Read bahnar I Kor 14 Bible Online

I Kor 14 - bahnar bible

I Kor 14

¹Na bơ̆n ling-lang athei băt 'mêm kơ 'Bok Kei-Dei hăm bôl buăl bơ̆n păng bơ̆n athei apinh Yang Bơhngol 'Lơ̆ng asong kơ bơ̆n tơdrong hơgei Sư, mă loi gơh pơtruh nơ̆r 'Bok Kei-Dei.

²Bơ̆n 'bôh đe bu ư-ang kơ 'Bok Kei-Dei hăm nơ̆r hlĭch mă bơ̆n tam mă kơtơ̆ng păng ưh kơ hlôh, 'noh lu sư pơma ư-ang kơ 'Bok Kei-Dei, ưh kơ sĭ lu sư pơma kơ lu bơ̆n kon bơngai ôh. Tơdrong pơma nơ̆r hlĭch noh đơ̆ng Yang Bơhngol 'Lơ̆ng tơbăt kơ lu sư.

³Mă-lei gah lu bơngai mă pơtruh nơ̆r 'Bok Kei-Dei, sư bơtho tơblơ̆ tơblang kơ kon bơngai bơ̆n wă kơ hlôh na jing lui kơjăp hiôk huay pă ơh sơ'ngon.

⁴Bơngai mă ư-ang kơ Kră Yang pơma nơ̆r hlĭch, sư atŏk jơhngơ̆m lui sư kơdih đĕch, sư ưh kơ atŏk jơhngơ̆m bôl lui ôh. Mă-lei bơngai mă pơtruh nơ̆r 'Bok Kei-Dei, sư pơhiôk atŏk jơhngơ̆m lui bôl.

⁵Bơngai mă ư-ang kơ Kră Yang pơhiôk akâu sư kơdih noh, inh kư̆m wă kơ iĕm gơh rok sư mơ̆n, mă-lei iĕm athei pơtruh ăn kơ đe tơdrong 'Bok Kei-Dei 'noh kăl hloh kơ tơdrong pơhiôk akâu kơdih. Mă-lei dah bơngai mă ư-ang kơ 'Bok Kei-Dei gơh pơma nơ̆r hlĭch 'noh gơh tơblang kơ lu bôl lui lei kư̆m kăl mơ̆n, yua kơ sư gơh pơhiôk atŏk ăn kơ jơhngơ̆m lui bôl.

⁶Ơ 'nhŏng oh, dah inh năm chă hơpong kơ iĕm na inh nŏng pơma ư-ang kơ 'Bok Kei-Dei păng nơ̆r hlĭch mă iĕm ưh kơ hlôh, tơdrong inh ư-ang noh ưh kơ yua kiơ kơ iĕm ôh. Mă-lei dah inh bơtho tơblơ̆ tơblang ăn kơ iĕm tơdrong 'Bok Kei-Dei mă iĕm tam mă hlôh đơ̆ng sơ̆, lei akâu inh yua kơ iĕm tơpă.

⁷Pơtih gia tơdrong bơ̆n hlôm tơgiĕp dah reh brŏ, tơdah bơ̆n hlôm dah reh na re atŏ hloi, lei ưh kơ đei bu băt bơ̆n wă hlôm dah reh tơdrong kiơ ôh.

⁸Pơtih gia kơ khŭl linh tơblah, tơdah bơngai mă chĕp keng hlôm ưh kơ tơdra kơ đe nai băt, lei thoi yơ bôl gơh kơchăng kơ tơdrong tơblah?

⁹Tơdrong pơma nơ̆r hlĭch kư̆m thoi noh mơ̆n, tơdah bơ̆n nŏng kơ pơma mă-lei đe nai ưh kơ hlôh minh tơdrong kiơ, thoi yơ gơh yua kơ bôl?

¹⁰Đei lơ bơngai tơ ala teh âu pơma nơ̆r phara, rim nơ̆r pơma sư hlôh kơdih kơdih.

¹¹Mă-lei dah bơ̆n tơ'bơ̆p bơngai tơmoi pơma nơ̆r pha kơ bơ̆n, bơ̆n ưh kơ hlôh nơ̆r sư pơma, bơ̆n lăng sư bơngai tơmoi đĕch păng sư lăng bơ̆n kư̆m lei-lăi.

¹²Yua kơ thoi noh na inh wă khan kơ iĕm thoi âu: Iĕm wă tơpă mơ̆n kơ Yang Bơhngol 'Lơ̆ng tơgŭm iĕm hơgei tôm tơdrong, mă-lei iĕm athei apinh tơdrong hơgei gơh tơgŭm kơ bơ̆n bơngai lui.

¹³Thoi noh na bơngai mă Yang Bơhngol 'Lơ̆ng tơgŭm sư gơh pơma nơ̆r hlĭch ư-ang kơ 'Bok Kei-Dei 'noh, sư athei krao khan apinh 'Bok Kei-Dei tơgŭm sư hơgei hlôh tôm tơdrong sư pơma nơ̆r hlĭch 'noh 'mơ̆i, na sư gơh tơblang ăn kơ lu bơngai lui.

¹⁴Phŏ bơ̆n gơh pơma krao khan nơ̆r hlĭch pơhiôk lăm jơhngơ̆m kơdih, mă-lei bơ̆n ưh kơ hlôh tơdrong bơ̆n pơma noh wă khan kiơ, bơ̆n kư̆m bơnê kơ 'Bok Kei-Dei lăm jơhngơ̆m bơ̆n mơ̆n, mă-lei đon bơ̆n ưh kơ hlôh wao.

¹⁵Bơ̆n tơchĕng thoi yơ wă kơ trŏ lei? Inh wă kơ bơ̆n krao khan pơhiôk lăm jơhngơ̆m kơdih păng inh wă kơ bơ̆n krao khan gơh hlôh wao tơdrong bơ̆n krao khan. Inh wă kơ bơ̆n hơri bơnê kơ 'Bok Kei-Dei pơhiôk lăm jơhngơ̆m kơdih păng inh wă kơ bơ̆n hơri kư̆m hlôh tơdrong bơ̆n hơri mơ̆n.

¹⁶Dah bu krao khan bơnê kơ 'Bok Kei-Dei yua nơ̆r hlĭch pơhiôk lăm jơhngơ̆m sư kơdih đĕch, lei thoi yơ bôl bơ̆n mă ưh kơ hlôh hơdai wang bơnê kơ 'Bok Kei-Dei tơdrong sư ưh kơ hlôh?

¹⁷Tơdrong bơ̆n krao khan bơnê kơ 'Bok Kei-Dei thoi noh 'lơ̆ng ră mơ̆n, mă-lei ưh kơ yua kơ bôl.

¹⁸Inh bơnê kơ 'Bok Kei-Dei Sư ăn kơ inh gơh pơma nơ̆r hlĭch lơ hloh kơ iĕm.

¹⁹Mă-lei kơplah bơ̆n akŭm inh ưh kơ wă ôh pơma nơ̆r hlĭch. Inh pơma kiơ̆ kơ nơ̆r bôl băt lăp pơđăm tŏ plei đĕch kư̆m dang lĕ hloh loi kơ mơjĭt-rơbâu nơ̆r hlĭch mă inh gơh pơma 'noh.

²⁰Ơ 'nhŏng oh, gah tơdrong iĕm 'maih pơma nơ̆r hlĭch, iĕm athei tơchĕng kiơ̆ đon kră, 'nĕ pă kiơ̆ thoi đon bơngai nge. Bơ̆n băt kơ lu bơngai nge ưh kơ gơh pơm kơnê̆ kơ đe, dah bơ̆n kiơ̆ thoi noh 'lơ̆ng mơ̆n, mă-lei bơ̆n 'nĕ kơ kiơ̆ kơ đon sư tơchĕng, yua kơ sư ưh kơ hlôh ôh.

²¹Lăm sơ̆p hla bơar 'Bok Kei-Dei khan boih thoi âu: “Inh wơh lu bơngai tơmoi yua nơ̆r lu sư kơdih bơtho pơđep lu bơngai Isơrael tơgŭm inh, mă-lei lu bơngai Isơrael kư̆m ưh kơ chu 'mơ̆i.”

²²Thoi noh na 'Bok Kei-Dei yua nơ̆r hlĭch wă tơbăt ăn tơdrong Sư wă phak kơ lu bơngai mă mơ̆ng đunh boih mă ưh kơ chu lui kơ nơ̆r Sư. Gah lu bơngai chu lui kơ nơ̆r Sư, ưh kơ kăl kơ đe pơma tơbăt ăn tơdrong 'Bok Kei-Dei wă phak ôh, lu sư kăl pôm lu bơngai pơtruh nơ̆r 'Bok Kei-Dei đĕch; mă-lei ưh kơ sĭ pơtruh kơ lu bơngai mă kuă kơ lui ôh, pơtruh kơ lu bơngai mă lui boih.

²³Pơtih gia thoi âu dơ̆ng: Dah kơplah iĕm oei akŭm băl, na đĭ-đăng kơ iĕm pơma hloi nơ̆r hlĭch, lu bơngai mă ưh tam kơtơ̆ng tơdrong 'Bok Kei-Dei, lu bơngai mă ưh tam lui, lu sư 'bôh tơdrong iĕm pơma nơ̆r hlĭch 'noh lu sư khan iĕm wơnh đĕch hăm trŏ?

²⁴Mă-lei dah lu sư mơ̆ng đĭ kơ iĕm pơtruh nơ̆r 'Bok Kei-Dei, lei lu sư kư̆m băt kơdih bơngai yoch, yua kơ đĭ-đăng kơ iĕm tơbăt kơ lu sư mă nhên.

²⁵Păng dah lu sư băt kơdih bơngai yoch tih dang yơ, lu sư kư̆m sơtơ̆p kŭl-tăng kơkuh hli kơ 'Bok Kei-Dei mơ̆n păng lu sư kư̆m băt kơ iĕm bơngai 'Bok Kei-Dei tơgŭm.

²⁶Ơ 'nhŏng oh, iĕm băt tơdrong inh pơma hei thoi noh boih, na iĕm wă pơđâu băl thoi yơ dơ̆ng gah tơdrong iĕm wă akŭm? Kơplah iĕm akŭm, bơngai âu sư wă hơri bơnê kơ 'Bok Kei-Dei, bơngai noh sư wă bơtho, bơngai to sư wă pơtruh nơ̆r đơ̆ng 'Bok Kei-Dei, bơngai nai wă pơma nơ̆r hlĭch ư-ang kơ 'Bok Kei-Dei, bơngai nai dơ̆ng wă tơblơ̆ tơdrong pơma nơ̆r hlĭch. Mă-lei dôm tơdrong iĕm pơm noh inh athei iĕm pơm mă trŏ wă atŏk jơhngơ̆m bôl buăl bơngai lui.

²⁷Dah iĕm wă kơ bơngai mă gơh pơma nơ̆r hlĭch ư-ang kơ 'Bok Kei-Dei iung pơma kơ iĕm, lei iĕm athei ăn lăp 'bar 'nu dah pêng 'nu đĕch păng sư athei pơma bơlơh băl mơ-minh 'nu, ưh kơ gơh iung pơma minh 'măng hơdai hloi ôh. Păng athei đei bơngai mă gơh tơblơ̆ nơ̆r hlĭch sư pơma noh mơ̆n.

²⁸Dah ưh kơ đei bơngai gơh tơblơ̆ nơ̆r hlĭch noh, iĕm 'nĕ kơ ăn sư pơma kơ iĕm nơ̆r noh hŏ, iĕm athei sư krao khan kơdrô̆ sư kơ 'Bok Kei-Dei đĕch.

²⁹Gah lu bơngai pơtruh kơ iĕm nơ̆r 'Bok Kei-Dei, iĕm athei lu sư bơtho lăp 'bar 'nu dah pêng 'nu păng ăn kơ tơduă lu sư bơngai pơtruh nơ̆r 'Bok Kei-Dei tơchĕng tơdrong bơngai mă dơ̆ng bơtho noh hăm 'blep trŏ kơ tơdrong 'Bok Kei-Dei tơpă dah ưh.

³⁰Kơplah bôl sư oei bơtho, dah 'Bok Kei-Dei tơbăt dơ̆ng kơ bôl sư nai tơdrong kiơ wă pơma, bơngai mă pơma hơdrol noh sư athei krŏt mơ̆ng kơ bôl sư pơma dơ̆ng 'mơ̆i.

³¹Lu iĕm bơngai mă 'Bok Kei-Dei rơih wă pơtruh nơ̆r Sư kơ bôl buăl, đĭ-đăng kơ iĕm gơh bơtho mơ̆n, mă-lei iĕm athei iung pơma bơlơh băl mơ-minh 'nu, thoi noh na đĭ-đăng kơ bôl gơh băt nhên tơdrong 'Bok Kei-Dei na jing hiôk chơt.

³²Bơngai mă pơtruh nơ̆r 'Bok Kei-Dei, dah 'Bok Kei-Dei tơbăt ăn kơ sư tơdrong kiơ wă pơtruh ăn kơ bơngai lui, bơngai noh kư̆m gơh gô bôl bơtho đang 'mơ̆i na sư gơh iung pơma kơ đe,

³³yua kơ 'Bok Kei-Dei ưh kơ wă kơ bơ̆n akŭm kư̆ kă ôh, Sư wă kơ bơ̆n akŭm 'blep trŏ thoi Sư wă.

³⁴Lăm iĕm akŭm, lu bơngai drŏ-kăn athei hreh ưh kơ gơh iung pơma. Lu bơngai lui mă akŭm jơ̆p-jang anih kư̆m pơm thoi noh mơ̆n. Lu bơngai drŏ-kăn athei lui yom kơ bơngai drŏ-nglo kư̆m thoi tơdrong 'Bok Kei-Dei pơkă.

³⁵Dah lu bơngai drŏ-kăn ưh kơ hlôh tơdrong kiơ kiơ na wă jet đe, sư athei jet klo sư 'bơ̆t brŏk tơ hnam kơnh đĕch, 'nĕ kơ jet kơplah oei akŭm. Bơngai drŏ-kăn pơma kơplah iĕm akŭm ưh kơ 'lơ̆ng ôh.

³⁶Iĕm khan iĕm pơm tơm tơdrong bơtho nơ̆r 'Bok Kei-Dei hă? 'Bok Kei-Dei wă tơbăt kơ pôm iĕm đĕch tơdrong Sư dah kiơ? Ưh ôh.

³⁷Bơngai bu băt kơdih sư khan sư bơngai pơtruh tơdrong 'Bok Kei-Dei kơ đe păng lu bơngai bu nai khan sư đei Yang Bơhngol 'Lơ̆ng tơgŭm sư hơgei gơh pơm tơdrong kiơ kiơ, lu bơngai noh sư athei băt tôm tơdrong inh chih ată đơ̆ng Yêsu Krist tơpă yơh.

³⁸Dah bơngai bu lăm lu iĕm ưh kơ băt kơ inh chih ată tơdrong 'Bok Kei-Dei kơ iĕm tơpă, lei 'Bok Kei-Dei kư̆m ưh kơ băt kơ bơngai noh lui kơ Sư ôh.

³⁹Ơ 'nhŏng oh, iĕm athei krao khan apinh 'Bok Kei-Dei ăn kơ iĕm gơh pơtruh nơ̆r Sư ling-lang. Tơdrong lu bôl pơma nơ̆r hlĭch noh iĕm 'nĕ mah khă sư dêh hŏ.

⁴⁰Mă-lei iĕm athei akŭm 'blep trŏ thoi Kră Yang wă, 'nĕ pă akŭm kư̆ kă.