô mơ̆ng kơ đe dui ba iĕm kơkuh kơ rup yang mă ưh kơ gơh pơma.

³Na inh wă roi ăn kơ iĕm dang ei thoi âu: Bơngai bu gơnang kơ Yang Bơhngol 'Lơ̆ng tơgŭm ăn kơ Sư pơma, bơngai 'noh sư ưh kơ đei layơ wă pơjăm pơjuă Yêsu ôh. Păng dôm lu bơngai mă krao Yêsu Kră Yang sư, sư pơma thoi noh yua kơ Yang Bơhngol 'Lơ̆ng bơtho sư pơma thoi noh. Bơngai bu ưh kơ đei Yang Bơhngol 'Lơ̆ng, bơngai 'noh sư ưh kơ đei layơ pơma thoi noh ôh.

⁴Yang Bơhngol 'Lơ̆ng ăn kơ bơ̆n lơ tơdrong hơgei wă kơ gơh jang tơdrong Sư, mă-lei dôm tơdrong 'noh đơ̆ng lăp minh 'nu Sư đĕch ăn kơ bơ̆n.

⁵Rim 'nu kơ bơ̆n đei phara tơdrong jang, mă rim tơdrong jang bơ̆n tă jang tơdrong Kră Yang Yêsu Krist ngăl.

⁶'Bok Kei-Dei ăn kơ Yang Bơhngol 'Lơ̆ng Sư gơh tơgŭm bơ̆n phara tơdrong hơgei, mă-lei lăp minh 'nu 'Bok Kei-Dei đĕch gơh tơgŭm đĭ-đăng kơ bơ̆n lăm tôm tơdrong.

⁷Yang Bơhngol 'Lơ̆ng tơgŭm rim 'nu bơngai wă jang tơdrong Sư, wă kơ bơ̆n gơh tơgŭm dih băl dơ̆ng.

⁸Yang Bơhngol 'Lơ̆ng ăn kơ bơngai âu đon hơgei wă kơ năm chă bơtho tơdrong 'Bok Kei-Dei; Sư kư̆m ăn kơ bơngai to hlôh wao tôm tơdrong 'Bok Kei-Dei wă kơ gơh năm chă bơtho đe mơ̆n.

⁹Sư ăn kơ bơngai 'nâu đei đon lui kơjăp păng Sư kư̆m ăn kơ bơngai to gơh pơklaih bơngai jĭ jăn.

¹⁰Sư ăn kơ bơngai âu gơh pơm tơdrong mơsêh; Sư ăn kơ bơngai to gơh pơtruh nơ̆r 'Bok Kei-Dei. Sư kư̆m ăn kơ bơngai mơ'nah băt kơnăl kơ bơngai bu pơma yua kơ Yang Bơhngol 'Lơ̆ng tơgŭm, bơngai bu ưh. Sư kư̆m đei ăn kơ bơngai mơ'nah gơh pơma nơ̆r hlĭch mă ưh kơ tam băt đơ̆ng sơ̆; Sư kư̆m ăn kơ bơngai nai gơh hlôh nơ̆r 'noh wă kơ tơblơ̆ ăn kơ đe.

¹¹Đei minh 'nu Yang Bơhngol 'Lơ̆ng đĕch ăn kơ bơ̆n tôm tơdrong hơgei 'noh, Sư asong kơ rim 'nu bơngai bu kiơ̆ kơ Sư wă.

¹²Akâu jăn kon bơngai bơ̆n đei lơ chăl, mă-lei hơdôm tŏ chăl 'noh pơjing kơ minh 'nu bơngai đĕch, thoi noh boih na đĭ-đăng lu bơ̆n bơngai lui kơ Yêsu Krist kư̆m lei-lăi thoi noh mơ̆n, bơ̆n jing minh jơhngơ̆m minh đon akŭm păng Yêsu Krist.

¹³Na đĭ rim khŭl bơngai, bơngai Juđê, bơngai khŭl nai, mă bơngai đĭch đe, mă bơngai rơngei, dah bơ̆n lui kơ Yêsu Krist, Yang Bơhngol 'Lơ̆ng pơm 'batem kơ bơ̆n pơgơ̆p bơ̆n jing minh jơhngơ̆m minh đon dih băl. Sư minh 'nu đĕch, mă-lei đĭ-đăng kơ bơ̆n iŏk Sư.

¹⁴Akâu jăn kon bơngai bơ̆n ưh kơ sĭ minh chăl đĕch ôh, đei lơ chăl tơpă.

¹⁵Pơtih gia jơ̆ng bơ̆n pơma khan: “Kơlih kơ inh ưh kơ yua thoi ti, na inh kư̆m dang ưh pă yua kơ akâu.” 'Bơ̆r sư pơma thoi noh ră, mă-lei sư ưh kơ gơh achăng tŭk akâu ôh.

¹⁶Dah đon bơ̆n dơ̆ng khan: “Kơlih kơ inh ưh kơ yua thoi măt, na inh kư̆m dang lĕ pă yua kơ akâu.” Sư khan thoi noh ră, mă-lei sư ưh kơ gơh achăng tŭk akâu ôh.

¹⁷Pơtih gia dah 'Bok Kei-Dei pơjing akâu bơ̆n đei pôm klong măt đĕch, lei thoi yơ bơ̆n gơh kơtơ̆ng tôm tơdrong re? Dah akâu bơ̆n đei pôm đon đĕch lu nai ưh kơ đei, lei thoi yơ bơ̆n gơh băt kơ 'bâu?

¹⁸Kơlih kơ thoi noh na 'Bok Kei-Dei pơjing akâu bơ̆n đei lơ chăl phara kơdih kơdih kiơ̆ thoi Sư wă.

¹⁹Dah Sư pơjing akâu bơ̆n lăp minh chăl đĕch lei akâu bơ̆n ưh kơ tôm ôh.

²⁰Sư pơjing ăn kơ bơ̆n lăp minh pôm akâu, mă-lei mă minh pôm akâu 'noh đei lơ chăl.

²¹Kơlih kơ thoi noh na măt bơ̆n ưh kơ đei layơ wă khan kơ ti bơ̆n khan: “Inh ưh kơ kăl kơ e ôh.” Kơ̆l bơ̆n kư̆m ưh kơ đei layơ wă khan kơ jơ̆ng bơ̆n khan: “Inh ưh kơ kăl kơ e ôh.”

²²Dôm chăl lăm akâu bơ̆n mă bơ̆n lăng ưh kơ gan kăl ră mă-lei bơ̆n kư̆m kăl yua kơ sư mơ̆n.

²³Dôm chăl lăm akâu bơ̆n mă bơ̆n lăng ưh kơ 'lơ̆ng, bơ̆n athei wei-lăng sư, pơhrŭk kơ sư hơbĕn ao mă 'lơ̆ng hloh kơ lu chăl nai.

²⁴Mă-lei dôm lu chăl nai bơ̆n lăng sư 'lơ̆ng rŏ bơ̆n huay kăl kơ pơhrŭk kơ sư hơbĕn ao. 'Bok Kei-Dei boih pơjing akâu jăn bơ̆n thoi noh wă kơ bơ̆n wei-lăng mă 'lơ̆ng 'biơ̆ dôm lu chăl mă bơ̆n lăng ưh kơ gan 'lơ̆ng rŏ.

²⁵Thoi noh lăm akâu bơ̆n ưh kơ đei tơdrong tơklah băl ôh, yua kơ dôm lu chăl akâu bơ̆n gơh wei-lăng tơgŭm dih băl ngăl.

²⁶Dah akâu bơ̆n minh chăl sư jĭ, lei jơ̆p kơ akâu bơ̆n kư̆m jĭ mơ̆n. Dah đe ư-ang kơ minh chăl akâu bơ̆n 'lơ̆ng rŏ, lei jơ̆p kơ trôm akâu bơ̆n kư̆m lăp đon mơ̆n.

²⁷Akâu bơ̆n noh wă pơtih gia kơ dôm lu bơngai mă pơgơ̆p minh jơhngơ̆m minh đon hăm Yêsu Krist, na rim kơ chăl noh pơgơ̆p jing minh pôm akâu bơngai đĕch.

²⁸'Bok Kei-Dei asong kơ lu bơngai lui tôm kơ bơngai jang kiơ̆ thoi âu: Mă mônh 'Bok Kei-Dei ăn bơngai pơm jơ̆ng 'bang Yêsu; mă 'bar Sư ăn bơngai pơtruh nơ̆r Sư; mă pêng Sư ăn bơngai bơtho tơdrong Sư; klaih kơ noh Sư ăn bơngai gơh pơm tơdrong mơsêh, bơngai gơh pơklaih đe jĭ jăn, đei bơngai gơh tơgŭm đe, đei bơngai gơh wei-lăng đe; Sư ăn kơ bơngai mơ'nah gơh pơma nơ̆r hlĭch wă ư-ang kơ 'Bok Kei-Dei.

²⁹Mă-lei đĭ-đăng kơ bơ̆n ưh kơ sĭ pơm jơ̆ng 'bang Yêsu ngăl ôh; đĭ-đăng kơ bơ̆n ưh kơ sĭ bơngai pơtruh nơ̆r 'Bok Kei-Dei dah thây bơtho tơdrong 'Bok Kei-Dei ngăl ôh; đĭ-đăng kơ bơ̆n ưh kơ gơh pơm tơdrong mơsêh ngăl ôh,

³⁰dah pơklaih bơngai jĭ jăn, dah pơma nơ̆r hlĭch kơ bôl, dah tơblơ̆ ăn kơ đe nơ̆r mă hlĭch 'noh ngăl ôh. 'Bok Kei-Dei ăn kơ bơngai mơ'nah gơh jang tơdrong âu mơ'nah gơh jang tơdrong to.

³¹Thoi noh lăm dôm tơdrong jang 'noh, bơ̆n athei apinh 'Bok Kei-Dei ăn kơ bơ̆n tơdrong jang mă kăl yua 'biơ̆. Mă-lei dang ei inh wă bơtho iĕm gah tơdrong mă kăl tơpă.